Kulvi Outer Seraji Bible
मूल़ 46
याकब डेऊअ मिसर देशा लै
इज़राईल लागअ आपणीं सारी ज़ैदात संघा लई मिसर देशा लै हांढदअ। बाता बेर्शेबा नगरी नेल़ पुजी किअ तिन्नैं बशैघ। तिधी दैनी तिन्नैं तेऊ बिधाता लै कई बल़ीदान ज़सरी च़ाकरी इसहाक करा त।
तैहा बैल़ी किई बिधाता धैनै-सुपनै इज़राईला संघै गल्ला, संघा बोलअ इहअ, “याकब, याकब।”
याकबै बोलअ, “किज़ै बोला मेरै मालक?”
परमेशरै बोलअ, “हुंह आसा सह परमेशर ज़हा तेरअ बाब मना त। तूह निं लागी डरदअ, तूह लाग मिसर देशा लै डेऊंदअ। मुंह दैणीं ताल्है खास्सी आद-लुआद अर तिन्नों बणनअ एक बडअ देश।
“हुंह एछूं ताह संघै आप्पू उंधै मिसर देशा लै, बादा का आणनैं मुंह तेरै आद-लुआद इधा लै बापस फरेऊई। ज़ेभै तेरी मौत हणीं, तेभै हणअ तेरअ शोहरू युसुफ ताह सेटा तिधी।”
इज़राईल लागअ बेर्शेबा का आजू हांढदअ। तेऊए शोहरू बशैल़अ सह होछ़ै रथा दी ज़ुंण मिसर देशे माहा राज़ै थिऐ दैनै दै। होछ़ै लान्हैं अर बेटल़ी बी बशैल़ै तिन्नैं ज़ुदै-ज़ुदै रथा दी। याकबे डेऊऐ सोभै शोहरू, पोचै अर शोहरी-नुशा संघी सारै टबर कनान देशा का मिसर देशा लै। तिन्नैं निंईं आपणीं डागै-चैणैं अर सारी ज़ैदात आप्पू संघै।1
मिसर देशै याकबे सारै टबर
ज़धू इज़राईल मिसर देशा लै डेऊअ, तेऊ संघै डेऊऐ तेऊए शोहरू अर पोचै बी मिसर देशा लै ज़ुंण कनान देशै हुऐ तै।
याकब अर तेऊए लाल़ी लिआ का थिऐ शोहरू, पोचै अर पल़पोचै संघी पठी तेत्ती ज़ण्हैं पर दूई पोचै गऐ तै तिन्नें कनान देशै ज़ांऐं गछ़ी।
सोभी का ज़ेठअ थिअ रूबेन। तेऊ निंयैं आप्पू संघै आपणैं शोहरू हणोक, पालू, हिस्रोन अर कर्मीं।
शमौनै निंयैं आपणैं शोहरू यमूएल, ज़ामन, ओहाद, जाकीन, सोहार अर शाऊल ज़सरी ईज कनानी थिई।
तिन्नें शोहरू लेबी निंयैं आप्पू संघै आपणैं शोहरू गर्शोन, कहात अर मरारी।
यहूदा निंयैं आपणैं शोहरू शेलाह, फिरिस, जेराह। यहूदे तै एर अर ओनान दूई होर शोहरू बी तिंयां गऐ तै कनान देशै रहंदी ज़ांऐं गछ़ी। यहूदे शोहरू फिरिसै निंयैं आप्पू संघै आपणैं शोहरू हेज़्रोन अर हामल।
इस्साकारै निंयैं आप्पू संघै आपणैं शोहरू तोला, पुबा, एलोन अर शिम्रोन।
ज़बलूनै निंयैं आप्पू संघै आपणैं शोहरू सेरेद, एलोन अर जहलेल।
तिन्नें ती एक शोहरी बी तैहा नाअं थिअ दीना, सह बी डेऊई तिन्नां सोभी संघै मिसर देशा लै।
ज़िल्पा ज़ुंण दासी लाबानै आपणीं शोहरी लिआ लै दैनी ती, याकब अर तैहा का थिऐ आजू पठी शोहरू, पोचै अर पल़पोचै संघी सोल़ा आद-लुआद।
तिन्नें शोहरू गादै निंयैं आप्पू संघै आपणैं शोहरू सपोन, हगाई, शूनी, एसबोन, एरी, अरोदी अर अरेली।
आशेरै निंयैं आप्पू संघै आपणैं शोहरू इमना, इशबा, ईशबी, अर बरीया अर शोहरी सेराह।
बरीया निंयैं आप्पू संघै आपणैं शोहरू हेबेर अर मोल्कीएल।
याकब अर राहेले थिऐ शोहरू अर पोचै पठी च़ौदा ज़ण्हैं।
तिन्नों शोहरू युसुफ त तिन्नां का आजी मिसर देशै, तिधी हुअ तेऊओ ओन नगरीए प्रोहत पोतीपोरे शोहरी आसनता संघै बैह। युसुफ अर आसनते हुऐ दूई शोहरू मनिश्शे अर एप्रैम।
याकब अर राहेले शोहरू बिन्यामीनै निंयैं आप्पू संघै आपणैं शोहरू बेला, बेकेर, अशबेल, गेरा, नामान, आही, रोशण, मुप्पी, हुप्पी अर आर्द।2
बिल्हा ज़ुंण दासी लाबानै आपणीं शोहरी राहेला लै दैनी ती, याकब अर तैहा का थिऐ आजू शोहरू अर पोचै संघी पठी सात ज़ण्हैं।
तिन्नें शोहरू दानै निंयं आप्पू संघै आपणअ शोहरू हूशीम।
नप्ताली निंयैं आप्पू संघै आपणैं शोहरू जसेल, गूणी, ज़सेर अर शलेम मिसर देशा लै।
याकबा संघै ज़ेतरै ज़ण्हैं मिसर देशा लै तेऊ संघै डेऊऐ तिंयां सोभै मर्ध थिऐ पठी गणी करै छाहठ ज़ण्हैं। याकबे नुशा ती इना का लाऊआ, तिंयां निं एथ आथी गणी दी।
युसुफे दूई शोहरू ज़ुंण मिसर देशै तै हुऐ दै तिन्नां संघी ज़ोल़ी करै हुऐ याकबे सोभ टबर मिसर देशै सत्तर ज़ण्हैं।3
याकबै छ़ाडअ यहूदा आजू युसुफा सेटा इहअ बोल्दअ कि तूह लोल़ी गोशेन मुल्खै हाम्हां का आजी गअ पुजी। तेखअ पुजै तिंयां मिसर देशे गोशेन मुल्खै।
युसुफै ज़ुंडअ आपणअ रथ संघा डेऊअ आपणैं बाब इज़राईला का मिलदअ। ज़ांऊं तिंयां गोशेन पुजै, युसुफै दैनी आपणैं बाबे गल़ा फेर बाह पाई मल़्हैची, संघा रहअ खास्सी घल़ी लेरा लांदअ लागी।
इज़राईल लागअ इहअ बोल्दअ, “युसुफ, ऐबै हेरअ मंऐं तूह आपणीं आछी भाल़ी, ऐबै हुंह मरी बी जाए, तेतो दुख निं मुंह आथी।”
तेखअ बोलअ युसुफै आपणैं तिन्नां सोभी भाई-बंधा लै ज़ुंण याकबा संघै तै आऐ दै, “हुंह एछूं एभै मिसर देशे माहा राज़ै सेटा डेऊई, संघा एछूं अह खबर राज़ै सेटा पजैल़ी कि मेरै सोभ भाई-बंध गऐ कनान देशा का इधी पुजी।
“तेऊ का खोज़ूं हुंह कि तम्हैं आसा फुआल अर तम्हैं आसा आपणैं डागै-चैणैं, गाधै-गाधी, ऊँटे हेल़्ही अर आपणीं सारी ज़ैदाता संघी इधा लै आऐ दै।
“ज़ेभै माहा राज़अ तम्हां शादे अर इहअ पुछ़े, ‘तम्हैं किज़ै काम करा?’ तेभै बोलै तम्हैं इहअ ‘हाम्हां का आसा डागै-चैणें हेल़्ह अर हाम्हैं तेरै दास करा होछ़ी उझै इना धाचणेंओ काम, म्हारै प्रोढै बी करा तै इहअ ई काम।’
“ज़ै तम्हैं इहअ बोले, तै बोल़णअ तेऊ तम्हां लै गोशेन मुल्खै रहणा लै।”
युसुफ च़ाहा त तिन्नां लै कि तिंयां बोले राज़ै सेटा इहअ ई। किल्हैकि मिसर देशे लोग निं फुआला संघै कोई बभार ई डाहंदै तै।
Source notes (3)
- Cross-reference शधा. 7:15
- Cross-reference मूल. 41:50-52
- Cross-reference शधा. 7:14
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.