Kulvi Outer Seraji Bible
मूल़ 12
बिधाता शादअ अब्राम
बिधाता1 बोलअ अब्रामा का, “तूह डेऊ आपणैं देश अर आपणैं टबरा2 छ़ाडी तेऊ देशा लै ज़ुंण मुंह ताखा रहैऊंणअ।3
“मुंह दैणीं ताल्है बर्गत अर तेरी आद-लुआदा करै बणाणैं मुंह खास्सै देश। तूह हणअ इहअ मशूर कि ताह करै भेटणीं होरी बी बर्गत।
“ज़ुंण ताल्है भलअ करे तेऊ लै दैणीं मुंह बर्गत, पर ज़ुंण ताल्है फिटक दैए, तिन्नां लै दैणअ मुंह फिटक। पृथूईए सोभी खिंबे लोगा भेटणीं ताह करै मुखा बर्गत।” 4
बिधाता ज़धू अब्राम हारान देशा का शादअ, तधू थिई तेऊए अमर पझत्तरा साले। ज़िहअ बिधाता तेऊ लै बोलअ, तिहअ ई लागअ सह तिधा का आपणीं लाल़ी साराई, भतिज़ै लूता संघा लई कनान देशा लै हांढदअ। हारान देशै ज़ुंण ज़ैदात अर गलाम तेऊ संघै थिऐ, तिंयां बी आणै तेऊ संघा।5
हांढदी-हांढदी पुजअ अब्राम शकेम नाओंए तैहा ज़ैगा, ज़िधी महरूओ बडअ बूट आसा। तेऊ ज़मानैं रहा तै अज़ी बी तेऊ देशै कनानी लोग।
बिधाता हुअ अब्रामा सेटा प्रगट संघा बोलअ अब्रामा लै इहअ, “तेरी लुआदा लै दैणीं मुंह अह ज़ैगा सदा लै।” तेखअ बणाईं अब्रामै तिधी बिधाता लै एक बेदी।6
तेखअ फिरअ अब्राम तिधा का बेतेल नगरी पुर्ब दिशा बाखा, धारा बाखे मुल्खा लै तिधी पाअ तिन्नैं तेखअ डेरअ, पछ़मा बाखा बेतेल अर पुर्बा बाखा ती एई नगरी। तिधी बी बणाईं अब्रामै बिधाता लै एक बेदी। बादा का डेऊअ अब्राम हांढदी-हांढदी कनान देशे दखणा बाखा।
अब्राम मिसर देशै
कनान देशै पल़अ सारै दी खास्सअ नकाल़ संघा डेऊअ अब्राम आपणीं लाल़ी साराई अर आपणैं सोभी मणछा संघी मिसर देशा लै कि तिंयां नकाल़ खतम हणैं तैणीं तिधी रहे।
ज़ांऊं तिंयां मिसर देशा नेल़ पुजै, अब्रामै बोलअ साराई लै, “तूह आसा हेरनी खास्सी बित्ती! ताह भाल़ी सका मिसर देशे लोग मुंह मारी पाई, किल्हैकि हुंह आसा तेरअ मर्ध। पर ताह निं ईंयां मारदै। ज़ीबाण, तूह बोलै इहअ कि तूह आसा मेरी बैहण, तै झ़ाणीं हुंह बच़े।”7
ज़िहअ ई अब्राम अर साराई मिसर देशै पुजै, मिसरी लोगै भाल़अ कि साराई आसा हेरनी बित्ती। राज़दारै खोज़अ तेसे बारै मिसर देशे माहा राज़ै का, अर साराई पजैल़ी मिसर देशे माहा राज़ेए मैहलै।
मिसर देशो राज़अ8 हुअ साराई करै अब्रामा लै खुश अर तेऊ दैनी अब्रामा लै खास्सी भेडा-बाकरी, गाऊई-बल्द, गाधै-गाधी अर ऊँटे हेल़्ही अर गलाम।
पर बिधाता पाई अब्रामे लाल़ी साराई पिछ़ू मिसर देशे माहा राज़ेए सारै टबरा जैंदरी घोर बमारी अर आफ़त। खिरी शादअ मिसर देशे माहा राज़ै अब्राम संघा बोलअ तेऊ लै, “अह कै किअ तंऐं मुंह संघै? तंऐं किल्है निं खोज़अ कि साराई आसा तेरी लाल़ी? तंऐं किल्है बोलअ इहअ कि अह आसा तेरी बैहण? तैही लाअ त मंऐं ऐहा संघै बैह करी! ऐबै निंऊं ऐहा आपणीं लाल़ी संघा डेऊ इधा का।”
तेखअ बोलअ मिसर देशे माहा राज़ै आपणैं लोगा कि अब्रामा अर एऊए लाल़ी दैआ इने ज़ैदाता संघी इधा का राज्ज़ी-राम्बल़ै फिरी डेऊणैं।
Source notes (8)
- Footnote बिधाता याहवेह
- Footnote टबरा तैहा ज़ैगा ज़िधी हुअ ज़ल्मअ अर ज़िधी तेऊए आपणैं नातै रिश्तैदार आसा
- Cross-reference शधा. 7:3; इब्रा. 11:8
- Cross-reference शधा. 3:25; गल. 3:8
- Cross-reference शधा. 7:4
- Cross-reference गल. 3:16
- Cross-reference मूल. 20:2; 26:7
- Footnote मिसर देशो राज़अ फिरोन
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.