Kulvi Outer Seraji Bible
मूल़ 11
मणछे बोली दी फरक
सारी धरती थिई एक्कै बोली, सोभै लोग हेरा तै आप्पू मांझ़ै एकी-दुजे गल्ला फैल़ी।
तिन्नां मांझ़ै डेऊऐ कई पुर्बा बाखा, तिधी शुझुई तिन्नां का शिनार देशै एक सरली ज़ैगा संघा बस्सै तिंयां तिधी।
तिंयां लागै आप्पू मांझ़ै एही गल्ला करदै, “एछा, हाम्हां बसाऊंणी इधी एक बडी नगरी संघा बणाणअं हाम्हां सरगै तैणीं उछ़टअ कोट। हाम्हां बणाणीं तेता लै आगीए भठी दी सेकी करै पाक्की ईंटा, संघा लाणीं हाम्हां तिंयां पात्थरे ज़ैगा अर च़ुन्नें ज़ैगा लाणीं हाम्हां तेथ माट्टे गार। इहअ करै हणीं म्हारी मशूरी। तेखअ निं हाम्हां सारी पृथूई दी छिंघणें ज़रुरत आथी।”
तिंयां मणछ ज़हा बडी नगरी अर उछ़टै कोटा बणाऊंदै थिऐ लागै दै, बिधाता होथअ तेता भाल़अ उंधै।
बिधाता सोठअ इहअ, “इनै मणछै आसा एक्कअ किअ द अर इने बोली बी आसा एक्कै। इनै कामों देऊस बी लाअ इहअ ई, इहअ करै सका ईंयां आपणीं मन्न-मरज़ी दी ज़िहअ च़ाहे तिहअ करी। च़ाल्ला तै हाम्हां डेऊणअ उंधै संघा पाणअ हाम्हां इने बोली दी भिंघल़ तै निं इना आप्पू मांझ़ै एकी दुजे गल्ला फैल़णी।”
बिधाता पाअ तिन्नें बोली दी भिंघल़, संघा निं तिंयां आप्पू मांझ़ै एकी दुजे गल्ला फैल़ी सकै। तेखअ पाई तिन्नैं तैहा नगरी अर सरगै तैणीं उछ़टै कोटा बणाणें छ़ाड़, संघा छिंघुऐ तिंयां सारी पृथूई दी। तैही पल़अ तिधो नाअं बाबेल।
शेमा का तेराह तैणीं खिंब
ज़ल-प्रल़या बाद ज़ांऊं शेमे अमर शौआ साले हुई, तेऊओ हुअ शोहरू, तेऊ नाअं थिअ अर्पक्षद। शेमे हुऐ होर बी शोहरू-शोहरी, संघा गअ सह छ़ह शौआ साले अमरा ज़ांऐं। शेमे खिंबा दी थिऐ आजू ईंयां:
ज़ांऊं अर्पक्षद पैंईंती साले अमरो हुअ, तेऊओ हुअ शोहरू, तेऊ नाअं थिअ शेलाह। शेलाह हणैं का बाद हुऐ अर्पक्षदे होर बी शोहरू शोहरी संघा गअ सह च़ऊ शौआ ठत्ती साले अमरा ज़ांऐं।
ज़ांऊं शेलाह तिहा सालो हुअ, तेऊओ हुअ एक शोहरू तेऊ नाअं थिअ एबेर।
एबेरा हणैं का बाद हुऐ शेलाहे होर बी शोहरू शोहरी संघा गअ सह च़ऊ शौआ तेत्ती साले अमरा ज़ांऐं।
ज़ांऊं एबेर चऊती सालो हुअ, तेऊओ हुअ एक शोहरू तेऊ नाअं थिअ पेलेग। एबेरे थिऐ आजू होर बी शोहरू शोहरी, संघा गअ सह चिई शौआ चऊठा साले अमरा ज़ांऐं।
तिहा साले अमरा हुअ पेलेगो शोहरू, तेऊ नाअं थिअ रऊ। होर बी थिऐ पेलेगे शोहरू-शोहरी, संघा दूई शौआ उन्ताल़ी साले अमरा गअ सह ज़ांऐं।
ज़ांऊं रऊ बत्ती सालो हुअ, तेऊओ हुअ शोहरू, तेऊ नाअं थिअ सरूग। तेऊए हुऐ आजू होर बी शोहरू-शोहरी, रऊ बी गअ दूई शौआ उन्ताल़ी साले अमरा ज़ांऐं।
ज़ांऊं सरूग तिहा सालो हुअ, तेऊओ हुअ एक शोहरू, तेऊ नाअं थिअ नाहोर।
नाहोरा बाद हुऐ सरूगे होर बी शोहरू-शोहरी संघा गअ सह दूई शौआ तिहा साले अमरा ज़ांऐं। उणत्ती साले अमरा हुअ नाहोरो शोहरू, तेऊ नाअं थिअ तेराह। होर बी हुऐ नाहोरे शोहरू-शोहरी, संघा गअ सह एकी शौआ अड़ताल़ी साले अमरा ज़ांऐं।
तेराहो खिंब
तेराह ज़ांऊं सत्तर सालो हुअ, तेऊए हुऐ चअन शोहरू, अब्राम ज़ुंण कईओ दाद-बाब हुअ, नाहोर, अर हारान ज़ुण लूतो बाब आसा।
तेराहे शोहरू हुऐ कसदी ज़ातीए लोगे ऊर नाओंए नगरी अर हारान गअ त तेराहे ज़िऊंदी ज़िता तैहा ई नगरी रहंदी मरी। तेराहो खिंब रहअ तेखअ आजू इहअ:
अब्रामै किअ साराई संघै बैह, पर तेसे निं आजू शोहरू-माठै हई सकदै तै किल्हैकि सह थिई बांढी। नाहोरै किअ मिल्का संघै बैह। मिल्का अर तेसे बैहण इस्का थिई हाराने शोहरी।
ऊर नगरी ज़िधी कसदी ज़ातीए लोग रहा तै, तैहा नगरी छ़ाडी डेऊअ तेराह आपणैं शोहरू अब्राम अर तेऊए लाल़ी साराई अर आपणैं पोचै लूता संघै कनान देशा बाखा लै, पर ज़ांऊं तिंयां हारान नाओंए नगरी पुजै, तिंयां बस्सै तिधी।
तेराहे अमर गई ती दूई शौआ पांज़ा साले हई, संघा गअ सह हारान नगरी ज़ांऐं।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.