Kulvi Outer Seraji Bible
मूल़ 23
सारा गई ज़ांऐं
ज़ांऊं सारा एकी शौआ सताई साले अमरे हुई, सह गई कनान देशै किर्यात-अराबा नगरी ज़ांऐं ज़हा लै हेब्रोन नगरी बोला।
आबरामै किअ लेरा लाई शोग, संघा बोलअ हित्ती लोगा सेटा डेऊई आबरामै तिन्नां लै, “हुंह आसा थारै देशै परदेसी, अर मुखा निं इधी आपणीं ज़िम्मीं-ज़ैगा किछ़ै आथी ज़िधी हुंह आपणीं लाल़ीए ल्हास दाबी सकूं, तम्हां का आसा मेरी एही मांग कि तम्हैं दैआ मुल्है थोल़ी ज़ेही ज़ैगा मोलै।”1
हित्ती लोगै बोलअ आबरामा लै, “म्हारै मालक, तूह आसा हाम्हां मांझ़ै सैणअ, तूह छ़ांट म्हारी ज़ैगा का बधिया का बधिया ज़ैगा, ताल्है निं हाम्हां मांझ़ै कोह म्हारी आपणीं ल्हासा दाबणे ज़ैगा दैणा लै नांईं करदअ।”
आबराम बेठअ हित्ती लोगा सम्हनै आपणैं ज़ान्हूं दी धरनीं संघा बोलअ इहअ, “ज़ै तम्हैं सोभै राज्ज़ी आसा कि हुंह दाबूं मेरी लाल़ी इधी, तै आसा मेरी तम्हां का एही अरज़ कि तम्हैं बोला सोहारे शोहरू एप्रोना लै कि मकपेला ज़ैगा ज़ुंण तेऊओ डुआर आसा, तेऊ दै मुल्है, सह आसा तेऊए सिऊंआं दी। तम्हां सोभी नदरी दैणअ मुंह तैहा ज़ैगे ढब्बै मोल ताकि तम्हैं सोभै तेते शाजत होए।”
ज़ेभै आबराम हित्ती का इना गल्ला करदअ त लागअ द, एप्रोन थिअ तेभै सोभी संघै नगरीए प्रऊल़ी नेल़ तिधी बेठअ द, तेऊ दैनअ ज़बाब, “मेरै मालक, डुआरा संघी आसा सह सारी ज़ैगा ऐबै तेरी, मेरै ईंयां सोभ लोग आसा ऐहा गल्ले शाजत, तेतो निं ताखा मुंह किछ़ै मोल लणअ, सह ज़ैगा हुई ताल्है मुंह बाखा तेरै मुल्दै दाबणा लै।”
आबराम बेठअ एकी बारी भिई आपणैं ज़ान्हूं दी संघा बोलअ तेऊ तिन्नां सोभी लोगा सम्हनै एप्रोना लै, “मुंह निं एही लोल़ी, इना सोभी नदरी दैणअ मुंह तैहा ज़ैगो मोल, ज़ेतरअ हआ, तेते ढब्बै लआ तम्हैं मुखा ढाकी तेखअ दाबणी मुंह आपणीं लाल़ीए ल्हास तिधी।”
एप्रोनै बोलअ आबरामा लै, “मेरै मालक, पठी चअन-च़ार शौ च़ंदीए सिक्कै2 आसा तैहा ज़ैगे किम्मत! एतरै कै ढब्बै पिछ़ू हाम्हैं आप्पू मांझ़ै कै मोल भाअ लाअ करी? एतो निं किछ़ै माता, तूह निंऊं ज़िम्मीं सह आसा ऐबै तेरी।”
आबरामै शूणीं एप्रोने गल्ला, संघा दैनै तेऊ लै नगरीए प्रऊल़ी नेल़ सोभी हित्ती मणछा सम्हनै च़ार शौ च़ंदीए सिक्कै तैहा ज़ैगो मोल।
इहअ करै भेटी एप्रोने सह ज़ैगा ज़ुंण ममरे पुर्बा बाखा थिई। एप्रोने सिऊंआं दी तैहा सारी ज़ैगा अर तेते सोभ डाल़-बूट अर मकपेला नाओंए डुआरा दी हुअ आबरामो हक।
तेखअ दाबी आबरामै आपणीं लाल़ी साराई तेऊ मकपेला नाओंए डुआरै ज़ुंण हेब्रोन नगरी सम्हनै कनान देशै तैहा ज़ैगा थिअ, ज़ुंण ज़ैगा आबरामै हित्ती लोगा का मोलै लई।
Source notes (2)
- Cross-reference इब्रा. 11:9,13; शधा. 7:16
- Footnote च़ार किलू छ़ह शौ गराम च़ंदीए सिक्कै
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.