Kulvi Outer Seraji Bible
मूल़ 33
याकब अर एसाबो मेल़-ज़ोल़
याकब लागअ तिधा का हांढदअ, हांढदी-हांढदी शुझुअ याकबा का इहअ कि एसाब आसा ओर्ही बाखा लै एछदअ लागअ द, तेऊ संघै आसा तिंयां च़ार शौ मणछ बी। याकबै डाहै आपणैं सोभै शोहरू लिआ, राहेल अर तिन्नां दुही दासी संघै हांढदै लाई।
सोभी का आजू किई ज़िल्पा अर बिल्हा तिन्नें शोहरू संघै, तिन्नां पिछ़ू लागी लिआ आपणैं शोहरू संघै हांढदी, तेता पिछ़ू राहेल आपणैं शोहरू युसुफा संघै हांढदी।
आप्पू लागअ याकब तिन्नां सोभी का आजू हांढदअ। सह रहअ आजू हांढदअ लागी संघा किअ तेऊ धरनीं माथअ टेक्की, इहअ करै टेक्कअ तेऊ साता बारी माथअ संघा पुजअ आपणैं भाई सेटा।
याकब आअ एसाबा सेटा लै ठुर्ही संघा दैनी तेऊ एसाबा लै मल़्हैची। तेखअ लागै दुहै भरैर लेरा लांदै।
बेटल़ी-माठै भाल़ी पुछ़अ एसाबै याकबा का, “ईंयां लान्हैं कसरै आसा?”
याकबै बोलअ, “बिधाता दैनअ मुल्है जश अर तेऊ दैनै ईंयां मुल्है, ईंयां शोहरू आसा मेरै, ज़ुंण हुंह तेरअ च़ाकर आसा।”
तेखअ आई तिंयां दासी अर तिन्नें शोहरू संघा टेक्कअ तिन्नैं एसाबा सेटा माथअ।
तिन्नां पिछ़ू आई लिआ अर तेसे शोहरू संघा टेक्कअ तिन्नैं एसाबा सेटा माथअ। खिरी आई राहेल अर तेसो शोहरू युसुफ संघा टेक्कअ तिन्नैं एसाबा सेटा माथअ।
एसाबै पुछ़अ याकबा का, “ज़ुंण डागै-चैणें हेल़्ह मुंह बाता भेटी, सह किज़ू लै आसा ती?”
याकबै दैनअ ज़बाब, “तिंयां छ़ाडै तै मंऐं कि तूह मेरअ मालक मुल्है झींण करे।”
एसाबै बोलअ, “मेरै भाऊआ, मुखा आसा बतेर्है, तिन्नां डाह तूह आप्पू लै, तिंयां आसा तेरै।”
याकबै बोलअ, “नांईं-नांईं, तिंयां हुऐ ताह मुंह बाखा भैंट मनणै, तै ज़ाणूं हुंह कि ताह लागा मेरी झींण। ऐहा गल्ला लै निं किछ़ै बैहम आथी कि आझ़ तेरअ मुंह भाल़णअ हुअ मुल्है बिधाते मुंहां भाल़णैं ज़िहअ, किल्हैकि तंऐं मनअ हुंह।
“ज़ीबाण मेरअ भाई, मेरी अह होछ़ी ज़ेही भैंट ढाक। बिधाता दैनअ मुल्है जश अर तेऊए दौलती आसा मुखा सोभै गल्ला बतेर्ही।”
याकब रहअ बोल्दअ ई लागी खिरी मनअ एसाब।
तेखअ बोलअ एसाबै, “च़ाल्ला ऐबै लागणअ हाम्हां हांढदै, हुंबी च़ाल्लअ तम्हां संघै।”
पर याकबै दैनअ ज़बाब, “भाई, मेरै मालक, ताखा आसा आप्पै थोघ भाल़ लान्हें निं खास्सअ हांढदअ आथी, हेल़्ही दी आसा कई भेडा-बाकरी, गाऊई, ऊँट अर गाधी सूई दी, तिन्नें हेर-सभाल़ बी लागा मुंह करनी। ज़ै तिन्नां एकी धैल़ी का खास्सै छ़ेल़्हे, तिंयां सका मरी बी।
“मेरै मालक, तूह डेऊ हाम्हां का आजू, हाम्हैं एछमैं लान्हैं-सुन्हैं अर डागै-चैणें छ़ुंढा अर हेल़्ही संघै सुलै-सुलै पिछ़ू किल्हैकि ईंयां निं छ़ेक्कै हांढी सकदै। एदोम पुजी जाणैं हाम्हैं ताह संघै भिई कठा हई।”
एसाबै दैनअ ज़बाब, “तै डाहूं हुंह थोल़ै आपणैं आदमी ताह संघै पिछ़ू।”
याकबै बोलअ, “भाई, मेरै मालक, हुंह आसा ऐहा ई गल्ला लै खुश कि तंऐं किई मुल्है झींण, होर निं ताह किछ़ै करने ज़रुरत आथी।”
एसाब लागअ तेखअ आपणैं लोगा संघै हांढदअ संघा पुजअ तैहा ई धैल़ी एदोम नगरी।
पर याकब फिरअ तिधा पिछ़ू संघा डेऊअ तिधा का सक्कोत नगरी1 लै, संघा बणाअं आप्पू लै तिधी एक घअर अर डागै-चैणैं लै बणाऐं दल़बै। तैही बोला तैहा ज़ैगा लै सक्कोत2, अर तिधी बणाअं तेऊ आप्पू लै एक घअर।
याकब पुजअ कनान देशै
पद्दनराम ज़ैगा का पुजअ याकब राज्ज़ी-राम्बल़अ कनान देशे शकेम नगरी। संघा पाअ नगरी का दूर ज़िहअ आपणअ डेरअ।
ज़हा ज़ैगा तेऊ आपणैं खिम्भ खल़ै किऐ। सह ज़ैगा थिई शकेमे बाब हमोरे आद-लुआदे। याकबै लई सह ज़ैगा तिन्नां का एक शौ च़ंदीए सिक्कै3 दैई मोलै।4
खिम्भे डेरै पाणै का बाद बणाईं तिधी तेऊ एक बेदी बी संघा डाहअ तैहा ज़ैगा नाअं बिधाता आसा इज़राईलो परमेशर5।
Source notes (5)
- Footnote सक्कोत इब्रानी बोली दी छ़ानां, दल़बै
- Footnote सक्कोत छ़ानीं
- Footnote एक शौ च़ंदीए सिक्कै एकी च़ंदीए सिक्के किम्मत हआ ती आम मज़दूरा लै एकी धैल़ीए मज़दूरी
- Cross-reference ज़ैह. 24:32; जोह. 4:5; शधा. 7:16
- Footnote बिधाता आसा इज़राईलो परमेशर एल-एलोहे-इज़राईल
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.