Kulvi Outer Seraji Bible
मूल़ 40
सुपनैओ फल खोज़णअ
युसुफ त कैदखाने दी, एकी धैल़ै हुअ इहअ कि मिसर देशे माहा राज़ेए पणैऊंए दरोगै अर मल़ेगे दरोगै किअ किज़ै कशूर। राज़ै पाऐ रोश्शै तिंयां कैदखानै दी ज़िधी युसुफ त।
सपाहीए दरोगै सभाल़ी तिन्नें हेर-भाल़ करने ज़िम्मैंबारी युसुफा लै। तेखअ रहै तिंयां खास्सै धैल़ै तैणीं कैदखाने दी।
एकी राची हुऐ तिन्नां दुही ज़ुदै-ज़ुदै सुपनै।
दुजै धैल़ै दोत्ती ज़ांऊं युसुफ कैदी भाल़अ डेऊअ, तिन्नें मुंहां भाल़ी गअ तेऊ का ज़ाण्हुंई कि इने मन्नैं आसा झाख पल़अ द।
युसुफै बोलअ मिसर देशे माहा राज़ेए पणैऊं अर मल़ेगे दरोगै दुही लै, “तम्हैं किल्है आसा आपणैं मुंह शेऊई डाहै दै?”
तिन्नैं बोलअ युसुफा का, “हिझ़ बैल़ी हुऐ हाम्हां दुही सुपनै, पर एतो फल खोज़णैं आल़अ निं हाम्हां का कोहै आथी।”
युसुफै बोलअ तिन्नां का, “सुपनैओ किज़ै फल हणअ तेतो थोघ हआ बिधाता का। मुखा खोज़ा हैनूं तम्हैं किहै सुपनै भाल़ै।”
राज़े पणैऊं दरोगै बोलअ युसुफा का, “मुंह हुअ इहअ सुपनअ कि मुखा शुझुई दाखे बेल, तेथ आसा चअन शाण्हटी लागी दी, ज़ेतरी तेथ डोडी लागी, तेतरी गऐ तिंयां फूली संघा गऐ तेतरी तेते लुम्बरू दी दाखे दाणैं पाक्की।
“संघा शुझुअ मुखा इहअ कि मिसर देशे माहा राज़ैओ प्रिहअ थिअ मेरै हाथै, तेथ मठिल्लअ मंऐं दाखो रस संघा दैनअ राज़े हाथै।”
युसुफै बोलअ, “आपणैं सुपनैओ फल शुण, तिंयां चअन शाण्हटी आसा चअन धैल़ी, इना चिई धैल़ै करनी राज़ै तेरी बड़ैई अर तूह शादणअ तेऊ आपणैं कामां लै बापस अर तूह हणअ पैहलै ज़िहअ मिसर देशे माहा राज़ै का दाखे रसा पणैंऊंदअ।
“पर ज़ेभै तूह मिसर देशे माहा राज़ै सेटा बापस आपणैं कामां दी लागे, तेभै निं तूह मुंह बिस्सरुई, मेरै बारै करै राज़ै का गल्ला अर मुंह काढै एऊ कैदखाने का बागै।
“हुंह आसा इब्रानी लोगे देशा का च़की आणअ द अर इधी मिसर देशै बी निं मंऐं इहअ किछ़ गलत काम आथी किअ द ज़ेता लै हुंह कैदखाने आसा बंद किअ द।”
तेखअ ज़ांऊं तेऊ राज़े मल़ेगे दरोगै भाल़अ कि युसुफै खोज़अ सुपनैओ बधिया फल, तेऊ बोलअ, “मुंह बी हुअ सुपनअ, इहअ कि मेरै मुंडा प्रैंदै आसा चअन शेती रोटीए छ़ल़्हटी।
“तेखअ शुझुअ मुखा इहअ कि सोभी का प्रैंदे छ़ल़्हटी दी आसा मिसर देशे माहा राज़ै लै कई भांतीए सटेऊई दी च़िज़ा। पर च़ेल्लू-पखीरू आसा तेता का च़ुंघदै लागै दै।”
युसुफै बोलअ, “तेरै सुपनैओ फल शुण, तिंयां चअन छ़ल़्हटी आसा चअन धैल़ै।
“एभा पोर्ही चिई धैल़ै भितरी पाणअ मिसर देशे माहा राज़ै तेरअ कैल़अ काटी अर तेरी ल्हास डाहणीं राज़ै उछ़टै बूटा दी छ़ड़ाऊई, अर तूह खाणअ शकारी च़ेल्लू-पखीरू च़ोच़ल़ी-च़ोच़ल़ी करै।”
चिऐ धैल़ै थिअ मिसर देशे माहा राज़ैओ ज़ल्म धैल़अ, तेऊ दैनी सोभी कार-करिंदै लै धाम। राज़ै किऐ तैहा धैल़ी पणैऊं अर मल़ेगे दुहै दरोगै कैदखाने का आज़ाद। पणैऊं दरोगअ ता डाहअ मिसर देशे माहा राज़ै भिई तेऊए कामां दी। पर सह मल़ेगैओ दरोगअ पाअ तेऊ मारी संघा डाहअ उछ़टै बूटा दी छ़ड़ाऊई।
ज़िहअ युसुफै बोलअ त तिन्नां दुही संघै हुअ तिहअ ई, पर ज़ांऊं तेऊ पणैऊंए दरोगै राज़ै सेटा आपणअ काम भिई भेटअ, तेऊ निं तेखअ युसुफे आद बी रही।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.