Kulvi Outer Seraji Bible
मूल़ 5
आदमीओ खिंब
बिधाता बणाऐं मणछ मर्ध अर बेटल़ी आपणैं रुपै आप्पू ज़िहै। ज़धू मणछ बणाऐं तधू डाहअ तेऊ नाअं बिधाता आदमी। तेऊ दैनी तिन्नां लै बर्गत संघा बोलअ तिन्नां लै मणछ। ज़ुंण सह सोभी का आजी आदमी थिअ, तेऊए खिंबे बही आसा बाढै एही:1
ज़ांऊं सह आदमी एकी शौआ तिहा सालो हुअ, तेभै हुअ तेऊओ आजू शोहरू, सह थिअ ज़ाथी तेऊ ई आप्पू ज़िहअ हेरनअ, तेऊ डाहअ तेऊ नाअं शेत। तेऊ आदमीए थिऐ होर बी शोहरू-शोहरी।
नौ शौआ तिहा साले अमरा गअ आदमी ज़ांऐं।
ज़ांऊं शेत एक शौआ पांज़ा साले अमरा पुजअ, तेऊओ हुअ एक शोहरू तेऊ नाअं थिअ एनोश। शेते थिऐ होर बी शोहरू-शोहरी, सह गअ नौ शौआ बारा साले अमरा ज़ांऐं।
नबै साले अमरा हुअ एनोशो शोहरू तेऊ नाअं थिअ कनान। एनोशे थिऐ होर बी शोहरू-शोहरी। नौ शौआ पांज़ा साले अमरा गअ एनोश बी ज़ांऐं।
सत्तर साले अमरा हुअ कनानो एक शोहरू तेऊ नाअं थिअ महलेल2 कनाने बी थिऐ होर बी शोहरू-शोहरी। कनान गअ नौ शौआ दसा साले अमरा ज़ांऐं।
महलेलो हुअ आजू पैंठा साले अमरा एक शोहरू तेऊ नाअं थिअ जेरेद, अर होर बी थिऐ तेऊए शोहरू-शोहरी महलेल गअ आठ शौआ पजैनुंऐं साले अमरा ज़ांऐं।
जेरेदो हुअ बाहठा साले अमरा एक शोहरू, तेऊ नाअं थिअ हणोक। जेरेदे थिऐ होर बी खास्सै शोहरू-शोहरी। नौ शौआ शाठी साले अमरा गअ जेरेद ज़ांऐं।
पैंठा साले अमरा हुअ हणोको एक शोहरू तेऊ नाअं थिअ मतूशेल मतूशेले ज़ल्मां बाद हुऐ आजू चिई शौआ साला तैणीं हणोके होर बी शोहरू शोहरी। हणोक झ़ूरा त बिधाता लै शुचै मन्नैं।
चिई शौआ पैंठा साले अमरा किअ हणोक बिधाता लोगा मांझ़ा का दूर, किल्हैकि सह निंयं परमेशरै तेऊए ज़िऊंदी ज़िता स्वर्गा लै।3
ज़ांऊं मतूशेल एक शौआ सतास्सी सालो हुअ, तेभै हुअ तेऊओ एक शोहरू तेऊ नाअं थिअ लेमेक। मतूशेले हुऐ आजू होर बी शोहरू-शोहरी। संघा गअ सह नौ शौआ ऊणाहठा साले अमरा ज़ांऐं।
ज़ांऊं लेमेक एक शौआ बैस्सी सालो हुअ, तेभै हुअ तेऊओ एक शोहरू, तेऊ डाहअ इहअ बोली तेऊ नाअं नूह, “कि बिधाता धरती लै फिटक दैणैं का बाद हुअ त म्हारअ ज़िऊंणअ बेघै कठण, एऊ शोहरू करै भेटणीं हाम्हां शांती।” लेमेके हुऐ होर बी शोहरू-शोहरी। सह गअ सात शौ सतत्तर साले अमरा ज़ांऐं।
ज़ांऊं नूह पांज़ा शौआ सालो हुअ, तेऊओ हुअ एक शोहरू, तेऊ नाअं डाहअ तिन्नैं शेम, तेखअ हुअ दुजअ शोहरू, तेऊ नाअं डाहअ तिन्नैं हाम अर ज़ांऊं चिअ शोहरू हुअ, तेऊ नाअं डाहअ तिन्नैं ज़बेद।
Source notes (3)
- Cross-reference मोत्त. 1:1; 1; 19:4; मार्क. 10:6; 1 करि. 11:7
- Footnote महलेल मतलब परमेशरे स्तोती
- Cross-reference इब्रा. 11:5; यहू. 14
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.