ଯାତ୍ରା ବଇ
Exodus
Introduction from this edition
ମୋଶାଙ୍କ ଲିଖିତ ଦ୍ୱିତୀୟ ପୁସ୍ତକ
ଯାତ୍ରା ବଇ
ଯାତ୍ରା ବଇ ବିସୟ୍ତାନ୍ ଏସ ମାଟା
ଯାତ୍ରା ବଇ ଆଜିନାତ୍ ଅବ୍ରାହାମ୍ତି ଇଲୁବେଲିଦି ଇତିଆସ୍ ମାଟା ମାନାତ୍, ଆମାକା ପାର୍ତୁମ ବଇଦାନ୍ ଆରାମ୍ ଆତାମାର୍ହାତ୍ । ଯାତ୍ରା ବଇଦି ଅର୍ତ ଆଜିନାତ୍ “ବୁଲାନିକା” ଇସ୍ରାଏଲ୍ ମିସର ଦେସ୍ତାନ୍ ସନି ଦେସ୍ତିଙ୍ଗ୍ ବୁଜାକିନାତ୍, ଆମାକା ମାପୁରୁ ଅବ୍ରାହାମ୍ତିଙ୍ଗ୍ ମାଟା ସିତାମାର୍ହାନ୍ । ରିତିନିତି ଇସାବ୍ତାନ୍, ପଣ୍ତିତ୍କୁ ବିସ୍ବାସ୍ କିନାର୍ ଜେ ଯାତ୍ରା ବଇ ଲୋଇରାନ୍ ଏସ ମୋସା ବବିସତ୍ବକ୍ତାଦି ମାଣାନ୍ ରାସାତିକା ମାରି ଇୟା ପାଟ୍ ନିଜେ ଆଦେସ୍ ସିତିମାରିକା ତର୍ନାତ୍ । ଯାତ୍ରା ୨୪:୪ ଇନାତ୍ ଜେ ମୋସା ଏଣ୍ତେସ୍ ବଇଦି ଏସ ବାଗ୍ ରାସ୍ତାମାର୍ହାନ୍ । ଯିହୋସୁୟ ୮:୩୧ ଦୁ ଇକା ଯାତ୍ରା ୨୦:୨୫ ଦୁ ଉଣ୍ତ୍ରି ଆଦେସ୍ତିଙ୍ଗ୍ ତର୍ନାତ୍ ମାରି ଇକା ଇର୍ହାମାନାନ୍ ଜେ ଇକା “ମୋସାଦି ନିୟମ୍ ବଇଦୁ ରାସାତା ମାନାତ୍ ।” ପୁନି ନିୟମ୍ ମୋସାଦି ମାଣାନ୍ ନାଣ୍ତ ଦେବେଙ୍ଗ୍ ରାସାତି ବଇଦିଙ୍ଗ୍ ବୁଜା କିନାତ୍, କାତା ଇସାବ୍ତାନ୍ ଏସ୍ତିୱାଲେ କାସ୍ନି ଦୁପାଦୁ ଗଟାତିମାନି ଗଟ୍ନା ବିସ୍ୟତାନ୍ ଇନାତ୍ ମାରି ଇକା “ମୋସାଦି ବଇ” ଦୁ ରାସାତା ମାର୍ହାତ୍ ମାର୍କ ୧୨:୨୬ । ମିସରତାନ୍ ଇସ୍ରାଏଲତି ବୁଲାନିକା ପାକାପାକି ୧୩୦୦ ମାରି ୧୪୦୦ ବାର୍ସେକ୍ ଆଗ୍ଡ଼ିରାନ୍ ଗଟାତାମାର୍ହାତ୍ । ୧ ରାଜା ୬:୧ ଦୁ ଇକା ଇନାୟ୍ ଆତାମାନାତ୍ ଜେ ସଲମନ୍ତି ଇସ୍ରାଏଲ ମୁସ୍କୁ ରାଜା ଆନି ନାଲ୍ଗି ବାର୍ସେକ୍ ଆଗ୍ଡ଼ିରାନ୍ ୪୮୦ ବାର୍ସେକ୍ ଆଗ୍ଡ଼ିରାନ୍ ଇୟା ତରାଜିଅନିକା ଗଟାତାମାର୍ହାତ୍ ।
ଅବ୍ରାହାମ୍, ଇସ୍ହାକ୍ ମାରି ଜାକୁବଙ୍ଗ୍ ମାପୁରୁ ଏଣ୍ତେସ୍ ମାଟା ସିତାମାର୍ହାନ୍, ତାନିମୁସ୍କୁ ଦିୟାନ୍ ସିଆୟ୍ଆତାମାନାତ୍ । ଇକା ଅବ୍ରାହାମ୍ତି କୁଟୁମ୍, ଇସ୍ରାଏଲ୍ତି ଜାତି, ମିସର ଦେସ୍ତାନ୍ ମାପୁରୁଦି ସାକ୍ତିଦୁ ମୁକୁଡ଼ା କିନି ବିସୟ୍ତାନ୍ ୱେର୍ନାତ୍ ଯାତ୍ରା ୧୨:୧ । ଆବେଣାନ୍ ମାପୁରୁ ୱାନି ଲୋକାଙ୍ଗ୍ ସିନୟ ଗରତି ଆଡ୍ଗି ଅତାନ୍ ଏମେମାନୁ ୱାନ୍ ଇସ୍ରାଏଲ୍ତି ଲୋକାଙ୍ଗ୍ ମାନାନି ଉଣ୍ତିଙ୍ଗ୍ ମୋସେଙ୍ଗ୍ ନାଣ୍ତ ନିୟମ୍କୁ ସିତାମାର୍ହାନ୍ ଯାତ୍ରା ୧୨:୧୯ । ଇୟା ନିୟମ୍କାଙ୍ଗ୍ ୱାର୍ ଏଣ୍ତେସ୍ ପାଣି କିନିକା ମାନାତ୍, ୱାର୍ ଏଣ୍ତେସ୍ ପୁଜା ସିନିକା ମାନାତ୍ ମାରିନ୍ ଗୁଡ଼ା ତିଆର୍ ଉଣ୍ତିଙ୍ଗ୍ ନାଣ୍ତ ଆଦେସ୍କୁ ଆମାକା ୱାରି ଲୋଇ ମାପୁରୁଦି ବାସାନିବାଡି ଆନାତ୍, ଗୁଡ଼ାଦୁ ପୁଜାପାଟ୍ କିନି ଉଣ୍ତିଙ୍ଗ୍ ଜାହାଜ୍ ମାରି ଆଇ ଆଇ ସାମାନ୍କୁ ମାରି ପୁଜାରି ଲୋକା ଆଙ୍ଗିଁ ପାସିୟା ବିସୟ୍ତାନ୍ ରାସାତାମାନାତ୍ । ଯାତ୍ରା ୨୦:୩୧ ତାନିୱେନ୍କା ଉଣ୍ତ୍ରି ବୟଙ୍କାର୍ତି ଜୁଦ୍ ୱେନ୍କା ଏମେମାନୁ ଇସ୍ରାଏଲ ଲୋକୁ ବାଚିପିଲା ରୁପ୍ତାନ୍ ଉଣ୍ତ୍ରି ବମା ତିଆର୍ କିତାର୍, ମୋସା ମାରିଡ଼େସି ମାପୁରୁଦି ୱାଲେ ବେଟ୍ ଆତାନ୍ ଯାତ୍ରା ୩୨:୩୩ । ବଇଦି ସାରାସାରି ବାଗ୍ତୁ ମାଡ୍ ପଡ଼ାଜିନିକା ଜେ ଆଗ୍ଡ଼ିରାନ୍ ୱେର୍ହାତି ଜିନିସ୍କୁ ଏଣ୍ତେସ୍ ତିଆର୍ କିଆଇଆତା ମାର୍ହାତ୍ ଯାତ୍ରା ୩୩:୪୦ ।
ଇୟା ବଇଦୁ ମାନି ମୁକିୟ୍ ବିସୟ୍
ମିସର ଦେସ୍ତୁ ଇସ୍ରାଏଲ୍ ଲୋକୁ ଏଣ୍ତେସ୍ ଗତି ମୁରୁଲିର୍ ଆତାମାର୍ହାର୍, ଅଦ୍ୟାୟ୍ ୧ ୱେର୍ନାତ୍ ।
୨ ତାନ୍ ୪ ଅଦ୍ୟାୟ୍ ମୋସେଙ୍ଗ୍ ଜାଣାସିନା କିନାତ୍ ମାରି ମାପୁରୁଦି ଲୋକାଙ୍ଗ୍ ରକିୟା କିଦେଙ୍ଗ୍ କୁକ୍ନି ସାନ୍ଦି ୱାନି ଜିବନ୍ ବିସୟ୍ତାନ୍ ୱେର୍ନାତ୍ ।
ତାନିୱେନ୍କା ରାସ୍ତିକାନ୍ ୱେର୍ତାମାନାନ୍ ଜେ ମାପୁରୁ ଏଣ୍ତେସ୍ ନିଜେଦି ଲୋକାଙ୍ଗ୍ ଆୟା ଦେସ୍ତାନ୍ ପାର ରାଜାଦି ସନ୍ୟ ଦଲ୍ତାନ୍ ରକିୟା କିନି ଉଣ୍ତିଙ୍ଗ୍ ମିସର ଦେସ୍ତାନ୍ ଏଣ୍ତେସ୍ ସାକ୍ତିଦି କାବାଆନିକା ମାରି ସାନି ମର୍ଡି କିତାନ୍ ଅଦ୍ୟାୟ୍ ୫-୧୫ ।
ଇବେଣାନ୍ ଇସ୍ରାଏଲ୍ ଲୋକୁ ସିନୟ ଗରତୁ ବୁଲାଜି ସର୍ହାର୍ ଅଦ୍ୟାୟ୍ ୧୬-୧୯ ।
ଅଦ୍ୟାୟ୍ ୨୦ ଦାନ୍ ୩୧ ଅଦ୍ୟାୟ୍ତୁ ମାଡ୍ ପଡ଼ାନାଟ୍ ଜେ ମାପୁରୁ ଏଣ୍ତେସ୍ ମୋସେଙ୍ଗ୍ ନିୟମ୍ ସିତାମାନାନ୍, ଏମେମାନୁ ମାପୁରୁଦି ଲୋକୁ, ଇସ୍ରାଏଲ୍ ଲୋକାଙ୍ଗ୍ ଏଣ୍ତେସ୍ ଜିନିକା ମାରି ପାର୍ତନା କିଦେଙ୍ଗ୍ ପଡ଼ାନାତ୍ ଆୟା ବିସୟ୍ତାନ୍ ଆଦେସ୍ ରାସାତାମାର୍ହାତ୍ ।
ଅଦ୍ୟାୟ୍ ୩୨ ଦୁ ରାସାତାମାନାତ୍ ଜେ ଇସ୍ରାଏଲ୍ ଲୋକୁ ଏଣ୍ତେସ୍ ମୋସାଦି ତଡ଼ାନ୍ ହାରଣଙ୍ଗ୍ ଉଣ୍ତ୍ରି ବାଙ୍ଗାଁରାମ୍ତି ବାଚିପିଲା ରୁପ୍ତାନ୍ ଉଣ୍ତ୍ରି ବମା ତିଆର୍ କିଦେଙ୍ଗ୍ ବିସ୍ବାସ୍ କିଜି ମାପୁରୁଦି ବିରୁଦ୍ତାନ୍ ଜୁଦ୍ କିତାର୍ ।
ମୋସା ଏଣ୍ତେସ୍ ମାପୁରୁଦି ଗୌରବ୍ ସୁଡ଼ୁତାନ୍ ମାରି ତାନିୱେନ୍କା ଇସ୍ରାଏଲ୍ ଲୋକାଙ୍ଗ୍ ମାପୁରୁଦି ନିୟମ୍ ବିସୟ୍ତାନ୍ ମାରି ଏଣ୍ତେସ୍ ଗୁଡ଼ା, ଜାହାଜ୍ ମାରି ଗୁଡ଼ାଦୁ ପାର୍ତନା କିନି ଉଣ୍ତିଙ୍ଗ୍ ଆଇ ଆଇ ସାମାନ୍କୁ ମାରି ପୁଜାରି ଲୋକାଙ୍ଗ୍ ଆଙ୍ଗିଁ ପାସିଆ ବିସୟ୍ତାନ୍ ୱେର୍ତାନ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.