Konda Porja Bible
ଯାତ୍ରା ବଇ 37
ନିୟମ୍ ପେଡ଼ା ତିଆର୍ କିନିକା
(ଯାତ୍ରା ୨୫:୧୦-୨୨)
ଇୟାୱେନ୍କା ବତ୍ସଲେଲ ଆକିସିଆ ମାରାନ୍ଦାନ୍ ରୁଣ୍ତି ମୁରେଙ୍ଗ୍ ଆଦା ନିରିକା ମାରି ଉଣ୍ତ୍ରି ମୁରା ଆଦା ଅସାର୍ ମାରି ଉଣ୍ତ୍ରି ମୁରା ଆଦା ଉଛା, ଉନ୍ଡ୍ରି ନିୟମ୍ ପେଡ଼ା ତିୟାର୍ କିତାର୍ ମାରି ଆବେଣି ଲୋଇ ମାରି ଆତ୍ରେ ନେଗି ବାଙ୍ଗାରାମ୍ଦାନ୍ ଡାଲାୟ୍ କିତାର୍ ଆବେନୁ ସାରିବେଡ଼େତି ବାଙ୍ଗାରାମ୍ଦି ଅଟି କିତାର୍ । ମାରି, ଆବେଣି ନାଲ୍ଗି କୋନେଙ୍ଗା ଉଣ୍ତିଙ୍ଗ୍ ନାଲ୍ଗି ବାଙ୍ଗାରାମ୍ ବରୋ ଇଟ୍ତାନ୍; ଆବେଣି ଉନ୍ଡ୍ରି ତରଟି ରୁଣ୍ଡି ବରୋ ମାରି ଆଇ ତରଟି ରୁଣ୍ଡି ବରୋ ସିତାନ୍ । ମାରି ୱାନ୍ ଆକିସିଆ ମାରାନ୍ଦାନ୍ କଣା କିଜି ବାଙ୍ଗାରାମ୍ ଡାଲାୟ୍ କିତାର୍ ମାରି ନିୟମ୍ ପେଡ଼ା ପିଣ୍ଡ୍ନି ଉଣ୍ତିଙ୍ଗ୍ ନିୟମ୍ ପେଡ଼ାଦି ପାଡ଼ାକାଦି ବରୋଦୁ ଆୟା କଣା ଡ଼ୁଗିସ୍ କିତାନ୍ । ଇୟାୱେନ୍କା ଆୟା ନେଗି ବାଙ୍ଗାରାମ୍ଦାନ୍ ରୁଣ୍ତି ମୁରେଙ୍ଗ୍ ଆଦା ନିରିକା ମାରି ଅଦା କିୟୁ ଅସାର୍ ପାପ୍ତିଙ୍ଗ୍ ପିଡ଼ିକ୍ନି ଡାବ୍ଣା ତିଆର୍ କିତାନ୍ । ମାରି, ବାଙ୍ଗାରାମ୍ଦାନ୍ ରୁଣ୍ତି କିରୁବ ତିୟାର୍ କିଜି ପାପ୍ତିଙ୍ଗ୍ ପିଡ଼ିକ୍ନି ଡାବ୍ଣାଦି ରୁଣ୍ଡି ତାଲାଦୁ ଇଟ୍ତାନ୍ । ଆବେଣି ଉନ୍ଡ୍ରି ତାଲାଦୁ ଉନ୍ଡ୍ରି କିରୁବ ମାରି ଆଇ ତାଲାଦୁ ମାରି ଉନ୍ଡ୍ରି କିରୁବ ତିୟାର୍ କିତାନ୍; ପାପ୍ତିଙ୍ଗ୍ ପିଡ଼ିକ୍ନି ଡାବ୍ଣାଦି ରୁଣ୍ଡି ତାଲାଦୁ ରୁଣ୍ଡି କିରୁବଙ୍ଗା ଆବେଣିକା ବାଗ୍ କିଜି ଇଟ୍ତାନ୍ । ମାରି, କିରୁବରି ଡେଣା ମୁସୁକୁ ଅସାର୍ଆଜି ପିଡ଼ିକ୍ତାତ୍ ମାରି ୱାରି ମୋକମ୍ ସାମ୍ନା ସାମ୍ନି ଆତାତ୍; ମାତର ଡାବ୍ଣା ଉଣ୍ତିଙ୍ଗ୍ କିରୁବରି ମୋକମ୍ ମାର୍ହାତ୍ ।
ରୁଟିଦି ଟେବୁଲ୍ ତିଆର୍ କିନିକା
(ଯାତ୍ରା ୨୫:୨୩-୩୦)
ଆୟା ୱେନ୍କା ୱାନ୍ ଆକିସିଆ ମାରାନ୍ଦାନ୍ ରୁଣ୍ଡି ମୁରେଙ୍ଗ୍ ନିରିକା ମାରି ଉନ୍ଡ୍ରେ ମୁରା ଅସାର୍ ମାରି ମୁରା ଆଦା ଉଚ୍ଚା ଉନ୍ଡ୍ରି ଟେବୁଲ୍ ତିୟାର୍ କିତାନ୍ । ମାରି, ଆକା ନେଗି ବାଙ୍ଗାରାମ୍ଦାନ୍ ଡାଲାୟ୍ କିତାର୍ ମାରି ଆବେଣି ସାରିବେଡ଼୍ତି ବାଙ୍ଗାରାମ୍ଦି ଅଟି କିତାନ୍ । ମାରି, ୱାନ୍ ଆବେଣି ସାରିବେଡ଼୍ତି ନାଲ୍ଗି ଡ଼ାସ୍କେଣି ଉଣ୍ତ୍ରି କଟି କିତାନ୍ ଆୟା କଟିଦି ସାରିବେଡ଼୍ତି ବାଙ୍ଗାରାମ୍ଦାନ୍ ଅଟି କିତାନ୍ । ମାରି ବାଙ୍ଗାରାମ୍ଦାନ୍ ନାଲ୍ଗି ବରୋ ୱାକ୍ସି ଆବେଣି ନାଲ୍ଗି କାଲ୍କୁ ନାଲ୍ଗି କୋନେଙ୍ଗା ଇଟ୍ତାନ୍ । ଆୟା ବରୋ ଲାକ୍ତୁ କଣା ମାରି ଟେବୁଲୁ ପିଣ୍ଡ୍ନି ଉଣ୍ତିଙ୍ଗ୍ କଣାଦି ବରୋ ମାର୍ହାତ୍ । ମାରି, ୱାନ୍ ଆୟା ଟେବୁଲ୍ ପିଣ୍ଡିଦେଙ୍ଗ୍ ଆକିସିଆ ମାରାନ୍ଦି କଣା ତିୟାର୍ କିଜି ବାଙ୍ଗାରାମ୍ଦାନ୍ ଡାଲାୟ୍ କିତାର୍ । ମାରି, ୱାନ୍ ଟେବୁଲ୍ଦି ମୁସୁକୁରି ସାଟିଙ୍ଗ୍ୱିଜୁ, ଇର୍ରିଙ୍ଗା, ଆବେଣି ସାଡ଼୍ୱା ମାରି କୁଡ଼ୁକା ମାରି ସାଟି, ୱାକ୍ନି ଉଣ୍ତିଙ୍ଗ୍ ମୁତା ନେଗି ବାଙ୍ଗାରାମ୍ଦାନ୍ ତିଆର୍ କିତାନ୍ ।
ବାଙ୍ଗାରାମ୍ଦି ଦିୱା ଇଡ୍ନିକା ତିୟାର୍ କିନିକା
(ଯାତ୍ରା ୨୫:୩୧-୪୦)
ମାରି, ୱାନ୍ ନେଗି ବାଙ୍ଗାରାମ୍ଦାନ୍ ଉନ୍ଡ୍ରି ଦିୱା ଇଡ୍ନିକା ତିୟାର୍ କିତାନ୍, ୱାନ୍ ମୁଟୁଲାଦାନ୍ କତ୍ସି ଦିୱା ଇଡ୍ନିକା, ଆବେଣି ମୋଦଲ୍ ମାରି କମେଙ୍ଗ୍ ତିୟାର୍ କିତାନ୍, ମାରି ଆବେଣି ଗୁଡ଼ୁବେଲି, ଡୁଣ୍ତି ମାରି ପୁଙ୍ଗୁଁ ଆବେନୁ ମିସାତାତ୍ । ଆୟା ଦିୱା ଇଡ୍ନିମାନୁ ଉନ୍ଡ୍ରି ତରଟାନ୍ ମୁଣ୍ଡ୍ରି କମେଙ୍ଗ୍ ମାରି ଦିୱା ଇଡ୍ନି ଆଇ ତରଟାନ୍ ମୁଣ୍ଡ୍ରି କମେଙ୍ଗ୍, ଇୟା ସୋ ଗୋଟା କମେଙ୍ଗ୍ ଆବେନୁ ସତେ । ମାରି, ଉନ୍ଡ୍ରି କମାଦୁ ବୁମିକାତଲି ପୁଙ୍ଗୁଁତି ମୁଣ୍ଡ୍ରି ଗୁଡ଼ୁବେଲି, ଡୁଣ୍ତି ମାରି ପୁଙ୍ଗୁଁ, ମାରି ଆଇ କମାଦୁ ବୁମିକାତଲି ପୁଙ୍ଗୁଁତି ମୁଣ୍ଡ୍ରି ଗୁଡ଼ୁବେଲି, ଡୁଣ୍ତି ମାରି ପୁଙ୍ଗୁଁ, ଇୟାୱାଜା ଦିୱା ଇଡ୍ନି ମାଣାନ୍ ସଅତି ସୋ ଗୋଟା କମେଙ୍ଗା ମାର୍ହାତ୍ । ମାତର ଦିୱା ଇଡ୍ନିବାନୁ ବୁମିକାତଲି ପୁଙ୍ଗୁଁତି ନାଲ୍ଗି ଗୁଡ଼ୁବେଲି ମାରି ଆବେଣି ଡୁଣ୍ତି ମାରି ପୁଙ୍ଗୁଁ ମାର୍ହାତ୍ । ମାରି, ଆବେଣାନ୍ ଆମା ସୋ ଗୋଟା କମେଙ୍ଗ୍ ସତେ, ଆୟା ଇସାବ୍ଦାନ୍ ଉନ୍ଡ୍ରି କମାଦି ଆଡ୍ଗି ଉନ୍ଡ୍ରି ଡୁଣ୍ତି ମାରି ଆଇ କମାଦି ଆଡ୍ଗି ଉନ୍ଡ୍ରି ଡୁଣ୍ତି ମାରି ଆଇ କମା ଆଡ୍ଗି ଉନ୍ଡ୍ରି ଡୁଣ୍ତି ମାର୍ହାତ୍ । ଇୟା ଡୁଣ୍ତି ମାରି କମେଙ୍ଗ୍ ଆବେଣିକା ଆତାତ୍ ମାରି ୱିଜୁ ନେଗି ବାଙ୍ଗାରାମ୍ଦାନ୍ ତିୟାର୍ ଆତି ଉନ୍ଡ୍ରି ମୁଟୁଲାଦାନ୍ କତ୍ସି ପାଣି ଆତାତ୍ । ମାରି, ୱାନ୍ ଆୟା ଉଣ୍ତିଙ୍ଗ୍ ସାତ୍ ଗୋଟା ଦିୱେଙ୍ଗ୍, ସିମ୍ଟା ମାରି ରୁକୁଣା ନେଗି ବାଙ୍ଗାରାମ୍ଦାନ୍ ତିଆର୍ କିତାନ୍ । ୱାନ୍ ଉନ୍ଡ୍ରି ତାଲନ୍ତ 1ୱାଜା ନେଗି ବାଙ୍ଗାରାମ୍ଦାନ୍ ଆକା ମାରି ଆବେଣି ୱିଜୁ ସାଟିଙ୍ଗ୍ ତିଆର୍ କିତାନ୍ ।
ଦୁପ୍ଣି ବେଦି ତିଆର୍ କିନିକା
(ଯାତ୍ରା ୩୦:୧-୫)
ଇୟାୱେନ୍କା ୱାନ୍ ଆକିସିଆ ମାରାନ୍ଦାନ୍ ଉନ୍ଡ୍ରି କିୟୁ ନିରିକା ମାରି ଉନ୍ଡ୍ରି କିୟୁ ଅସାର୍ ମାରି ରୁଣ୍ଡି କିୟୁ ଉଚ୍ଚା ନାଲ୍ଗି କୋନାଦି ଦୁପ୍ଣି ବେଦି ତିଆର୍ କିତାନ୍, ଆବେଣି କମ୍କୁ ୱିଜୁ ଆବେଣି ବାଗ୍ ଆତେ । ମାରି, ଆକା ଆବେଣି ମୁସ୍କୁ, ମାରି ଆବେଣି ନାଲ୍ଗି ତରିନ୍ ମାରି ଆବେଣି କମୁୱିଜୁ ନେଗି ବାଙ୍ଗାରାମ୍ଦାନ୍ ଡାଲାୟ୍ କିତାର୍; ମାରି, ୱାନ୍ ଆବେଣି ୱିଜୁ ତରିନ୍ ବାଙ୍ଗାରାମ୍ଦି ଅଟି କିତାନ୍ । ମାରି, ଆବେଣି ପିଣ୍ଡ୍ନି ଉଣ୍ତିଙ୍ଗ୍ କଣାଦି ବରୋ ଉଣ୍ତିଙ୍ଗ୍ ଆବେଣି କାତି ଆଡ୍ଗି ରୁଣ୍ଡି ତରଟି ରୁଣ୍ଡି କନେଆଙ୍ଗ୍ ବାଙ୍ଗାରାମ୍ତି ରୁଣ୍ଡି ରୁଣ୍ଡି ବରୋ ତିୟାର୍ କିତାନ୍ । ମାରି ଆକିସିଆ ମାରାନ୍ଦାନ୍ କଣା କିତାନ୍ ମାରି ଆକା ବାଙ୍ଗାରାମ୍ଦାନ୍ ଡାଲାୟ୍ କିତାର୍ ।
ତାଲାଦୁ ୱାକ୍ନି ନିୟୁ ମାରି ଦୁପ୍ଣି
(ଯାତ୍ରା ୩୦:୨୨-୩୮)
ଇୟାୱେନ୍କା ୱାର୍ ତାଲାଦୁ ଉସ୍ନି ପବିତ୍ର ନିୟୁ ମାରି ଦୁପ୍ଣି ଉଣ୍ତିଙ୍ଗ୍ ବାସ୍ନା ଦୁପ୍ଣି ପାଣି ଇସାବ୍ଦାନ୍ ବାସ୍ନାଦି ଜିନିସ୍ ତିଆର୍ କିତାର୍ ।
Source notes (1)
- Footnote ତାଲନ୍ତ ତିରିସ୍ ତିନ୍ କିଲଗ୍ରାମ
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.