Konda Porja Bible
ଯାତ୍ରା ବଇ 38
ହୋମ୍ ବେଦି ତିଆର୍ କିନିକା
(ଯାତ୍ରା ୨୭:୧-୮)
ୱାନ୍ ଆକିସିଆ ମାରାନ୍ଦାନ୍ ପାସ୍ ଗୋଟା ମୁରେଙ୍ଗ୍ ନିରିକା ମାରି ପାସ୍ ଗୋଟା ମୁରେଙ୍ଗ୍ ଅସାର୍ ମାରି ମୁଣ୍ଡ୍ରି ମୁରେଙ୍ଗ୍ ଉଚ୍ଚା ଉନ୍ଡ୍ରି ନାଲ୍ଗି କୋନେଙ୍ଗାଣି ହୋମ୍ ଆଡ଼ିକ୍ନି ବେଦି ତିୟାର୍ କିତାନ୍ । ମାରି, ଆବେଣି ନାଲ୍ଗି କୋନେଙ୍ଗା ମୁସୁକୁ କମୁ ତିୟାର୍ କିଜି ପିତଲ୍ ଡାଲାୟ୍ କିତାର୍; ଆୟା କମୁ ୱିଜୁ ଆବେଣିକା ଆତାତ୍ । ମାରି ଆୟା ବେଦିଦି ୱିଜୁ ସାଟିଙ୍ଗ୍, ଇର୍ରିଙ୍ଗ୍, ନିରୁ ଇଡ୍ନି ସାଟି, ନିରୁ ତାଡ଼ିନି ସାଟ୍ୱା, କୁଣ୍ତ୍, ଗଜିୟା ସାଟ୍ୱା, ରୁକ୍ଣା, ଇୟା ୱିଜୁ ସାଟିଙ୍ଗ୍ ପିତଲ୍ଦାନ୍ ତିଆର୍ କିତାର୍ । ଇୟା ବେଦିଦି ବୁମିଦି ଆଡ୍ଗିରାନ୍ ନାଣିମି ସାନ୍ଦି ପିତଲ୍ଦାନ୍ ତିଆର୍ ଆତି ଜାଲି ସିକିଣି କିତାନ୍ । ମାରି, କଣାଦି ବରୋ ଉଣ୍ତିଙ୍ଗ୍ ଆୟା ପିତଲ୍ ସିକିଣିଦି ନାଲ୍ଗି କନେଙ୍ଗା ନାଲ୍ଗି ବରୋ କିତାନ୍ । ମାରି, ୱାନ୍ ଆକିସିଆ ମାରାନ୍ଦାନ୍ ଆୟା କଣା ତିୟାର୍ କିଜି ପିତଲ୍ଦାନ୍ ଡାଲାୟ୍ କିତାର୍ । ବେଦି ପିଣ୍ତ୍ନି ଉଣ୍ତିଙ୍ଗ୍ ଆବେଣି ମୁସୁକୁ ଆୟା କଣା ବରୋଦୁ ଡ଼ୁଗିସ୍ କିତାନ୍; ମାରି, ପାଗ୍ଡ଼ ଡ଼ିସ୍ଇ ପାଟାଦାନ୍ ବେଦି ତିଆର୍ କିତାନ୍ ।
ପିତଲ୍ଦି ନର୍ବାନି କୁଣ୍ତ୍ ତିଆର୍ କିନିକା
(ଯାତ୍ରା ୨୭:୭-୧୯)
ମାରି, ଆମା ଆଇମେକ୍ ମିସାଜିସାନି ଗୁଡ଼ାଦି ସେର୍ଲାଦି ଆଗ୍ଡ଼ି ସେବା କିତେ, ଆୟା ସେବାକିନି ଆଇମେକା ପିତଲ୍ଦାନ୍ ତିଆର୍ ଆତି ଦାର୍ପାଣ୍ତାନ୍ ଆୟା ନର୍ବାନି କୁଣ୍ତ୍ ମାରି ଆବେଣି ଗୁଦୁରି ତିୟାର୍ କିତେ ।
ତେବାନି ଗୁଡ଼ାଦି ଦୁୱାର୍ ତିଆର୍ କିନିକା
(ଯାତ୍ରା ୨୭:୯-୧୯)
ଇୟାୱେନ୍କା ୱାର୍ ଦୁୱାର୍ ତିୟାର୍ କିତାର୍; ଉଣେର୍ ତରିଟି ଦୁୱାର୍ ଉଣେର୍ ତରନ୍ ପାଡ଼ି ସରୁ ଅଡ଼ିନି ନୁଲୁଦାନ୍ ଶହେ ମୁରାଦି ପାର୍ଦା କିତାର୍ । ଆବେନୁ କୋଡ଼େ ଗୋଟା ମୁଣ୍ତା ମାରି କୋଡ଼େ ଗୋଟା ବନ୍ଦ୍କୁ ପିତଲ୍ଦିକା ମାରି ଆୟା ମୁଣ୍ତାଦି ଆକଡ଼ି ମାରି ଗୁଡ଼ୁବେଲି ୱେଣ୍ତିଦିକା ମାର୍ହାତ୍ ଡେବ୍ରା ତରଟି ପାର୍ଦା ଶହେ ମୁରା, ମାରି ଆବେନୁ କୋଡ଼େ ଗୋଟା ମୁଣ୍ଡେଙ୍ଗ୍ ମାରି କୋଡ଼େ ଗୋଟା ବନ୍ଦ୍କୁ ପିତଲ୍ଦିକା ମାରି ମୁଣ୍ଡେଙ୍ଗାଣି ଆକଡ଼ି ବାଡିଗା ମାର୍ହାତ୍ । ୱେନ୍କା ତରଟି ପାର୍ଦା ପସାସ୍ ଗୋଟା ମୁରେଙ୍ଗ୍ ମାର୍ହାତ୍, ଆବେଣି ଦୋସ୍ ଗୋଟା ମୁଣ୍ଡେଙ୍ଗ୍ ମାରି ଦୋସ୍ ଗୋଟା ବନ୍ଦ୍କୁ, ମାରି ମୁଣ୍ଡେଙ୍ଗାଣି ଆକଡ଼ି ମାରି ବାଡିଗା ୱେଣ୍ତିଦିକା ମାର୍ହାତ୍ । ଆଗ୍ଡ଼ି ତରିନ୍ ଆଗ୍ଡ଼ିରି ପାଡ଼ାକ୍ଦି ଉଣ୍ତିଙ୍ଗ୍ ପଚାସ୍ ଗୋଟା ମୁରେଙ୍ଗ୍ ମାର୍ହାତ୍ । ସେର୍ଲାଦି ଉନ୍ଡ୍ରି ତରଟି ଉଣ୍ତିଙ୍ଗ୍ ପନ୍ଦର ଗୋଟା ମୁରେଙ୍ଗ୍ ପାର୍ଦା ମାରି ଆବେଣି ମୁଣ୍ଡ୍ରି ମୁଣ୍ଡେଙ୍ଗ୍ ମାରି ମୁଣ୍ଡ୍ରି ବନ୍ଦ୍କୁ ମାର୍ହେ; ଆୟାୱାଜା ଆଇ ତରଟି ଉଣ୍ତିଙ୍ଗ୍ ମାର୍ହାତ୍ । ଦୁୱାର୍ ସେର୍ଲା ଲାକ୍ତୁ ଇୟା ତରିନ୍ ମାରି ଆୟା ତରିନ୍ ପନ୍ଦର ଗୋଟା ମୁରେଙ୍ଗ୍ ପାର୍ଦା ମାରି ଆବେଣି ମୁଣ୍ଡ୍ରି ମୁଣ୍ଡେଙ୍ଗ୍ ମାରି ମୁଣ୍ଡ୍ରି ବନ୍ଦ୍କୁ ମାର୍ହେ । ଦୁୱାର୍ତି ୱିଜୁତରିଟି ପାର୍ଦା ସରୁ ଅଡ଼ିନି ନୁଲୁଦାନ୍ ତିୟାର୍ ଆତା ମାର୍ହାତ୍ । ମାରି, ମୁଣ୍ଡେଙ୍ଗାଣି ବନ୍ଦ୍କୁ ୱିଜୁ ପିତଲ୍ଦିକା ମାର୍ହାତ୍; ମୁଣ୍ଡେଙ୍ଗାଣି ଆକଡ଼ି ମାରି ବାଡିଗା ୱେଣ୍ତିଦିକା; ଆବେଣି ମୁଣ୍ଡାଦିଟିପୁ ୱେଣ୍ତି ପୁଙ୍ଗୁଁପୁତିକା; ମାରି, ୱେଣ୍ତି ବାଡିଗାଦାନ୍ ଦୁୱାର୍ ୱିଜୁ ମୁଣ୍ଡେଙ୍ଗ୍ ମିସାତେ ମାର୍ହେ । ମାରି, ଦୁୱାର୍ ସେର୍ଲା ପିଡ଼ିକ୍ନି ୱାତି ନିଡ଼ି, ସେର୍ଗାତି ରଙ୍ଗ୍ ମାରି ଏରାନି ରଙ୍ଗ୍ ମାରି ନେଗି ଅଡ଼ିନି ନୁଲୁଦାନ୍ ତିଆର୍ ଆତିକା ମାରି ଦୁୱାର୍ ପାର୍ଦା ୱାଜା ଆକା ନିରିକା କୋଡ଼େ ଗୋଟା ମୁରେଙ୍ଗ୍ ମାରି ଅସାର୍ଦାନ୍ ପାସ୍ ଗୋଟା ମୁରେଙ୍ଗ୍ ଉଚ୍ଚା ମାର୍ହାତ୍ । ମାରି, ଆବେଣି ପିତଲ୍ଦି ନାଲ୍ଗି ମୁଣ୍ଡେଙ୍ଗ୍, ନାଲ୍ଗି ବନ୍ଦ୍କୁ, ୱେଣ୍ତିଦି ଆକଡ଼ି ମାରି ଆବେଣି ମୁଣ୍ଡାଟିପୁ ୱେଣ୍ତି ମାରି ବାଡିଗା ୱେଣ୍ତିଦିକା ମାର୍ହାତ୍ । ମାରି, ତେବାନି ଗୁଡ଼ାଦି ମାରି ଦୁୱାର୍ତି ୱିଜୁ ତରଟି କୁଟିଙ୍ଗ୍ ୱିଜୁ ପିତଲ୍ଦିକେଙ୍ଗ୍ ମାର୍ହେ ।
ତେବାନି ଗୁଡ଼ାଦି ଉଣ୍ତିଙ୍ଗ୍ ବ୍ୟବ୍ଆର୍ ଆନି ଜିନିସ୍
ଲେବିୟ ଲୋକାଦି ପାଣିଦି ଉଣ୍ତିଙ୍ଗ୍ ହାରୋଣ ଜାଜକଦି ମାରିନ୍ ଇଥାମରଦି ମାଣାନ୍ ମୋଶାଦି ମାଟା ଇସାବ୍ଦାନ୍ ମିସାଜିସାନି ଗୁଡ଼ାଦି, ଇରିଙ୍ଗ୍, ସାକି ୱାଜା ମିସାଜିସାନି ଗୁଡ଼ାଦି ଲେକିସ୍ କିନି ଜିନିସ୍ ୱିଜୁଦି ଇକା ଲେକିସ୍ କିଆୟ୍ଆତାତ୍ । ପ୍ରବୁ ମୋଶାଦି ମାଣାନ୍ ଆମା ମାଟା ଇର୍ହାମାର୍ହାନ୍, ଆୟା ଇସାବ୍ଦାନ୍ ଜିହୁଦା କୁଟୁମ୍ଦି ହୁରଦି ନାତି ଊରିଦି ମାରିନ୍ ବତ୍ସଲେଲ ଆୟା ୱିଜୁ ତିୟାର୍ କିତାମାର୍ହାର୍ । ମାରି ନିଡ଼ି ମାରି ସେର୍ଗା ରଙ୍ଗ୍, ଏରାନି ରଙ୍ଗ୍ ମାରି ଅଡ଼ିନି ନେଗି ସରୁ ନୁଲୁଦାନ୍ ତିୟାର୍ କିନିକାନ୍ ମାରି ଗଦେକିନି ମାରି ନେସ୍ନି ଗୁତ୍ନି ଦାନ୍ କୁଟୁମ୍ଦି ଅହିସାମକଦି ମାରିନ୍ ଅହଲିୟାବ ସାଙ୍ଗ୍କୁ ମାର୍ହାର୍ । ପବିତ୍ର ବାଡି ତିୟାର୍କିନି ୱିଜୁ ପାଣିଦୁ ଇୟାୱିଜୁ ବାଙ୍ଗାରାମ୍ ଲାଗେଆତାତ୍, ଇର୍ରିଙ୍ଗ୍, ପୁଜାଦି; ୱିଜୁ ବାଙ୍ଗାରାମ୍ ପବିତ୍ର ବାଡିଦି ସେକଲ୍ ଇସାବ୍ଦାନ୍ କୋଡ଼େ ନଅ ଗୋଟା ତାଲନ୍ତ ସାତ୍ସ ତିରିସ୍ ସେକଲ ମାର୍ହାତ୍ । ମାରି, ମଣ୍ଡଲିଦି ଲୋକା ମାନ୍ଦାଦି ଲେକିସ୍ ଆତି ଲକାଦି ୱେଣ୍ତି ପବିତ୍ର ବାଡିଦି ସେକଲ1 ଇସାବ୍ଦାନ୍ ଶହେ ତାଲନ୍ତ ଏକ୍ ଆଜାର୍ ସାତ୍ସ ସତୁରି ପାସ୍ ସେକଲ ମାର୍ହାତ୍ । ୱିଜୁ ଇସାବ୍ଆତି ଲୋକା ଉଣ୍ତିଙ୍ଗ୍, ଇର୍ରିଙ୍ଗା, ଆମାକାର୍ କୋଡ଼େ ବାର୍ସେକ୍ ବୟସ୍ତିକାର୍ ବା ଆବେଣାନ୍ ନାଣ୍ଡ ବୟସ୍ତିକାର ମାର୍ହାର୍, ଆୟା ସଅ ଲକିୟ ତିନି ଆଜାର୍ ପାସ୍ସୋ ପସାସ୍ ଲୋକା ମାଣାନ୍ ୱିଜୁ ଲୋକା ଉଣ୍ତିଙ୍ଗ୍ ଉନ୍ଡ୍ରି ଉନ୍ଡ୍ରି ଅଦା ସେକଲ, ଇର୍ରିଙ୍ଗା, ପବିତ୍ର ବାଡିଦି ସେକଲ ଇସାବ୍ଦାନ୍ ଅଦା ଅଦା ସେକଲ ସିଦେଙ୍ଗ୍ ଆତାମାର୍ହାତ୍ । ଆଦେଙ୍ଗ୍ ଆୟା ଶହେ ତାଲନ୍ତ ୱେଣ୍ତିଦାନ୍ ପବିତ୍ର ବାଡିଦି ମାରି ୱେରେଏ କିନି ୱାତିଦି ବନ୍ଦ୍କୁ ୱାକାଇ ଆତାତ୍; ଶହେ ବନ୍ଦ୍କୁ ଉଣ୍ତିଙ୍ଗ୍ ଶହେ ତାଲନ୍ତ, ଇର୍ରିଙ୍ଗ୍, ଉନ୍ଡ୍ରି ଉନ୍ଡ୍ରି ବନ୍ଦ୍ ଉଣ୍ତିଙ୍ଗ୍ ଉନ୍ଡ୍ରି ଉନ୍ଡ୍ରି ତାଳନ୍ତ ୱିଜିତାତ୍ । ମାରି, ଆୟା ଏକ୍ ଆଜାର୍ ସାତ୍ସ ସତୁରି ପାସ୍ ଗୋଟା ସେକଲ ୱେଣ୍ତିଦାନ୍ ଆୟା ମୁଣ୍ଡେଙ୍ଗା ଉଣ୍ତିଙ୍ଗ୍ ଆକଡ଼ି ତିୟାର୍ କିତାର୍ ମାରି ଆବେଣି ମୁଣ୍ଡାଟିପୁ ପୁତିକା ମାରି ବାଡିଗାଦାନ୍ କୁଡ଼ିତାତ୍ । ମାରି, ପୁଜାଦି ପିତଲ୍ ସତୁରି ତାଲନ୍ତ ଦୁଇ ଆଜାର୍ ସାରିସ ସେକଲ ମାର୍ହାତ୍ । ଆଦେଙ୍ଗ୍ ୱାନ୍ ଆୟା ମାଣାନ୍ ମିସାନି ଗୁଡ଼ା ଦୁୱାର୍ତି ବନ୍ଦ୍କୁ ମାରି ପିତଲ୍ଦି ବେଦି ମାରି ଆବେଣି ପିତଲ୍ଦି ସିକିଣି ମାରି ବେଦିଦି ୱିଜୁ ସାଟିଙ୍ଗ୍, ମାରି, ଦୁୱାର୍ତି ସାରିବେଡ଼୍ତିଦି ବନ୍ଦ୍କୁ ମାରି ଦୁୱାର୍ତି ବନ୍ଦ୍କୁ ମାରି ଇଲୁଦି ୱିଜୁ କୁଟିଙ୍ଗ୍ ମାରି ଦୁୱାର୍ତି ୱିଜୁତରଟି କୁଟିଙ୍ଗ୍ ୱିଜୁ ତିୟାର୍ କିତାନ୍ ।
Source notes (1)
- Footnote ସେକଲ ଏକ୍ ଆଜାର୍ କିଲୋଗ୍ରାମ
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.