Konda Porja Bible
ଯାତ୍ରା ବଇ 11
ଦସ୍ ଲମ୍ୱର୍ ମର୍ଡି ମାପୁରୁଦି ୱେର୍ନିକା
ସଦାପ୍ରବୁ ମୋସେଙ୍ଗ୍ ଇର୍ହାନ୍, “ମାପ୍ ରାଜା ପାରୋ ମାରି ମିସର ମୁସୁକୁ ମାରି ଉନ୍ଡ୍ରି ଦଣ୍ତ୍ ତାନାପ୍; ଆୟାୱେନ୍କା ୱାନ୍ ମିଙ୍ଗିଁ ଇୟା ବାଡିଦାନ୍ ସନ୍ଡ୍ରେଙ୍ଗ୍ ଡ଼ିସ୍ନାନ୍; ମାରି, ଡ଼ିସ୍ନି ୱେଡ଼ାଦୁ ୱାନ୍ ମିଙ୍ଗିଁ ଉଲ୍ପ୍ନାନ୍ । ଇୟାଉଣ୍ଡିଙ୍ଗ୍ ଇଲେଇ ଲୋକାଙ୍ଗ୍ ଗିତଣିଦୁ ୱେର୍ତୁ, ୱିଜେରେ ମେମାରି ନିଜେ ନିଜେଦି ଲାକ୍ତୁମାନି ଲୋକା ମାଣାନ୍ ମାରି ୱିଜୁ ଆଇମେକ୍ ନିଜେନିଜେଦି ଲାକ୍ତୁରି ଲୋକା ମାଣାନ୍ ବାଙ୍ଗାରାମ୍ ପୁସେଙ୍ଗ୍ ମାରି ୱେଣ୍ଡି ପୁସେଙ୍ଗ୍ ଲସ୍ସ ଆସ୍ତୁ ।” ମାରି ସଦାପ୍ରବୁ ମିସ୍ରିୟ ଲୋକା ଆଗ୍ଡ଼ି ଲୋକାଙ୍ଗ୍ ଦୟା କିତାନ୍ । ମାରି, ମିସର ଦେସ୍ତୁ ପାରୋଦି ଦାସର ମାରି ଲୋକା ଆଗ୍ଡ଼ି ମୋଶା ପେରି ଲୋକ୍ ଆତାନ୍ ।
ମୋଶା ଇର୍ହାନ୍, “ସଦାପ୍ରବୁ ଇୟା ମାଟା ଇଜିନାନ୍, ମାପ୍ ମାଜାର୍ ନାଡ଼ା ମିସର ଲୋଇ ସିଜି ସନାପ୍ ।” ଆବେଟ୍ ରାଜାଗାଦିଦୁ ବାସ୍ନି ପାରୋଦି ପାର୍ତୁମ୍ ଜନମ୍ ଆତି କଡ଼ ମାଣାନ୍ ଜାତା ନୁର୍ନି ସାକ୍ରାଣିଦି ପାର୍ତୁମ ଜନମ୍ ଆତି କଡ଼ ସାନ୍ଦି ମିସର ଦେସ୍ଦି ୱିଜୁ ପାର୍ତୁମ୍ ଜନମ୍ ଆତି ଲୋକ୍ ମାରି କଡିଙ୍ଗ୍ ଗରିଏଙ୍ଗ୍ ଆଗ୍ଡ଼ି ଜନମ୍ ଆତିକେଙ୍ଗ୍ ସାନେ । ଆଦେଙ୍ଗ୍ ୱିଜୁ ମିସର ଦେସ୍ତୁ, ଆୟାୱାଜା ଏସେଙ୍ଗ୍ ଆଏଣ୍ଡା ମାର୍ହାତ୍ ମାରି ଆଏତ୍, ଇୟାୱାଜା ଆଡ଼ାବାନି ଦିନ୍ ୱାନାତ୍ । ମାତର ସଦାପ୍ରବୁ ମିସ୍ରିୟ ଲୋକାବାଣାନ୍ ଇସ୍ରାଏଲ ଲୋକାଙ୍ଗ୍ ୱେର୍ଏ କିନାନ୍, ଇକା ଏଣ୍ଡେସ୍ ମିର୍ ନେସ୍ନିଦେର୍, ଇୟାଉଣ୍ଡିଙ୍ଗ୍ ଇସ୍ରାଏଲ ଲୋକା ଲୋଇ ଲୋକ୍ କି କଡିଗରିଏଙ୍ଗ୍ ଉଣ୍ତିଙ୍ଗ୍ ଉଣ୍ତ୍ରି ନୁକୁଡ଼ି ବା ଆଡ଼ାବାଏତ୍ । ଆବେନୁ ନି ଇୟାୱିଜୁ ଦାସର୍ ନା ଲାକ୍ତୁ ମାନାଜି ୱାନାର୍ ମାରି ନାଙ୍ଗି ମାଡ଼ିସ୍ କିଜି ଇନାର୍, ନିନ୍ ମାରି ନି ଲୋକ୍ ୱିଜେରେ ସୋସି ସାନ୍ଡ୍ରୁ; ଆୟାୱେନ୍କା ନାନ୍ ସୋସି ସନା । ୱାନ୍ ନାଣ୍ଡ ରିସାଦାନ୍ ପାରୋଦି ଲାକ୍ତୁରାନ୍ ସୋସି ସର୍ହାନ୍ । ସଦାପ୍ରବୁ ମୋସେଙ୍ଗ୍ ଇର୍ହାମାର୍ହାନ୍, “ମାପ୍ ଏଣ୍ଡେସ୍ ମିସର ଦେସ୍ତୁ ନିଜେଦି କାବାଆନି ବିସୟ୍ ନାଣ୍ଡ କିନାପ୍, ଇୟାଉଣ୍ଡିଙ୍ଗ୍ ପାରୋ ମି ମାଟାଦିଙ୍ଗ୍ ମନ୍ ସିଏନ୍ ।” ମାରି, ମୋଶା ମାରି ହାରୋଣ ପାରୋଦି ଆଗ୍ଡ଼ି ଇୟାୱିଜୁ କାବାଆନି ପାଣି କିତାମାର୍ହାର୍; ମାତର ସଦାପ୍ରବୁ ପାରୋଦି ଜିବନ୍ ଆଟ୍ୱା କିତାନ୍, ୱାନ୍ ନିଜେଦି ଦେସ୍ତାନ୍ ଇସ୍ରାଏଲ ଲୋକାଙ୍ଗ୍ ସନ୍ଡ୍ରେଙ୍ଗ୍ ସିଏତାନ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.