Konda Porja Bible
ଯାତ୍ରା ବଇ 25
ପବିତ୍ର ବାଡି ଉଣ୍ତିଙ୍ଗ୍ ଦାନ୍ସିନିକା
(ଯାତ୍ରା ୩୫:୪-୯)
ଇୟାୱେନ୍କା ପ୍ରବୁ ମୋସେଙ୍ଗ୍ ଇର୍ହାନ୍, ନିନ୍ ଇସ୍ରାଏଲ ଲୋକାଙ୍ଗ୍ ନା ଉଣ୍ତିଙ୍ଗ୍ ଦାନ୍ ଉଣ୍ତା କିଦେଙ୍ଗ୍ ଇନିଆ; ଆମାୱାନି ଜିବନ୍ ଆମାୱାନିଙ୍ଗ୍ ସିଦେଙ୍ଗ୍ ମନ୍ କିନାତ୍, ୱାନି ମାଣାନ୍ ନିନ୍ ନା ଆୟା ଦାନ୍ ଲସ୍ନି । ଇରିଙ୍ଗାଁ, ବାଙ୍ଗାରାମ୍, ୱେଣ୍ତି ମାରି ପିତଲ୍; ମାରି, ନିଡ଼ି ରଙ୍ଗ୍, ସେର୍ଗା ରଙ୍ଗ୍, ଏରାନି ରଙ୍ଗ୍ ମାରି ଗରିୟା ବୁର୍ବୁସାଦାନ୍ ତିଆର୍ଆତି ଅଡ଼ିନି ଟେରିକଟ୍ ୱାତି, ମାରି ନେତେର୍ ଆତି ମେଣ୍ଡାଦି ତଲୁ ମାରି କଡ଼୍କି ତଲୁ ମାରି ଆକିସିଆ ୱେର୍ଗୁ, ଦିୱା ଉଣ୍ତିଙ୍ଗ୍ ନିୟୁ ମାରି ଅବିସେକ୍ କିନି ନିୟୁ ମାରି ବାସ୍ନା ଦୁପ୍ଣି ଉଣ୍ତିଙ୍ଗ୍ ବାସ୍ନା ଜିନିସ୍ । ମାରି, ଏପୋଦ1 ମାରି ବକାଦୁ ଆରାନି ସାଜୁ ଉଣ୍ତିଙ୍ଗ୍ ଗୋମେଦକ ମଣି ୱିଜୁ କାସ୍ସିକିନି କାଲୁ; ଇୟା ୱିଜୁ ଦାନ୍ ୱାରି ମାଣାନ୍ ଲସ୍ନିଦେର୍ । ୱାର୍ ନା ଉଣ୍ତିଙ୍ଗ୍ ଉନ୍ଡ୍ରି ପବିତ୍ର ବାଡି ତିଆର୍ କିପିର୍; ଆବେଟ୍ ନାନ୍ ୱାରିବାନୁ ବାସା କିନା । ବାସାକିନି ଗୁଡ଼ାଦି ସିନା ମାରି ଆବେଣି ୱିଜୁ ଜିନିସ୍ଦି ସିନା ନାନ୍ ମିଙ୍ଗିଁ ଏଣ୍ତେସ୍ ତର୍ନା, ଆୟା ଇସାବ୍ଦାନ୍ ମିର୍ ୱିଜୁ କିନିଦେର୍ ।
ନିୟମ୍ ପେଡ଼ା
(ଯାତ୍ରା ୩୭:୧-୯)
ମାରି, ୱାର୍ ରୁଣ୍ତି କିୟୁ ଅଦା ନିରିକା ମାରି ଉଣ୍ତ୍ରି କିୟୁ ଅଦା ଅସାର୍ ମାରି ଉଣ୍ତ୍ରି କିୟୁ ଅଦା ଉଛା ଆକିସିଆ ୱେର୍ଗୁଦି ଉନ୍ଡ୍ରି ପେଡ଼ା ତିଆର୍ କିନିଦେର୍ । ଆବେନ୍ ମିର୍ ନେଗି ବାଙ୍ଗାରାମ୍ଦାନ୍ ଆକା ଡାଲାୟ୍ କିନିଦେର୍; ମାରି, ଆୟା ଲୋଇ ମାରି ଆତ୍ରେ ବା ଡାଲାୟ୍ କିନିଦେର୍, ମାରି, ଆୟା ମୁସୁକୁ ସାରିବେଡ଼୍ତି ବାଙ୍ଗାରାମ୍ଦି କାତି କିନିଦେର୍ । ମାରି, ଆୟା ଉଣ୍ତିଙ୍ଗ୍ ବାଙ୍ଗାରାମ୍ତି ନାଲ୍ଗି ଆସ୍ନିକେଙ୍ଗ୍ ଚଞ୍ଚ୍ତାନ୍ ୱାକ୍ସି ଆବେଣି ନାଲ୍ଗି କନାଦୁ ସିନିଦେର୍; ଆବେଣି ଉନ୍ଡ୍ରି ତରିନ୍ ରୁଣ୍ଡି ବାନୁ ଆସ୍ନିକା ମାରି ଆଇ ତରିନ୍ ରୁଣ୍ଡି ବାନୁ ଆସ୍ନିକା ତେବାନାତ୍ । ମାରି ମିର୍ ଆକିସିଆ ମାରାନ୍ଦାନ୍ ରୁଣ୍ଡି କଣା କିଜି ବାଙ୍ଗାରାମ୍ଦାନ୍ ଡାଲାୟ୍ କିନିଦେର୍ । ମାରି, ପେଡ଼ା ପିଣ୍ଡିନି ଉଣ୍ତିଙ୍ଗ୍ ପେଡ଼ାଦି ରିଆଙ୍ଗାଁ ତରିନ୍ ମାନି ବରୋଦୁ ଆୟା କଣା ଡ଼ୁଗିସ୍ କିନିଦେର୍ । ଆୟା କଣା ପେଡ଼ାଦି ଲୋଇ ମାନ୍ଜିନାତ୍, ଆବେଣାନ୍ ସୋପ୍ତେଙ୍ଗ୍ ଆଏତ୍ । ମାରି, ନାନ୍ ମିଙ୍ଗିଁ ଆମା ରୁଣ୍ତି କାଲୁଦୁ ରାସାତି ନିୟମ ଆକୁ ସିନା, ଆକା ଆୟା ପେଡ଼ାଦୁ ଇଡ୍ନିଦେର୍ ।
ଇୟାୱେନ୍କା ମିର୍ ନେଗି ବାଙ୍ଗାରାମ୍ଦାନ୍ ରୁଣ୍ଡି କିୟୁ ଅଦା ନିରିକା ମାରି ଉଣ୍ତ୍ରି କିୟୁ ଅଦା ଅସାର୍ତି ଉନ୍ଡ୍ରି ପାପ୍ତିଙ୍ଗ୍ ପିଡ଼ିକ୍ନି ଡାବ୍ଣା ତିଆର୍ କିନିଦେର୍ । ମିର୍ ବାଙ୍ଗାରାମ୍ଦି ରୁଣ୍ଡି ରେକାମାନି କିରୁବ ତିଆର୍ କିନିଦେର୍; ମୁଟୁଲା କତ୍ସି ଆକା ତିଆର୍ କିଜି ଆୟା ପାପ୍ତିଙ୍ଗ୍ ପିଡ଼ିକ୍ନି ଡାବ୍ଣାଦି ରୁଣ୍ଡି ତାଲାଦୁ ଇଡ୍ନିଦେର୍ । ଉନ୍ଡ୍ରେ କିରୁବ ଉନ୍ଡ୍ରି ତାଲାଦୁ ମାରି ଆଇ କିରୁବ ଆଇ ତାଲାଦୁ ତିଆର୍ କିନିଦେର୍; ରିୟାଙ୍ଗାଁ ତରିନ୍ ପାପ୍ତିଙ୍ଗ୍ ପିଡ଼ିକ୍ନି ଡାବ୍ଣା ୱାଲେ ମିସାକିଜି ମାରି ଆବେଣି ରୁଣ୍ଡି କନେଆଙ୍ଗ୍ ତିଆର୍ କିଜି ଇଡ୍ଦୁ । ମାରି, କିରୁବଙ୍ଗ୍ ସାମ୍ନା ସାମ୍ନି ଆଜି ରେକେଙ୍ଗ୍ ମୁସୁକୁ ପେର୍ଜି ପାପ୍ତିଙ୍ଗ୍ ପିଡ଼ିକ୍ନି ଡାବ୍ଣା ପିଡ଼ିକ୍ନାତ୍; ପାପ୍ତିଙ୍ଗ୍ ପିଡ଼ିକ୍ନି ଡାବ୍ଣା ଉଣ୍ତିଙ୍ଗ୍ କିରୁବଙ୍ଗା ମୋକମ୍ ତେବାନାତ୍ । ମିର୍ ଆୟା ପାପ୍ତିଙ୍ଗ୍ ପିଡ଼ିକ୍ନି ଡାବ୍ଣା ଆୟା ପେଡ଼ା ମୁସୁକୁ ଇଡ୍ନିଦେର୍, ମାରି, ନାନ୍ ମିଙ୍ଗିଁ ଆମା ରୁଣ୍ତି କାଲୁଦି ନିୟମ୍ ଆକୁ ସିନା, ଆକା ଆୟା ପେଡ଼ା ଲୋଇ ଇଡ୍ନିଦେର୍ । ମାରି ନାନ୍ ଆୟା ବାଡିଦୁ ମି ୱାଲେ ବେଟ୍ଆନା ମାରି ପାପ୍ତିଙ୍ଗ୍ ପିଡ଼ିକ୍ନି ଡାବ୍ଣାଦି ମୁସୁକୁରି ବାଗ୍ତୁ, ଇର୍ରିଙ୍ଗା, ନିୟମ ପେଡ଼ାଦି ମୁସୁକୁରି କିରୁବ ରୁଣ୍ଡି ମାଣାନ୍ ମି ୱାଲେ ୱାର୍ଗିଜି ଇସ୍ରାଏଲ ଲୋକା ବିସୟ୍ତି ନା ୱିଜୁ ମାଟା ମିଙ୍ଗିଁ ୱେର୍ନା ।
ରୁଟି ଉଣ୍ତିଙ୍ଗ୍ ପବିତ୍ର ଟେବୁଲୁ
(ଯାତ୍ରା ୩୭:୧୦-୧୬)
ଆୟା ୱେନ୍କା ମିର୍ ଆକିସିଆ ମାରାନ୍ଦାନ୍ ରୁଣ୍ଡି ମୁରେଙ୍ଗ୍ ନିରିକା ମାରି ଉନ୍ଡ୍ରେ ମୁରା ଅସାର୍ ମାରି ରୁଣ୍ତି ମୁରେଙ୍ଗ୍ ଅଦା ଉଛା ଉନ୍ଡ୍ରି ଟେବୁଲୁ ତିଆର୍ କିଦୁ । ନେଗି ବାଙ୍ଗାରାମ୍ଦାନ୍ ଆକା ଡାଲାୟ୍ କିନିଦେର୍, ମାରି, ଆବେଣି ସାରିବେଡ଼୍ତି ବାଙ୍ଗାରାମ୍ କାତି କିନିଦେର୍ । ମାରି, ଆବେଣି ସାରିବେଡ଼୍ତି ନାଲ୍ଗି ଡ଼ାସ୍କେଙ୍ଗ୍ତି ଉନ୍ଡ୍ରି ବରୋ କିନିଦେର୍ ମାରି ଆୟା ବରୋଦି ସାରିବେଡ଼୍ତି ବାଙ୍ଗାରାମ୍ଦି କାତି କିନିଦେର୍ । ମାରି ବାଙ୍ଗାରାମ୍ ତିଆର୍ ଆତି ନାଲ୍ଗି ବରୋ କିଜି ଆବେଣି ନାଲ୍ଗି କାଲ୍କୁ ନାଲ୍ଗି କୋନେଙ୍ଗା ଇଡ୍ନିଦେର୍ । ଟେବୁଲ୍ ପିଡ୍ନି କଣା ଆସ୍ନି ଉଣ୍ତିଙ୍ଗ୍ ଆୟା ବରୋ କେରେପ୍ନି ପାଡ଼ି ମାନାତ୍ । ମାରି, ଆୟା ଟେବୁଲ୍ ପିଡ୍ନି ଉଣ୍ତିଙ୍ଗ୍ ଆକିସିଆ ମାରାନ୍ଦାନ୍ କଣା ତିଆର୍ କିଜି ବାଙ୍ଗାରାମ୍ଦାନ୍ ଡାଲାୟ୍ କିନିଦେର୍ । ମାରି, ସାଡ଼ୁୱା, ଡୁବାଇ, କୁଡ଼ୁକା ମାରି ୱାକ୍ନି ଉଣ୍ତିଙ୍ଗ୍ ମୁତା ତିଆର୍ କିନିଦେର୍, ଇୟା ୱିଜୁ ନେଗି ବାଙ୍ଗାରାମ୍ଦାନ୍ ତିଆର୍ କିନିଦେର୍ । ମିର୍ ଆୟା ଟେବୁଲୁ ମୁସୁକୁ ମା ଆଗ୍ଡ଼ି ୱିଜୁଦିନ୍ ପବିତ୍ର ରୁଟି ଇଡ୍ନିଦେର୍ ।
ବାଙ୍ଗାରାମ୍ଦି ଦିୱା ଇଡ୍ନି ମୁଣ୍ତା
(ଯାତ୍ରା ୩୭:୧୭-୨୪)
ମାରିବା, ମିର୍ ନେଗି ବାଙ୍ଗାରାମ୍ଦି ଉନ୍ଡ୍ରି ଦିୱା ମୁଣ୍ତା ତିଆର୍ କିନିଦେର୍; ମୁଟୁଲା କତ୍ସି କିଜି ଦିୱା ମୁଣ୍ତା, ଆବେଣି ମୋଦଲ୍ ମାରି କମେଙ୍ଗ୍ ତିଆର୍ ଆନାତ୍; ମାରି ଗୁଡ଼ୁବେଲି ପୁଙ୍ଗୁଁ ମାରି ଡୁଣ୍ତି ମାରି ପୁଙ୍ଗୁଁ ଆବେନୁ ମିସାନା ତେବାନାତ୍ । ଇର୍ରିଙ୍ଗା, ଆବେନୁ ଉନ୍ଡ୍ରି ତରିନ୍ ମୁଣ୍ଡ୍ରି ଦିୱା କମା ମାରି ଉନ୍ଡ୍ରି ତରିନ୍ ମୁଣ୍ଡ୍ରି ଦିୱା କମା, ଇୟାୱାଜା ରୁଣ୍ଡି ପାଡ଼ାକାରାନ୍ ସୋ ଗୋଟା କମେଙ୍ଗ୍ ସଅନେ । ଆବେନୁ ଉନ୍ଡ୍ରି କମାଦୁ ବୁମିକାତଲି ପୁଙ୍ଗୁଁ ପୁତିନାନି ମୁଣ୍ଡ୍ରି ଗୁଡ଼ୁବେଲି, ଡୁଣ୍ତି ମାରି ପୁଙ୍ଗୁଁ ତେବାନାତ୍; ମାରି, ଆଇ କମାଦୁ ବୁମିକାତଲି ପୁଙ୍ଗୁଁ ପୁତିନାନି ମୁଣ୍ତ୍ରି ଗୁଡ଼ୁବେଲି, ଡୁଣ୍ତି ମାରି ପୁଙ୍ଗୁଁ ତେବାନାତ୍; ଆୟା ଦିୱା ମୁଣ୍ତାଦାନ୍ ସଅତି ସୋ ଗୋଟା କମାଦୁ ଇୟାୱାଜା ଆନାତ୍ । ମାତର ଦିୱା ମୁଣ୍ତାଦୁ ବୁମିକାତଲି ପୁଙ୍ଗୁଁ ପୁତିନାନି ନାଲ୍ଗି ଗୁଡ଼ୁବେଲି ପୁଙ୍ଗୁଁ, ଡୁଣ୍ତି ମାରି ପୁଙ୍ଗୁଁ ତେବାନାତ୍; ମାରି, ଆୟା ଦିୱା ମୁଣ୍ତାଦାନ୍ ଆମା ସୋ ଗୋଟା କମେଙ୍ଗ୍ ସନେ, ୱାନିକା ଉନ୍ଡ୍ରି କମା ଆଡ୍ଗି ଉନ୍ଡ୍ରି ଡୁଣ୍ତି ମାରିଉଣ୍ଡ୍ରି କମା ଆଡ୍ଗି ଉନ୍ଡ୍ରି ଡୁଣ୍ତି ମାରି ମୁଣ୍ତ୍ରି କମା ଆଡ୍ଗି ଉଣ୍ତ୍ରି ଡୁଣ୍ତି ତେବାନାତ୍ । ମାରି, ଡୁଣ୍ତି ମାରି କମା ଆବେନ୍ ମିସାନାତ୍ ମାରି ୱିଜୁ ନେଗି ବାଙ୍ଗାରାମ୍ଦାନ୍ ତିଆର୍ଆତି ଉନ୍ଡ୍ରି ମୁଟୁଲା କତ୍ସି ପାଣି ଆନାତ୍ । ମାରି, ମିର୍ ଆୟା ଉଣ୍ତିଙ୍ଗ୍ ସାତ୍ ଗୋଟା ଦିୱେଙ୍ଗ୍ ତିଆର୍ କିନିଦେର୍; ଆବେନୁ ଲୋକୁ ଆୟା ଦିୱା କାସିସ୍ତିଙ୍ଗା, ଆୟା ଆଗ୍ଡ଼ି ଜାୟ୍ ଆନାତ୍ ମାରି ନେଗି ବାଙ୍ଗାରାମ୍ଦାନ୍ ଆବେଣି ସିମ୍ଟା ମାରି ରୁକୁଣା କିନିଦେର୍ । ଇୟା ଦିୱା ମୁଣ୍ତା ମାରି ଆବେଣି ଜିନିସ୍ ୱିଜୁ ତିରିସ୍ ତିନ୍ କେଜି ନେଗି ବାଙ୍ଗାରାମ୍ଦାନ୍ ତିଆର୍ ଆନାତ୍ । ଜାଗାର୍ତା, ଗରନ୍ତୁ ମିଙ୍ଗିଁ ଆବେଣି ଆମା ଆମାକା ମାଟା ସିଆଇ ଆତାମାନାତ୍ ଆୟାୱାଜା ୱିଜୁ କିଦୁ ।
Source notes (1)
- Footnote ଜାଜକର୍ ଆରାନିମାନି ଆଙ୍ଗିଁଦି ମୁସ୍କୁ ତରାନିମାନି ତାନିଙ୍ଗ୍ ଏପୋଦ ଇନାର୍
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.