Konda Porja Bible
ଯାତ୍ରା ବଇ 24
ନିୟମ୍ ବୋଇଦୁ ସିଲ୍ ଡାକ୍ନିକା
ଇୟାୱେନ୍କା ପ୍ରବୁ ମୋସେଙ୍ଗ୍ ଇର୍ହାନ୍, “ମିର୍ ମାରି ହାରୋଣ ମାରି ନାଦବ, ଅବିହୂ ମାରି ଇସ୍ରାଏଲଦି ପେରିକାର୍ ସତୁରି ଲୋକୁ, ମିର୍ ପ୍ରବୁଦି ଲାକ୍ତୁ ଗରନ୍ତୁ ସୋଲ୍ସି ଆକ ମାନ୍ଜି ୱାନି ପାର୍ତନା କିଦୁ । କେବଲ ମୋସା ପ୍ରବୁଦି ଲାକ୍ତୁ ୱାନାନ୍, ମାତର ୱାର୍ ଲାକ୍ତୁ ରେଏର୍, ଇର୍ରିଙ୍ଗା ଲୋକୁ ୱାନିୱାଲେ ଗରନ୍ତୁ ସଲ୍ଏର୍ ।”
ଆଦେଙ୍ଗ୍ ମୋସା ୱାଜି ପ୍ରବୁଦି ଆୟା ୱିଜୁ ମାଟା ମାରି ନିୟମ୍ ବିସୟ୍ ଲୋକାଙ୍ଗ୍ ଇର୍ହାନ୍, ମାରି ୱିଜେରେ ଅର୍ସେ ଇର୍ହାର୍, “ପ୍ରବୁ ଆମା ୱିଜୁ ମାଟା ଇର୍ହାମାନାନ୍, ଆୟାକା ୱିଜୁ ମାପ୍ ମାନାନାପ୍ ।” ଇୟାୱେନ୍କା ମୋସା ପ୍ରବୁଦି ୱିଜୁ ବାକ୍ୟ ରାସ୍ତାନ୍, ମାରି, ସାଲ୍ଦି ନିଙ୍ଗ୍ଜି ଗରନ୍ ଆଡ୍ଗି ଉନ୍ଡ୍ରି ଜଜ୍ଞବେଦି ମାରି ଇସ୍ରାଏଲଦି ବାର ଗୋଟା କୁଟୁମ୍ ଇସାବ୍ଦାନ୍ ବାର ଗୋଟା କାଲୁ ମୁଣ୍ତା ତିଆର୍ କିତାନ୍ । ମାରି, ୱାନ୍ ଇସ୍ରାଏଲ ଲୋକା ମୁରୁଲିରିଙ୍ଗ୍ ପକତାନ୍ । ମାରି ୱାର୍ ପ୍ରବୁଦି ଉଣ୍ତିଙ୍ଗ୍ ହୋମବଲି ମାରି ସାନ୍ତି ଉଣ୍ତିଙ୍ଗ୍ ବାଲ୍ସ୍ତିକଡିଙ୍ଗାଁ ପୁଜା ସିଜି କାତ୍ତାର୍ । ଆବେନ୍ ମୋସା ନେତେର୍ ଅସି ଆବେଣି ଅଦା ସାଟିଦୁ ଇଟ୍ତାନ୍, ମାରି ଅଦା ନେତେର୍ ବେଦି ମୁସୁକୁ ଲୋଜିତାନ୍ । ମାରି, ନିୟମ୍ ବଇ ଅସି ଲୋକା ଆଗ୍ଡ଼ି ପୋଡ଼ାତାନ୍; ଆବେଟ୍ ୱାର୍ ଇର୍ହାର୍, “ପ୍ରବୁ ଆମା ଆମାକା ଇର୍ହାମାନାନ୍, ଆୟାକା ୱିଜୁ ମାପ୍ ମାନାନାପ୍ ।”
ଆବେଟ୍ ମୋସା ଆୟା ନେତେର୍ ଅସି ଲୋକା ମୁସୁକୁ ଲୋଜ୍ଜି ଇର୍ହାନ୍, “ସୁଡ଼ୁଦୁ ପ୍ରବୁ ମି ୱାଲେ ଇୟା ୱିଜୁ ମାଟା ବିସୟ୍ତି ଆମା ରାଜିନାମା କିତାମାନାନ୍, ଆୟା ରାଜିନାମାଦି ନେତେର୍ ଇକା ।”
ଆଦେଙ୍ଗ୍ ମୋସା, ହାରୋଣ, ନାଦବ, ଅବିହୂ ମାରି ଇସ୍ରାଏଲଦି ପେରିକାର୍ ସତୁରି ଲୋକୁ ଗରନ୍ତୁ ସର୍ହାର୍; ମାରି ୱାର୍ ଇସ୍ରାଏଲଦି ମାପୁରୁଙ୍ଗୁଁ ସୁଡ଼ୁତାର୍ । ମାରି, ଇସ୍ରାଏଲଦି ମାପୁରୁଦି ପାଦ୍ ଆଡ୍ଗିରି ବାଡି ଜାୟ୍ ନିଳକାନ୍ତ କାଲୁ ତିଆର୍ ଆତି ପାଣି ୱାଜା ମାରି ଟିକ୍ ବାଦଡ଼ ୱାଜା ମାର୍ହାତ୍ । ମାରି ୱାନ୍ ଇସ୍ରାଏଲ ଲୋକ୍ ପେରିୱାରି ବିରୁଦ୍ତାନ୍ କିୟୁ ପେର୍ଏତାନ୍; ମାତର ୱାର୍ ମାପୁରୁଙ୍ଗୁଁ ସୁଡ଼ୁତାର୍, ମାରି, ତିର୍ଆର୍ ମାରି ଉଟାର୍ ।
ସିନୟ ଗରନ୍ତୁ ମୋସା
ଇୟାୱେନ୍କା ପ୍ରବୁ ମୋସେଙ୍ଗ୍ ଇର୍ହାନ୍, “ନିନ୍ ଗରନ୍ତୁ ସୋଲ୍ସି ନା ଲାକ୍ତୁ ୱାଜି ଇୟା ବାଡିଦୁ ମାନାଆ; ଆବେଟ୍ ନାନ୍ ଲୋକା ସିକିୟା ଉଣ୍ତିଙ୍ଗ୍ ଆମାକା ରାସ୍ତାମାନା, ଆକା, ଇର୍ରିଙ୍ଗା, ମାରି ମାଟା ବିସୟ୍ ରୁଣ୍ତି କାଲୁଦୁ ରାସାତିମାନି ନିୟମ୍ଦି ପାଟା ନିଙ୍ଗିଁ ସିନା ।” ଆବେଟ୍ ମୋସା ମାରି ୱାନି ୱାଲେ ତେବାନି ଜିହଶୁୟ ନିଙ୍ଗିଁତାର୍; ମାରି, ମୋସା ମାପୁରୁଦି ଗରନ୍ତୁ ସର୍ହାନ୍ । ମାରି ମୋସା ନେତାରିଙ୍ଗ୍ ଇର୍ହାନ୍, “ନାନ୍ ଆମାସାନ୍ଦି ମି ଲାକ୍ତୁ ଡ଼େସି ରେଏ, ଆୟାସାନ୍ଦି ମିର୍ ନା ଉଣ୍ତିଙ୍ଗ୍ କାପ୍କିଜି ଇବେନୁ ମାନ୍ଡ୍ରୁ; ସୁଡ଼ୁଦୁ, ହାରୋଣ ମାରି ହୁର ମି ଲାକ୍ତୁ ମାନାର୍, ଏନ୍ ଇନି ଜାଟିଙ୍ଗ୍ ଆତିଙ୍ଗାଁ, ୱାନ୍ ୱାରି ଲାକ୍ତୁ ସଲିନ୍ ।”
ଇୟାୱେନ୍କା ମୋସା ଗରନ୍ତୁ ଏକ୍ତାନ୍, ମାରି, ବାଦଡ଼୍ ଗରତିଙ୍ଗ୍ ପିଡ଼ିକ୍ତାତ୍ । ଆବେଟ୍ ସିନୟ ଗରନ୍ ମୁସୁକୁ ପ୍ରବୁଦି ଜାୟ୍ ୱାତାତ୍; ମାରି ଆକା ସୋ ଦିନ୍ ସାନ୍ଦି ବାଦଡ଼୍ କେରେପ୍ତା ମାର୍ହାତ୍; ଆୟା ୱେନ୍କା ଆୟା ସାତ୍ ଦିନ୍ତୁ ବାଦଡ଼୍ ଲୋଇରାନ୍ ମୋସେଙ୍ଗ୍ କୁକୁତାନ୍ । ଆବେଟ୍ ଇସ୍ରାଏଲ ଲୋକା ଆଗ୍ଡ଼ି ଗରନ୍ ଦାମ୍କୁ ଡ଼ିଙ୍ଗ୍ନି ସିସୁ ୱାଜା ପ୍ରବୁଦି ଜାୟ୍ ତରିତାତ୍ । ମାରି, ମୋସା ବାଦଡ଼୍ ଲୋଇ ଡ଼ୁଗ୍ଜି ଗରନ୍ ମୁସୁକୁ ସୋଲ୍ସି ସାଲିସ୍ ଦିନ୍ ୱେଡ଼ା ନି ନାଡ଼ା ଆୟା ଗରନ୍ ମୁସ୍କୁ ମାର୍ହାନ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.