Konda Porja Bible
ଯାତ୍ରା ବଇ 1
ମିସର ଦେସ୍ତୁ ଇସ୍ରାଏଲ ଲୋକା କାସ୍ଟୁ
ଜାକୁବ ନି ଆମା ମାରିସିର୍ ୱିଜେରେ ନିଜେନିଜେଦି ଲୋକାଙ୍ଗ୍ ଆସ୍ସି ମିସର ଦେସ୍ତୁ ୱାତାର୍, ୱାରି ଦର୍କୁ; ରୁବେନ୍, ସିମିୟୋନ, ଲେବି ମାରି ଜିହୁଦା; ଇସାକର, ସବୁଲୁନ୍ ମାରି ବିନ୍ୟାମିନ୍; ଦାନ୍ ମାରି ନପ୍ତାଲି; ଗାଦ୍ ମାରି ଆସେର । ଆୟାୱାଲେ ୱିଜେରେ ଜାକୁବଦି କୁଟୁମ୍ ସତୁରି ଲୋକ୍ ମାର୍ହାର୍; ମାତର୍ ଜୋସେପ ପୁର୍ବେ ମିସରତୁ ମାର୍ହାନ୍ । ଇୟାୱେନ୍କା ଜୋସେପ, ୱାନି ତଡ଼ାନ୍କୁ ମାରି ଆୟା କାଡ଼ାଦି ୱିଜେରେ ଲୋକୁ ସାତାର୍ । ମାରିବା ଜାକୁବଦି କୁଟୁମ୍ ନାଣ୍ଡଲୋକ୍, ପିର୍ଜି ମାରି ନାଣ୍ଡ କୁଟୁମ୍ ଆଜି ନାଣ୍ଡ ଆତାର୍, ମାରି ୱାରି ମାଣୁକୁ ମିସର ଦେସ୍ତୁ ପୁରାବର୍ତି ଆତାର୍ । ଇୟାୱେନ୍କା ଏନ୍ ଜୋସେପଦିଙ୍ଗ୍ ନେସ୍ଏଣ୍ଡ୍ ମାର୍ହାନ୍, ଇୟାୱାଜା ଅରେନ୍ ପୁନି ରାଜା ମିସର ଦେସ୍ତୁ ରାଜା ଆତାନ୍ । ରାଜା ନିଜେଦି ଲୋକାଙ୍ଗ୍ ଇର୍ହାନ୍, “ସୁଡ଼ୁଦୁ, ଇସ୍ରାଏଲ ଲୋକାଦି କୁଟୁମ୍, ସାକ୍ତିଦାନ୍ ମାରି ଲୋକୁ ଇସାବ୍ତାନ୍ ମା ମାଣାନ୍ ନାଣ୍ଡ ମାନାର୍ । ୱାର୍ ଏଣ୍ଡେସ୍ଗି ରିସା ଆଏର୍, ମାରି ଜୁଦ୍ ଆତିଙ୍ଗାଁ, ମା ସତ୍ରୁ ତରିନ୍ ଆଜି ମା ୱାଲେ ଜୁଦ୍ କିଏର୍ ମାରି ଇୟା ଦେସ୍ତାନ୍ ସଲ୍ଏର୍, ଇୟାଉଣ୍ତିଙ୍ଗ୍ ରାଦୁ, ମାଡୁ ୱାରି ୱାଲେ ଜାଗ୍ରାତା ଆଜି ବ୍ୟବହାର୍ କିନାଟ୍ ।” ଇୟାୱେନ୍କା ୱାର୍ ବଜୁ ପିଣ୍ଡିନି ମାଣାନ୍ ୱାରିଙ୍ଗ୍ କାସ୍ଟୁ ସିଦେଙ୍ଗ୍ ୱାରି ମୁସୁକୁ ପାଣିସାଲାକିନି ୱାରିଙ୍ଗ୍ ଦାୟିତ୍ ସିତାନ୍, ମାରି, ୱାରି ମାଣାନ୍ ରାଜା ଫାରୋ ଉଣ୍ତିଙ୍ଗ୍ କାଦିଇଡ୍ନି ବାଡି ଗାଡ଼୍ ଅର୍ତାତ୍ ପିଥୋମ୍ ମାରି ରାମିସେସ୍ ତିଆର୍ କିବିସ୍କିତାର୍ । ମାତର ୱାର୍ ୱାରିଙ୍ଗ୍ ଏସ ନାଣ୍ଡ କାସ୍ଟୁ ସିତାର୍, ୱାର୍ ନାସ ନାଣ୍ଡ ଲୋକ୍ ଆତାର୍, ମାରି ନାସ ନାଣ୍ଡ ୱେଙ୍ଗିଁତା ସର୍ହାର୍ । ଇୟାଉଣ୍ଡିଙ୍ଗ୍ ଇସ୍ରାଏଲଦି ଲୋକା ଉଣ୍ତିଙ୍ଗ୍ ୱାର୍ ନାଣ୍ଡ ତିୟେଲ୍ ଆତାର୍ । ଆବେଟ୍କୁ ମିସରତି ଲୋକୁ ଦୟା କିଏଣ୍ତା ନାଣ୍ତ କାସ୍ଟୁଦାନ୍ ଇସ୍ରାଏଲ ଲୋକାଙ୍ଗ୍ ସାକର୍ ପାଣି କିବିସ୍ତାର୍ । ମାରି ଲାଦି, ଇଟା ମାରି କିଡ଼ିଇଦି ୱିଜୁ ପାଣିଦି କାସ୍ଟୁ ସାକର୍ ପାଣିଦି ମାଣାନ୍ ୱାରି ଜିଉଦିଙ୍ଗ୍ ରିସା କିଦେଙ୍ଗ୍ ଲାଗେ ଆତାର୍ । ୱାର୍ ଏମେ ୱିଜୁ ସାକର୍ ପାଣି କିବିସ୍ତାର୍; ଆୟାୱିଜୁ ଦାସ୍ କିଏଣ୍ଡା କିବିସ୍ତାର୍ ।
ଇୟାୱେନ୍କା ମିସ୍ରିୟ ରାଜା, ସିପ୍ରା ମାରି ପୁୟା ଦର୍ତି ରୁଣ୍ଡି ଏବ୍ରୀୟା ବଡୁ ଡକ୍ରିକାଙ୍ଗ୍ ଇୟା ମାଟା ଇର୍ହାନ୍, ଆମା ବେଡ଼ାଦୁ ମିର୍ ଏବ୍ରୀୟା ଆଇମେକାଦି ବଡୁ ଡକ୍ରି ପାଣି କିନିଦେର୍ ମାରି ୱାକ୍ ଜନମ୍ ସିନିବାନୁ ସୁଡ଼ୁନିଦେର୍, ଆୟା ବେଡ଼ାଦୁ ଏମେକେଙ୍ଗ୍ କଡ଼ ଜନମ୍ କିତିଙ୍ଗା, ଇରିଙ୍ଗାଁ ୱାନିଙ୍ଗ୍ ସାପିସ୍ କିଦୁ; ଏସେଙ୍ଗେ ଆଇଲି ଜନମ୍ଆତିଙ୍ଗା, ଇରିଙ୍ଗାଁ ତାନିଙ୍ଗ୍ ଜିଉ ଇଡ୍ଦୁ । ମାତର ଆୟା ବଡୁ ଡକ୍ରିକ୍ ମାପୁରୁଙ୍ଗୁଁ ତିଲାନି ଉଣ୍ତିଙ୍ଗ୍ ମିସ୍ରିୟ ରାଜାଦି ମାଟା ୱାଜା କିଏଣ୍ଡା ଆଜି କଡ଼ରିଙ୍ଗ୍ ଜିବନ୍ ଇଟ୍ତେ । ଆଦେଙ୍ଗ୍ ମିସରଦି ରାଜା ବଡୁ ଡକ୍ରିକାଙ୍ଗ୍ କୁକ୍ସି ଇର୍ହାନ୍, “ମିରୁ ଇୟାୱାଜା ପାଣି ଏନ୍ଧା କିତିଦେର୍ ? କଡ଼ରିଙ୍ଗ୍ ଏନ୍ଧା ଜିବନ୍ ଇଟ୍ତିମାନିଦେର୍ ?”
ଆବେଟ୍କୁ ବଡୁ ଡକ୍ରିକ୍ ପାରୋଙ୍ଗ୍ ଇର୍ହେ, ଏବ୍ରୀୟା ଆଇମେକ୍ ମିସ୍ରିୟା ଆଇମେକା ୱାଜା ସିଲେ; ୱାକ୍ନାଣ୍ଡ ଶାକ୍ତି, ୱାନିକା ଲାକ୍ତୁ ବଡୁ ଡକ୍ରିକ୍ ଉଣ୍ଡାନେ ୱାକ୍ ଜନମ୍ କିନେ । ମାପୁରୁ ଆୟା ବଡୁ ଡକ୍ରିକାଙ୍ଗ୍ ଆର୍ସିବାଦ୍ କିତାନ୍, ଆବେଟ୍କୁ ଲୋକୁ ନାଣ୍ଡ ଆଜି ନାଣ୍ଡ ଶାକ୍ତି ଆତାର୍ । ଆୟା ବଡୁ ଡକ୍ରିକ୍ ମାପୁରୁଙ୍ଗୁଁ ତିଲାନି ଉଣ୍ତିଙ୍ଗ୍ ୱାନ୍ ଆନିକା କୁଟୁମ୍ ନାଣ୍ଡ କିତାନ୍ । ଇୟାୱେନ୍କା ରାଜା ଫାରୋ ନିଜେଦି ୱିଜୁ ଲୋକାଙ୍ଗ୍ ଇୟା ମାଟା ଇର୍ହାନ୍, “ଏବ୍ରିୟ ଲୋକା ପୁନା ଜନମ୍ ଆତି ୱିଜେରେ କଡ଼ରିଙ୍ଗ୍ ନିଲ ଗାଡାଦୁ ପକ୍ତୁ, ମାତର ୱିଜୁ ଆଇଲିକାଙ୍ଗ୍ ଜିବନ୍ ଇଡ୍ଦୁ ।”
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.