Konda Porja Bible
ଯାତ୍ରା ବଇ 9
ପାସ୍ ଲମ୍ୱର୍ତି ମର୍ଡି ଜାତୁଙ୍ଗ୍ ସାନିକା
ସଦାପ୍ରବୁ ମୋସେଙ୍ଗ୍ ଇର୍ହାନ୍, “ମିର୍ ଫାରୋ ଲାକ୍ତୁ ସଲ୍ସି ୱାନିଙ୍ଗ୍ ଇନ୍ଡ୍ରୁ, ଏବ୍ରୀୟରି ସଦାପ୍ରବୁ ମାପୁରୁ ଇୟା ମାଟା ଇଜିନାନ୍, ମାଙ୍ଗିଁ ସେବା କିନି ଉଣ୍ତିଙ୍ଗ୍ ନିନ୍ ମା ଲୋକାଙ୍ଗ୍ ଡ଼ିସ୍ଆ ।” ମାତର ଜଦି ଏସେଙ୍ଗ୍ ୱାରିଙ୍ଗ୍ ଡ଼ିସ୍ନି ଉଣ୍ତିଙ୍ଗ୍ ମନା କିନାନ୍ ଇଲେଇବା କାସ୍ଟୁ ସିନାତ୍, ଆଦେଙ୍ଗ୍ ସୁଡ଼ୁଆ, ମି ବାଡିଦି ଗଡ଼ା, ଗଦ, ଉଟ୍, କଡିଙ୍ଗ୍ ମାରି ଗରିଏଙ୍ଗ୍ ମେଣ୍ଡେଙ୍ଗା ମୁସୁକୁ ସଦାପ୍ରବୁଦି କିୟୁ ମାନାତ୍; ଆଦେଙ୍ଗ୍ ନାଣ୍ଡ ମର୍ଡି ଆନାତ୍ । ମାତର ସଦାପ୍ରବୁ ଇସ୍ରାଏଲ ଲୋକାଙ୍ଗ୍ ମାରି ମିସର ଲୋକା କଡିଙ୍ଗ୍ ଗରିଏଙ୍ଗା ମାଣାନ୍ ଆକା ୱେର୍ଏ କିନାନ୍; ଆବେନୁ ଇସ୍ରାଏଲ ଲୋକା କଡିଙ୍ଗ୍ ଗରିଏଙ୍ଗ୍ ସାଉ । ସଦାପ୍ରବୁ ସମୟ ତିଆର୍ କିଜି ଇନାନ୍, ୱିଗେ ସଦାପ୍ରବୁ ଇୟାଦେସ୍ତୁ ଇୟା ପାଣି କିନାନ୍ ।
ମାରି ଅର୍ନେଣ୍ଡ ସଦାପ୍ରବୁ ଆୟା ପାଣି କିତାନ୍, ଆବେନୁ ମିସ୍ରିୟରି ୱିଜୁ କଡିଙ୍ଗ୍ ଗରିଏଙ୍ଗ୍ ସାତେ; ମାତର ଇସ୍ରାଏଲ ଲୋକା କଡିଙ୍ଗ୍ ଗରିଏଙ୍ଗ୍ ଉନ୍ଡ୍ରି ବା ସାଉତେ । ଆଦେଙ୍ଗ୍ ଫାରୋ ଲୋକ୍ ପକ୍ସି ଇସ୍ରାଏଲ ଲୋକା ଉନ୍ଡ୍ରି ବା କଡିଙ୍ଗ୍ ଗରିଏଙ୍ଗ୍ ସାଇକା ସୁଡ଼ୁତାର୍ । ଇର୍ରିଙ୍ଗ୍ବା ଫାରୋଦି ଜିବନ୍ ଆଟ୍ୱା ଆତାତ୍ ମାରି ୱାନ୍ ଲୋକାଙ୍ଗ୍ ଡ଼ିସ୍ଏତାନ୍ ।
ସୋ ଲମ୍ୱର୍ତି ମର୍ଡି ନପିଦି କୁରୁ
ମାରି ସଦାପ୍ରବୁ ମୋସେଙ୍ଗ୍ ମାରି ହାରୋଣଙ୍ଗ୍ ଇର୍ହାନ୍, “ମିର୍ ମୁଟିଦୁ ବର୍ତି କିଜି ବାଟିଦି ନିରୁ ଅତୁ, ମାରି ମୋଶା ଫାରୋଦି ଆଗିଡ଼ି ଆକା ବାଦଡ଼ ତରିନ୍ ୱିତିନ୍ । ଆବେଟ୍ ଆୟାୱିଜୁ ମିସର ଦେସ୍ ମୁସୁକୁ ୱାର୍ତି ଦୁଡ଼ି ଆଜି ମିସ୍ରିୟ ୱିଜୁ ଲୋକାଙ୍ଗ୍ ମାରି କଡିଙ୍ଗ୍ ଗରିଏଙ୍ଗ୍ ମେନ୍ଦଲ୍ଦୁ ନପିଦି କୁରୁ ସପ୍ନାପ୍ ।” ଆଦେଙ୍ଗ୍ ୱାର୍ ବାଟିଦି ନିରୁ ଅସି ଫାରୋ ଆଗ୍ଡ଼ି ନିଲ୍ତିଙ୍ଗା; ମାରି ମୋଶା ବାଦଡ଼୍ ତରିନ୍ ୱିତିଙ୍ଗା, ୱିଜୁ ଲୋକାଙ୍ଗ୍ ମାରି କଡିଗରିଏଙ୍ଗାଁ ମେନ୍ଦଲ୍ଦୁ ନପିଦି କୁରୁ ଆତାତ୍ । ଆୟା କୁରୁଦି ଉଣ୍ତିଙ୍ଗ୍ ଗୁରୁ ଗୁଣିଆର୍ ମୋଶାଦି ଆଗ୍ଡ଼ି ନିଲ୍ଦେଙ୍ଗ୍ ଆଟ୍ଏତାର୍; ଇରିଙ୍ଗାଁ ଗୁରୁ ଗୁଣିୟାରିଙ୍ଗ୍ ମାରି ୱିଜୁ ମିସ୍ରିୟ ଲୋକା ମେନ୍ଦଲ୍ଦୁ କୁରୁ ଆତାତ୍ । ସଦାପ୍ରବୁ ଫାରୋଦି ଜୀବନ୍ ଆଟ୍ୱା କିତାନ୍, ଆବେନୁ ୱାନ୍ ମୋଶାଦି ମାରି ସଦାପ୍ରବୁଦି ମାଟା ୱାଜା ୱାରି ମାଟାଦିଙ୍ଗ୍ ମନ୍ ସିଏତାନ୍ ।
ସାତ୍ ଲମ୍ୱର୍ତି ମର୍ଡି ଆଣ୍ତାରାଗା ପିରୁ
ସଦାପ୍ରବୁ ମୋସେଙ୍ଗ୍ ଇର୍ହାନ୍, ମିର୍ ସାଲ୍ଦିନେ ନିଙ୍ଗିଁଜ ଫାରୋ ଆଗ୍ଡ଼ି ନିଲ୍ଜ ୱାନିଙ୍ଗ୍ ଇୟା ମାଟା ଇନ୍ଆ, ଏବ୍ରୀୟରି ସଦାପ୍ରବୁ ମାପୁରୁ ଇଜିନାନ୍, ମାଙ୍ଗିଁ ସେବା କିଦେଙ୍ଗ୍ ମା ଲୋକାଙ୍ଗ୍ ଡ଼ିସ୍ଆ; ସିଲେତିଙ୍ଗା ଇଲେଇ ମାପ୍ ମି ଜିବନ୍ ବିରୁଦ୍ତାନ୍, ମାରି ମି ଦାସରିଙ୍ଗ୍ ମାରି ଲୋକା ଉଣ୍ତିଙ୍ଗ୍ ମା ୱିଜୁ ରକମ୍ଦି ମର୍ଡି ପକ୍ନାପ୍; ଆବେନୁ ୱିଜୁ ଦେସ୍ଦୁ ମା ୱାଜା ଏନ୍ସିଲେ, ଇୟାକା ନିନ୍ ନେସ୍ନି । ମାତର ଇୟା ୱେଡ଼ାଦୁ ମାପ୍ ନିଜେଦି କିୟୁ ପେର୍ଜି ମହାମାରିଦାନ୍ ମିଙ୍ଗିଁ ମାରି ମି ଲୋକାଙ୍ଗ୍ ସାପିସ୍ କିତାପ୍ ମାନ୍ଧି, ମାରି ମିର୍ ଦୁନିଆଦାନ୍ ସାତିଦେର୍ ମାନ୍ଦି; ମାତର ନିଙ୍ଗିଁ ନିଜେଦି ସାକ୍ତି ତର୍ତେଙ୍ଗ୍ ମାରି ୱିଜୁ ଦୁନିଆଦୁ ଏଣ୍ଡେସ୍ଗି ମା ଦର୍ ୱେଙ୍ଗ୍ନାତ୍, ଆଦେଙ୍ଗ୍ ଇୟାଉଣ୍ତିଙ୍ଗ୍ ମାପ୍ ନିଙ୍ଗିଁ ତିଆର୍ କିଜି ଇଟ୍ତାମାନାପ୍ । ଇଲେଇବା ନିନ୍ ମା ଲୋକାଙ୍ଗ୍ ଡ଼ିସ୍ଏଜି ୱାର୍ ମୁସୁକୁ ଗର୍ବ କିଜିନି ? ସୁଡ଼ୁଆ, ମାପ୍ ୱିଗେ ଇୟାୱାଜା ବେଡ଼ାଦୁ ମିସର ଦେସ୍ଦୁ ଇୟାୱାଜା ନାଣ୍ଡ ଆଣ୍ତାରାଗା ପିରୁ ୱାକ୍ନାପ୍ ଜେ, ମିସରଦୁ ଇୟାୱାଜା କାସ୍ଟୁ ଏସେଙ୍ଗେବା ଆଏଦେ । ଇୟାଉଣ୍ଡିଙ୍ଗ୍ ଇଲେଇ ଲୋକ୍ ପକ୍ସି କିଡ଼ିଇଦୁ ମି ପାସି ଆମା ଆମାକା ମାନାତ୍, ଆୟାକା ୱିଜୁ ଦାପ୍ରେ ତାଗାଟ୍, ଇର୍ରିଙ୍ଗା ଆମା ଲୋକ୍ ନା କଡିଗରିଏଙ୍ଗ୍ କିଡ଼ିଇଦି ମାନ୍ଜିନେ, ଇନ୍ଡ୍ର ତେଇତିଙ୍ଗା, ୱାରି ମୁସୁକୁ ଆଣ୍ତାରାଗା ପିରୁ ଆର୍ତିଙ୍ଗା ୱାକ୍ ସାନେ । ନାସ୍ତିୱାଲେ ଫାରୋଦି ଦାସର ମାଣାନ୍ ଆମାକାନ୍ ସଦାପ୍ରବୁଦି ମାଟାଦିଙ୍ଗ୍ ତିଲାତାନ୍, ୱାନ୍ ଦାପ୍ରେ ନିଜେଦି ଦାସରିଙ୍ଗ୍ ମାରି କଡିଙ୍ଗ୍ ଗରିଏଙ୍ଗ୍ ଇନ୍ଡ୍ର ତାତାନ୍ । ମାତର୍ ଏନ୍ ସଦାପ୍ରବୁଦି ମାଟାଦିଙ୍ଗ୍ ମନ୍ସିଏତାନ୍, ୱାନ୍ ନିଜେଦି ଦାସରିଙ୍ଗ୍ ମାରି ଗରିଏଙ୍ଗ୍ କଡିଙ୍ଗ୍ କିଡ଼ିଇ ସାତେ । ସଦାପ୍ରବୁ ମୋସେଙ୍ଗ୍ ଇର୍ହାନ୍, ନିନ୍ ବାଦଡ଼ ତରିନ୍ ନିଜେଦି କିୟୁ ପେର୍ଆ, ଆବେନୁ ମିସ୍ରିୟ ୱିଜୁ ଲୋକ୍, କଡିଙ୍ଗ୍ ଗରିଏଙ୍ଗ୍ ମାରି କିଡ଼ିଇଦି ପାସି ଆଣ୍ତାରାଗା ପିରୁ ଆର୍ତାତ୍ । ଆଦେଙ୍ଗ୍ ମୋଶା ନିଜେଦି ବାଡିଗା ବାଦଡ଼ ତରିନ୍ ପେର୍ତାନ୍ ଆକା, ସଦାପ୍ରବୁ ବାଦଡ଼ ଗାର୍ଜାଜି ମାରି ପିରୁ ୱାତାତ୍; ମାରି ମିସ୍ରିତାତ୍ ଆକା ବୁମିଦୁ ଆଡ୍ଗି ୱାତାତ୍; ଇୟାୱାଜା ସଦାପ୍ରବୁ ମିସର ଦେସ୍ଦୁ ଆଣ୍ତାରାଗା ପିରୁ କିତାନ୍ । ଆବେନୁ ଆଣ୍ତାରାଗା ପିରୁ ଆତାତ୍ ମାରି ପିରୁଦି ୱାଲେ ମିସ୍ରିତାତ୍; ଇୟାୱାଜା ନାଣ୍ଡ ପେରି ଆଣ୍ତାରାଗା ପିରୁ ଆତାତ୍ ମିସର ଦେସ୍ଦୁ ଏସେଙ୍ଗ୍ ଆଏତ୍ ମାର୍ହାତ୍ । ଆବେନୁ ୱିଜୁ ମିସର ଦେସ୍ଦି କିଡ଼ିଇଦି ଲୋକ୍ ମାରି କଡିଗରିଏଙ୍ଗ୍ ୱିଜୁ ଆଣ୍ତାରାଗା ଆର୍ତାତ୍ ଆକା ସାତେ ମାରି କିଡ଼ିଇଦି ମାରାକୁ ରୁଙ୍ଗିତେ ସର୍ହେ । କେବଲ ଇସ୍ରାଏଲ ଲୋକୁ ମାନ୍ଜିନି ବାଡ଼ି ଗୋଶନ ଦେସ୍ଦୁ ଆଣ୍ତାରାଗା ପିରୁ ଆଏତା ମାର୍ହାତ୍ ।
ଫାରୋ ଲୋକ୍ ପୋକ୍ସି ମୋସେଙ୍ଗ୍ ମାରି ହାରୋଣଙ୍ଗ୍ କୁକ୍ସି ଇର୍ହାନ୍, ଇଲେଇ ନାନ୍ ପାପ୍ କିତାମାନା; ସଦାପ୍ରବୁ ଦାର୍ମୁଦିକାନ୍, ମାତର ନାନ୍ ମାରି ମା ଲୋକୁ ଦୋସି । ସଦାପ୍ରବୁଦି ଲାକ୍ତୁ ପ୍ରାର୍ଥନା କିଦୁ; ଇର୍ରିଙ୍ଗା ମାପୁରୁ କିତିପାଣି ଡିଡ଼ିତିକା ମାରି ଆଣ୍ତାରାଗା ପିରୁ ୱାତିକା ନାଣ୍ଡ ଆତାମାନାତ୍; ମାପ୍ ମିଙ୍ଗିଁ ସନ୍ଡ୍ରେଙ୍ଗ୍ ସିନାପ୍, ମିଙ୍ଗିଁ ମାରି ୱେଡ଼ା ଆଏତ୍ନି । ନାସ୍ତିୱାଲେ ମୋଶା ୱାନିଙ୍ଗ୍ ଇର୍ହାନ୍, ନାନ୍ ଗାଡ଼୍ତାନ୍ ସସି ସୋରି ଦାପ୍ରେ ସଦାପ୍ରବୁଦି ଲାକ୍ତୁ ନିଜେଦି କିୟୁ ପେର୍ନା, ଆବେନୁ ବାଦଡ଼ ଗାର୍ଜାନିକା ବନ୍ଦ ଆନାତ୍ ମାରି ଆଣ୍ତାରାଗା ପିରୁ ଆଏତ୍; ମାରି ଇୟା ଦୁନିଆ ଜେ ସଦାପ୍ରବୁଦି, ଆକା ନିନ୍ ନେସ୍ନି । ମାତର ନାନ୍ ନେସ୍ନା, ନିନ୍ ମାରି ନି ଦାସର ନେରୁ ସାନ୍ଦି ସଦାପ୍ରବୁ ମାପୁରୁଙ୍ଗୁଁ ତିୟେଲ୍ ଆଇଦେର୍ ।
ଆୟା ବେଡ଼ାଦୁ ପେସି1 ମାରି ଗଦ୍ମୁ ୱିଜୁ ନାସ୍ଟୁ ଆତାତ୍, ଇର୍ରିଙ୍ଗା ଗଦ୍ମୁ ସେରେନ୍ ମାର୍ହାତ୍ ମାରି ପେସି ପୁଙ୍ଗୁଁ ପୁତା ମାର୍ହାତ୍ । ମାତର ଗଦ୍ମୁ ମାରି ଜନା2 ପିରିଏତି ମାର୍ହିଙ୍ଗ୍ ନାସ୍ଟୁ ଆଏତାତ୍ ।
ମୋଶା ରାଜା ଫାରୋଦି ଲାକ୍ତୁରାନ୍ ଗାଡ଼୍ତି ଆତ୍ରେ ସଲସି ସଦାପ୍ରବୁଦି ଆଗ୍ଡ଼ି ନିଜେଦି କିୟୁ ପେର୍ତିଙ୍ଗ୍, ବାଦଡ଼ ଗାର୍ଜାନିକା ମାରି ଆଣ୍ତାରାଗା ପିରୁ ୱାନିକା ବନ୍ଦ ଆତାତ୍, ବୁମିଦୁ ମାରି ପିରୁ ଆର୍ଏତାତ୍ । ନାସ୍ତିୱାଲେ ପିରୁ ମାରି ଆଣ୍ତାରାଗା ମାରି ଗାର୍ଜାନିକା ବନ୍ଦ ଆନିକା ସଡ଼ୁଜି ରାଜା ଫାରୋ ମାରି ପାପ୍ କିତାନ୍, ମାରି ୱାନ୍ ମାରି ୱାନି ଦାସର ନିଜେ ନିଜେଦି ମନ୍ ଆଟ୍ୱା କିତାର୍ । ଆବେଟ୍ ରାଜା ପାରୋଦି ଜିବନ୍ ଆଟ୍ୱା ଆତାତ୍, ଆଦେଙ୍ଗ୍ ମୋଶାଦି ମାଣାନ୍ ଇର୍ହି ମାଟା ମାପୁରୁଦି ବାକ୍ୟ ଇସାବ୍ତାନ୍ ୱାନ୍ ଇସ୍ରାଏଲ ଲୋକାଙ୍ଗ୍ ସନ୍ଡ୍ରେଙ୍ଗ୍ ସିଏତାନ୍ ।
Source notes (2)
- Footnote ଫେସି ଆଜିନାତ୍ ଉନ୍ଡ୍ରି ନିୟୁ ଆନି ପାଡ଼ୁ ମାରି ଆୟା ମାରାନ୍ତାନ୍ ୱାତିଗନ୍ଧା ତିଆର୍ ଆଜିନାତ୍ ।
- Footnote ଜନା ଆଜିନାତ୍ ଉନ୍ଡ୍ରି ଆଇ ରକମ୍ତି ଗଦ୍ମୁ
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.