Konda Porja Bible
ଯାତ୍ରା ବଇ 27
ପିତଲ୍ଦି ବେଦି
(ଯାତ୍ରା ୩୮:୧-୭)
ମାରି ମିର୍ ଆକିସିଆ ମାରାନ୍ଦାନ୍ ପାସ୍ ଗୋଟା ମୁରେଙ୍ଗ୍ ନିରିକା ମାରି ପାସ୍ ଗୋଟା ମୁରେଙ୍ଗ୍ ଅସାର୍ତି ବେଦି ତିଆର୍ କିନିଦେର୍, ଆୟା ବେଦି ନାଲ୍ଗି କୋନେଙ୍ଗ୍ ଆନାତ୍; ଆବେଣି ଉଛା ମୁଣ୍ଡ୍ରି ମୁରେଙ୍ଗ୍ ଆନାତ୍ । ମାରି, ଆବେଣି ନାଲ୍ଗି କୋନେଙ୍ଗା ମୁସୁକୁ କମୁକୁ କିନିଦେର୍, ମାରି ଆୟା କମ୍କୁ ବେଦିଦୁ ଉନ୍ଡ୍ରେ ବାଗ୍ ଆନେ ମାରି ଆକା ପିତଲ୍ଦାନ୍ ଡାଲାୟ୍ କିନିଦେର୍ । ମାରି ଆବେଣାନ୍ ନିରୁ କୁତ୍ସି ଅନି ଉଣ୍ତିଙ୍ଗ୍ ନିରୁ ଇଡ୍ନି ସାଟି କିନିଦେର୍, ଆବେଣି ସିସୁ ଆନ୍ନି ସାଟ୍ୱା ମାରି କୁଣ୍ତ୍ ମାରି ଗଜିୟାଦି ସାଟ୍ୱା ମାରି ରୁକୁଣା; ଆବେଣି ୱିଜୁ କୁଡ଼ୁକେଙ୍ଗ୍ ପିତଲ୍ଦାନ୍ ତିଆର୍ କିନିଦେର୍ । ମାରି, ପିତଲ୍ଦାନ୍ ଉନ୍ଡ୍ରି ଜାଲି କିନିଦେର୍ ମାରି ଆୟା ମୁସୁକୁ ନାଲ୍ଗି କୋନେଆଙ୍ଗାଁ ପିତଲ୍ଦି ନାଲ୍ଗି ଆସ୍ନିକେଙ୍ଗ୍ ତିଆର୍ କିଦୁ । ଇୟା ଜାଲି ବେଦି ଆଡ୍ଗି ବାଡିଦୁ ଇଡ୍ନିଦେର୍ ମାରି ଜାଲି ବେଦିଦି ନାଣିମି ସାନ୍ଦି ଇନାତ୍ । ମାରି ବେଦି ଉଣ୍ତିଙ୍ଗ୍ ଆକିସିଆ ମାରାନ୍ଦାନ୍ କଣା କିନିଦେର୍ ମାରି ଆକା ପିତଲ୍ଦାନ୍ ଡାଲାୟ୍ କିନିଦେର୍ । ମାରି, ବେଦି ପିଣ୍ଡିନି ୱେଡ଼ାଦୁ ଆବେଣି ରୁଣ୍ଡି ତରଟି ମୁସୁକୁ ବରୋ ଲୋଇ ଆୟା କଣା ତେବାନାତ୍ । ମିର୍ ପାଙ୍କା ଇଡ୍ଜି ପାଟାଦୁ ଆକା କିନିଦେର୍, ଗରନ୍ତୁ ନାନୁ ମିଙ୍ଗିଁ ଏଣ୍ଡେସ୍ ୱେର୍ତାମାର୍ହା, ଆୟାୱାଜା ଲୋକୁ କିନାର୍ ।
ମିସାଜିସାନି ଗୁଡ଼ାଦି ଦୁୱାର୍
(ଯାତ୍ରା ୩୮:୯-୨୦)
ମିର୍ ଗୁଡ଼ାଦି ଦୁୱାର୍ କିନିଦେର୍; ଆୟା ଦୁୱାର୍ତି ଉଣେର୍ ତରିନ୍ ନେଗି ଅଡ଼ିନି ନୁଲୁଦାନ୍ ତିଆର୍ଆତି ପାର୍ଦା କିନିଦେର୍; ଆବେଣି ଉନ୍ଡ୍ରି ତରଟି ନିରିକା ଶହେ ମୁରେଙ୍ଗ୍ ଆନାତ୍ । ଆବେନୁ କୋଡ଼େ ଗୋଟା ମୁଣ୍ଡେଙ୍ଗ୍ ମାରି କୋଡ଼େ ଗୋଟା ବନ୍ଦ୍କୁ ପିତଲ୍ଦାନ୍ ଆନାତ୍, ମାରି, ମୁଣ୍ତାଦି ଆକଡ଼ି ମାରି ୱେଣ୍ତିଦାନ୍ ତିଆର୍ଆତି ଜିନିସ୍ । ଆୟାୱାଜା ଡେବିରି ତରିନ୍ ଶହେ ଗୋଟା ମୁରେଙ୍ଗ୍ ନିରିକା ପାର୍ଦା ଆନାତ୍; ମାରି କୋଡ଼େ ଗୋଟା ମୁଣ୍ଡେଙ୍ଗ୍ ମାରି କୋଡ଼େ ଗୋଟା ବନ୍ଦ୍କୁ ପିତଲ୍ତିକେଙ୍ଗ୍ ଆନାତ୍; ମାରି, ମୁଣ୍ତାଦି ଆକଡ଼ି ମାରି ୱେଣ୍ତିଦାନ୍ ତିଆର୍ଆତି ଜିନିସ୍ । ମାରି ୱେଡ଼ା ଆର୍ନି ତରିନ୍ ଦୁୱାର୍ତି ଅସାର୍ ଉଣ୍ତିଙ୍ଗ୍ ପସାସ୍ ଗୋଟା ମୁରେଙ୍ଗ୍ ପାର୍ଦା ମାରି ଆବେଣି ଦାସ୍ ଗୋଟା ମୁଣ୍ଡେଙ୍ଗ୍ ମାରି ଦାସ୍ ଗୋଟା ବନ୍ଦ୍କୁ କିନିଦେର୍ । ମାରି, ଆଗ୍ଡ଼ି ତରିନ୍ ଦୁୱାର୍ତି ଅସାର୍ ପସାସ୍ ଗୋଟା ମୁରେଙ୍ଗ୍ ଆନାତ୍ । ସେର୍ଲାଦି ଉନ୍ଡ୍ରି ତରିନ୍ ପନ୍ଦର ଗୋଟା ମୁରେଙ୍ଗ୍ ପାର୍ଦା ମାରି ମୁଣ୍ଡ୍ରି ମୁଣ୍ଡେଙ୍ଗ୍ ମାରି ମୁଣ୍ଡ୍ରି ବନ୍ଦ୍କୁ ଆନାତ୍ । ମାରି ଆଇ ତରନ୍ ପନ୍ଦର ମୁରେଙ୍ଗ୍ ପାର୍ଦା ମାରି ମୁଣ୍ଡ୍ରି ମୁଣ୍ଡେଙ୍ଗ୍ ମାରି ମୁଣ୍ଡ୍ରି ବନ୍ଦ୍କୁ ଆନାତ୍ । ମାରି ଦୁୱାର୍ତି ସେର୍ଲା ଉଣ୍ତିଙ୍ଗ୍ ନିଡ଼ି ରଙ୍ଗ୍, ସେର୍ଗା ରଙ୍ଗ୍, ଏରାନି ରଙ୍ଗ୍ ମାରି ନେଗି ଅଡ଼ିନି ନୁଲୁଦାନ୍ ତିଆର୍ କିତି କୋଡ଼େ ଗୋଟା ମୁରେଙ୍ଗ୍ ଉନ୍ଡ୍ରି ପିଡ଼ିକ୍ନି ୱାତି ମାରି ଆବେଣି ନାଲ୍ଗି ମୁଣ୍ଡେଙ୍ଗ୍ ମାରି ନାଲ୍ଗି ବନ୍ଦ୍କୁ ଆନେ । ମାରି, ଦୁୱାର୍ତି ସାରିବେଡ଼୍ତି ମୁଣ୍ଡେଙ୍ଗ୍ ୱିଜୁ ୱେଣ୍ତିଦାନ୍ ତିଆର୍ଆତି ଜିନିସ୍ କେର୍ପାୟ୍ ଆନାତ୍ ମାରି ଆକଡ଼ି ୱେଣ୍ତିଦିକା ମାରି ବନ୍ଦ୍କୁ ପିତଲ୍ଦିକା ଆନାତ୍ । ଦୁୱାର୍ ଶହେ ମୁରେଙ୍ଗ୍ ନିରିକା ମାରି ୱିଜୁ ତରଟି ପସାସ୍ ଗୋଟା ମୁରେଙ୍ଗ୍ ଅସାର୍ ମାରି ପାସ୍ ଗୋଟା ମୁରେଙ୍ଗ୍ ଉଚା, ମାରି ୱିଜୁ ନେଗି ଅଡ଼ିନି ନୁଲୁଦାନ୍ ତିଆର୍ଆତିକା ମାରି ଆବେଣି ପିତଲ୍ଦି ବନ୍ଦ୍କୁ ଆନେ । ମାରି ଲୋକୁ ଉଣ୍ତାନି ଗୁଡ଼ାଦି ୱିଜୁ ପାଣି ବିସୟ୍ତି ସାଟିଙ୍ଗ୍ ମାରି କୁଟିଙ୍ଗ୍ ମାରି ଦୁୱାର୍ତି ୱିଜୁ କୁଟିଙ୍ଗ୍ ପିତଲ୍ଦାନ୍ ଆନାତ୍ ।
ଦିୱା ଜାତୁନ୍
(ଲେବିୟ ୨୪:୧-୪)
ମାରି ଦିନାମି ଦିୱା କାସିସ୍ କିଜି ଜାୟ୍ କିନି ଉଣ୍ତିଙ୍ଗ୍ ନେଗି ପିରିତି ଜିତ ନିୟୁ ମି ଲାକ୍ତୁ ତାନି ଉଣ୍ତିଙ୍ଗ୍ ଇସ୍ରାଏଲ ଲୋକାଙ୍ଗ୍ ଇନିଦେର୍ । ମାରି ମିସାଜିସାନି ଗୁଡ଼ାଦୁ ନିୟମ୍ ପେଡ଼ା ଆଗ୍ଡ଼ିରି ୱେରେଏ କିନି ୱାତିଦି ଆତ୍ରେ ହାରୋଣ ମାରି ୱାନି ମାରିସିର୍ ମିଲିମିଲିକା ଦାନ୍ ସାଲ୍ଦି ସାନ୍ଦି ପ୍ରବୁଦି ଆଗ୍ଡ଼ି ଆକା ରସ୍ସି ଇଡ୍ନାର୍; ଇକା ଇସ୍ରାଏଲ ଲୋକା କାଡ଼ା କାଡ଼ା ସାନ୍ଦି ଏସେଙ୍ଗ୍ ୱିଜ୍ଇ ବିଦି ଆନାତ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.