Konda Porja Bible
ଯାତ୍ରା ବଇ 14
ସୁପ୍ ସାମ୍ଦୁର୍ ନାନିକା
ଇୟାୱେନ୍କା ପ୍ରବୁ ମୋସେଙ୍ଗ୍ ଇର୍ହାନ୍, “ନିନ୍ ଇସ୍ରାଏଲ ଲୋକାଙ୍ଗ୍ ଇନ୍ଆ, ମିର୍ ଡ଼େସି ପିହହିରୋତଦି ଆଗ୍ଡ଼ି ତରିନ୍ ମିଗ୍ଦୋଲ ମାରି ସାମ୍ଦୁର୍ ନାଣ୍ମି ବାସା କିଦୁ; ମିର୍ ବାଲ-ସପୋନ ଆଗ୍ଡ଼ି, ଇର୍ରିଙ୍ଗା, ତାନି ଆଗ୍ଡ଼ି ସାମ୍ଦୁର୍ ଲାକ୍ତୁ ବାସା କିଦୁ । ଆବେଟ୍ ପାରୋ ଇସ୍ରାଏଲ ଲୋକା ବିସୟ୍ତାନ୍ ଇନାନ୍, ୱାର୍ ଦେସ୍ ଲୋଇ ଇନିଙ୍ଗା ଆନିଙ୍ଗାଁ ଆଜିମାନାର୍ ମାରି ୱାରିଙ୍ଗ୍ ମରୁବୁମି ସାରି ବାଣାତାମାନାର୍ । ମାରି, ନାନ୍ ରାଜା ପାରୋଦି ଜିବନ୍ ଆଟ୍ୱା କିନା, ଆବେଟ୍ ୱାନ୍ ୱାରି ୱାଲେ ୱାଲେ ଉରୁକୁନାନ୍; ମାରି, ନାନ୍ ରାଜା ପାରୋ ମାରି ୱାନି ୱିଜୁ ସନ୍ୟରି ମାଣାନ୍ ଗୌରବ୍ ପୟ୍ନା; ଆବେଟ୍ ନାନ୍ ଜେ ପ୍ରବୁ, ଇୟାକା ମିସ୍ରିୟ ଲୋକୁ ନେସ୍ନାର୍ ।” ଆଦେଙ୍ଗ୍ ୱାର୍ ଆୟାୱାଜା କିତାର୍ ।
ଇୟାୱେନ୍କା ଇସ୍ରାଏଲ ଲୋକୁ ଉରୁକ୍ସି ସଲ୍ସିନାର୍, ଇୟା କାବୁର୍ ମିସ୍ରିୟ ରାଜେଙ୍ଗ୍ ୱେର୍ତାର୍ । ମାରି ଲୋକା ବିସୟ୍ତାନ୍ ରାଜା ପାରୋଦି ମାରି ୱାନି ଦାସରି ଜିବନ୍ ବାଦ୍ଲେ ଆତାତ୍; ଆଦେଙ୍ଗ୍ ୱାର୍ ଇର୍ହାର୍, “ମାଡ୍ ଇୟା ଇନି ପାଣି କିତିମାନିକା ? ଏନ୍ଦା ଇସ୍ରାଏଲ ଲୋକାଙ୍ଗ୍ ନିଜେଦି ଦାସ୍ପାଣିଦାନ୍ ଡ଼ିସ୍ତି ସିତିମାନିକା ?” ଆଦେଙ୍ଗ୍ ରାଜା ନିଜେଦି ରତ ତିଆର୍ କିଦେଙ୍ଗ୍ ଇର୍ହାନ୍ ମାରି ନିଜେଦି ଲୋକାଙ୍ଗ୍ ଅର୍ସେ ଅତାନ୍ । ମାରି, ସୋସ ଗୋଟା ଆସ୍କିତି ରତ୍ ମାରି ମିସ୍ରିୟରି ୱିଜୁ ରତ ମାରି ୱିଜୁ ରତଦୁ ଜୁଦ୍କିନି ୱାରିଙ୍ଗ୍ ଅତାର୍ । ମାରି ପ୍ରବୁ ମିସ୍ରିୟଦି ରାଜା ପାରୋଦି ଜିବନ୍ ଆଟ୍ୱା କିତାନ୍ । ମାରି ୱାନ୍ ଇସ୍ରାଏଲ ଲୋକା ୱେନ୍କା ୱେନ୍କା ପେରିତାନ୍; ନାସ୍ତିୱାଲେ ଇସ୍ରାଏଲ ଲୋକୁ ମୁସ୍କୁ କିୟୁ ପେର୍ଜି ବୁଲାଜି ମାର୍ହାର୍ । ଆଦେଙ୍ଗ୍ ମିସ୍ରିୟ ଲୋକ୍, ଇର୍ରିଙ୍ଗ୍, ରାଜା ପାରୋଦି ୱିଜୁ ଗଡ଼ା, ରତ ମାରି ସଗଡ଼ ସାଲାକିନି ସୋନ୍ୟର୍ ୱାରି ୱେନ୍କା ୱେନ୍କା ସୋଲ୍ସି ବାଲ-ସପୋନ ଜିଣାଜି ପିହହିରୋତ ଲାକ୍ତୁ ସୁପ୍ ସାମ୍ଦୁର୍ ପାଡ଼ିଦୁ ଇସ୍ରାଏଲ ଲୋକୁ ଗୁଡ଼ାକିନି ୱେଡ଼ାଦୁ ୱାରି ଲାକ୍ତୁ ଇତାର୍ ।
ମାରି ରାଜା ପାରୋ ଲାକ୍ତୁ ଇଗା ସର୍ହାନ୍, ଇସ୍ରାଏଲ ଲୋକୁ ନିଜେଦି ୱେନ୍କା ୱେନ୍କା ମିସ୍ରିୟରିଙ୍ଗ୍ ସୁଡ଼ୁଜି ନାଣ୍ଡ ତିଲାତାର୍, ମାରି ଇସ୍ରାଏଲ ଲୋକୁ ପ୍ରବୁଙ୍ଗ୍ କୁକୁତାର୍ । ମାରି, ମୋସେଙ୍ଗ୍ ଇର୍ହାର୍, “ମିସରଦୁ ଦୁକି ସିଲେତାତ୍ ଇଜି ନୋ ବାଲିବାଟାଦୁ ନିନ୍ ମାଙ୍ଗିଁ ସାପିସ୍ତେଙ୍ଗ୍ ତାତିମାନି ? ମା ୱାଲେ ଇୟାୱାଜା ସାଲାକିଜି ମାଙ୍ଗିଁ ମିସରତାନ୍ ଏନ୍ଦା ସପ୍ସିତାତି ? ମାଙ୍ଗିଁ ମାନ୍ଡ୍ରେଙ୍ଗ୍ ସିଦା, ମାପ୍ ମିସ୍ରିୟରି ଦାସ୍ ପାଣି କିନାପ୍, ଇର୍ରିଙ୍ଗ୍ ବାଲିବାଟାଦୁ ସାନି ବାଦ୍ଲୁ ମିସ୍ରିୟରି ସେବା କିନିକା ନେଗେଣ୍ଡ୍, ମାପ୍ ନୋ ମିସରଦୁ ନିଙ୍ଗିଁ ଇୟା ମାଟା ଇନ୍ଏପ୍ ନୋ ?”
ଆବେଟ୍ ମୋଶା ଲୋକାଙ୍ଗ୍ ଇର୍ହାନ୍, “ମିର୍ ତିଲାମାଟ୍, ନିଲ୍ଜ ସୁଡ଼ୁଦୁ; ପ୍ରବୁ ନେର୍ ଏଣ୍ଡେସ୍ ମିଙ୍ଗିଁ ରକିୟା କିନାନ୍, ଆକା ସୁଡ଼ୁଦୁ; ମିର୍ ନେର୍ ଏଣ୍ତେସ୍ ମିସ୍ରିୟରିଙ୍ଗ୍ ସୁଡ଼ୁଜିନିଦେର୍, ଆୟାୱାଜା ଜୁଗ୍ଜୁଗ୍ ସାନ୍ଦି ମାରି ଏସେଙ୍ଗ୍ ସୁଡ଼ୁଇଦେର୍ । ପ୍ରବୁ ମି ଉଣ୍ତିଙ୍ଗ୍ ଜୁଦ୍ କିନାନ୍, ମିର୍ ଆଲ୍ଜ ମାନ୍ଡ୍ରୁ ।”
ଇୟାୱେନ୍କା ପ୍ରବୁ ମୋସେଙ୍ଗ୍ ଇର୍ହାନ୍, “ନିନ୍ ମାଙ୍ଗିଁ ଏନ୍ଦା କୁକ୍ସିନି ? ଇସ୍ରାଏଲ୍ ଲୋକାଙ୍ଗ୍ ଇନ୍ଆ, ୱାର୍ ଆଗ୍ଡ଼ି ସଲିର୍ । ମାରି, ନିନ୍ ନିଜେଦି ବାଡିଗା ପେର୍ଆ ମାରି ସାମ୍ଦୁର୍ ମୁସୁକୁ କିୟୁ ପେର୍ଜି ଏରୁ ରୁଣ୍ଡି ବାଗ୍ କିଆ; ଆବେଟ୍ ଇସ୍ରାଏଲ ଲୋକୁ ୱାର୍ତି ବୁମିଦୁ ସାମ୍ଦୁର୍ ଲୋଇରାନ୍ ବୁଲାଜିସନାର୍ । ମାରି, ନାନ୍, ସୁଡ଼ୁଆ, ନାନ୍ ମିସ୍ରିୟରି ଜିବନ୍ ଆଟ୍ୱା କିନା ମାରି ୱାର୍ ୱାରି ୱେନ୍କା ୱେନ୍କା ସନାର୍, ଆବେଟ୍ ନାନ୍ ରାଜା ପାରୋ ମାରି ୱାନି ୱିଜୁ ସୋନ୍ୟର୍, ରତ ମାରି ସଗଡ଼ ସାଲାକିନି ଲୋକା ମାଣାନ୍ ଗୌରବ୍ ପୟ୍ନା । ମାରି ପାରୋ, ୱାନି ରତ ମାରି ୱାନି ଗଡ଼ା ସାଲାକିନି ଲୋକା ମାଣାନ୍ ଗୌରବ୍ ପୟ୍ତି ୱେନ୍କା ନାନ୍ ଜେ ସଦାପ୍ରବୁ, ଇକା ମିସ୍ରିୟ ଲୋକୁ ନେସ୍ନାର୍ ।”
ନାସ୍ତିୱାଲେ ଇସ୍ରାଏଲ ମାନ୍ଦାଦି ମାପୁରୁଦି ଦୁତ୍ ୱାଜି ୱାରି ବୁଲାନି ସାରିଦୁ ମାର୍ହାନ୍, ମାରି, ବାଦଡ଼ ମୁଣ୍ତା ୱାରି ଆଗ୍ଡ଼ିରାନ୍ ୱାଜି ୱାରି ୱେନ୍କା ନିଲ୍ତାତ୍ । ଆୟା ବାଦଡ଼ ମିସ୍ରିୟ ଦଲ୍ ମାରି ଇସ୍ରାଏଲ ଦଲ୍ ନାଣିମି ୱାତାତ୍, ମାରି, ବାଦଡ଼ ମାରି ସିକାଟି ଆତିଙ୍ଗ୍ ବା ଆକା ସିକାଟିଦିଙ୍ଗ୍ ଜାୟ୍ କିତାତ୍; ଇୟାଉଣ୍ଡିଙ୍ଗ୍ ୱିଜୁ ନାଡ଼ା ଉନ୍ଡ୍ରି ଦଲ୍ ଆଇ ଦଲ୍ ଲାକ୍ତୁ ୱାଦେଙ୍ଗ୍ ଆଟ୍ଏତାର୍ ।
ଇୟାୱେନ୍କା ମୋଶା ସାମ୍ଦୁର୍ ମୁସୁକୁ ନିଜେଦି କିୟୁ ପେରିଜି, ସଦାପ୍ରବୁ ଆୟା ନାଡ଼ା ୱିଗ୍ଜି ନାଣ୍ଡ ଗାଲି ଦାନ୍ ସାମ୍ଦୁର୍ଦିଙ୍ଗ୍ ୱେନ୍କା ଗୁସାକିଜି ୱାରିସ୍ କିତାନ୍ ମାରି ଏରୁ ରୁଣ୍ଡି ବାଗ୍ ଆତାତ୍ । ଆବେଟ୍ ଇସ୍ରାଏଲ ଲୋକୁ ୱାରିତି ବୁମିଦି ସାରି ସିଜି ସାମ୍ଦୁର୍ ଲୋଇରାନ୍ ସର୍ହାର୍, ମାରି, ୱାରି ଉଣେରି ତରିନ୍ ନି ଡେବିରି ତରିନ୍ ଏରୁ ଗଡା ୱାଜା ଆଜି ନିର୍ହାତ୍ । ଇୟାୱେନ୍କା ମିସ୍ରିୟ ଲୋକୁ, ପାରୋଦି ୱିଜୁ ଗଡ଼ା, ରତ, ମାରି ଗଡ଼ା ସାଲାକିନି ଲୋକୁ ୱିଜେରେ ଉର୍କୁସି ୱାରି ୱେନ୍କା ୱେନ୍କା ସାମ୍ଦୁର୍ତୁ ଡ଼ୁଗିତାର୍ । ମାତର୍ ନାଡ଼ାଦି ୱିଗ୍ନି ୱେଡ଼ାଦୁ ସଦାପ୍ରବୁ ସିସୁ ନି ବାଦଡ଼ ମୁଣ୍ତାଦାନ୍ ସିଜି ମିସ୍ରିୟରି ସୋନ୍ୟରିଙ୍ଗ୍ ବେସ୍ତାନ୍ ମାରି ମିସ୍ରିୟରି ସୋନ୍ୟରିଙ୍ଗ୍ ଗାବ୍ରା କିତାନ୍ । ୱାନ୍ ୱାରି ରତଦି ସକା ସପ୍ସି ପକ୍ତାନ୍, ୱାର୍ ନାଣ୍ଡ କାସ୍ଟୁଦାନ୍ ରତ ସାଲାକିତାର୍; ଆବେଟ୍ ମିସ୍ରିୟ ଲୋକୁ ଇର୍ହାର୍, ରାଦୁ, ମାଡୁ ଇସ୍ରାଏଲ ଆଗ୍ଡ଼ିରାନ୍ ଉରୁକ୍ସି ସନାଟ୍; “ଇରିଙ୍ଗ୍ ସଦାପ୍ରବୁ ୱାରି ତରିନ୍ ଆଜି ମିସ୍ରିୟରି ବିରୁଦ୍ତାନ୍ ଜୁଦ୍ କିଜିନାନ୍ ।”
ଇୟାୱେନ୍କା ସଦାପ୍ରବୁ ମୋସେଙ୍ଗ୍ ଇର୍ହାନ୍, “ନିନ୍ ସାମ୍ଦୁର୍ ମୁସୁକୁ ନିଜେଦି କିୟୁ ପେର୍ଆ; ଆବେଟ୍କୁ ମିସ୍ରିୟରି ମାରି ୱାରି ରତ ମାରି ଗଡ଼ା ସାଲାକିନି ଲୋକା ମୁସୁକୁ ମାରିଡ଼େସି ଏରୁ ୱାନେ ।” ଆବେଟ୍ ମୋଶା ସାମ୍ଦୁର୍ ମୁସୁକୁ କିୟୁ ପେର୍ତାନ୍, ମାରି ସାଲ୍ଦି ୱେଡ଼ାଦୁ ସାମ୍ଦୁର୍ ମାରିଡ଼େସି ସମାନ୍ ଆଦେଙ୍ଗ୍ ଆସ୍ତାତ୍; ଆବେଟ୍ ମିସ୍ରିୟର୍ ଡ଼େସି ଉରୁକ୍ତେଙ୍ଗ୍ ଆସ୍ତାର୍, ସଦାପ୍ରବୁ ସାମ୍ଦୁର୍ ଲୋଇ ୱାରିଙ୍ଗ୍ ପୋକ୍ତାନ୍ । ମାରି, ଏରୁ ମାରିଡ଼େସି ୱାଜି ୱାରି ରତ ମାରି ଗଡ଼ା ସାଲାକିନି ୱାରିଙ୍ଗ୍ ପିଡ଼ିକ୍ତାତ୍; ଆବେଟ୍ ପାରୋଦି ଆମା ୱିଜୁ ସୋନ୍ୟର୍ ୱାରି ୱେନ୍କା ୱେନ୍କା ସାମ୍ଦୁର୍ ଲୋଇ ଡ଼ୁଗିତା ମାର୍ହାର୍, ୱାରି ଲୋଇରାନ୍ ଅରେନ୍ବା ତେବାଏତାର୍ । ମାତର୍ ଇସ୍ରାଏଲ ଲୋକୁ ୱାର୍ତି ସାରିଦାନ୍ ସାମ୍ଦୁର୍ ଲୋଇ ସିଜି ସର୍ହାର୍; ମାରି, ଏରୁ ୱାରି ଡେବିରି ନି ଉଣେରି ତରିନ୍ ଗଡା ୱାଜା ଆତାତ୍ ।
ଇୟାୱାଜା ଆୟା ଦିନ୍ ପ୍ରବୁ ମିସ୍ରିୟରି କିୟୁଦାନ୍ ଇସ୍ରାଏଲ ଲୋକାଙ୍ଗ୍ ରକିୟା କିତାନ୍ ମାରି ଇସ୍ରାଏଲ ମିସ୍ରିୟରିଙ୍ଗ୍ ସାମ୍ଦୁର୍ତୁ ସାନିକା ସୁଡ଼ୁତାର୍ । ସଦାପ୍ରବୁ ମିସ୍ରିୟରି ବିରୁଦ୍ଦାନ୍ ଇୟା ଆମା ପେରି ପାଣି କିତାନ୍, ଆକା ଇସ୍ରାଏଲ ଲୋକୁ ସୁଡ଼ୁତାର୍; ଆବେଟ୍ତାନ୍ ଲୋକୁ ପ୍ରବୁଙ୍ଗ୍ ତିଲାଜି ପ୍ରବୁଦିମାନୁ ମାରି ୱାନି ଦାସ୍ ମୋସା ଲାକ୍ତୁ ବିସ୍ବାସ୍ କିତାର୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.