ईब्‌रानीयो

ईब्‌रानीयों के नाम पोलुस की पत्री

ईब्‌रानीयो ना नाम पोलुस नी चीट्‌ठी

जानकारी

तीहयी ईब्‌रानीयो नी कीताप एक हीम्‌मत आपवा वाळी चीट्‌ठी से, जीनी मे आहयु देखाड़लु से के कीकम ईसु कंय जुन्‌ला कायदा नी भगवान वगे गेथी केदली वात ने पुरी कर्‌यो। आहयी कीताप एक परच्‌यार ने तेम लीखली से। ईब्‌रानीयो नी कीताप मे जुन्‌ला कायदा नी 60 गेथी जादा सेलाणी से जे उजन्‌ती देखाड़े के कीकम ईसु भगवान वगे गेथी केदली वात अने डायला पुंजारा नी जपापदारी ने पुरी कर्‌यो। करीन आहयी कीताप युहदी ईसु पोर भरहो करन्‌या जुगु हीम्‌मत आपवा वाळी हती। ईब्‌रानीयो नी कीताप मे आहयु देखाड़े के कीकम ईसु कायदा ने पुरा कर्‌यो के पुंजारा ने अळी वळ-वळीन बादा चड़ाव्‌वा नी जरवत नी पड़े। ईसु आखा पापु नी जुगु, एक वार अने जलमको बादा चड़्‌यो। अमारी टेम ना ईसु पोर भरहो करन्‌या हीम्‌मत हात कर सके। आहयी कीताप सी आमने आसम ह़मज मे आवे के, ईसु मसी, आपणु ने भगवान पोर भरहो करवा करीन तीयार करे

आहयीत रीते आहयी कळी ना आमु ईसु पोर भरहो करन्‌या जुगु आहयी कीताप मे घणी जादा हीम्‌मत जड़े। आमने तीनी पोर टेकला रेवा जोवे। ईब्‌रानीयो नी चीट्‌ठी कोय लीखलु से कोयने मालम नी हय, पण जाणकार माणहु नेवताळो पोलुस, लुको, अने बरनाबास ने एवा लीखला से देखाड़े। आहयीत रीते आहयी कीताप कारु लीखली से आहयु बी आमने मालम नी हय। पण ढेरेत जाणकार आसम माने के, आहयी कीताप मसीन पयदा हयवान 70 साल ने अळतेण लीखी हहे। आनो कारण आहयो से के, जत्‌यार यरुसलेम ह़ेर 70 वा साल मे खत्‌तम हय ज्‌यु ते बी आहयी कीताप मे यरुसलेम ना बारा मे वात आसम हयी के, जीसम तीहयु खत्‌तम नी हयु। आहयी कीताप ने ढेरेत मंडळी मे भण्‌या हहे। अने आहयी कीताप रोमीयो ह़ेर मे लीखली से

रुपरेखा

1. लीखवा वाळो आसम देखाड़े के, ईसु आहया भगवान ना आखा भगवान वगे गेथा केण्‌या माणहु अने ह़रगदुत सी मोटो से।

2. अळतेण तीहयो आहयु लीखे के, जे पुंजारो यरुसलेम मंदीर मे सेवा-चाकरी करतो हतो तीनी सी बी ईसु मोटो से।

3. मुसा ने आपला हुकम नी लारे जे जुन्‌ला कायदा मे भगवान आह़फा ना माणहु ह़ाते करलो तीमनी सी बी ईसु नी सेवा मोटी से

4. ईसु आखी वात मे आखा सी वारु से आहयु पक्‌कु करवान अळतेण लीखण्‌यो ढेरेत दाड़ीन ना काम ना वेहवार ना बारा मे ह़ला करे।

5. आखरी मे लीखण्‌यो बड़ावो आपीन अने वारला से के कीन चीट्‌ठी ने खत्‌तम करे।