Paliya Bible
ईब्रानीयो 2
मोटो छुटकारो
आनीन करते जरुड़ी से के आमु तीहयी सच्चाय नी वात पोर जे आमु ह़मळला से, अळी बी मन लगाड़ो, आसम नी हयवा जोवे के वीरखीन तीमनी गेथा सेटा जत रेय। जे खबर ह़रगदुत नी लारे आपणा आड़ा-बुड़ा ने जड़ी तीहयी खरली हती, जे कोय तीहया हुकम ने नी पाळे अने जे कोय हुकम ने तोड़ीन पाप कर्यो तीमने आखा ने डंड जड़्यो। कदीम आमु एतरा मोटा छुटकारा पोर धीयान नी दीया, ता आमु कीकम बचहु? मालीक आखा सी पेले आहया छुटकारा नी वात कर्यो, अने जे तीने ह़मळ्या तीहयु अमारी जुगु साबीत हयु के आहयु ह़ाचली से। अने ह़ातेत भगवान बी आह़फा नी मरजी नी लारे सेलाणी, अने जुदा-कामु, अने आखा भाती नी सक्ती ना कामु, अने चोखली आत्मा ना वाटाम ने वाटवा नी लारे आनी गवाय आपतो र्यो।
छुटकारा नी वाट देखाड़न्यो
भगवान तीहयी आव्वा वाळी कळी ने जीना बारा मे आमु कर र्या, ह़रगदुत ना हक मे नी कर्या। पण चोखली सास्तर मे कानो आहयी गवाय देदलो से,
“माणेह ह़ु से के तु तीनी फोम करे?
अने माणेह नो सोरो ह़ु से के तु तीनी फीकर करे?
तु तीने ह़रगदुतु गेथो थोड़ुक कम कर्यो;
तु तीनी पोर बड़ाय अने ईज्जत नी पागड़ी मेकलो से,
अने तीने आह़फा ना हात ना कामु पोर हक आपलो से। तु आखु कंय तीना पोगु ना तळे कर देदलो।”
एतरे जत्यार तीहयो आखु कंय तीना हक मे कर देदलो, ता तीहयो कंय बी नी मेल्यो जे तीनी हक मे नी हय। पण आमु हमणे आखु कंय तीना हक मे नी देखीया। पण आमु ईसु ने जे ह़रगदुतु गेथो थोड़ुक कम करलु हतु, मोत नो दुख झेलवा नी करते बड़ाय अने ईज्जत नी पागड़ी पेरली देखत्ला से, काहाके भगवान नी बरकत सी तीहयो आखा माणहु जुगु मरे। आहयु भगवान जुगु संय हतु जे आखी वातु ने बणायो अने ह़माळीन राख्यो, ईसु ने बी दुख नी लारे पुरोन-पुरो बणाव्वा जोवे, काहाके ढेरेत अवल्यात तीनी बड़ाय मे भेसकाय सके। काहाके ईसुत तीहयो एक से जे तीमने छुटकारा भणी ली जाय।
तीहयो माणहु ने तीमना पापु सी चोखो करे अने तीहया बेम तीहया अने चोखला करला, आखा नो बाह एकीत से; आनीन करते ईसु तीमने आपणा घोरल्या केवा सी नी लजवायतो हतो। तीहयो केय,
“मे तारु नाम मारा भाय-बेन्या ने ह़मळावही;
मंडळी ना वच मे, मे तारु भजन गावही।”
अने अळी आहयु केय, “मे तीनी पोर भरहो राखही।” अने अळी आहयु बी केय, “देख, मे तीहया सोराम नी भेळतो जीने भगवान मने आपलो से।”
एतरे जत्यार सोरा माह अने लोय ना साजल्या से, ता तीहयो आह़फो बी तीमनीन तेम तीमना साजल्या हय ज्या, काहाके मोत नी लारे तीने जीने मोत पोर सक्ती जड़ली हती, काहाके भुतड़ा ने रीकामा कर देय; आहयीत रीते जेतरा मोत नी बीक नी करते जलम नी जीवाय मे गुलामी मे फस ज्या, तीमने छोड़ाय लेय। काहाके आहयु उजन्तु से के तीहयो ह़रगदुत नी, नी पण अब्राहम नी अवल्यात नी मदत करे। आनीन करते तीने जोवतु हतु, के आखी वातु मे आह़फाम ना भायुन तेम बणे; जीनी सी तीहयो तीहयी वातु मे जे भगवान सी नातु राखे, एक दया वाळो अने भरहो करे एवु डायलो पुंजारो बणे काहाके माणहु ना पापु ने माफ कर सके। काहाके जत्यार तीहयो पारख नी टेम मे दुख झेल्यो, ता तीहयो तीमनी बी मदत कर सकत्लो जीमनी पारख हये।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.