Paliya Bible
ईब्रानीयो 3
ईसु मुसा गेथो बी मोटो से
ए मारा चोखला भाय अने बेन्या तमु जे भगवान नी लारे बोलावला से तमु तमारो धीयान ईसु पोर लगाड़ीन राखो जीने भगवान डायलो पुंजारो बणवा करीन मोकल्लो से, तीने जीनी पोर आमु कबुल्या। तीहयो जे तीने टाळ्यो तीहया भगवान नी करते भरहा नी लायक हतो, तेमेत जेम मने मुसो आपणा काम नी करते भगवान ना घोर मे भरहो करे एवो हतो। जेम घोर बणाव्वा वाळो एक माणेह घोर गेथो जादा खुद ईज्जत नी लायक रेय, आहयीत रीते ईसु बी मुसा करते जादा ईज्जत नी लायक मनायो। काहाके हर एक घोर नो कोयने कोय बणाव्वा वाळो रेय। पण भगवान ते आखी चीज ने बणाव्वा वाळो से। मुसो ते भगवान ना घोर मे चाकर्यान तेम भरहा नी लायक हतो, तीहयो तीहयी वात केदो जे अगी हयवा वाळी वात भगवान नी लारे केवा वाळी हती। पण मसी सोरा नी रुप भगवान ना घोर मे भरहा नी लायक से। अने तीनु घोर आपणु से, कदीम आमु अमारी हीम्मत अने जीनी पोर आमु मोटाय करया तीहयी आह पोर वातड़ा रीन टेकला रीया।
भगवान ना माणहु नी जुगु अराम नो दाड़ो
एतरे जीसम चोखली आत्मा केय,
“कदीम आज तमु भगवान नी अवाज ह़मळो,
ता आह़फाम ना मन ने वातड़ु ना करो,
जीसम के तमारा आड़ा-बुड़ा जत्यार रीह देवाड़वा नी टेमे अने पारख ना दाड़ा मे बड़ा मे करला हता।
भगवान केय तां तीहया मारी पारख कर्या अने पारख्या।
अने मारा कामु ने देख्या जीने मे चाळीह साल तक करतो र्यो।
आनीन करते मे तीहयी टेम ना माणहु सी
रीहवायतो र्यो, अने केदो,
ईमना मन सदा भटकता रेता हता, अने मारा हुकम ने नी मान्या।
तत्यार मे रीहवाय्न ह़ाम खादो,
‘तीहया मारा अराम ना जागा मे अळतेण कदी भराय नी सके।’”
ए भायु, अने बेन्या, चेतीन रेवो के तमारी मे गेथु कोय नु बुरु अने भरहो नी करवा वाळु मन नी रेवा जोवे, जे तमने जीवता भगवान सी सेटु कर देय। पण आनी बदले जत्यार तक आहयो “आज नो दाड़ो” केवाये तमु दाड़ीन एक-बीजा ने धीरज आपता रेवो के तमारी माय्न कोय बी पाप मे भटके नी अने वातड़ा हय जाय। कदीम आमु आखरी तक वातड़ा रीन आपणा सुरुवात ना आत्मा ना भरहा मे बणीन रेय ता आमु मसी ना साजल्या बण जीया।
जीसम सास्तर केय,
“कदीम आज तमु भगवान नो बोल ह़मळो,
ता आह़फाम ना मन ने वातड़ा ना करो,
जीसम के भगवान सी वीरोद कर्या ते दाड़ा मे तमारा आड़ा-बुड़ा करला हता।”
तीहया काना माणहु हता जे भगवान नी अवाज ह़मळ्या अने तीना खीलाप मे वीरोद कर्या? ह़ु तीहया ते माणहु नी हता जे मुसो मीसर देस मे गेथा बचाड़ीन नीकळलो हतो? अने भगवान चाळीह साल तक काना माणहु सी रीहवाय्न र्यो? ह़ु तीमनी पोर नी जे पाप करला हता, अने जीमना धोड़ बड़ा मे पड़ र्या हता? अने भगवान काना माणहु जुगु ह़ाम खादलो के तमु अराम ना जागा मे नी भराय सको? ह़ु आहया तीहया ते नी हय, जे तीनो हुकम नी मान्या? पण आमु देखीया के तीहया भरहो नी हयवा नी करते भराय नी सके।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.