Paliya Bible
ईब्रानीयो 4
एतरे जत्यार तीना अराम मे भरायवा नो वायदो हमणे तक से, ता आमने बीहवा जोवे ईसम नी हय जाय के तमारी मे गेथो कानो माणहे तीनी मे जवा नी लायक नी जड़्यो। काहाके आमु खुस-खबर ह़मळ्या जेम तीहया ह़मळला हता, पण जे खबर तीहया ह़मळला हता तीमनी जुगु तीनी कोय कीमत नी हती। काहाके जत्यार तीहया ह़मळ्या तीहया तीने भरहा भेळ नी मान्या। आमु जे भरहो करन्या से, तीहया अराम ने जीनो वायदो भगवान करलो हतो, तीने हात करया। जेम भगवान केदलो,
“मे रीह मे आनी पोर ह़ाम खाय्न केदो,
तीहया कारु बी मारा अराम मे भेसकाय नी सके।
तीहयो आहयु केदलो हतो के जत्यार कळी ने बणाव्वान बाद तीनु काम पुरु हय जेलु हतु।” काहाके ह़ातवा दाड़ा ना बारा मे कंखर ते सास्तर मे केदलु से, “अने अळी ह़ातवा दाड़े भगवान आह़फा ना आखा कामु सी अराम कर्यो।” अने आना बारा मे तीहयो अळी आहयु केय, “तीहया मारा अराम ना जागा मे अळतेण कदी भराय नी सके।” जे पेले खुस-खबर ह़मळ्या तीहया ते अराम ने हात नी कर सक्या, काहाके तीहया भरहो नी कर्या। पण बीजाम नी जुगु अराम नु झापलु हमणे बी उगड़लु से। भगवान अळी एक खास दाड़ो ठेरायो अने तीनु नाम पाड़्यो, “आज नो दाड़ो” कंय साल बाद दावुद नी लारे भगवान तीहया दाड़ा ना बारा मे सास्तर मे देखाड़लो हतो, जीना बारा मे सास्तर पेलेत देखाड़े,
“कदीम आज तमु तीनी अवाज ह़मळह़ु,
ता आह़फाम ना मन ने वातड़ा ना करो।”
कदीम यहोसु तीमने अराम मे लीन जेलो हतो जीनो वायदो भगवान करलो हतो, ता भगवान अळतेण कदी अळी बीजा दाड़ा ना बारा मे नी केतो। ता जे बी हय, जेम भगवान ह़ातवा दाड़े अराम करे, तेमेत भगवान ना माणहु नी जुगु एक अराम री र्यो। काहाके जे कोय बी भगवान ना वायदा करला अराम मे जाय, तीहयो आह़फा ना काम सी अराम हात करहे, तेमेत जेम भगवान आह़फा ना कामु सी अराम कर्यो। ता आवो आपणु बी तीहया अराम ने हात करवा करीन आपणी पुरी रीती सी कोसीत करया, के भरहो नी करवा वाळा अमारा वच मे गेथु कोय बी तीने हात करवा मे वण-भरह्यो नी रेवा जोवे।
काहाके भगवान नो बोल जीवत्लो, अने काम करवा लायक, अने कानी बे धार वाळी तलवार गेथो बी वेताळो से; अने जीव अळी आत्मा ने अने गाठ-गाठ अने गुदा-गुदा ने अलग करीन आर-पार डुचो पाड़ देय अने मन नी ईच्छा अने वीच्यार नो नीयाव करे। कळी नी कानी बी चीज भगवान नी नींगा सी ह़तायली नी हय तीना डोळा अगळ जीने आमने हीसाप आपवा नो से, आखी चीज कानी बी चीज सी ढकायली नी पण उगाड़ली से।
ईसु मोट्लो पुंजारो
आनीन करते जत्यार अमारो एवो मोट्लो पुंजारो से जे ह़रग मे हतीन जेलो से मतलब भगवान नो सोरो ईसु मसी, ता आपणु आपणा भरहा ने जीने आपणु हात करला से टणकाय सी धरीन रीया। काहाके अमारी पांह जे डायलो पुंजारो से तीहयो एवो नी हय के जे अमारी कमजोरी मे दुखी नी हय सके, तीने आखी भाते तेमेत पारख्या जेम आमने पारख्या पण तीहयो जलम वण-पापी नीकळ्यो। ता एतरे आवो, खुद पोर भरहो राखीन बरकत हात करवा भगवान नी राजगादी नी जाय के आनीन करते के जरवत पड़वा पोर आपणी मदत नी जुगु आमु दया अने बरकत ने हात कर सकया।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.