Paliya Bible
ईब्रानीयो 13
आमु भगवान ने कीसम खुस करीया?
एक-बीजा मे भरहो करन्या भायु नो मोंग बणलो रेय। अंजाण्या माणहु नो आह़फाम ना घोर आव-भाव करवा ना भुलो, काहाके आनी लारे कंय माणहु ते अंजाण्या ह़रगदुतु नो आव-भाव करला से। केदड़ा नी आसम खबर लेवो, के मानो तीमनी ह़ाते तमु बी केद मे हय; अने जीमनी ह़ाते बुरो वेहवार हये, तीमने आहयी रीते फोम करो जेम मानो तमु खुद दुखी हय र्या हय।
आपणा वचमे वेवा आखी भात्ये ईज्जत सी हयवा जोवे, अने लाडी अने लाडा ने एक-बीजा पोर एदराय नी करवा जोवे, काहाके भगवान छीनाळ्या नो, अने बीजी बयर राखण्या नो नीयाव करहे।
तमु धन नी लालच नी करजो। अने जे तमारी पांह से तीनी मे खुस रेवो; काहाके भगवान खुद केदो, मे तने कदी नी सोड़ु, अने नी भुलु। एतरे आमु भरहा सीत कीया,
मालीक ईसु मारी मदत करत्लो
से मे नी बीहु,
माणेह मारु ह़ुं कर सके?
जे तमारा अगवाय करन्या से, अने जे तमने भगवान नो बोल ह़मळावला से, तीमने फोम राखो; के तीहया कीसम चाले, मरे, अने जीवे अने तीमना भरहा नी तेम चालवा नु करो। ईसु मसी आज अने काल जलम-जलम एक ह़रको से। आखी भाती नी अंजाण्यान ह़ीकापण सी ना भटको, आपणी जुगु आहयु वारु से के तीहया मन नी दया नी लारे मजबुत बणया, नी के खावा-पीवान तेवा कायदा ने मानवा सी जीनी सी तीमनो कंय फायदो नी हयो जे तीने मान्या।
अमारी एक आसवी वेदी से, जीनी पोर सी खावा नो हक तीहया पुंजारा ने नी, जे तम्बु नी चाकरी करत्ला से। काहाके जे जानवर नु लोय मोट्ला पुंजारा, पाप नी बादा नी लेदे चोखला जागा मे ली जाय्न, तीमनु डील ने मांडवा ना बारथु धपाड़त्ला। आनी कारण, ईसु बी माणहु ने आपणा लोय नी लारे चोखला करवा नी लेदे झापला ना बारथो दुख उठायो। ता एतरे, आवो तीनीन्तां मांडवान तां जीया अने तीनी बुराय मे साजल्या बणया। काहाके आञे धरती पोर अमारु कोय टेकलु रेवा वाळु ह़ेर नी हय, पण आमु एक आव्वा वाळा ह़ेर नी वाट जोय र्या। चालो आवो आपणु ईसु नी लारे भगवान ने बड़ाय ना रुप मे बादा चड़ावया जे तीहया होट्या नु फोळ से जे तीना नाम ने मान लेदा। भलाय करवा अने एक-बीजा नी मदत करवा ना भुलो, काहाके भगवान आसवी बादा सी खुस हये।
आपणा अगवाय करन्या ना हुकम मानो अने तीना हुकम पोर चालो, काहाके तीहया अराम कर्या वगर तमारा जीव नी लेदे तमारी पोर एवी चोकसी राखे जीमने आह़फाम नो लेखो-जोखो भगवान ने आपवा पड़हे
अमारी जुगु वीन्ती करता रेवो, काहाके आमने पक्कु से, के अमारु मन चोखलु से, अने आमु आखी वातु मे वारली चाल चालवा हींडत्ला। मे अगवाय करु के तमु वीन्ती कर्या करो के तमारीन्तां छोटोत आय सकु।
जे गाडरा ना मोट्ला गुवाळ्या अमारा मालीक ईसु ना लोय नी लारे तीहया जलमका वायदा पोर सीलटप्पो लगाड़ीन जीवाड़ उठाड़्यो, तीहयो सांती आपण्यो भगवान, तमने आखा वारला सादन आपीन पुरो करे, जीनी सी तमु तीनी मरजी पुरी कर सको, अने ईसु मसी नी लारे तीहयो अमारी मोय तीहयु आखु ने तीयार करे जे तीने गमे। जलम-जलम तक मसी नी बड़ाय हयती रेय। आमीन।
आखरी सब्द
ए भायु, अने बेन्या मे तमारी सी वीन्ती करु, के आहयी ह़ीकापण नी वात ने धीरारीन ह़मळो, काहाके मेत तमने घणु कमतु चीट्ठी मे लीखलो से। मे चाहु के तमने आहयु मालम हये के तीमुथीयुस अमारो भाय सुट जेलो से। अने कदी तीहयो ममार आय लागहे, ता मे तीनी ह़ाते तमने भेटवा आवही।
आपणा आखा अगवाय करन्या ने अने आखा भगवान ना चोखला माणहु ने वारला से के केजो। ईटली वाळा भरहो करन्या तमने वारला से के केय।
तमु आखा पोर भगवान नी दया हयती रेय। आमीन।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.