Paliya Bible
ईब्रानीयो 7
मलकीसीदक नो पुंजारो
आहयो मलकीसीदक सालोम नो राजा हतो, अने डायला भगवान नो पुंजारो हतो, जत्यार अब्राहम च्यार राजाम ने हरावीन पासो आव्वा बाज र्यो हतो, ता मलकीसीदक अब्राहम ने भेट्यो अने संयबरकत आप्यो। अने अब्राहम तीने तीहयु आखु मे गेथु जे तीहयो लड़ाय मे जीकलो हतो तीनो दसवो वाटो आप्यो। मलकीसीदक ना नाम नु पेलु मतलब से, “धरम नो राजो” अने अळी तीनु आहयु बी मतलब से, “सालोम नो राजो” मतलब “सांती नो राजा।” तीना बाह, अने आय्ह, अने आड़ा-बुड़ा नी कोय जानकारी नी जड़ती, तीनी पयदावारी अने मोत नी बी जानकारी नी हय, पण भगवान ना सोरान तेमेत जलमको पुंजारो बणीन रेय।
हाव वीच्यार करो के तीहयो केतरो मोटो हतो, जे कंय अब्राहम झगड़ा मे हात कर्यो तीनो दसवो वाटो आप्यो। लेवी नी अवल्यात मे गेथा जे पुंजारा नो जागो हात करे, तीमने कायदा नी अनसारे हुकम जड़लो से के ईस्रायल ना माणहु सी, मतलब आह़फाम ना माणहु सी, दसवो वाटो लेय, अळतेण तीहया अब्राहम नी अवल्यात बी काहा नी रेय। पण मलकीसीदक, जे तीमना घोराणा नो बी नी हतो, अब्राहम सी दसवो वाटो लेदो, अने जीमने वायदा जड़ला हता तीमने बरकत आप्यो। जा तक लेवीयो नो सवाल से आनी मे सण्का नी हय के नानलो मोट्ला पांह गेथो बरकत हात करे। अने आञे ते मरवा वाळा माणहु दसवो वाटो लेय, पण तां तेत लेत्ला से जीमनी गवाय देखाड़े के तीहया जीवत्ला से। ता आपणु आहयु बी की सकत्ला के लेवी बी, जे दसवो वाटो से, अब्राहम नी लारे दसवो वाटो आपला से। काहाके जत्यार मलकीसीदक अब्राहम ने भेटलो, ता लेवी पयदा बी नी हयो, तीहयो ते तीमना आड़ा-बुड़ा ना डील मेत हतो।
मलकीसीदक नी तेम बीजो पुंजारो
कदीम लेवी पुंजारा नी रीती नी लारे पुरुत कर लेय ता काना बीजा पुंजारा नी आव्वा नी जरवत ह़ु हती? काहाके आना आधार पोर माणहु ने कायदा बी आपला हता, एक एवा पुंजारा नी ह़ु जरवत हती जे मलकीसीदक नी रीती नो, नी पण हारुन नी रीती नो। काहाके जत्यार पुंजारा नो जागो बदली देय, ता कायदा नो जागो बी बदलवा नी जरवत से। काहाके जीनी बारा मे आहयी वात केय के आहयो बीजी जाती नो से, जीनी मे सी कोय बी वेदी नी चाकरी नी कर्यो। तां उजन्तु से के अमारो मालीक यहुदा नी जाती मे गेथो पयदा हयलो से अने आहयी जाती ना बारा मे मुसो पुंजारा ना जागा ना बारा मे कंय वात नी कर्यो।
मलकीसीदक ने तेवो बीजो पुंजारो
अमारो दावो अळी बी वारु चोखो उजन्तो हय जाय, जत्यार मलकीसीदक ने तेवो एक अळी पुंजारो पयदा हय जाय, जे आहयी कळी ना कायदा ना अनसारे नी, पण खत्तम नी हयवा वाळी जीवाय नी सक्ती ना लारे पुंजारो बणलो से। काहाके तीना बारा मे आहयी गवाय देदलो से, “तु मलकीसीदक नी रीती पोर जलम-जलम नो पुंजारो से।” पेल्नो कायदा आनीन करते खत्तम कर देदा काहाके तीहयो कमजोर अने रीकामो हतो। आनीन करीन के मुसा ना कायदा कानी बी वात ने पुरी चोखी नी कर्यो, अने तीना जागा पोर एक एवी वारु आह मेकली से जीनी लारे आपणु भगवान ना ह़ाते जाय सकत्ला।
मसी ने टाळे वगर ह़ाम नी हयी, पण ईसु एक ह़ाम सी पुंजारो बणलो जत्यार भगवान तीने केदलो,
“मालीक ह़ाम खादो,
अने तीहयो आह़फा नु मन कदी नी बदले:
तु जलम-जलम नो पुंजारो बणीन रेही।”
आहयी ह़ाम ना कारण ईसु एक अळी वारु वायदा नी जामनी रेण्यो बण ज्यो।
तीहया घण ढेरका पुंजारा बणता आया, पण तीमनी मोत आह़फा ना पुंजारा ना जागा पोर जलम टेकला रेवा नी देती हती; काहाके ईसु अमर से, आहयात कारण सी तीनो डायला पुंजारा नो जागो जलम बण्लो रेय। एतरे जे तीनी लारे भगवान पांह आवत्ला से, तीहयो तीमनु पुरी रीती सी छुटकारो कर सकत्लो से, काहाके तीहयो तीमनी जुगु रावण्या करवा जलम जीवत्लो से।
अने ईसु, एवो मोट्लो पुंजारो से, जे अमारी जरवत ने पुरी कर सके, तीहयो चोखलो अने वण-गुनाळ्ळो दगो नी करन्यो अने ह़ुवाळो, अने पापी माणहु सी अलग, अने ह़रग गेथु बी उचु करलु से। अने तीहया बीजा पुंजारान तेम तीने जरवत ना हरेक दाड़े पेले आह़फा ना पाप अने माणहु ना पाप नी लेदे बली चड़ावे काहाके तीहयो आह़फा ने बली चड़ावीन जलम नी भेट आप देदो। मुसा ना कायदा ते पुरी रीती सी लुल्ला से, तीहया माणहे ने डायलो पुंजारो बणावे, पण भगवान नो वायदो तीनी ह़ाम खाय्न कर्यो तीहयो वायदो कायदान बाद आवलो से अने आहयो वायदो खास पुंजारा ना रुप मे सोरा ने टाळ्यो जे जलमको पुरोन-पुरो बण ज्यो।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.