Paliya Bible
ईब्रानीयो 6
एतरे आवो आपणु मसी नी सुरुवात नी ह़ीकापण ने ह़ीकीन अळी अगा बड़ता जीया जे वात ह़ीक लेदा तीने पासी ह़ीकवा जरुड़ी नी हय जीसम पाप भणी गेथा मन फीरव्वा नी ह़ीकापण अळी भगवान पोर भरहो करवा नी ह़ीकापण, अने बपतीस्मा नी ह़ीकापण अने हात उपर मेलवा, अने मरला मे गेथा जीव उठवा, अने आखरी दाड़ा ना नीयाव नी ह़ीकापण नी नीव ना नाखो। कदीम भगवान ने गमे ता आपणु आहयुत करहु।
काहाके जे माणहु आह़फा ना भरहा ने सोड़ देय तीमने फीर सी मन फीरव्वा करीन कीकम लावया? तीहया एक कावा भगवान नु वीजाळु मे हता। जे ह़रग ना वाटा नो ह़वाद चाख लेदला से अने चोखली आत्मा नो आपणो वाटो हात करला से, अने तीहया भगवान ना बोल ने जाणता हता के भगवान नो बोल केतरो वारु से। अने आव्वा वाळी कळी नी सक्ती नी जानकारी ली चुक्या। कदीम तीहया भरहा सी भटकी जाय ता तीमने अळी मन फीराव्वा नी लेदे पासा लाव्वा काठु से; काहाके तीहया भगवान ना सोरा ने अळी कुरुस पोर चड़ावे अने आखा नी अगळ नामबद्दी नी वात बणावे।
जे धरती जलमको पड़वा वाळा पाणी ने चुह लेय, अने जोपवा अने ओरवा नी लेदे काम लायक मेर आपे अने तीहयी भगवान गेथी संयबरकत हात करे। पण कदीम तीहयी धरती कटाळस्या झाटवा अने गोखरा काटा उगाड़े, ता तीहयी रीकामी से, अने भगवान सी सरापीत हयवा नी बीक से, अने तीने आखरी मे धपाड़ देहे।
ए मोंगाळ्ळा, भले आमु आहयी रीते ने वात कीया पण तमारा बारा मे आमने आनी सी बी वारु वातु नो खुद पोर भरहो से। तीहयी वात जे तमारा छुटकारा सी जोड़ायली से। तमु भगवान ना चोखला माणहु नी लगत मदत करता जाय्न जे मोंग देखाड़ला से, तीने अने तमारा बीजा कामु ने भगवान कदी नी भुले, तीहयु गलत नी हय। पण अमारी घणी ईच्छा आहयी से के, तमारी माय्न एक-एक जणो आखरी लग काठी मेहनत करता रेय। के तमु तीने पक्को तमु तीने हात कर लेहु जीनी तमु आह कर र्या। काहाके आमु नी चाहता के तमु ओगज्या बण जावो, पण तमु तीमनीन तेवा बणो जे भरहा पोर हीम्मत नी ह़ाते जे चीज ने हात कर र्या जीनो वायदो भगवान करलो हतो।
भगवान नो नी टळवा वाळो वायदो
जत्यार भगवान अब्राहम सी वायदो करलो हतो, ता खुद तीनी सी मोटु कोय अळी नी हतु जीनी ह़ाम खाय सके, करीन आह़फा नी ह़ाम खाय्न, तीहयो केदो, “मे तने ह़ाचलीन ढेरेत संयबरकत आपही, अने तने ढेरेत अवल्यात आपही।” अने आहयी रीते अब्राहम दम धरीन भगवान नो वायदो करली वात हात कर लेदो। माणेह ते आह़फा गेथा काना मोटा नी ह़ाम खाय, अने तीमना ह़ाम आखा झगड़ा खत्तम करीन जे कंय केय तीने पक्कु कर देय। भगवान आने तीहया माणहु नी जुगु पुरी रीती सी आसुझण कर देवा हींडतो हतो, के तीहयो तीना मकसत ने कदी नी बदले। आनी करते तीहयो आह़फा ना वायदा ने ह़ाम ह़ाते जोड़ देदो। आञे बे वात से तीनो वायदो अने तीनी ह़ाम जे कदी नी बदली सके अने जीना बारा मे भगवान कदी झुट नी की सकतो। करीन आमु जे भगवान नी ह़ाते रखवाळी हात करवा करीन आवला से अने जे आह तीहयो आपणु ने आपलो से तीने धरीन, घण जादा होह मे से। तीहयी आह अमारा जीव नी लेदे एसवा ढुंड्यु रोकवा ना हेकड़ान तेवी से जे टेकली अने मजबुत से, जे मंदीर ना पड़दा नी मोय लग पुगली से,1 जां ईसु अमारी भणी गेथो अमारी सी पेले भरायो, तीहयो मलकीसीदक नी रीती मे जलमको डायलो पुंजारो बण ज्यो।
Source notes (1)
- Footnote ढुंड्यु ने रोकवा करीन ह़ाकळ वेर बांदीन मोट्ला दगड़ा ने पाणी मे नाखे तीने मांजरी केतला।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.