Paliya Bible
ईब्रानीयो 8
ईसु अमारो पुंजारो
हमणे जे वात आमु की र्या तीमनी मे गेथी मोटी वात आहयी से के अमारो ईसम डायलो पुंजारो से, जे ह़रग पोर मोट्ला भगवान नी राजगादी ना जमणी धेड़े जाय्न बह ज्यो, अने चोखला जागा मे मतलब, खरला तम्बु नो चाकर्यो बण्यो जीने कानो माणेह नी, पण भगवान उबो करलो से।
काहाके आखा मोट्ला पुंजारा भेट अने बादा चड़ाव्वा करीन ठेरावत्ला से, आनीन करीन जरुड़ी से के आहया पुंजारा पांह बी कंय चड़ाव्वा नी लेदे हय। कदीम तीहयो धरती पोर रेतो ता कदी पुंजारो नी रेतो, काहाके तां पेले गेथात आवा पुंजारा से जे युहदी कायदा नी अनसारे भेट चड़ावे। जे पुंजारा नु काम तीहया करे तीहया जे ह़रग मे से तीनो एक साहळो जे तीनीन तेवो से। आहयु आहयी रीते से जत्यार मुसो चोखला तम्बु ने बणाव्वा वाळो हतो, ता भगवान तीने केदलो हतो, “ध्यान रेय के तु आखी चीज वारु तीहयीत रीते बणावे जे तने बड़ा पोर देखाड़ली हती।” पण हाव जे पुंजारा नी सेवा ईसु ने जड़ली से तीहया तीमना सेवा ना कामु सी वारु से, काहाके तीहयो जे वायदा नी वचमे से तीहयो जुन्ला वायदा गेथा वारु से। काहाके आहयु वारली चीज ना वायदा पोर टेकलो से।
काहाके पेल्ना वायदा मे कानी बी गलती नी हय, ता बीजा वायदा नी जरवत नी हती। पण भगवान माणहु पोर गुनो लगाड़ीन की र्यो, “मालीक केवा बाज र्यो, देखो, तीहया दाड़ा आव्वा बाज र्या”
“मे ईस्रायल ना घोराणा नी ह़ाते,
अने यहुदा ना माणहु ह़ाते नवलो वायदो बांदही।
आहयी ह़ेली बोलीन तेवी नी हये,
जे मे ईमना आड़ा-बुड़ा नी ह़ाते तीहयी टेमे बांदली हती,
जत्यार मे ईमनो हात धरीन ईमने मीसर देस सी नीकाळ लायो;
काहाके हीय्या वायदा पोर भरहा नी लायक नी र्या, एम करीन मे ते ईमनी खबर नी लेदो, भगवान बी आहयुत केवा बाज र्यो
अळी भगवान केवा बाज र्यो,
जे वायदो मे तीहया दाड़ान बाद ईस्रायल ना घोराणा नी ह़ाते बांदही;
तीहयो आहयो से के मे मारो कायदो तीमना मन मे नाखही,
अळी मे ईमनो भगवान बणही
अने हीय्या मारा माणहु बणहे।
अने कोय आह़फा ना दोस्तीदार्या ने
अने आह़फा ह़ाते वाळा ने आहयी ह़ीकापण नी आपे,
के तु मालीक ने ओळख,
काहाके नान्ला गेथा मोट्ला तक आखा मने जाण लेहे।
काहाके मे तीमना पाप ने माफ कर देही,
अने तीमना पाप ने मे अळी फोम नी करु।”
आहया वायदा ने नवलो कीन पेल्ना वायदा ने जुनो कर देदो, अने जे चीज जुनी अने जरजर हय जाय तीहयु छोटुत खत्तम हय जाय।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.