Paliya Bible
ईब्रानीयो 9
धरती अने ह़रगे नी बड़ाय
तीहयी पेल्नी बोली मे बी उपाह़ पाळवा ना कायदा हता, अने ईसम चोखलो जागो हतो जे आहयी कळी नो हतो। एक तम्बु बणावला हता, जीना पेल्ना कोपरा मे दीवलाय अने भगवान ने भेट करवा ना रोट्ला हता; अने तीहयो चोखलो जागो केवायतो हतो। बीजा पड़दा पसळ एक अळी कोपरो हतो, जे घणो वारु चोखलो जागो केवात्लो हतो। आनी मे वारु गंदायण्या धुप नी लेदे ह़ोना नी वेदी, अने च्यारो-मेर ह़ोना सी बणलु पेटारु हतु आहया पेटारा मे मन्ना सी भरलु ह़ोना नु ठाहरु हतु अने हारुन नी लाकड़ी जीनी मे डीरा नकळ्ळा हता अने बे दगड़ा जीनी पोर बे हुकम लीखला हता। तीमनी उपर बेम भबळवा वाळा ह़रगदुत हता, जे पाप नी माफी ना जागा पोर साहळो करला हता; ईमनु एक-एक करीन देखाड़वा नी टेम नी हय।
आखु कंय आनी रीते तीयार हय जवान बाद पुंजारो पेल्ना कोपरा मे दाड़ीनेत भराय्न आह़फा नु सेवा-चाकरी नु काम करवा जता हता। पण पड़दा ना मोय ना बीजा कोपरा मे खास पुंजारो साल मे एकीत कावा भरायतो हतो। अने तीहयो लोय वगर मोय कदी नी भरायतो हतो जीने तीहयो खुद आह़फा नी लारे अने माणहु नी लारे अंजाण्या मे करला पापु नी जुगु भगवान ने भेट चड़ावतो हतो। आनी लारे चोखली आत्मा वारु रीती सी आहयु ह़ीकाड़े के जत्यार तक बाहरलु तम्बु उबु हयलु से, तत्यार तक चोखला जागा नी वाट उगड़ली नी हये। आहयु एक तम्बु से जे हमणे नी टेम नी लेदे एक सेलाणी से; जीनी मे एक एवी भेट अने बादा चड़ाव्वान बाद बड़ाय करवा वाळा ना जीव चोखा नी हय सकता। तीहया ते बस खावा-पीवा अने अलग-अलग चोखा करवा ना जागा ना बाहरला कायदा से, अने भगवान ना नवला कायदा बणाव्वा नी टेम नी जुगुत लागु हये।
मसी ना लोय नी सक्ती
पण जे वात पेले गेथीत आञे से एवी वारली चीज नो मसी पेले गेथोत खास पुंजारो बणीन आवलो से। तीहयु तम्बु जीनी मे तीहयो सेवा करे तीहयु घणु वारु अने आखी भाते पुरु हयलु तम्बु से। तीहयु माणहु ना हातु सी बणावलु तम्बु नी हय, अने आहयी कळी नु नी हय। अने बोकड़ा अने वाछड़ा ना लोय नी लारे नी पण आह़फा ना लोय नी लारे, मसी एकीत कावा तम्बु मे हय्न मोट्ला चोखला जागा मे भरायो, अने अमारी जुगु जलम नो छुटकारो हात कर्यो। काहाके जत्यार बोकड़ा अने बोळद्या नु लोय अने धपाड़ला केवड़्या नो रोखड़ो वीटळ्ळा माणहु पोर छाटवा सी तीहया चोखा हय जता हता, जत्यार आहयु ह़ाचली से ता मसी नु लोय केतरु आखा पोर राज करे एवु हहे, तीहयो अमरकाय आत्मा नी लारे आह़फा ने एक आखी बादान तेम भगवान ने आप देदा। ता तीनु लोय अमारी ह़मज ने तीहया कामु सी छुटकारो अपाड़हे जे मोत बणीन ली जाय, के आमु जीवत्ला भगवान नी सेवा कर सकया।
आहयात कारण सी मसी नवला कायदा नो वचे से, काहाके जीने भगवान लारे बोलावला से तीहया भगवान मे वायदो करला अमरकाय नी संयबरकत नो हकदार्यो हय सके, पेल्ना वायदा ना हक मे करला पापु सी तीमने छुटकारो करवा करीन बदला ना रुप मे तीहयो आह़फा नो जीव आप देदलो से।
जां तक मरजी नी चीट्ठी नो सवाल से तीनी जुगु जे तीने बणायो तीनी मोत नो पुरावो देवा बी जरुड़ी से। काहाके मरवान बाद वारीस नी चीट्ठी पाकी हये जत्यार तक वारीसदार जीवत्लो रेय तां तक वारीसदार नी चीट्ठी कामकी नी हय। एतरे पेल्नो वायदो बी लोय वगर नी करलो हतो। पेले मुसो जत्यार कायदा ना आखा हुकम ने आखा माणहु ने खबर कर देदो ता तीहयो पाणी नी ह़ाते बोकड़ा नु अने वाछड़ा नु लोय ने रात्लु हीर अने हीस्सप नी डाळ्या सी चामड़ा ना चीट्ठ्या अने कायदा नी कीताप पोर अने आखा माणहु पोर छाट देदलो हतो। अने तीहयो केदो, “आहयु तीहया वायदा नु लोय से, जीनो हुकम भगवान तमारी जुगु आपलो से।” अने आहयी रीते तम्बु अने सेवा नु आखु ह़मान पोर लोय छाट्यो1 ह़ाचलीन मे कायदा नी लारे लोय सी लग-भग आखी चीज चोखी हये; अने लोय वयाड़्या वगर माफी नी हये।
मसी नी बादा नी लारे पाप नी माफी
ता आहयु जरुड़ी से के ह़रगे वाळी चीज ने तेम जानवरु ना बादा सी चोखी करे, पण ह़रग नी चीज आनी सी बी जादा वारु बादा सी चोखी करवा नी हेर करे। काहाके मसी मे माणहु ना हात ना बणावला चोखला जागा मे जे खरला अने चोखला जागान तेम से, भरायो नी, पण ह़रग मेत भरायो, काहाके अमारी जुगु हाव भगवान नी अगळ देखाव पड़े। आहयु नी के तीहयो आह़फा ने वळ-वळीन चड़ावे, जीसम के डायलो पुंजारो हर साल जानवरु नु लोय लीन चोखला जागा मे जीया करे। नीता कळी नी सुरुवात सी लीन मसी ने वळ-वळीन दुख झेलवा पड़तु; पण हाव कळी ना आखरी मे तीहयो एक कावा आखा नी जुगु उजन्तो हयलो से, काहाके आपणात बादा नी लारे पाप ने सेटो कर देय। अने जीसम माणहु नी लेदे एक कावा मरवा अने तीनी बाद नीयाव नु हयणु से जरुड़ी से। तेमेत मसी बी ढेरेत ना पापु ने उचल लेवा नी लेदे एक कावा बादा चड़्यो। अने जे माणहु तीनी वाट जोय रेत्ला, तीमना छुटकारा नी लेदे बीजी कावा वण-पापी देखाव पड़हे।
Source notes (2)
- Cross-reference लेव्यवेवस्था 8:15
- Cross-reference लेव्यवेवस्था 17:11
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.