Paliya Bible
ईब्रानीयो 11
भरहो
भरहा नु मतलब से, जीनी आमु आह करया जीनी जुगु पक्कु हयवा अने कानी चीज आमु भले देख नी सकता तीना हजुर हयवा नी आह करली चीज खरली से। आहयीत रीते पेल्ना वारा ना माणहु ने तीमना भरहा नी लारे भगवान नी राजी जड़ी। 1
भरहा सीत आमु जाण जीया के आखी धरती भगवान नात बोलु ना लारे बणली से। एतरे जे बणावली चीज देखाये, तीहयी देखायवा वाळी चीज सी नी बणी।
भरहा सीत हाबील केन सी वारलु भेट भगवान जुगु चड़ावलो, अने तीनीत लारे तीहयो धरमी हयवा नी गवाय बी देदलो से, भगवान तीनी भेट ना बारा मे गवाय देदो; अने तीनीत लारे तीहयो मरवान बाद बी हजु लग वात करे।
भरहा सीत हनोक उचलाय ज्यो के मोत ने नी देखे, अने तीने कोय ह़ोद नी सक्यु, काहाके भगवान तीने उपर उचल लेदलो हतो, अने तीने उचलवान पेले तीना बारा मे सास्तर आहयी गवाय देय, के हनोक उपर उचलाय जवान पेले तीहयो भगवान ने खुस कर्यो। अने भरहा वगर भगवान ने खुस नी कर सकत्ला, काहाके भगवान नी तां आव्वा वाळा ने भरहो करवा जोवे, के तीहयो से; अने तीने फोळ आपे जे तीने ह़ोदे।
भरहा ना कारण सीत नुहा ने जत्यार अगी हयवा वाळी वात नी भगवान चेतावणी आप्यो जे तीहयो देख्यो ता तीहयो चोखली बीक भेळ आह़फा ना घोरल्या ने बचाड़वा करीन एक ढुंड्यु ने बणावलो हतो। जे हयु तीना भरहा नी लारेत आहयी कळी ने गुनाळ्ळी ठेरायो, अने भरहा नी लारे भगवान भणी गेथी आव्वा वाळी धारमीक्ता ने हात कर्यो।
भरहा सीत जत्यार अब्राहम ने भगवान बोलावलो ता हुकम मानीन एवा जागा मे नीकळ ज्यो जीने हक मे लेवा वाळो हतो; अने आहयु नी जाणतो हतो मे कां जवा बाज र्यो, ते बी नीकळ ज्यो। भरहा सीत वायदो करला देस मे बीजा देस मे अंजाण्यान तेम, रीन ईसाक अने याकुब भेळ, जे तीनी ह़ाते तीहयात वायदा ना हकदार्या हता, तम्बु मे र्या। काहाके तीहयो ते तीहयी टेकली नीव वाळा ह़ेर नी वाट जोवतो हतो, जीने घड़न्यो अने बणावण्यो भगवान से।
भरहा ना कारण सीत अब्राहम जे घणो डायलो हय जेलो हतो अने सारा जे खुद वांज्याण हती भगवान पोर भरहो कर्या के तीहयो तीनो वायदो पुरो करे, अने अब्राहम बाह बण ज्यो। आनीन करते एकीत जणा सी जे, मरलान तेवो हतो, वादळा ना तारा अने दर्या नी बालु रेत ने तेम गणाये नी एतरी अवल्यात पयदा हयी।
आहया आखा भरहा नात हाल मे मर्या; अने तीहया वायदो करली चीज ने नी हात कर्या, पण तीने सेटात रीन देखीन खुस हया अने तीहया मान लेदा के आमु धरती पोर अंजाण्या अने बाहर वाळा से। तीहया माणहु जे एवी वात केय तीहया उजन्तु करे, तीहया आह़फाम नात देस ना ह़ोदवाळ्या से। अने जे देस तीहया सोड़ला से तीना बारा मे तीहया सोचता नी रेय, कदीम सोचता रेता ता तीमनो पासो आव्वा नो मोखो रेतो। पण तीहया एक वारलु देस मतलब ह़रग ना देस ने ह़ोदवा मे लाग र्या हता, एतरे भगवान तीमनो भगवान केवायवा मे नी लजवात्लो, काहाके तीहयो तीमनी लेदे एक ह़ेर तीयार करलो से।
भरहा सीत अब्राहम, पारख नी टेम मे, आह़फा ना सोरा ईसाक ने भेट ना रुप मे चड़ायो; अने जे वायदा ने ह़ाचली मान्लो हतो तीहयो आह़फा ना एक-खोळ्या सोरा ने भेट चड़ाव्वा तीयार हय ज्यो। अने ता तीने भगवान केदलो हतो, “ईसाक सीत तारी अवल्यात वदहे।” काहाके तीहयो मान लेदो, के भगवान ताखत वाळो से के तीने मरला मे गेथो जीवाड़े; अने तीमनीत मे गेथा दाखला नी रीती पोर तीहयो तीने अळी जड़्यो।
भरहा सीत ईसाक याकुब अने एसाव ने आव्वा वाळी वात ना बारा मे बरकत आपलो।
भरहा सीत याकुब मरती घड़ी युसुफ ना बेम सोरा मे सी एकीक ने बरकत आप्यो, अने आह़फा नी लाकड़ी नो टेको लीन भगवान नी बड़ाय कर्यो।
भरहा सीत युसुफ, जत्यार तीहयो मरवा वाळो हतो, ता ईस्रायली ने मीसर मे गेथा नीकळ जवा नी वात कर्यो, अने आह़फा ना हाकटा नी ह़ाते ह़ु करवा तीना बारा मे हुकम आप्यो।
भरहा सीत मुसा ना आय्ह-बाहा तीने, पयदा हयवान बाद तीन मयना लग ह़ताड़ीन राख्या, काहाके तीहया देख्या के सोरु घटाळु से, अने तीहया राजा ना हुकम तोड़वा सी नी बीह्या।
भरहा सीत मुसो मोटो हय्न फीरोन नी सोरी नो सोरो से केवायवा सी मना कर नाख्यो। आनीन करते के पाप मे थोड़ाक दाड़ा लग सुक लेवा सी वारु भगवान ना माणहु ह़ाते दुख झेलवा अळी बी वारु लाग्यु। अने ईसु मसी ना लेदे बेईज्जत्यो हयवा ने मीसर ना धन सी मोटु धन ह़मज्यो काहाके तीना डोळा ईलाम लेवा नी भणी लागला हता।
भरहा सीत राजा नी रीह सी नी बीहीन तीहयो मीसर देस सोड़ देदो, काहाके तीहयो वण-देख्या ने मानो देखतो जाय्न काठो र्यो। भरहा सीत तीहयो फसह नो तीवार अने झापला पोर लोय साटवा नी रीती ने मान्यो, के मोत नो दुत ईस्रायली नी पयदा हयली पेली अवल्यात ने नी मार सके।
भरहा सीत ईस्रायली माणहु रात्ली दर्या ना ह़ेली धेड़ आसम उतर ज्या, जीसम ह़ुकला जागा पोर सी उतरे; अने जत्यार मीसरी माणहु तीसमेत करवा चाह्या, ता आखा पाणी मे डुबीन मर ज्या।
भरहा सीत यरीहो नु भीतड़ु, जत्यार ईस्रायली ह़ात दाड़ा लग तीना च्यारो-मेर चक्कर लगाड़ देदा ता तीहयु भीतड़ु ओदरी ज्यु। भरहा सीत राहाब छीनाळ्याण भगवान ना हुकम नी मानवा वाळा ह़ाते खत्तम नी हयी, आनीन करते के तीहयी ईस्रायली ने वारु राखली हती।
हाव अळी मे वदु ह़ु केम? काहाके टेम नी री के गीदोन ना, अने बाराक, सीमसोन, यीफतह, दावुद, समुएल ना अने भगवान वगे गेथा केण्या माणहु ना बारा वात करु। तीहया भरहात सी राज्य ने जीक लेदा; धरम ना काम कर्या; अने भगवान वायदो करलो तीने हात कर्या; अने तीहया नाहर ना मोडा बंद कर देदा; आक्ठु नी आच ने टाडी कर देदा; तलवार नी धार सी बच ज्या; कमजोर मे गेथा ताखत वाळा हया; झुमायवा मे आखा गेथा हुस्यार नकळ्या, बाहर देस वाळा ना सीपायड़ा ने हराय नाख्या।
भरहा नी लारे बयरा ते आह़फाम ना मर जेला ह़गाय वाळा ने पासा जीवत्ला देख्या; केतरा ते मार खाता-खाता मर ज्या, अने सुटवा नी चाह्या, आनी लेदे के वारलु मरीन पासु जीवतु हयवा नु हात हये। भरहो करन्या माणहु नी हाही-ठट्टा उडाड़्या, अने ह़ड़काट्या, अने थोड़ाक ने ह़ाकळ्या वेर बांदीन जेल ने कुंड देदा। कंय माणहु ते दगड़ा वेते मार देदा; आरा वेते चीर देदा; तीमनो पारख कर्या; तलवार वेते मार देदा; तीहया गरबाय मे, अने वेला मे, अने दुख झेल्ता जाय्न, बोकड़ा अने गाडरा नी खाल ओडीन एथान-एथा मरला ह़रका फीर्या; अने उजाड़ी, बड़ा, अने मोट्ला दोरु मे, अने धरती नी चीह मे भटकता फीर्या। कळी तीमनी लायक नी हती।
तीमना भरहा ना कारण सीत आहया आखाम नो लेखो-जोखो राख्या, ते बी भगवान नो वायदो करली चीज तीमने नी जड़ी। काहाके भगवान अमारी जुगु पेले गेथोत एक वरली वात ठेरावलो से, के तीहया अमारी वगर चोखलापणा मे नी पुगे।
Source notes (1)
- Cross-reference युहन्ना 1:3
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.