2 राज़ै

2 राज़ै

इज़राईल अर यहूदा मुल्खे बरैबादी

भेत

लिखणैं आल़अ: खास थोघ निं आथी पर कोऐ बोला अह आसा जेरमयाह गूरै लिखी दी

सन: 590 का 538 ईसा आजी

पहल़णैं आल़ै: इज़राईली

अह 2 राज़ै कताब आसा 1 राज़ै कताबा दी लिखै दै यहूदा अर इज़राईल देशे इतिहासो दुजअ भाग। अह कताब बी आसा खासकर दूई हेस्सै दी बांडी दी, पैहलअ भाग आसा धैअ एकी पोर्ही सतारा तैणीं अर तेथ आसा 722 ईसा आजी तैणीं राज़ैओ इतिहास ज़ेऊ ज़मानै इज़राईल देश अश्शूर देशो गलाम हुअ। तिन्‍नैं किअ त इज़राईल देशे राज़धानी सामरी किई पठी बरैबाद अर इज़राईली निंयैं अश्शूर देशा लै गलाम बणाईं। तेखअ त सिधअ दखणा बाखा यहूदा मुल्ख बच़अ द।

ऐहा कताबो दुजअ भाग आसा धैअ ठारा का पच्‍ची तैणीं, तेथ आसा 586 ईसा आजी तैणीं यहूदा मुल्खो इतिहास, ज़ेऊ ज़मानैं यहूदा मुल्खै बाबेल देशे राज़ै नबूकदनेसरै कबज़अ किअ अर यहूदा मुल्खे राज़धानी एरुशलेम नगरी किई तेऊ पठी बरैबाद। यहूदा मुल्खै बस्सै दै इज़राईली बी निंयैं तेऊ आप्पू संघै कैद करी बाबेल देशा लै संघा डाहै तिधी गलाम बणाईं।

ऐहा कताबा दी लागा हाम्हां का थोघ कि इज़राईल अर यहूदा मुल्ख हुऐ पठी बरैबाद किल्हैकि तिंयां पेठै बिधाता छ़ाडी कबाता। बिधाता छ़ाडै तिन्‍नां सेटा भिई-भिई आपणैं गूर चतैनगी दैंदै कि तिंयां अर तिन्‍नें राज़ै पाप करनै का पिछ़ू हटे। खिरी भेटी तिन्‍नां तेते सज़ा संघा हुऐ दुहै देश बरैबाद संघा पल़अ तिन्‍नां आपणीं ज़ैगा का दूर पराऐ देशै गलाम रहणअ। एरुशलेम नगरीए बरैबादी आसा इज़राईले इतिहासा दी सोभी का बडी गल्‍ल। ऐहा कताबा पहल़णैं ई करै जाआ हाम्हां का थोघ लागी कि अह आफ़त किल्है पल़ी:

“बिधाता आई यहूदा अर इज़राईल मुल्खे परज़ा लै खास्सी रोश्शै अर खिरी दैनअ बिधाता तिन्‍नां आछी सम्हनै पठी बरैबाद हणैं।”

(24.20)

कताबे बांड

एलिशा गूरे च़ाकरी 1:1—8:29

अहाब राज़े अत्री 9:1—11:21

जोआशा पोर्ही इज़राईले बरैबादी तैणीं 12:1—17:41

हिजकिया राज़ै पोर्ही यहूदा मुल्खे बरैबादी तैणीं 18:1—25:30