Kulvi Outer Seraji Bible
2 राज़ै 13
इज़राईलो राज़अ जोअहाज
यहूदा मुल्खै त अहाजयो शोहरू जोआश राज़अ, तेऊए राज़ा दी त्रेहुई साला बणअ इज़राईल मुल्खै ज़ैऊओ शोहरू जोअहाज राज़अ। तेऊ किअ इज़राईल मुल्खे राज़धानी सामरी नगरी का सतारा साला तैणीं राज़। ज़िहअ तेऊ का पैहलै नबाते शोहरू जरोबाम राज़ै इज़राईली का पाप कराऊअ त, सह बी निं तिन्नां तिहै पापा करनै का पिछ़ू हटअ ज़ेता का बिधाता नफरत करा। इहअ करै पल़अ बिधातो कोप इज़राईली लै अर इज़राईली पल़अ अराम देशे राज़ै हज़ाएल अर आजू तेऊए शोहरू बेन्हदादे गलामी दी खास्सी साला तैणीं रहणअ। तेखअ पाई जोअहाजै बिधाता सेटा लेर-पकार, बिधाता भाल़अ कि अराम देशे राज़ै हंतै इज़राईली खास्सै संघा शूणीं जोअहाजे अरज़। तेखअ छ़ाडअ बिधाता इज़राईली छ़ड़ैऊंणा लै एक मणछ अर तेऊ किऐ तिंयां अराम देशे गलामी का आज़ाद। तेखअ लागै इज़राईली पैहलै ज़िहै राज्ज़ी-मौज़ी रहंदै। पर तज़ी बी निं तिन्नैं तिंयां पाप करनै छ़ाडै, ज़िहै राज़ै जरोबामै इज़राईली का कराऊऐ तै। सामरी नगरी थिई अशेरा देबीए मुहुर्ती अज़ी तैणीं बी एही।
अराम देशे राज़ै हज़ाएला का हारी इज़राईली सैना एही कि तिन्नें हुई बूरी दशा। राज़ै जोअहाजा का बच़ै सिधै दस रथ, पज़ाह घोल़े शुंआर, दस हज़ार पैदल हांढणै आल़ै सपाही। बाकी किऐ अरामी सैना पठी खतम, तिंयां चेल्है धरनीं धूल़ै ज़िहै।
राज़ै जोअहाजे काम अर तेऊए शूरबीरा आल़ै काम आसा इज़राईले राज़े इतिहासे कताबा दी लिखी डाहै दै। ज़ांऊं जोअहाज मूंअ, सह डाहअ सामरी नगरी दाबी अर आजू बणअ तेऊओ शोहरू जोआश तेऊए ज़ैगा इज़राईला दी राज़अ।
इज़राईलो राज़अ जोआश
यहूदा मुल्खै थिअ जोआश राज़अ अर तेऊए राज़ा दी सैंतुई साला बणअ इज़राईल मुल्खै जोअहाजो शोहरू जोआश राज़अ। तेऊ किअ सामरी नगरी का इज़राईला दी सोल़ा साला तैणीं राज़। तेऊ बी किअ तिहअ ई ज़ेता बिधाता नांईं च़ाहंदअ त कि सह करे। सह निं नबाते शोहरू राज़ै जरोबामा ज़िहै कामां करनै का पिछ़ू हटअ अर तेऊ बी कराऊअ इज़राईली का पाप। राज़ै जोआशै ज़िहै-ज़िहै काम अर ज़िहअ शूरबीर हई तेऊ यहूदे राज़ै अमास्या संघै मकाबलअ किअ, तिंयां सोभै गल्ला आसा इज़राईले राज़े इतिहासे कताबा दी लिखी डाही दी। खिरी ज़ांऊं राज़अ जोआश मूंअ, सह डाहअ सामरी नगरी तेऊए दादा-बाबा संघै दाबी आजू बेठअ इज़राईले राज़गाद्दी दी तेऊओ शोहरू जरोबाम राज़अ।
एलिशा गूरे मौत
बिधाते गूर एलिशा लागी नबिज़री बमारी अर तेऊए ती ऐबै मौत हणैं आल़ी। इज़राईलो राज़अ जोआश डेऊअ तेऊ सेटा लै झेठू संघा लागअ लेरा लांदी-लांदी इहअ बोल्दअ, “आईओ मेरै बाबा, ए मेरै बाबा! इज़राईली छ़ड़ैऊंणै आल़अ महान मणछ थिअ तूह ई!”
एलिशा किअ तेऊ लै हुकम, “कतीर-कबाण आण ओर्ही।” जोआशै शदाऊअ कहा का कबाण अर कतीर। तेखअ बोलअ एलिशा इज़राईले राज़ै जोआशा लै कि कतीरा बाहणां लै हअ तैर। राज़ै किअ तिहअ ई अर तेखअ डाहै एलिशा आपणैं हाथ राज़े हाथा प्रैंदै। तेखअ बोलअ एलिशा राज़ै लै कि पुर्बा बाखे ताक्की खोल्ह अर तेऊ किअ तिहअ ई अर राज़ैओ मुंह त अराम देशा बाखा, तेखअ बोलअ एलिशा, “एऊ कतीरा बाह!” ज़ेतरी राज़अ कबाणा का कतीर छ़ाडी निं मुक्कअ, एलिशा बोलअ, “इहअ ई आसा बिधातो कतीर तूह, ताह करै दैणीं बिधाता इज़राईली लै ज़ीत। ताह करनअ अपेक नगरी अरामी संघै मकाबलअ अर ताह करनै तिधी तिंयां खतम।”
एलिशा बोलअ राज़ै लै, “इना होरी कतीरा बी च़क उझै।” ज़ांऊं राज़ै धख कतीर हाथै च़कै, तेखअ बोलअ एलिशा इज़राईले राज़ै लै, “इना कतीरा बाह उंधै धरनीं।” राज़ै बाहै चअन कतीर संघा खल़्हुअ। एता भाल़ी आई बिधाते गूर एलिशा रोश्शै संघा बोलअ राज़ै लै, “ताह लागा ती पांज़ा-छ़हा बारी बाहणीं, तिहअ करै करनै तै ताह अरामी पठी खतम अर ऐबै भेटणीं ताह तिन्नां का सिधी चिई बारी ज़ीत।”
एलिशा मूंअ, सह डाहअ दाबी।
मोआब देशा आल़ै करा तै हर साल बशाह पोर्ही इज़राईला हंतदै छ़ुंढे-छ़ुंढ एछी। लोग तै कहा मूंऐं दै मणछा दाबदै लागै दै अर तिन्नां का गअ एक मोआबी छ़ुंढ शुझुई, तिन्नैं डाही छ़ेक्कै-छ़ेक्कै सह ल्हास तिधी ज़िधी एलिशा गूर थिअ दाबअ द, ज़िहै ई तैहा ल्हासा एलिशा गूरे हाडकै छ़ुंहैं, सह मणछ हुअ ज़िऊंदअ अर सह हुअ आज़रअ खल़अ!
इज़राईल अर अराम देशा मांझ़ै जुध
ज़धू इज़राईला दी जोअहाज राज़अ त, तेऊ ज़मानै हुअ अराम देशो राज़अ हज़ाएल इज़राईलीए खलाफ। पर बिधाता फिरी इज़राईलीए झींण अर तिन्नां निं बरैबाद हणैं दैनअ। बिधाता किई तिन्नें तैहा करारा आद करी मज़त ज़ुंण बिधाता आबराम, इसहाक अर याकबा संघै किई ती। बिधाता निं आपणीं परज़ा शोटी डाही।
ज़ांऊं अराम देशो राज़अ हज़ाएल मूंअ, तेऊए ज़ैगा बेठअ तेऊओ शोहरू बेन्हदाद राज़अ। जोअहाजो शोहरू राज़अ जोआश ज़ितअ बेन्हदादा का चिई बारी संघा गिम्मी तिंयां नगरी भिई ज़ेथ बेन्हदादै तधू कबज़अ किअ त ज़धू इज़राईला दी राज़ै जोअहाज राज़ैओ राज़ थिअ।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.