Kulvi Outer Seraji Bible
2 राज़ै 14
यहूदा मुल्खै अमास्यो राज़
(2 इतिहास 25:1-24)
इज़राईला दी थिअ जोअहाजे शोहरू जोआशो राज़, तेऊ राज़ा दी दुजी साला बणअ यहूदा दी जोआशो शोहरू अमास्या राज़अ। ज़धू अमास्या राज़अ बणअ, सह थिअ तधू पच्ची सालो अर तेऊ किअ एरुशलेम नगरी का उणत्ती साला तैणीं राज़। तेऊए ईजा नाअं थिअ जेहोदी अर सह थिई एरुशलेम नगरी का। अमास्या किअ तिहअ ई ज़िहअ बिधाता च़ाहा त, पर तज़ी बी निं सह आपणैं दाद-बाब दाबेदा ज़िहअ बिधाता लै शुचअ-पाक्कअ रहअ। तेऊ किअ आपणैं बाब जोआशा ज़िहअ। तेऊ निं तिंयां उझै धारे गान-स्तान ढोल़ै अर लोग रहै तेथ बल़ीदान अर धूपा-ज़ाल़दै अज़ी बी लागी।
ज़ेतरी अमास्या सारअ यहूदा मुल्ख काबू किअ, तेऊ किऐ तिंयां कार-करिंदै कैद संघा पाऐ मारी ज़ुंणीं तेऊओ बाब राज़अ मारी पाअ त। पर तिन्नां हत्या करनै आल़ेए शोहरू निं तेऊ मारै आथी, तेऊ मनअ मोसा गूरै लिखै दै बधाना दी बिधातो सह हुकम, “शोहरूए ज़ुल्मा पिछ़ू निं ईजा-बाबा लै मौते सज़ा दैई अर नां ईजा-बाबे ज़ुल्मा पिछ़ू शोहरू लै मौते सज़ा दैई। ज़ुंण दोशी होए, सज़ा लोल़ी तेऊ ई भेटी।”
एदोमी संघै जुध
अमास्या पाऐ तै लूंणै खागा दी दस हज़ार एदोमी सपाही मारी। तेखअ किअ तेऊ सेला नगरी कबज़अ अर तेऊ डाहअ तैहा नगरी नाअं जोक्तेल अर अह नाअं आसा आझ़ तैणीं बी तिहअ ई।
इज़राईली संघै जुध
अमास्या छ़ाडै इज़राईले राज़ै ज़ैऊए पोचै अर जोअहाजे शोहरू जोआशा सेटा लै इहअ बोल्दै दूत, “ज़ै हिम्मत आसा, तै कर जुधा लै मेरअ मकाबलअ!” पर इज़राईले राज़ै जोआशै दैनअ यहूदे राज़ै अमास्या लै इहअ समाद, “लाबानोन बणैं झ़िंझ़रे कांडे झ़ुंभल़ै दैनअ केल़ुई लै समाद, ‘तूह कर आपणीं केल़टीओ बैह मेरै झ़ुंभल़ू संघै।’ तेतरी डेऊअ तेस्सी बाती एक बणों ज़ीब संघा दर्ल़अ झ़िंझ़रै कांडैओ झ़ुंभल़ धरनीं! तूह ज़ितअ एदोमी का, तै आसा एभै तूह इहअ हुल्लअ-फुल्लअ हुअ द। तिन्नां डिंगा मारदी रह आपणैं घअरै बेशी। तूह किल्है आसा आप्पू लै आफ़त खल़ी करदअ लागअ द? इहअ करै हणीं तेरी अर यहूदा मुल्खे तेरी परज़े बरैबादी!”
पर अमास्या निस्सअ मनी, तेखअ निखल़अ इज़राईलो राज़अ जोआश यहूदा बाखा लै अर यहूदे राज़ै अमास्या किअ तेऊ संघै बेथ-शमेश मकाबलअ। तेऊ जुधा लै हारी यहूदे सैना इज़राईला का पठी अर तिन्नें सारी सैना ठुर्ही आपणैं-आपणैं डेरै लै। इज़राईले राज़ै जोआशै किअ यहूदो राज़अ अहाजयो पोचअ अमास्या बेथ-शमेश कैद। तेखअ डेऊअ सह एरुशलेम नगरी संघा पाअ एप्रैम प्रऊल़ी पोर्ही कूणींए प्रऊल़ी तैणीं नगरी फेरो गहल़ कोई च़ार शौ हाथ ढोल़ी। तेऊ ज़ेतरअ बी सुन्नअ-च़ंदी भेटअ, बिधाते भबन अर राज़े मैहलै भढारै ज़ेतरै बी सुन्नैं-च़ंदीए भांडै थिऐ, तिंयां निंयैं तेऊ सामरी नगरी लै अर ज़ुंण कैद किऐ, तिंयां बी निंयैं आप्पू संघा।
राज़ै रहंदी जोआशै ज़िहै बी काम किऐ, अर यहूदे राज़ै अमास्या संघै तेऊ किहअ जुध ज़ितअ, तिंयां सोभै गल्ला आसा इज़राईले राज़े इतिहासे कताबा दी लिखी डाही दी। खिरी मूंअ जोआश अर संघा डाहअ सह सामरी नगरी राज़ै दाबणे ज़ैगा दाबी। तेऊ बाद बणअ तेऊओ शोहरू जरोबाम तेऊए ज़ैगा इज़राईल मुल्खो राज़अ।
यहूदा मुल्खे राज़ै अमास्ये मौत
(2 इतिहास 25:25-28)
यहूदा मुल्खो राज़अ अमास्या रहअ इज़राईले राज़ै जोअहाजे शोहरू जोआशा मरनै बाद पंद्रा साला तैणीं ज़िऊंदअ। अमास्या राज़ै ज़ुंण बी काम किऐ, तिंयां आसा शुरू का खिरी तैणीं यहूदा मुल्खे राज़े इतिहासे कताबा दी लिखी डाहै दै।
एरुशलेम हुऐ कई लोग तेऊए द्रोही अर सह ठुर्हअ तिधा का लकीश नगरी लै पर तेऊए दुशमण पुजै तेऊ पिछ़ू तिधी बी संघा पाअ सह मारी। तेखअ आणी तेऊए ल्हास एरुशलेम नगरी लै घोल़ै प्रैंदै, संघा डाहअ सह दाबेदपूर तेऊए दादा-बाबा संघै दाबी। तेखअ बणाअं यहूदा मुल्खे परज़ा तेऊओ सोल़ा सालो शोहरू उज़ियाह राज़अ। राज़अ अमास्या ता गअ त मरी अर ज़ांऊं उज़ियाह राज़अ बणअ, तेऊ च़िणीं एलात नगरी भिई संघा डाही सह नगरी यहूदा मुल्खे काबू दी।
राज़ै जरोबामो राज़
ज़धू यहूदा मुल्खै जोआशो शोहरू अमास्या राज़अ थिअ, तेऊए राज़ा दी पंद्रुई साला बणअ जरोबाम इज़राईल मुल्खै राज़अ। तेऊ किअ सामरी नगरी का इज़राईली प्रैंदै कताल़ी साला तैणीं राज़। तेऊ किअ तिहअ ई पाप ज़ेता बिधाता नांईं च़ाहंदअ त कि सह करे। तेऊ बी कराऊअ नबाते शोहरू जरोबामा ज़िहअ ई इज़राईली का पाप अर सह निं तिन्नां पापा करनै का पिछ़ू हटअ। इज़राईलीए ज़ैगा ज़ुंण होरी कबज़अ त किअ द, तेऊ गिम्मी तिंयां ज़ैगा बापस संघा किई इज़राईले सिअं उतरा बाखा हमात ज़ोता उंधै दखण खारै समुंदरा तैणीं ज़ेही पैहलै ती तेही। गात-हेपेर रहणैं आल़ै अमातीओ शोहरू थिअ जोना, सह थिअ बिधातो गूर, बिधाता त तेऊ बाती पैहलै ई बोली हेरअ द कि इहअ ई हणअ।
बिधाता भाल़अ कि इज़राईली आसा आज़ाद अर गलाम सोभै खास्सै दाह-दुख ज़िरदै लागै दै तिन्नें मज़त करनै आल़अ बी निं ज़ाथी कोहै रहअ। बिधाता त आप्पै बोलअ द कि इहअ निं हुंह हणैं दैंदअ कि इज़राईली धरती का पठी खतम होए, तेखअ छ़ाडअ बिधाता जोआशो शोहरू राज़अ जरोबाम तिन्नां बच़ाऊंदअ।
राज़ै जरोबामै ज़िहै-ज़िहै काम किऐ, ज़िहै-ज़िहै जुध ज़ितै अर तेऊ दमिश्क, हमात नगरी ज़ुंण यहूदा ती गिम्मी दी, तिंयां केही बापस छ़ड़ैऊई, तिंयां सोभै गल्ला आसा इज़राईले राज़े इतिहासे कताबा दी लिखी डाही दी। ज़ांऊं जरोबाम मूंअ, सह डाहअ तेखअ सामरी नगरी राज़े मल्थाना दी दाबी। तेऊए ज़ैगा बणअ तेऊओ शोहरू जकर्या इज़राईल मुल्खो राज़अ।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.