Kulvi Outer Seraji Bible
2 राज़ै 15
यहूदा मुल्खै राज़अ उज़ियाह
(2 इतिहास 26:1-23)
ज़धू इज़राईल मुल्खै राज़ै जरोबामो राज़ थिअ, तेऊए राज़ा दी स्तार्हुई साला बणअ यहूदा मुल्खै अमास्यो शोहरू उज़ियाह राज़अ। ज़धू उज़ियाह राज़अ बणअ, तधू ती तेऊए अमर सोल़ा साल। तेऊ किअ एरुशलेम नगरी का यहूदा मुल्खै बुंजा साला तैणीं राज़। तेऊए ईजा नाअं त जकोल्या अर सह थिई एरुशलेम नगरी का। तेऊ किऐ आपणैं बाब अमास्या ज़िहै भलै काम ज़ेता करै बिधाता खुश हआ। पर उझै धारा प्रैंदे गान-स्तान निं तेऊ बी खतम किऐ अर लोग करा तै तेथ अज़ी बी बल़ीदान अर धूप ज़ाल़ी। खिरी दैनी बिधाता उज़ियाह लै एही सज़ा कि तेऊ निखल़ी प्रोढी अमरा कोहल़ अर सह रही तेऊए मरनै तैणीं। तेता बाद रहा त सह राज़े मैहला का दूर ज़ुदअ ज़िहअ एकी घअरै। यहूदा मुल्खो सारअ राज़-काज़ सभाल़ा त पठी तेऊओ शोहरू जताम।
ज़ुण बी राज़ै उज़ियाह किअ, तिंयां सोभै गल्ला आसा यहूदा मुल्खे राज़े इतिहासे कताबा दी लिखी डाही दी। ज़ांऊं उज़ियाह मूंअ, सह डाहअ दाबेदपूर नगरी दाबी अर तेऊए ज़ैगा बणअ तेऊओ शोहरू जताम यहूदा मुल्खो राज़अ।
इज़राईल मुल्खै राज़ै जकर्यो राज़
यहूदा मुल्खै थिअ अजर्याह राज़अ, तेऊए राज़ा दी ठत्तुई साला बणअ इज़राईल मुल्खै दुजै जरोबामो शोहरू जकर्या राज़अ। तेऊ किअ छ़हा भिन्नैं तैणीं सामरी नगरी का इज़राईली प्रैंदै राज़। तेऊ किअ आपणैं दादा-बाबा ज़िहअ पाप ज़ेता का बिधाता नफरत करा त। तेऊ ढाकी नबाते शोहरू जरोबामा ज़ेही बात संघा कराऊअ इज़राईली का पाप। जबेशे शोहरू शलूमै किअ तेऊ लै राज़ द्रोह संघा पाअ सह सोभी लोगा नदरी मारी। तेखअ बणअ तेऊए ज़ैगा शलूम आप्पू राज़अ।
राज़ै जकर्या ज़िहै बी काम किऐ तिंयां आसा इज़राईले राज़े इतिहासे कताबा दी लिखी डाहै दै।
इहअ करै हुई बिधाता राज़ै ज़ैऊ लै बोली दी सह गल्ल पूरी, “ताह बाद हणैं तेरी आद-लुआदा मांझ़ै तेरी च़ौथी पोस्ती तेरै पल़पोचे शोहरू तैणीं इज़राईला दी राज़ै।” खिरी हुअ बी तिहअ ई।
इज़राईला दी राज़अ शलूम
ज़धू यहूदा मुल्खै राज़अ उज़ियाह राज़अ थिअ, तेऊए राज़ा दी उन्ताल़ुई साला बणअ जबेशो शोहरू शलूम इज़राईल मुल्खो राज़अ। तेऊ किअ राज़धानी सामरी नगरी का एकी भिन्नैं राज़।
गादीओ शोहरू मनहैम डेऊअ तिर्सा नगरी का सामरी नगरी लै संघा पाअ जबेशो शोहरू शलूम मारी अर आप्पू बणअ तेऊए ज़ैगा इज़राईल मुल्खो राज़अ। शलूमे सोभ काम अर ज़ुंण तेऊ राज़ द्रोह किअ, तिंयां सोभै गल्ला आसा इज़राईल देशे राज़े इतिहासे कताबा दी लिखी डाही दी। गादीओ शोहरू मनहैम आअ तिर्सा का सामरी नगरी लै, बाता एछदी किई तेऊ तिपसा नगरी अर तेता ओरी-पोरीए गराअं पठी खतम। किल्हैकि तिंयां निस्सै तै तेऊ लै नगरीए प्रऊल़ी खोल्ही। तेऊ पाई ती तिन्नें सुंदी बेटल़ी बी आरी करै च़िरी।
इज़राईल मुल्खो राज़अ मनहैम
ज़धू यहूदा मुल्खै राज़अ उज़ियाह राज़अ थिअ, तेऊए राज़ा दी उन्ताल़ुई साला बणअ इज़राईल मुल्खै गादीओ शोहरू मनहैम राज़अ। तेऊ किअ सामरी नगरी का दसा साला तैणीं राज़। तेऊ बी किअ आपणीं ज़िऊंदी ज़िता तिहअ ई पाप ज़ेता का बिधाता नफरत करा। तेऊ ढाकी नबाते शोहरू जरोबामे बात ज़ुंणीं इज़राईली का पाप कराऊअ त। अश्शूर देशे राज़ै तिगला-पेल़सर 1आअ इज़राईल मुल्खै कबज़ै करदअ, पर मनहैम राज़ै दैनी तेऊ लै पैंईंती हज़ार किलू च़ंदी संघा किअ सह ऐहा गल्ला लै राज्ज़ी कि देश मनहैमे काबू रहे। एतरी च़ंदी झाल़ी ती मनहैम राज़ै इज़राईल मुल्खे सोभी सेठा का। एकी-एकी सेठा का मांगै तै तेऊ कोई पज़ाह-पज़ाह च़ंदीए सिक्कै अर तेखअ डेऊअ अश्शूर देशो राज़अ इज़राईल मुल्खा छ़ाडी बापस फिरी।
ज़ुंण बी काम मनहैम राज़ै किऐ, तिंयां आसा इज़राईले राज़े इतिहासे कताबा दी लिखी डाहै दै। खिरी ज़ांऊं राज़अ मनहैम मूंअ, सह डाहअ तेऊए दादा-बाबा संघै दाबी अर तेऊ बाद बणअ तेऊओ शोहरू पेखया इज़राईल मुल्खै राज़अ।
इज़राईला दी राज़अ पेखया
ज़धू यहूदा मुल्खै राज़अ उज़ियाह राज़अ थिअ, तेऊए राज़ा दी पज़ाहुई साला बणअ इज़राईल मुल्खै मनहैमो शोहरू पेखया राज़अ। तेऊ किअ सामरी नगरी का दूई साला तैणीं राज़। तेऊ बी किअ आपणीं ज़िऊंदी ज़िता तिहअ ई पाप ज़ेता का बिधाता नफरत करा। तेऊ ढाकी नबाते शोहरू जरोबामे बात ज़ुंणीं इज़राईली का पाप कराऊअ त। रेमलो शोहरू पेका थिअ राज़ै पेखयो बज़ीर, तेऊ सोठी राज़ द्रोह करी राज़ै मारने तरकीब। तेऊ संघै तै गलाद नगरी का पज़ाह शूरबीर मर्ध। तिन्नैं पाऐ सामरी नगरी राज़े मैहलै सोभी का पाक्की भीत फाल़ी संघा पाअ पेखया राज़अ अर तेऊ संघै अर्गोब अर आर्य मारी। तेखअ बणअ पेखया राज़े ज़ैगा पेका इज़राईलीओ राज़अ।
पेखया राज़ै ज़ुंण बी काम किऐ, तिंयां आसा इज़राईले राज़े इतिहासे कताबा दी लिखी डाहै दै।
इज़राईला दी राज़अ पेका
यहूदा दी थिअ उज़ियाह राज़ैओ राज़, तेऊए राज़ा दी बुंजूई साला बणअ इज़राईल मुल्खै रेमलो शोहरू पेका राज़अ अर तेऊ किअ सामरी नगरी का इज़राईली प्रैंदै बिहा साला तैणीं राज़। तेऊ बी किअ आपणीं ज़िऊंदी ज़िता तिहअ ई पाप ज़ेता का बिधाता नफरत करा। तेऊ ढाकी नबाते शोहरू जरोबामे बात ज़ुंणीं इज़राईली का पाप कराऊअ त।
ज़ेऊ ज़मानै इज़राईला दी पेका राज़ैओ राज़ थिअ, अश्शूर देशे राज़ै तिगला-पेल़सरै गिम्मी इज़राईलीए इजोन, अबेल-बेथ-माकाहा, जानोह, कादेश, हसोर नगरी अर सारै गलाद, गलील अर नप्ताली सारै देशै किअ तेऊ कबज़अ। तेथ बस्सै दै सोभ इज़राईली निंयैं तेऊ अश्शूर देशा लै कैद करी।
यहूदा थिअ उज़ियाहो शोहरू जताम राज़अ, तेऊए राज़ा दी ठाहुई साला किअ एले शोहरू होशे रेमले शोहरू पेका राज़ै लै द्रोह अर तेऊ मारी करै बणअ आप्पू इज़राईल मुल्खो राज़अ। राज़ै पेका ज़ुंण बी काम किऐ तिंयां आसा इज़राईले राज़े इतिहासे कताबा दी लिखी डाहै दै।
यहूदा मुल्खै राज़अ जताम
(2 इतिहास 27:1-9)
इज़राईला दी थिअ रेमलो शोहरू पेका राज़अ, तेऊए राज़ा दी दुजी साला बणअ यहूदा मुल्खै उज़ियाह राज़ैओ शोहरू जताम राज़अ। ज़धू जताम यहूदा मुल्खो राज़अ बणअ, तधू त सह पच्ची सालो। तेऊ किअ एरुशलेम नगरी का सोल़ा साला तैणीं राज़। तेऊए ईजा नाअं त जेरूशा अर सह थिई सदोके शोहरी। तेऊ किअ आपणैं बाब उज़ियाह ज़िहअ भलअ ज़ेता करै बिधाता खुश हआ। पर उझै धारा प्रैंदै देअए गान-स्तान निं तेऊ बी खतम किऐ अर लोग करा तै तेऊए ज़मानै बी तेथ बल़ीदान अर धूपा ज़ाल़दै डेऊई। बिधाते भबनै उतर दिशा बाखे प्रऊल़ बणाईं राज़ै जतामै।
ज़िहअ बी राज़ै जतामै किअ, तिंयां सोभै गल्ला आसा यहूदा अर इज़राईल देशे राज़े इतिहासे कताबा दी लिखी डाही दी। जतामे राज़ा दी छ़ाडै बिधाता अराम देशो राज़अ रसीन अर इज़राईल दोशो राज़अ रेमलो शोहरू पेका यहूदा बाखा लै। ज़ांऊं जताम मूंअ, सह डाहअ दाबेदपूर गहल़ै राज़ै दाबणे मल्थाना दी दाबी अर तेऊओ शोहरू अहाज बणअ तेऊए ज़ैगा यहूदा मुल्खो राज़अ।
Source notes (1)
- Footnote तिगला-पेल़सर पूल
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.