Kulvi Outer Seraji Bible
2 राज़ै 11
यहूदे राणीं अताल्या
(2 इतिहास 22:10—23:15)
राज़ै अहाजये ईज अताल्या भाल़अ कि तेसो शोहरू हेरअ मारी, तैहा किअ हुकम कि राज़ परिबारे तिन्नां सोभी पाआ मारी ज़ुण राज़ै बणी यहूदा मुल्खे राज़ै बणी सका। तिन्नां मांझ़ै छ़ुटअ सिधअ अहाजयो शोहरू जोआश। सह बी हेरअ त होरी संघै मारी पाई पर सह बच़ाऊअ तेऊ शोहरूए बुबी जेहशेबा। सह थिई राज़ै जोरामे शोहरी अहाजये काकी बैहण। तैहा डाहअ सह शोहरू तेऊ धाचणै आल़ी दाई संघी झिकल़ै डाहणें कठैरी दी इहअ च़ोरी कि अताल्या का निं थोघ ई लागणै दैनअ अर इहअ करै निं तेऊए हत्या हुई। सह डाहअ जेशेबा छ़हा साला तैणीं बिधाते भबनै च़ोरी संघा रही तिधी लुक्की करै तेऊ धाचदी लागी। यहूदा ती अताल्या राणीं राज़ करदी लागी दी।
पर सातुई साला शादै जहोयादा राज़ै प्रोहतै सैनापति, दलपति अर दरबारी बिधाते भबनै आप्पू सेटा। तिधी किई तिन्नैं बिधाते सोह खाई आप्पू मांझ़ै करार कि आप्पू मांझ़ै कुंण विश्वास घात नां करे। तेखअ रहैऊअ प्रोहतै सह टिक्कअ तिन्नां का। प्रोहतै किअ तिन्नां लै इहअ हुकम, “तम्हैं आसा पांज़ दल। तम्हैं करै इहअ कि तम्हां मांझ़ै रहै चअन दल बशैघे धैल़ी पहरै लै। हुंह च़ाहा इहअ कि चिई मांझ़ै एक दल रहै राज़े मैहलै पहरी। एक दल डाहै सूर नाओंए प्रऊल़ी सेटा पहरअ पाई अर एक दल डाहै राज़ मैहला पिछ़ू बाखा प्रऊल़ी सेटा पहरअ पाई। ज़ुंण दूई दल बशैघे धैल़ी छ़ुटी हणैं, तिंयां डाहै बिधाते भबनै राज़ै जोआशो ओर्ही-पोर्ही नेल़ पहरअ पाई। तम्हैं डाहै आप्पू का गुप्त तलबारा संघा रहै राज़ै जोआशा फेर संघा-संघा लगैग लाई हांढदै लागी। ज़ुंण राज़ै नेल़ एछणें कोशिश करे, तेऊ पाऐ मारी।”
ज़िहअ जहोयादा प्रोहतै बोलअ, सैनापति अर दलपति किअ तिहअ ई। सैना का ज़ुंण दल बशैघे धैल़ी छ़ुटी दी थिऐ अर ज़सरी तैहा धैल़ी च़ाकरी करने बारी थिई, तिंयां डेऊऐ जहोयादा प्रोहता सेटा लै। बिधाते भबनै राज़ै दाबेदे ज़ुंण ढाल़ा अर बर्छ़ै थिऐ, तिंयां दैनै प्रोहतै सैने दलपति लै। इहअ करै डाहअ तिन्नैं आप्पू संघै गुप्त तलबारा पाई बिधाते भबनै दखण बाखा पुंझ़ा पोर्ही उतरा बाखा पुंझ़ै तैणीं राज़ै जोआशा फेर पहरअ पाई। तेखअ आणअ जहोयादा प्रोहतै जोआश बागा लै संघा लाअ तेऊए मुंडै मुगट संघा दैनअ तेऊए हाथै देशा दी राज़ करने बधाने च़ुआल़ी दी कताब। तेखअ किअ तिधी तेऊए मुंडै जैतूनो तेल तरैल़ी अभिषेक कि आगलअ राज़अ आसा ऐबै अह। सोभी लोगै बाज़ी तिधी ताल़ी संघा लागै ज़ोरै-ज़ोरै इहअ बोल्दै, “राज़ै जोआशे अमर लोल़ी खास्सी हुई!”
राणीं अताल्या का गई पहरी अर लोगे छ़ेल़ शुण्हुंई अर सह आई तेभी बिधाते भबना लै ज़िधी खास्सै मणछ तै कठा हुऐ दै। तिधी भाल़अ तैहा कि नऊंअ राज़अ आसा बिधाते भबनै दूई थाम्हा मांझ़ै खल़्हुअ द, ज़िहअ तिन्नों रबाज़ थिअ। तेऊ फेर थिऐ कार-करिंदै अर नर्शिंगै बाज़णैं आल़ै। लोग तै खुशी मनाऊंदै अर नर्शिंगै बाज़दै लागै दै। अताल्या धेल़अ आपणअ बाघलअ सुआब संघा लागी ज़ोरै लैल़ा पाई इहअ बोल्दी, “अह आसा राज़ द्रोह! अह किअ राज़ द्रोह!”
जहोयादा प्रोहत निं अताल्या बिधाते भबना नेल़ मारनअ च़ाहंदअ त, तेऊ किअ कार-करिंदै लै हुकम, “पहरीए लगैगा मांझ़ा का काढा ऐहा पोर्ही संघा निंयां ऐहा इधा का दूर, ज़ुंण ऐहा छ़ड़ैऊंदअ पिछ़ू एछे, तेऊ पाऐ मारी।” अताल्या निंईं तिन्नैं कैद करी राज़े मैहला नेल़, तिधी पाई तिन्नैं घोल़े प्रऊल़ी सेटा मारी।
जहोयादा प्रोहतै खोज़अ बधान
(2 इतिहास 23:16-21)
जहोयादा प्रोहतै किई राज़ै जोआश अर लोगे बिधाता संघै एही करार कि तिंयां लोल़ी सदा बिधाते परज़ा रही। राज़ै अर परज़ा मांझ़ै बी किई तेऊ बिधाता शाजत मनी करार कि तिंयां लोल़ी एकी-दुजै लै शुचै-पाक्कै रहै। तेखअ डेऊऐ लोग बाल देअए देहुरै संघा ढोल़अ सह पठी। बेदी अर मुहुर्ती पाई तिन्नैं फाल़ी अर बाल देअ प्रोहत मतान पाअ तिन्नैं बेदी आजू मारी।
जहोयादा प्रोहतै डाहै बिधाते भबने प्रऊल़ी पहरी लाई अर तेखअ निंयं राज़अ जोआश जहोयादा प्रोहतै संघा हांढणै आल़ै सपाही, दरबारी, दलपति अर सैनापतिए पहरै दी बिधाते भबना का उंधै संघा पजैल़अ राज़े मैहलै, होर लोग आऐ तेऊ पिछ़ू। जोआश डेऊअ पहरीए प्रऊल़ी बाती मैहला भितरी संघा बेठअ राज़गाद्दी प्रैंदै। सोभ लोग तै तिधी खुशी हुऐ दै अर सारी नगरी दी थिई शांती हुई दी किल्हैकि अताल्या ती राज़े मैहलै मारी हेरी दी।
ज़धू जोआश राज़अ बणअ, तधू त सह साता सालो।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.