Kulvi Outer Seraji Bible
2 राज़ै 10
अहाब राज़े सत्तर शोहरू पाऐ मारी
अहाब राज़े तै आजू आद-लुआद सत्तर ज़ण्हैं, तिंयां रहा तै सामरी नगरी। ज़ैऊ दैनअ च़िठी लिखी सामरी नगरीए सोभी सैणैं, जज्रेल नगरीए सैणैं लै अर तिन्नां लै समाद ज़ुंण अहाबे आद-लुआदा धाचदै तै लागै दै। च़िठी दी थिअ इहअ लिखअ द, “राज़ै अहाबे लुआद आसा तम्हैं सभाल़ै दै, तम्हां का आसा गहल़ा आल़ी नगरी, आपणैं रथ, घोल़ै अर अस्त्र-शस्त्र बी आसा, ज़ेभै तम्हां मेरी अह च़िठी भेटे, तम्हां अहाबे लुआदा मांझ़ै ज़ुंण सोभी का राम्बल़अ ज़ाण्हिंए, तेऊ बणाऐं तम्हैं राज़अ संघा करै तम्हैं आपणैं मालक अहाबे खिंबे फाज़त कि सह बच़े।”
सामरी नगरीए सैणैं छ़ुटअ तैहा च़िठी पहल़ी दर्छ़णअ। तिंयां लागै आप्पू मांझ़ै बोल्दै, “ज़ैऊ संघै ज़ै राज़अ जोराम अर राज़अ अहाजया निं टेक्की सकै, तै हाम्हैं किहअ करै सका तेऊओ मकाबलअ करी?” बज़ीरै, तैहा नगरीओ सैणैं अर ज़ुंण अहाबे लुआदा धाचणै आल़ै सैणैं थिऐ, तिन्नैं दैनअ ज़ैऊ लै इहअ समाद, “माहा राज़अ, हाम्हैं आसा तेरै दास, हाम्हां करनअ ज़िहअ तूह बोले तिहअ। पर हाम्हां निं कोह आपणअ राज़अ बणाणअं आथी। तूह कर ज़िहअ तेरअ दिल बोला तिहअ।”
ज़ैऊ लिखी तिन्नां लै होर च़िठी अर तेथ दैनअ इहअ समाद, “ज़ै तम्हैं मेरै पक्षा लै आसा अर मेरअ हुकम मनणअ च़ाहा, तै लोल़ी तम्हैं अहाबे लुआदे मूंड काटी काल्ला मुंह सेटा जज्रेल नगरी आऐ, तै ज़ाणूं हुंह कि तम्हैं आसा असली दी मुंह संघै।”
अहाब राज़े लुआद तै सत्तर ज़ण्हैं अर तिन्नें फाज़त करा तै सामरी नगरीए सैणैं। ज़ांऊं तिन्नां सेटा राज़ै ज़ैऊए च़िठी पुजी, तिन्नें पाऐ अहाबे तिंयां सत्तर आद-लुआद मारी। तिन्नें मूंड काटी पाऐ तिन्नैं छ़ाब्बै भितरी संघा छ़ाडै तिंयां राज़ै ज़ैऊ सेटा जज्रेल नगरी।
राज़ै ज़ैऊ का हेरअ कुंणी खोज़ी कि अहाब राज़े शोहरूए मूंड हेरै काटी आणी, राज़ै ज़ैऊ बोलअ इहअ, “तेते डाहा नगरीए प्रऊल़ी सेटा काल्ला दोत्ती तैणीं दूई रूल़ लाई।” दुजै धैल़ै दोत्ती डेऊअ राज़अ ज़ैऊ बागा लै संघा खल़्हुअ तिधी ज़िधा का तेऊ सोभै शूणीं सका तै। तेऊ बोलअ इहअ, “थारअ निं किछ़ै कशूर आथी, सह आसा हुंह ज़ुंणी राज़ै जोरामा लै द्रोह किअ अर मारी पाअ, पर ईंयां सोभै कुंणी मारै? ईंयां मारै तम्हैं! ऐबै समझ़ा ऐहा गल्ला कि ज़िहअ बी बिधाता आपणैं गूर एलियाह बाती राज़ै अहाबे आद-लुआदे बारै बोलअ त, तिंयां गल्ला हुई तेही ई पूरी।”
अहाब राज़े सोभ रिश्तैदार पाऐ मारी
तेखअ राज़ै अहाबे रिश्तैदार, सैणैं, साथी, प्रोहत अर होर कार-करिंदै ज़ुंण बी जज्रेल नगरी तै बच़ै दै, तिंयां बी पाऐ राज़ै ज़ैऊ मारी। तिन्नां मांझ़ै निं तेऊ एक बी ज़िऊंदअ छ़ाडअ।
तेखअ डेऊअ राज़अ ज़ैऊ जज्रेल नगरी का सामरी नगरी लै। बाता पुजअ सह फुआले डेरै तैहा ज़ैगा ज़िधी फुआल भेडा बाकरी मुना। तिधी भेटै तेऊ यहूदे राज़ै अहाजये रिश्तैदार, तेऊ पुछ़अ तिन्नां का, “तम्हैं कुंण आसा?”
तिन्नैं बोलअ, “हाम्हैं आसा अहाजया राज़े रिश्तैदार, हाम्हैं आसा राज़ माता जज़बेले शोहरू अर राज़ परिबारे राज्ज़ी-खुशी पुछ़दै जज्रेल नगरी लै च़ाल्लै दै।” ज़ैऊ किअ तेभी आपणैं सपाही लै हुकम, “इना ढाका ज़िऊंदै!” सपाही किऐ तिंयां कैद संघा पाऐ तिंयां तिधी फुआले डेरै बेथ-अकेद कुहै सेटा मारी। तिंयां थिऐ पठी बयाल़ी ज़ण्हैं अर तिन्नां मांझ़ै निं एक बी ज़िऊंदअ बच़अ।
अहाब राज़े होर बच़ै दै रिश्तैदार बी पाऐ मारी
तेखअ लागअ राज़अ ज़ैऊ तिधा का आजू हांढदअ, बाता भेटअ तेऊ रकाबो शोहरू जोनादाब। राज़ै ज़ैऊ पुछ़अ सह इहअ बोली राज्ज़ी-राम्बल़अ, “मेरै दिलै निं ताल्है किछ़ै खोट आथी, तूह कै बोला? ताह मेरअ साथ दैणअ?”
जोनादाबै दैनअ ज़बाब, “हो, मुंह किल्है निं दैणअ।”
ज़ैऊ बोलअ, “ज़ै इहअ आसा, तै कर आपणअ हाथ आजू।” जोनादाबै किअ आपणअ हाथ आजू संघा लागअ ज़ैऊ इहअ बोली तेऊओ हाथ ढाकी रथा दी बशैल़दअ, “तूह च़ाल्ल मुंह संघै, तेखअ भाल़ आपणीं आछी कि मेरै दिलै बिधाते तैणीं केही आग हआ लागी दी।” जोनादाब बशैल़अ ज़ैऊ आपणैं रथा दी। संघा लागै तिंयां दुहै सामरी नगरी बाखा लै हांढदै। राज़धानी सामरी नगरी पुजी पाऐ राज़ै ज़ैऊ तिधी बच़ै दै अहाब राज़े सोभ भाई-बंध मारी अर तिधी बी निं तेऊ तिन्नां मांझ़ै कोह ज़िऊंदअ छ़ाडअ। अह हुई सह गल्ल पूरी ज़ुंण बिधाता एलियाह गूरा बाती बोली ती हेरी दी।
बाल देअआ पूज़णै आल़ै पाऐ मारी
राज़ै ज़ैऊ किअ सामरी नगरीए लोगो झाल़अ संघा बोलअ इहअ, “अहाब राज़अ निं बाल देअए खास्सी पूज़ा करी सकअ, पर मुंह करनीं तेऊए राम्बल़ी पूज़ा। तम्हैं शादा बाल देअए सोभी गूर-पज़ैरै अर तिन्नां सोभी ज़ुंण बाल देअआ मना, एक बी निं लोल़ी पिछ़ू रहअ। मंऐं लाअ बाल देअआ लै बडअ हूम करी, ज़ुंण तेऊ हूमा लै नांईं एछे, सह निं ज़िऊंदअ छ़ाडणअ।” राज़ै ज़ैऊ खेल्ही ती अह बाल देअआ मनणै आल़ै मारना लै च़ाल। तेखअ किअ राज़ै ज़ैऊ हुकम, “एक धैल़ी काढा, संघा खोज़ा सोभी का कि बाल देअए हूमा लै लोल़ी सोभ आऐ।” लोगै किअ तिहअ ई। राज़ै ज़ैऊ छ़ाडै सारै इज़राईल ऐहा गल्ला खोज़दै दूत अर बाल देअआ मनणै आल़ै आऐ हूमा लै सोभ अर ज़ाथी निं एक बी इहअ रहअ ज़ुण तिधी निं पुजअ होए। तेखअ डेऊऐ तिंयां सोभै बाल देअए देहुरै लै अर तिधी हुऐ एतरै लोग कि सिऊंणी सहरनै जोगी ज़ैगा बी निं रही।
तेखअ किअ राज़ै ज़ैऊ प्रोहते झिकल़े भढारी लै हुकम, “बाल देअआ मनणै आल़ै लै दैआ सोभी लै भढारा का च़ोल़ै बान्हणां लै।” भढारी आणै भढारा का सोभी लै च़ोल़ै। तेखअ डेऊअ राज़अ ज़ैऊ बाल देअए देहुरै भितरा लै अर रकाबो शोहरू जोनादाब निंयं आप्पू संघा। तेखअ बोलअ तिधी बाल देअआ मनणै आल़ै लोगा लै, “ओर्ही-पोर्ही दैआ भाल़णीं कि इधी तम्हां जैंदरी कुंण बिधाता मनणै आल़अ मणछ किनी आसा? इधी लोल़ी मुंह सिधै बाल देअआ मनणै आल़ै ई रहै।” तेखअ डेऊऐ ज़ैऊ अर जोनादाब बाल देअआ लै हूम बल़ीदान करदै। देहुरै बागै तै ज़ैऊ अश्शी मणछ इहअ बोली तैरी डाहै दै, “ज़ुंण मणछ मुंह तम्हां का दैणैं, तिन्नां पाऐ सोभी मारी, पर ज़ै कुंण एक मणछ बी ज़िऊंदअ छ़ुटे, तै लागणअ तेऊए बदल़ै मेरै हाथै तेऊ मरनअ ज़हा का सह मणछ छ़ुटअ।”
ज़ेतरी ज़ैऊ बेदी दी हूम बल़ीदान पाई मुक्कअ, तेऊ बोलअ कार-करिंदै अर पहरी लै, “भितरा लै डेओआ संघा मारा तिन्नां सोभी, एक बी निं ज़िऊंदअ लोल़ी छ़ुटअ!” तिंयां डेऊऐ भितरा लै संघा पाऐ तिंयां सोभै तलबारा करै मारी। तिन्नें ल्हासा आणी तिन्नैं घिशी करै बागा लै। तेखअ डेऊऐ तिंयां भगूरी भितरा लै, संघा आणी तिन्नैं बाल देअए मुहुर्ती बागा लै काढी तेखअ चैल़ी तेथ आग। बाल देअए डौंड पाऐ तिन्नैं ढोल़ी अर फाल़ी अर देहुरअ बी पाअ तिन्नैं पठी ढोल़ी। सह आसा आझ़ तैणीं बी तिहअ ई। तेथ डेओआ लोग सिधै दिशा करदै।
इहअ करै किई राज़ै ज़ैऊ इज़राईला जैंदरी बाल देअए पूज़ा खतम। पर नबाते शोहरू जरोबामै ज़ुंणीं सुन्नें बाछ़ूए मुहुर्ती बणाईं दान अर बेतेल स्तापी अर तेते पूज़ा कराऊई सोभी इज़राईली का पाप कराऊअ त, तेते पूज़ा निं ज़ैऊ बी बंद किई आथी। बिधाता बोलअ ज़ैऊ लै, “तंऐं किअ अहाबे आद-लुआदा संघै ज़िहअ हुंह च़ाहा त तिहअ ई बभार। ताल्है रही मेरी अह ज़बान कि ताह बाद हणैं तेरी आद-लुआदा मांझ़ै तेरी च़ौथी पोस्ती तेरै पल़पोचे शोहरू तैणीं इज़राईला दी राज़ै।” पर राज़ै ज़ैऊ बी निं इज़राईले परमेशर बिधातो बधान तत्त-दिला का मनअ। सह रहअ जरोबामा ज़िहअ पाप करदअ लागी ज़ुंणीं इज़राईली का पाप कराऊअ त।
राज़ै ज़ैऊए मौत
तेऊ ज़मानै घटेरी बिधाता इज़राईल मुल्खे सिअं खास्सी। अराम देशे राज़ै हज़ाएलै गिम्मअ इज़राईली का जुध ज़िती इज़राईल मुल्ख जरदण नदी पुर्बा बाखा दखणा दखण अरोर अर अर्नोन गाडा तैणीं। एथ आअ सारअ गलाद अर बाशान मुल्ख ज़िधी गाद, रूबेन अर मनिश्शे गोत्रा आल़ै थिऐ बस्सै दै।
इज़राईलो राज़अ रहंदी ज़ैऊ ज़ुंण बडै-बडै काम किऐ अर होर ज़िहअ-ज़िहअ बी तेऊ किअ, तिंयां आसा इज़राईले राज़े इतिहासे कताबा दी लिखी डाहै दै। खिरी मूंअ राज़अ ज़ैऊ संघा डाहअ सह सामरी नगरी दाबी अर आजू बणअ तेऊओ शोहरू जोअहाज इज़राईल मुल्खो राज़अ। ज़ैऊ किअ सामरी नगरी का इज़राईल मुल्खा दी ठाई साला तैणीं राज़अ।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.