Kulvi Outer Seraji Bible
2 राज़ै 24
ज़धू यहूदा मुल्खै जेहोकीम राज़अ थिअ, तेऊ ज़मानै छ़ेल़अ बाबेल देशे राज़ै नबूकदनेसरै यहूदा मुल्खा संघै जुध अर यहूदा मुल्ख रहअ चिई साला तैणीं बाबेल देशे गलामी दी। तेखअ किअ जेहोकीम राज़ै नबूकदनेसरा लै द्रोह। तेऊ ई ज़मानै छ़ाडै बिधाता कसदी, अरामी, मोआबी अर अमोनी लोगे छ़ुंढ लुटदै अर तिन्नैं किई यहूदा मुल्खे सोभ नगरी बरैबाद। इहअ करै हुई तिंयां गल्ला पूरी ज़ुंण बिधाता आपणैं दास अर कई गूरा बाती खास्सी साला पैहलै ती बोली हेरी दी कि इहअ हणअ। यहूदा लै दैनअ इहअ बिधाता आप्पै हणैं कि सह यहूदा मुल्ख पठी खतम होए किल्हैकि राज़ै मनिश्शे किअ त घोर पाप अर तेऊ पाऐ तै एरुशलेम खास्सै नर्दोश मणछ मारी अर तेता निं बिधाता माफ करी सकदअ त।
जेहोकीम राज़ै ज़िहै-ज़िहै काम किऐ, तिंयां आसा यहूदा मुल्खे राज़े इतिहासे कताबा दी लिखी डाहै दै। जेहोकीम राज़ै मरनै का बाद बणअ तेऊओ शोहरू जेहोकीन यहूदा मुल्खो राज़अ।
तेखअ निं मिसर देशो राज़अ आपणैं देशा का यहूदा संघै भिई जुधा लै आअ किल्हैकि ज़ुंण ज़ैगा मिसर देशे गाडा ओर्ही फरात दरैऊआ तैणीं मिसर देशे राज़े थिई, तेथ किअ बाबेल देशे राज़ै कबज़अ।
यहूदा मुल्खै जेहोकीन राज़अ
(2 इतिहास 36:9,10)
ज़धू जेहोकीन यहूदा मुल्खो राज़अ बणअ, तेऊए अमर ती तधू ठारा साले। तेऊ किअ एरुशलेम नगरी का चिई भिन्नैं तैणीं राज़। तेऊए ईजा नाअं त नेहुश्ता अर सह थिई एरुशलेम नगरीए एलनाताने शोहरी। तेऊ किअ आपणैं बाब जेहोकीमा ई ज़िहअ पाप अर तेऊ किअ तिहअ ई ज़ेता बिधाता नांईं च़ाहंदअ त कि सह करे।
तेऊए राज़ा दी आऐ बाबेल देशे राज़ै नबूकदनेसरे सैनापति एरुशलेम नगरी लै संघा गोटी तिन्नैं नगरी फेरा-फेर। सैना ती एरुशलेम नगरी गोटी डाही दी अर तेखअ पुजअ राज़अ नबूकदनेसर तिधी आप्पै। यहूदो राज़अ जेहोकीन डेऊअ छ़ेक्कै आपणीं ईज, दास-दासी, सोभी कार-करिंदै अर सैनापति संघी बाबेल देशे राज़ै सेटा लै अर नबूकदनेसरै किऐ तिंयां कैद। ईंयां गल्ला हुई ज़धू नबूकदनेसरा बाबेल देशो राज़अ बणी आठुई साल ती लागी दी। ज़ेही बिधाता खास्सी साला पैहलै चतैनगी ती हेरी दी दैई, नबूकदनेसरै बझ़ैल़अ सारअ सुन्नअ काढणैं अर ज़ेतरै सुन्नें भांडै इज़राईले राज़ै सुलैमानै बिधाते भबना लै थिऐ बणाऐं दै अर ज़ेतरी बी ज़ैदात राज़े मैहलै अर बिधाते भबनै थिई, सह निंईं ठोर-ठोर चोल़ी नबूकदनेसर राज़ै पठी बाबेल देशा लै। एरुशलेम नगरीए लोग बी निंयैं नबूकदनेसर राज़ै कैदी बणाईं, तिंयां थिऐ सेठ, कार-करिंदै, दलपति अर सैनापति ज़ोल़ी करै पठी कोई दस हज़ार ज़ण्हैं। काठ-पात्थरे कारीगीर, लुहार, ठठार बी निंयैं तेऊ आप्पू संघै बाबेल देशा लै। यहूदा मुल्खै बच़ै सिधै तिंयां ज़ुंण बाख रैनै-गरीब अर दाल़जी मणछ थिऐ।
जेहोकीन राज़अ बी निंयं नबूकदनेसरै एरुशलेम नगरी का बाबेल देशा लै कैद करी अर तेऊ संघै तेऊए ईज, तेऊए सोभै बेटल़ी, कार-करिंदै, दलपति अर सैनापति बी निंयैं कैद करी बाबेल देशा लै। बाबेल देशे राज़ै नबूकदनेसरै ज़ुंण बाबेल देशा लै कैद करी निंयैं तेथ तै सेठ मणछ पठी सात हज़ार, काठ-पात्थरे कारीगीर, लुहार, ठठार अर ज़ुंण शूर-बीर जुधा करनै जोगी थिऐ तिंयां थिऐ पठी एक हज़ार।
बाबेल देशे राज़ै नबूकदनेसरै बणाअं जेहोकीमे ज़ैगा तेऊओ च़ाच़ू मतानियाह राज़अ अर तेऊओ नाअं डाहअ बदल़ी करै सिदकिया।
यहूदा मुल्खै राज़अ सिदकिया
(2 इतिहास 36:11,12; जेरमयाह 52:1-3)
ज़धू सिदकिया यहूदा मुल्खो राज़अ बणअ, सह थिअ तधू इक्की सालो। तेऊ किअ एरुशलेम नगरी का गैरा साला तैणीं राज़। तेऊए ईजा नाअं त हेमातल अर सह थिई लिब्ना नगरीए जेरमयाह गूरे शोहरी। राज़ै सिदकिया बी किअ राज़ै जेहोकीमा ज़िहअ ई पाप ज़ेता बिधाता नांईं च़ाहंदअ त कि सह करे। बिधाता आई यहूदा अर एरुशलेम नगरीए परज़ा लै खास्सी रोश्शै अर खिरी दैनअ बिधाता तिन्नां आपणीं आछी सम्हनै पठी बरैबाद हणैं।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.