Kulvi Outer Seraji Bible
2 राज़ै 23
जोशिया किई मुहुर्ती पूज़ा बंद
(2 इतिहास 34:3-7,29-33)
राज़ै जोशिया शादै यहूदा मुल्खे अर एरुशलेम नगरीए सोभ सैणैं, संघा डेऊऐ तिंयां सोभै ज़ण्हैं एरुशलेम बिधाते भबना लै, तिन्नां संघै तै गूर, प्रोहत अर यहूदा मुल्खे आम आदमी बी। ज़ांऊं सोभै ज़ण्हैं तिधी थिऐ, राज़ै जोशिया पहल़ी बधाने सह कताब बाढै ज़ोरै-ज़ोरै ज़ुंण बिधाते भबनै भेटी ती। ज़ांऊं जोशिया राज़अ पहल़ी मुक्कअ, सह खल़्हुअ बिधाते भबनै एकी थाम्हा नेल़। संघा बझ़ैल़ै सोभी लोगा का सोह खाणैं कि आझ़ा बाद मनणअ हाम्हां बिधातो बधान, तेते सोभ बिधी अर हुकम तत्त-दिला का। हाम्हां करनअ तिहअ ई ज़िहअ ऐहा बधाने कताबा दी आसा लिखदअ द। ज़ेतरै लोग तिधी थिऐ, तिन्नैं सोभी खाऐ इहै सोह।
तेखअ किअ जोशिया राज़ै हिलकिया माहा प्रोहत अर तेऊ संघे प्रोहत अर दुआरे पहरी लै हुकम कि ज़ेतरी च़िज़ा अर भांडै बाल देअआ अर अशेरा देबी अर ग्रहे पूज़ा करना लै आसा बणाऐं दै, तिन्नां सोभी काढा बिधाते भबना का पोर्ही अर तेखअ चैल़ै तेता दी एरुशलेम नगरी बागै किद्रोन गाडा पजैल़ी आग अर तेतो छ़ार पजैल़ै बेतेल। यहूदा काढै तिंयां पज़ैरै बी दूर ज़ुंण यहूदा अर एरुशलेम नगरी ओरी पोरी धारा देहुरै थिऐ। ईंयां तै तिंयां मणछ ज़ुंण जोशिया का पैहलै यहूदे राज़ै तेथ बाल देअ, सुरज़, ज़ोथ, तारै अर होरी ग्रहे पूज़ा करदै थिऐ डाहै दै। अशेरा देबीओ डौंड बी काढअ तेऊ बिधाते भबना का पोर्ही संघा निंईं एरुशलेम नगरी का दूर किद्रोन गाडा लै, तिधी चैल़ी तेथ आग। तेखअ राल़अ सह छ़ार माट्टै जैंदरी संघा डाहअ मल्थानै छिंगी।
बिधाते भबनै ज़ेतरै मर्ध-मर्ध एकी-दुजै संघै उंबल़अ काम करा तै, तिन्नें डेरै बी पाऐ जोशिया राज़ै ढोल़ी। तिन्नां डेरै दी बूणा ती बेटल़ी अशेरा देबीए पूज़ा करना लै च़ादरा। जोशिया राज़ै शादै बिधाते सोभ प्रोहत एरुशलेम नगरी लै ज़ुंण यहूदा मुल्खै होरी-होरी नगरी रहा तै। उतरा बाखा गिबा उंधै दखण बेर्शेबा तैणीं तिन्नें सोभ देहुरै अर गान-स्तान बी मनै तेऊ छ़ोतलै ज़ेथ तिंयां बिधाता लै बल़ीदान अर धूप दैआ तै। तेऊ किऐ तिंयां गान-स्तान बी खतम ज़ुंण एरुशलेम नगरी ज़ैहसू प्रऊल़ी सेटा थिऐ, ज़िधी नगरीओ राज़पाल रहा त। अह प्रऊल़ थिई नगरी भितरा लै एछणैं आल़ी प्रऊल़ीए बाऊंईं बाखा। तिंयां प्रोहत निं तेऊ एरुशलेम बिधाते भबनै च़ाकरी करदै डाहै पर होरी प्रोहते हाथा का भोज़न सका तै तिंयां खाई।
धख आदमी छ़ाडै राज़ै जोशिया एरुशलेम नगरी बागै हिनोम खागै इहअ हुकम करी कि हिनोमी बणाईं दी तोपेत बेदी अर गान-स्तान आसा बिधाता लै बल़ीदान अर धूप ज़ाल़णा लै छ़ोतलै। ताकि तेथ कोई आपणैं शोहरू-शोहरी मोलक देअआ लै आगी जैंदरी दहई हूम नां करे। ज़ुंण घोल़ै यहूदा मुल्खे होरी राज़ै सुरज़े पूज़ा करना लै थिऐ अर्पण किऐ दै, तिंयां काढै तेऊ पोर्ही अर तेता संघै ज़ुण रथ थिऐ, तिंयां बी पाऐ ज़ाल़ी। तिंयां घोल़ै थिऐ बिधाते भबने प्रऊल़ी नेल़ खुडी डाहै दै ज़िधा का धख दूर नातान-मोलक बज़ीर रहा त। यहूदे राज़ै खासकर मनिश्शे ज़ुंण बिधाते भबने दोहरै खोल़ै ज़ुंण बेदी ती बणाईं दी अर ज़ुंण बेदी अहाज राज़े मैहला प्रैंदै थिई बणाईं दी, तिंयां सोभ बेदी पाई जोशिया ढोल़ी अर तेतो मलुअ शोटअ एरुशलेम नगरी बागै किद्रोन गाडा। तेखअ किअ जोशिया सह देहुरअ बंद ज़ुंण इज़राईले राज़ै सुलैमानै एरुशलेम पुर्बा अर जैतून धारे दखणा बाखा सदोनी लोगे अशतरोत नाओंए नांगी देबी, कमोश नाओंए मोआबीए नांगै देअ अर अमोनी लोगे मलकोम नाओंए च़िल़्हखरै देअआ पूज़णा लै थिअ बणाअं द। तेथ स्तापै दै पात्थरे ओडै पाऐ जोशिया फाल़ी अर अशेरा देबीए डौंड बी काटै अर तिन्नां ज़ैगा डाहै मणछे हाडकै भरी।
बेतेल ज़ुंण बेदी थिई, सह बी पाई जोशिया ढोल़ी ज़ुंण नबाते शोहरू जरोबाम राज़ै थिई बणाईं दी अर तेऊ कराऊअ त इज़राईली का पाप। तैहा बेदीए पात्थरो किअ तेऊ फाल़ी करै शरबूर संघा डाहै धरनीं माट्टै जैंदरी छिंगी। तेथ ज़ुंण अशेरा देबीए डौंड थिऐ, तिंयां बी पाऐ तेऊ आगी जैंदरी दहई। ज़ांऊं जोशिया राज़ै फेर भाल़अ, तेऊ का शुझुई धारा बाखा मुल्दै दाबणे ज़ैगा, तेऊ बझ़ैल़ै तेता का मूंऐं दै मणछे हाडकै आणनैं संघा ज़ाल़ै तिंयां तैहा बेदीए ज़ैगा ताकि सह ज़ैगा छ़ोतली होए। इहअ करै हुई बिधाता बोली दी सह गल्ल पूरी ज़ुंण तेऊ आपणैं गूरा बाती तधू बोली ती ज़धू राज़ै जरोबामै तैहा बेदी सेटा खल़्हुई जाच प्रतिष्ठा किई ती। जोशिया राज़ै पुछ़अ, “अह पोर थाम्ह किज़ै आसा?”
बेतेल नगरीए लोगै बोलअ, “एथ हेठै आसा यहूदा का आअ द बिधातो सह गूर दाबी डाहअ द, ज़ुंण आझ़ हंदअ आसा लागअ द, एते बारै थिअ एऊ गूरै तधू ई बोली हेरअ द कि इहअ-इहअ हणअ।”
जोशिया राज़ै किअ हुकम, “एता निं छ़ेल़ी आथी, एऊ गूरे हाडकै निं एता का बागै काढी।”
तेखअ निं लोगै तेऊ गूरे हाडकै कोतै आथी अर नां तिन्नां गूरे हाडकै कोतै ज़ुंण सामरी नगरी का थिऐ आऐ दै।
तेखअ सामरी नगरी उझै धारा ज़ेतरै देहुरै अर गान-स्तान ज़ुंण इज़राईल मुल्खे राज़ै थिऐ बणाऐं दै, तेता पिछ़ू बी थिई बिधाता रोश्शै आई दी, तिंयां बी पाऐ जोशिया ढोल़ी अर तेथ बी किअ तेऊ तिहअ ई ज़िहअ बेतेल किअ त। तिन्नां देहुरे बेदी दी बल़ीदान करनै आल़ै पज़ैरै बी पाऐ जोशिया मारी अर तिन्नां सोभी बेदीए ज़ैगा ज़ाल़ै मणछे हाडकै संघा आअ एरुशलेम नगरी लै फिरी।
राज़ै जोशिया मनाऊंअ ऊवार्णैओ थैर
(2 इतिहास 35:1-19)
राज़ै जोशिया किअ सारी परज़ा लै हुकम कि सोभै मनाऊंआं बिधातो अदर करना लै ऊवार्णैओ थैर, ठीक तेही ई बिधी दी ज़िहअ परमेशरे ऐहा बधाने कताबा दी आसा लिखअ द। ऊवार्णैओ थैर ज़िहअ जोशिया राज़ै मनाऊंअ, तिहअ नां तेऊ ज़मानै कधू मनाऊंअ ज़धू पांच़ो राज़ हआ त अर नां इज़राईल अर यहूदा मुल्खै राज़े राज़ा दी कधू मनाऊंअ। ज़ांऊं यहूदा मुल्खै राज़ करदी जोशिया ठार्हुई साल लागी, तेभै मनाऊंअ एरुशलेम नगरी सोभी बिधाता लै ऊवार्णैओ थैर।
होर ज़ुंण राज़ै जोशिया बदल़अ
यहूदा मुल्खै अर एरुशलेम नगरी ज़ेतरै ज़ादू-जंतर करनै आल़ै, मणशाण झ़ैऊंणै आल़ै, घअरै-घअरै मुहुर्ती, तिंयां बझ़ैल़ै जोशिया सोभ दूर काढणैं। आपणैं साबै लाअ जोशिया राज़ै पूरअ ज़ोर कि सह सोभी गल्ला बधाने तैहा कताबे साबै करे ज़ुंण हिलकिया माहा प्रोहता बिधाते भबनै भेटी ती। नां तधू तैणीं इहअ राज़अ हुअ अर नां तधा बाद कुंण जोशिया राज़ै ज़िहअ हुअ ज़ुंणीं पूरअ ज़ोर लाई तत्त-दिला का मोसा गूरै लिखै दै बधाने साबै सोभै गल्ला करने कोशिश किई होए।
पर ज़ुंण तेऊ का आजी यहूदा मुल्खे राज़ै मनिश्शे किअ त, तेता लै ती बिधाता खास्सी रोश्शै आई दी अर सह रोश्श निं अज़ी बी फांभअ हुअ त। बिधाता बोलअ इहअ, “ज़िहअ मंऐं इज़राईल मुल्खे इज़राईली परज़ा संघै किअ, मुंह करनअ यहूदा मुल्खे परज़ा संघै बी तिहअ ई। यहूदा मुल्खे परज़ा बी करनीं मुंह आप्पू का दूर। एरुशलेम नगरी अर तेथ मेरअ भबन ज़ुंण ज़ैगा मंऐं आप्पू लै छ़ांटी ती कि तिधी सोभ मुंह सेटा एछी माथअ टेक्के, तेता का बी हटणअ मुंह पिछ़ू।”
राज़ै जोशियो राज़ मुक्कअ
(2 इतिहास 35:20—36:1)
ज़िहअ-ज़िहअ बी राज़ै जोशिया किअ, तिंयां सोभै गल्ला आसा यहूदा मुल्खे राज़े इतिहासे कताबा दी लिखी डाही दी। ज़धू जोशिया यहूदा मुल्खै राज़अ थिअ, मिसर देशो माहा राज़अ नेकू आअ अश्शूर देशे राज़ैओ साथ दैंदअ फरात दरैऊआ तैणीं। राज़अ जोशिया बी डेऊअ तेऊए मकाबलै करदअ अर तेऊ जुधा दी हुई मगिदो नाओंए ज़ैगा जोशिया राज़े मौत। कार-करिंदै आणी जोशिया राज़े ल्हास मगिदो ज़ैगा का रथा दी एरुशलेम नगरी लै संघा डाहअ तैहा ज़ैगा दाबी ज़िधी राज़े खिंबा आल़ै दाबा।
यहूदा मुल्खे परज़ा किअ जोशिया राज़े शोहरू जोअहाजो अभिषेक संघा बणाअं तेऊए ज़ैगा आजू यहूदा मुल्खो राज़अ।
यहूदा मुल्खो राज़अ जोअहाज
(2 इतिहास 36:2-4)
ज़धू जोअहाज यहूदा मुल्खो राज़अ बणअ, तधू त सह त्रेई सालो। तेऊ किअ एरुशलेम नगरी का यहूदा मुल्खै चिई भिन्नैं तैणीं राज़। तेऊए ईजा नाअं त हमूतल अर सह थिई लिब्ना नगरीए जेरमयाह गूरे शोहरी। जोहाजै बी किअ आपणैं दादा-बाबा ई ज़िहअ पाप, तेऊ बी किअ तिहअ ई ज़ेता बिधाता नांईं च़ाहंदअ त कि सह करे। मिसर देशे माहा राज़ै नेकू किअ जोहाज हमात रिबला नाओंए ज़ैगा कैद अर इहअ करै हुअ एरुशलेम नगरी तेऊओ राज़ खतम। तेऊ बोलअ यहूदा मुल्खा का चअन हज़ार च़ार शौ किलू च़ंदी अर चऊती किलू सुन्नअ कारअ भरना लै। मिसर देशे माहा राज़ै नेकू बणाअं तेखअ जोशिया राज़ैओ शोहरू एलीकीम यहूदा मुल्खो राज़अ अर तेऊओ नाअं डाहअ बदल़ी करै जेहोकीम। जोअहाज राज़अ निंयं तेऊ आप्पू संघै कैद करी मिसर देशा लै अर खिरी मूंअ जोहाज तिधी।
यहूदा मुल्खो राज़अ जेहोकीम
(2 इतिहास 36:5-8)
राज़ै जेहोकीमै झाल़ी सह च़ंदी अर सुन्नअ सारै यहूदा मुल्खा का खास्सअ कारअ मांगी ताकि मिसर देशे माहा राज़ै नेकू ज़ुंण सुन्नैं-च़ंदीए मांग किई ती, सह तेता भैंट दैई सके।
ज़धू जेहोकीम यहूदा मुल्खो राज़अ बणअ, तधू ती तेऊए अमर पच्ची साले। तेऊ किअ एरुशलेम नगरी का गैरा साला तैणीं राज़। तेऊए ईजा नाअं त ज़बीदा अर सह रूमा नगरी रहणैं आल़ै पदाहे शोहरी। जेहोकीम राज़ै बी किअ आपणैं दादा-बाबा ई ज़िहअ पाप, तेऊ बी किअ तिहअ ई ज़ेता बिधाता नांईं च़ाहंदअ त कि सह करे।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.