1 शमूएल

1 शमूएल

इज़राईला दी राज़ैओ राज़

भेत

लिखणैं आल़अ: शमूएल, पर पाक्‍कअ थोघ निं आथी।

सन: 1050 का 722 ईसा आजी

पहल़णैं आल़ै: इज़राईली

सोभी का आजी थिई 1 शमूएल अर 2 शमूएले कताबा दुहै ज़ोल़ी करै एक ई कताब। इना दुही कताबा दी आसा इज़राईला दी 1080 पिछ़ू 970 ईसा आजी इतिहासे बारै शमूएल गूरे ज़ल्म हणैं ओर्ही राज़ै दाबेदा मरनै तैणीं। अह कताब निं पठी शमूएलै आथी लिखी दी किल्हैकि ऐहा कताबा पूरी हणैं का आजी गअ त शमूएल मरी।

अह कताब खोज़ा खासकर इज़राईल देशे शुरूआती चिई मशूर मणछ शमूएल, राज़अ शाऊल अर राज़ै दाबेदे ज़िन्दगीए बारै। एथ हाम्हां का इहअ थोघ बी लागा कि इज़राईली पांच़े ढिलै राज़ा का किहअ करै बणअ इज़राईल राज़े राज़ा दी बलबान देश।

2 शमूएले कताब हआ शमूएल गूरे ज़ल्मां ओर्ही शुरू, तेखअ शादा तेऊ बिधाता आपणअ गूर हणां लै, बादा का बणा सह इज़राईलो प्रधान पांच़।

बादा का करा लोग शमूएला का एही अरज़ कि सह छ़ांटे एक इहअ मणछ ज़ुंण इज़राईली प्रैंदै राज़अ होए। बिधाता बोलअ शमूएला लै कि बिन्यामीन गोत्रा का छ़ांट शाऊला इज़राईलै पैहलअ राज़अ। शाऊल राज़ै निं तिहअ किअ ज़िहअ बिधाता च़ाहा त। तेखअ बोलअ बिधाता शमूएल गूरा लै इहअ कि ईशैई कान्हीं-कान्हैं शोहरू छ़ांट इज़राईली लै राज़अ ज़ुंण फुआल आसा। एता पिछ़ू हुअ राज़अ शाऊल दाबेदो दुशमण। शमूएल रहअ राज़ै शाऊला का दाबेदा बच़ाऊंदअ लागी अर पलिश्ती संघै जुधा दी शाऊल अर तेऊए शोहरूए मौत हणें गल्‍ला संघै हआ 1 शमूएले कताब खतम।

“ताह कधू तैणीं रहणअ शाऊले तैणीं हिक्‍का पटाक्‍कदै लागी? हुंह निं च़ाहंदअ कि शाऊल आजू इज़राईलीओ राज़अ रहे! शींगा दी निंऊं जैतूनो तेल भरी संघा डेऊ बेतलेम नगरी ईशैई नाओंए मणछा सेटा, किल्हैकि तेऊए शोहरू मांझ़ै आसा मंऐं एक ज़ण्हअ इज़राईलीओ राज़अ लाअ द बणाईं।”

(16:1)

कताबे बांड

शमूएलो ज़ल्म अर च़ाकरी 1:1—8:22

इज़राईलीओ पैहलअ राज़अ 9:1—12:25

शाऊल हुअ बेघै निक्‍कअ राज़अ 13:1—15:35

दाबेदे ज़िन्दगी 16:1—20:42

इज़राईलीए राज़े रुपै दाबेद 21:1—31:13