Kulvi Outer Seraji Bible
1 शमूएल 30
दाबेदो अमोलकी संघै जुध
चिऊथै धैल़ै पुजअ दाबेद आपणैं आदमी संघै सकाल़ग नगरी। अमोलकी त हेरदअ द तेभा लै दखण रेगीस्तान अर सकाल़ग लुटी अर सकाल़ग नगरी आसा तिन्नैं सारै दी आग चैल़ी दी। बेटल़ी-माठै निंयैं तिन्नैं सोभ कैद करी आप्पू संघै। तिन्नां मांझ़ै मारअ निं तिन्नैं कोहै पर तिंयां निंयैं तिन्नैं सोभ आप्पू संघै, संघा डेऊऐ फिरी। तैही ज़ांऊं दाबेद आपणैं आदमी संघै तिधी पुजअ, तिन्नैं भाल़अ कि सारी नगरी आसा आग चैल़ी दी अर तिन्नें बेटल़ी अर शोहरू-शोहरी निंयैं तिन्नैं आप्पू संघै गलाम बणाईं। दाबेद अर तेऊ संघै तेऊए तिंयां आदमी लागै ज़ोरै-ज़ोरै लैल़ा लाई लेरा लांदै, तिंयां रहै तेभै तैणीं लेरा लांदै लागी ज़ेभै तैणीं तिन्नों शाह पठी हल़कअ निं फिरअ। दाबेदे बेटल़ी, जज्रेला का आणी दी आहीनोम अर कर्मेल नगरी का आणी दी नबाले बेटल़ी अबीगेल बी निंईं तिन्नैं दुहै आप्पू संघै कैद करी।
दाबेदा लै ती ऐबै खास्सी आफ़त पल़ी दी। किल्हैकि तेऊ संघै तेऊए आदमी बी तै आपणैं शोहरू-शोहरी डेऊणैं पिछ़ू खास्सै दुखी हुऐ दै। तिंयां थिऐ आप्पू मांझ़ै ऐबै एही गल्ला करदै लागै दै कि दाबेद ई पाणअ ऐबै पात्थरो ढो दैई मारी। पर दाबेदै डाही आपणैं परमेशर बिधाते आद करी खास्सी हिम्मत।
तेखअ बोलअ दाबेदै आहीमोलके शोहरू अबतार प्रोहता लै, “आपणीं सदरी आण ओर्ही मुंह सेटा लै।” अबतारै आणी सदरी तेऊ सेटा लै। दाबेदै पुछ़अ बिधाता का, “हुंह एऊ अमोलकीए छ़ुंढा पिछ़ू डेऊं? मेरै तिंयां ढाखणैं बी?” बिधाता दैनअ तेऊ लै ज़बाब, “तूह डेऊ तिन्नां पिछ़ू, ताह हेरनै तिंयां ढाकी अर ताह आणनीं आपणीं सोभ गल्ला तिन्नां का बापस छ़ड़ैऊई।”
तेखअ डेऊअ दाबेद तिधा का बसोर नाओंए गाडा तैणीं अर तेऊए छ़ह शौ आदमी तै तेऊ संघा। धख आदमी डाहै तेऊ तिधी। आप्पू डेऊअ दाबेद च़ार शौ आदमी संघा निंईं अमोलकी पिछ़ू अर दूई शौ आदमी गऐ तै इहै थकी कि तिंयां निं बसोर गाडा पार टपी बोल़ै संघा रहै तिंयां पिछ़ू तिधी। आजू भेटअ दाबेदे आदमी मिसर देशो एक ज़ुआन मणछ, तिन्नैं आणअ सह दाबेदा सेटा लै संघा दैनी तेऊ लै रोटी खाणां लै अर झुटणा लै पाणीं। तेखअ दैनै तिन्नैं फेडूए दूई डेलू अर दूई लुम्बरू दाखे। तेता खाई फिरअ तेऊओ शाह हरअ किल्हैकि तेऊ निं चिई धैल़ी-राची ओर्ही किछ़ै खाअ त नां पाणीं झुटअ त।
तेखअ पुछ़अ दाबेदै तेऊ का, “तेरअ मालक कुंण आसा अर तूह किधो आसा?”
तेऊ दैनअ ज़बाब, “हुंह आसा मिसर देशा का एकी अमोलकी मणछो गलाम, हुंह हुअ त बमार अर मेरै मालकै डाहअ हुंह इधी शोटी अर आझ़ हुऐ मुंह इधी चअन धैल़ै। हाम्हैं तै दखण यहूदा मुल्खे दखणा बाखा करेती, कालेब अर सकाल़ग लुटी अर तेथ आग चैल़ी बापस एछदै लागै दै।”
दाबेदै बोलअ तेऊ लै, “तूह सका मुंह तिन्नां अमोलकी सेटा पजैल़ी?”
तेऊ बोलअ इहअ, “ज़ै तूह मुल्है परमेशरे सोह खाई एही ज़बान दैए कि ताह निं हुंह मारनअ आथी अर नां मेरै मालके हाथै दैणअ आथी, तै दैंऊं तम्हां हुंह तिन्नां अमोलकीए छ़ुंढा सेटा पजैल़ी।”
तेखअ पजैल़ै तेऊ मिसरी मणछै तिंयां लुटी मारी डेऊऐ दै अमोलकीए छ़ुंढा नेल़। तिंयां थिऐ तिधी ओर्ही-पोर्ही सारै दी छिंघुऐ दै, खुशी मनाऊंदै, खांदै-पिंदै अर नाच़दै लागै दै किल्हैकि तिन्नैं आणअ त पलिश्ती देशा अर यहूदा मुल्खा का खास्सअ माल लुटी। दाबेद अर तेऊए आदमी डेऊऐ तिन्नां मारदै राची अर तिंयां रहै दुजै धैल़ै सान्हां तैणीं तिन्नां मारदै लागी। तिन्नैं पाऐ तिंयां सोभ मारी अर तेथ निखल़ै तिन्नें सिधै तिंयां च़ार शौ ज़ुआन मणछ बच़ी ज़ुंण ऊँटा प्रैंदै बेशी तिधा का ठुर्है।
इहअ करै ज़ुंण बी अमोलकी लुटी निंयं थिअ, दाबेदै आणी तिंयां सोभै गल्ला बापस छ़ड़ैऊई अर सोभी बेटल़ी-माठै संघी आणी तेऊ आपणीं दुहै बेटल़ी बी छ़ड़ैऊई। तिन्नें निं ज़ाथी धख ज़ेही च़ीज़ बी शोठुई। दाबेदै आणी आपणैं सोभी आदमीए बेटल़ी, शोहरू, शोहरी अर अमोलकी ज़ुंण समान लुटअ थिअ, तिंयां आणी तेऊ सोभ च़िज़ा डागै-चैणैं संघी बापस। डागै-चैणें हेल़्ही अमोलकी होर्ता का बी थिई लुटी दी, तिंयां बी छ़ेल़्है दाबेदे आदमी आप्पू आजू-आजू ज़ुदै ज़िहै। तिंयां सोभै बोला तै तेता लै इहअ, “ईंयां आसा पठी दाबेदे हेस्सै तेऊए मैन्थो फल!”
तेखअ डेऊअ दाबेद तिन्नां दूई शौआ मणछा सेटा ज़ुंण थकी करै बसोर गाडा आर बाखा पिछ़ू तै छ़ुटै दै। तेखअ आऐ तिंयां बी आजू तैणीं दाबेद अर तिन्नां होरी सेटा लै अर दाबेद बी पुजअ तिन्नां सेटा संघा पुछ़ै तिंयां राज्ज़ी-खुशी। पर दाबेदा संघै डेऊए दै कई उपद्रभी अर मतलबी मणछै बोलअ दाबेदा लै इहअ, “ईंयां ता हाम्हां संघै आऐ ई निं आथी तै, हाम्हां निं इना लै लुटै दै माला मांझ़ा का किछ़ै दैणअ। आपणैं बेटल़ी-माठै लागा ईंयां घअरा लै निंदै।”
तेखअ बोलअ दाबेदै तिन्नां लै इहअ, “मेरै भाईओ! बिधाता ज़ुंण हाम्हां लै दैनअ, तेता करै निं सिधअ आपणअ पूरअ करा। म्हारी फाज़त किई तेऊ ई बिधाता अर तेऊ ई किई म्हारी अमोलकी डाकूए छ़ुंढा खतम करना लै मज़त। थारी अह गल्ल निं कोही लाई मनी! सोभी भेटणअ बराबर हेस्सअ, ज़ुंण जुधा लै डेऊऐ तिन्नां बी अर ज़ुंण पिछ़ू समाना पहरी रहै तिन्नां लै बी भेटणअ तेतरअ ई।” दाबेदै बणाअं अह सूल अर तेखअ रहअ अह सूल इज़राईली मांझ़ै सदा।
ज़ांऊं दाबेद सकाल़ग नगरी बापस पुजअ फिरी, तेऊ दैनअ लुटै दै माला मांझ़ै धख-धख यहूदी सैणैं लै ज़ुंण तेऊए पाक्कै साथी थिऐ, संघा दैनअ इहअ समाद, “अह आसा तम्हां लै मुंह बाखा भैंट ज़ुंण मंऐं बिधाते दुशमणा का आणी लुटी।” सह भैंट दैनी तेऊ बेतेल, यहूदा मुल्खै दखणा बाखा रामोत नगरी, जतीर नगरी, अरोर, सिपमोत, एश्तमो नगरी, रकाल़, जर्मेल टोलीए नगरी, कैनी टोलीए नगरी, होर्मा, बोर-अशान, अताक, हेब्रोन नगरीए सैणैं लै ज़ुंण दाबेदे पाक्कै साथी तै अर ज़ेसी-ज़ेसी दाबेद हांढा-फिरा त।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.