Kulvi Outer Seraji Bible
1 शमूएल 31
शाऊल अर तेऊए शोहरूए मौत
(1 इतिहास 10:1-12)
तेतरी किअ पलिश्ती इज़राईली संघै गिलबा नाओंए धारा मकाबलअ। तिधी पाऐ पलिश्ती कई इज़राईली मारी अर बाकी ज़ुंण बच़ै तिंयां ठुर्है तिधा का राज़ै शाऊल अर तेऊए शोहरू संघी। पर पलिश्ती निं शाऊल अर तेऊए शोहरूओ पिछ़अ छ़ाडअ, पलिश्ती पाऐ शाऊले चअन शोहरू जोनातान, अबीनादाब अर मोलकीशूआ मारी। शाऊला फेर लागअ घणअ जुध अर तेऊ लै खुभै दुशमणे कतीर अर तेता करै हुअ सह खास्सअ ज़खमी। तेखअ बोलअ शाऊलै आपणैं अस्त्र-शास्त्रा ढोणै आल़ै लै, “तूह खिंच़ आपणीं तलबार संघा मार मुंह आप्पै! ईंयां पलिश्ती ज़सरअ खतैर निं हंदअ हुअ द, हुंह निं इने तलबारा करै लोल़ी मूंअ! तेखअ हणअ हुंह लोगे सुहांगा लै!” पर सह ज़ुआन मणछ डरअ खास्सअ अर किअ तेऊ मारना लै नांह। तेखअ किई राज़ै शाऊलै आपणीं तलबार काढी धरनीं खल़ी संघा दैनअ तलबारे च़ुंज़ी प्रैंदा लै गल़िम्ह च़ारै लै जुंघू।
ज़ांऊं तेऊ अस्त्र-शस्त्रा ढोणै आल़ै ज़ुआन मणछै भाल़अ कि राज़अ शाऊल गअ मरी, तेऊ बी दैनअ शाऊला ई ज़िहअ आपणीं तलबार खल़ी करी तेथ प्रैंदै जुंघू संघा मूंअ तिधी राज़ै ई संघै। इहअ करै मूंऐं शाऊल राज़अ, तेऊए चअन शोहरू, अस्त्र-शस्त्र ढोणै आल़अ सह ज़ुआन मणछ अर राज़ै शाऊले लुआद पठी ज़ुंण आजू तेऊ बाद राज़ सका तै करी। ज़ुंण इज़राईली जज्रेल खागै जरदण नदीए दुजै बाढै तै, ज़ांऊं तिन्नां का इहअ थोघ लागअ कि इज़राईली सैना ठुर्ही जुधा का, शाऊल अर तेऊए शोहरू बी पाऐ पलिश्ती मारी, तिंयां ठुर्है तेखअ आपणीं-आपणीं नगरी छ़ाडी। तेखअ आऐ पिछ़ू पलिश्ती संघा गिम्मी तिंयां नगरी आप्पू लै।
दुजै धैल़ै ज़ांऊं पलिश्ती मारै दै इज़राईलीए माला लुटदै आऐ, तिन्नां भेटी शाऊल अर तेऊए चिई शोहरूए ल्हासा गिलबा धारा पल़ी दी। तिन्नैं काटअ शाऊलो मूंड, तेऊए अस्त्र-शस्त्र बी लुटै, संघा छ़ाडै तिन्नैं सारै पलिश्ती देशै दूत कि ऐहा खुशीए खबरा खोज़ा सोभी देअए देहुरै अर सोभी आम लोगा का। तेखअ डाहै तिन्नैं शाऊले अस्त्र-शस्त्र अशतरोत देबीए देहुरै अर तेऊए घेर डाही बेथ-शान नगरीए गहल़ै बागा बाखा भित्ती दी टोक्की।
ज़ांऊं गलाद जबेश नगरीए लोगा का इहअ थोघ लागअ कि पलिश्ती किअ शाऊला संघै इहअ-इहअ, तिन्नें शूरबीर पुजै राचो-राच बेथ-शान। संघा आणी शाऊल अर तेऊए शोहरूए ल्हासा नगरीए गहल़ा का काढी जबेश नगरी लै संघा दहई तिन्नें ल्हासा तिधी। तेखअ डाहै तिन्नैं शाऊल अर तेऊए शोहरूए हस्तू जबेश नगरी मधनूंए बूटा हेठै दाबी। संघा रहै सोभै साता धैल़ी तैणीं कहतू।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.