Kulvi Outer Seraji Bible
1 शमूएल 7
तेखअ पुजै किर्यात-ज़रीम नगरी बस्सै दै इज़राईली बेथ-शमेश। तिधा का निंयं तिन्नैं बिधाते करारो मणशू उझै किर्यात-ज़रीम नगरी लै, संघा डाहअ अबीनादाब नाओंए मणछे घअरै, तेऊओ घअर त धारठी प्रैंदै। तिन्नैं किई अमीनादाबे शोहरू एलीआजरे शुधी संघा डाहअ करारो मणशू तेऊ का सभाल़ी।1
इज़राईला दी शमूएल पांच़
बिधाते करारो मणशू रहअ खास्सी साला किर्यात-ज़रीम कोई बिहा साला तैणीं। एतरी साला रहै इज़राईली बिधाता का लेर-पकार पाई मज़त मांगदै लागी।
एकी धैल़ै बोलअ शमूएल गूरै इज़राईली लै इहअ, “ज़ै तम्हैं असली दी आपणैं दिला का बिधाता बाखा फिरै, तै काढा आप्पू मांझ़ा का इना पराऐ देअआ अर अशतरोत देबीए मुहुर्ती पोर्ही। आप्पू रहा पठी बिधाते स्तोती दी लागी। तै हेरनै तम्हैं तेऊ पलिश्ती का बच़ाऊई।” तेखअ काढै इज़राईली तिंयां बाल देअए अर अशतरोत देबीए मुहुर्ती आप्पू मांझ़ा का पोर्ही संघा रहै सिधै बिधाते स्तोती दी लागी।
तेखअ बोलअ शमूएलै इहअ, “सोभै इज़राईली करा मिज़पा नगरी झाल़अ, हुंह करूं तिधी तम्हां सोभी लै बिधाता सेटा प्राथणां।” तेखअ किअ सोभी इज़राईली मिज़पा एछी झाल़अ। तिन्नैं आणअ कुहै का पाणीं संघा तरैल़अ सह पाणीं बिधाता सेटा, तिंयां रहै तैहा सारी धैल़ी ब्रतू, तिन्नैं बोलअ इहअ, “हाम्हां किअ बिधाता लै पाप।” शमूएलै किअ मिज़पा नगरी इज़राईलीओ नसाफ।
पलिश्ती आऐ इज़राईली संघै जुधा लै
ज़ांऊं पलिश्तीए पांज़ा राज़ै का थोघ लागअ कि इज़राईली आसा मिज़पा झाल़अ, तिन्नें छ़ाडी सैना कि इज़राईली लै चुटी पल़े। ज़ांऊं इज़राईली का इहअ थोघ लागअ, तिंयां डरै खास्सै अर इज़राईली बोलअ शमूएला लै इहअ, “तूह रह बिधाता सेटा हाम्हां लै अरज़ करदअ लागी, तूह बोल बिधाता लै कि हाम्हां बच़ाऊ पलिश्ती का।”
शमूएलै काटअ एक च़ूई झुटणैं आल़अ मिम्मूं संघा किअ सह बेदी दी पठी दहई 2बिधाता लै हूम बल़ी। तेखअ किई शमूएलै बिधाता का अरज़ कि इज़राईली बच़ाऊ। बिधाता दैनअ शमूएले प्राथणों ज़बाब। ज़ांऊं शमूएल बिधाता लै हूम बल़ी करदअ त लागअ द, पलिश्ती सैना गई ती इज़राईली संघै जुधा करना लै खास्सी नेल़ एछी। पर बिधाता लाअ तैहा ई धैल़ी सरगै पलिश्ती प्रैंदै गुल़ूबिज़ल़ू इहअ ज़ोरै-ज़ोरै कि तिन्नां छ़ुटअ दर्छ़णअ, संघा झाखुऐ तिंयां आप्पू मांझ़ै पठी अर इहअ करै हारै पलिश्ती संघा ठुर्है बापस। इज़राईली ठुर्है मिज़पा का पलिश्ती पिछ़ू, तिन्नैं खद्रेल़ै तिंयां काटदी-मारदी धारा बाखा उंधै बेथ-कार तैणीं।
शमूएलै किअ एक बडी ज़ान मिज़पा अर शेन मांझ़े ज़ैगा खल़ी अर तैहा ज़ानीं नाअं डाहअ तेऊ इहअ बोली एबीनेज़र3, “बिधाता किई म्हारी इधी तैणीं मज़त।” इहअ करै हारै पलिश्ती अर तेखअ निं तिंयां इज़राईलीए देशै भिई आऐ। शमूएले ज़िऊंदी ज़िता डाहै बिधाता पलिश्ती रोक्की। अक्रोन उंधै गात तैणीं ज़ेतरी नगरी दी पलिश्ती कबज़अ थिअ किअ द, तिंयां नगरी बी भेटी इज़राईली बापस अर इना नगरी फेर ज़ेतरअ बी मुल्ख आसा, सह बी भेटअ इज़राईली बापस। इज़राईली अर अमोरी लोगा मांझ़ै बी हुअ मेल़-ज़ोल़।
आपणीं ज़िऊंदी ज़िता रहअ शमूएल इज़राईलीओ पांच़ अर सैणअ। सह डेओआ त हर साल बेतेल, गिलगाल अर मिज़पा मुल्खै संघा दैआ त इज़राईली लै नसाफ करी। तेखअ एछा त सह रामाह नगरी आपणैं घअरा लै अर तिधी बी करा त सह इज़राईलीओ नसाफ। रामाह नगरी बी थिई शमूएलै बिधाता लै एक बेदी डाही दी बणाईं।
Source notes (3)
- Cross-reference 2 शमू. 6:2-4; 1 इति. 13:5-7
- Cross-reference पठी दहई लेब. 6:23; बधा. 13:16; 33:10
- Footnote एबीनेज़र मज़तीओ ज़ान
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.