Kulvi Outer Seraji Bible
1 शमूएल 23
दाबेदै बच़ाऊई पलिश्ती का केलाह नगरी
दाबेदै शूणअ इहअ कि पलिश्ती आऐ केलाह नगरीए परज़ा मारदै अर तिंयां आसा खेचा-खहल़ा का नऊंईं साल-फसला लुटदै लागै दै। दाबेदै पुछ़अ बिधाता, “हुंह पलिश्ती मारदअ डेऊ?” बिधाता दैनअ ज़बाब, “हाँ, डेऊ संघा बच़ाऊ केलाह नगरी।”
पर दाबेदे आदमी बोलअ तेऊ लै, “हाम्हां आसा इधी यहूदा मुल्खै तोही पलिश्ती का डअर लागी दी! केलाह नगरी डेऊई पलिश्ती संघै मकाबलअ सका हाम्हां लै होर बी डरैऊंणअ हई!” तेखअ पुछ़अ दाबेदै बिधाता भिई अर बिधाता दैनअ दाबेदा लै ज़बाब, “तूह डेऊ उंधै केलाह नगरी लै, संघा कर पलिश्ती संघै मकाबलअ, हुंह दैंऊं तिधी आप्पै ताल्है ज़ीत।” तेखअ डेऊअ दाबेद आपणैं आदमी संघा निंईं केलाह नगरी लै संघा छ़ेल़अ पलिश्ती संघै जुध। तिन्नैं मारै तिधी खास्सै पलिश्ती अर तिन्नें डागै-चैणैं आणै आप्पू लै छ़ेल़्ही। इहअ करै बच़ाऊई दाबेदै केलाह नगरी।
आहीमोलक प्रोहतो शोहरू अबतार ठुर्हअ संघा पुजअ केलाह नगरी दाबेदा सेटा अर आपणीं प्रोहते सदरी बी थिई तेऊ आप्पू संघै आणी दी।
शाऊला का गई अह खबर पुजी कि दाबेद आसा केलाह नगरी लै डेऊअ द, तेऊ बोलअ इहअ, “ऐबै किअ सह बिधाता मेरै बशै। फेर-फिरदै उछ़टै गहल़ा आल़ी नगरी भितरी डेऊई शाचअ सह ज़ज़ाल़ा दी आप्पै।” शाऊलै शादी आपणीं सैना जुधा लै कि केलाह नगरी डेऊई गोटणैं दाबेद अर तेऊए आदमी नगरी भितरी फेरा-फेर।
ज़ांऊं दाबेदा का थोघ लागअ कि शाऊल च़ाहा ऐबै इहअ करनअ, तेऊ बोलअ अबतार प्रोहता लै, “प्रोहते सदरी आण ओर्ही।” तेखअ बोलअ दाबेदै इहअ, “हे इज़राईले परमेशर बिधाता, मुखा शुण्हुंअ इहअ कि शाऊल आसा मुंह मारदअ केलाह नगरी लै च़ाल्लअ द एछी! मुंह पिछ़ू लाई तेऊ अह नगरी बी खतम करी, ऐबै हुंह किज़ै करूं? केलाह नगरीए सैणैं कै हुंह तेऊए हाथै दैणअ? ज़िहअ मंऐं शूणअ, शाऊल कै तिहअ ई च़ाल्लअ एछी? हे इज़राईले परमेशर बिधाता, ज़ीबाण, तूह खोज़ मुखा!”
बिधाता दैनअ ज़बाब, “हाँ, सह एछणअ।”
तेखअ पुछ़अ दाबेदै बिधाता का इहअ, “केलाह नगरीए सैणैं कै हुंह अर मेरै आदमी शाऊले हाथै दैणैं?” बिधाता दैनअ ज़बाब, “हाँ, तिन्नां करनअ इहअ ई।”
दाबेद अर तेऊए आदमी तै पठी कोई छ़ह शौ अर तिंयां निखल़ै केलाह नगरी का दूर संघा रहै नगरी का दूर ज़िधी तिन्नां ज़ैगा भेटी तेथ लुक्की। ज़ांऊं शाऊला का थोघ लागअ कि दाबेद आसा गअ द केलाह नगरी का ठुर्ही, तेखअ निं सह केलाह नगरी लै आअ।
दाबेद रहअ धारा जुहल़ी लुक्की
तेखअ रहअ दाबेद धारा बाखे मुल्खै जीप रेगीस्ताना नेल़ लुक्की। शाऊल त कबल्लअ तेऊ लोल़अ लागअ द, पर बिधाता निं शाऊला सफल हणैं दैनअ। दाबेदै बी हेरअ ज़ाणीं कि शाऊल निं तेऊ मारनै बाझ़ी पिछ़ू हटी गअ।
दाबेद त जीप रेगीस्ताना नेल़ होरेश नाओंए ज़ैगा। राज़ै शाऊलो शोहरू जोनातान पुजअ दाबेदा सेटा होरेश, संघा लागअ इहअ बोली तेऊ हैऊंदअ-बतैऊंदअ कि परमेशरा करनी तेरी फाज़त आप्पै। जोनातानै बोलअ इहअ, “तूह निं डरदअ लागी, मेरअ बाब शाऊल निं तेरी हान्नी करी सकदअ। तेऊ का आसा थोघ कि तूह आसा सह ई ज़ुंण तेऊ बाद आजू इज़राईलो राज़अ हणअ अर ताह बाद दुजी पदबी हणीं मेरी।” तेखअ किई तिन्नैं दुही ज़ण्हैं बिधाते सोह खाई करार कि म्हारी साथ रहणीं सदा। दाबेद रहअ होरेश ई अर जोनातान डेऊअ आपणैं घअरा लै फिरी।
जीप नगरी का डेऊए कुंण गिबा नगरी शाऊला सेटा संघा खोज़अ तेऊ का, “दाबेद आसा म्हारै मुल्खै होरेश गहल़ै हकीला धारा लुक्कअ द। सह ज़ैगा आसा जशमोन रेगीस्ताने दखणा बाखा। माहा राज़अ, हाम्हां का आसा थोघ कि तूह तेऊ लोल़अ किहअ आसा लागअ द, तूह एछ म्हारै मुल्खा लै अर दाबेद तेरै हाथै दैणअ आसा म्हारअ काम।”
शाऊलै बोलअ तिन्नां लै, “मुल्है इहै खास्सै झ़ूरना लै लोल़ी, बिधाता तम्हां लै खास्सी बर्गत दैनी! ऐबै डेओआ, संघा लआ राम्बल़अ थोघ करी कि सह किधी ज़िहअ आसा अर सह तिधी कुंणी भाल़अ। मुखा खोज़अ कुंणी कि सह आसा खास्सअ च़लाक मणछ। राम्बल़अ थोघ करा कि सह कैहा ज़ैगा आसा लुक्कअ द, सोभै गल्ला राम्बल़ी ज़ाच़ी-भाल़ी एछै मुंह सेटा फिरी। तेखअ एछूं हुंह तम्हां संघै। ज़ै अज़ी बी सह तेऊ ई मुल्खै होए, सह लणअ मुंह ढाकी, च़ाऐ मुंह तेता लै सारै यहूदा मुल्खै किल्है निं लागे लोल़ै डेऊणअ।”
जीप नगरी आल़ै तिंयां मणछ आऐ शाऊला का आजू फिरी। दाबेद अर तेऊए आदमी तै अराबा मिऊन नाओंए रेगीस्तानै जशमोन दखणा बाखा गऐ दै पुजी। शाऊल डेऊअ आपणैं आदमी संघा निंईं दाबेदा लोल़अ। ज़ांऊं दाबेदा का एतो थोघ लागअ, तैही निखल़अ सह उझै धारा का उंधै मिऊन रेगीस्ताना लै। शाऊला का हेरअ कुंणी खोज़ी अर सह डेऊअ तेथ दाबेदा लोल़अ। ऐबै हुअ इहअ कि धारा ओर्ही बाखा थिअ शाऊल अर धारा पोर्ही बाखा तै दाबेद अर तेऊए आदमी। दाबेदा त शाऊल अर तेऊए आदमी का दूर ठुर्हनेओ छ़ेक्कअ लागअ द अर शाऊले आदमी तै दाबेद अर तेऊए आदमी फेरा का गोटी आणै दै। तेतरी आअ एक दूत शाऊला सेटा संघा बोलअ इहअ, “ओर्ही एछा छ़ेक्कै! पलिश्ती गऐ इज़राईली मारदै भिई एछी!” तेखअ पाई शाऊलै दाबेदे पिछ़ै करने छ़ाड़, संघा डेऊअ सह पलिश्तीए मकाबलै करदअ। तैही पल़अ तैहा ज़ैगा नाओं बच़णे टोल्ह। तिधा का डेऊअ दाबेद एनगाद मुल्खा लै संघा रहअ तिधी लुक्की।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.