Kulvi Outer Seraji Bible
1 शमूएल 20
जोनातानै नभाऊई दाबेदा संघै आपणीं पाक्की साथ
दाबेद निखल़अ रामाह नगरीए नबाओत गराऊंआं का बच़ी संघा डेऊअ जोनाताना सेटा। दाबेद लागअ तेऊ का इहअ पुछ़दअ, “मेरअ आस्सा किज़ै कशूर! मेरै भलै इहअ किज़ै पाप हुअ कि तेरअ बाब आसा मुंह मारदअ मेरै पिछ़ै पल़अ द?”
जोनातानै दैनअ ज़बाब, “परमेशर नां करे कि तूह मरे! मेरअ बाब लआ हर होछ़ै-बडै कामां करनै का आजी मुखा खोज़ी। तै ऐहा गल्लो टवारअ किल्है लाअ तेऊ मुखा करी? ऐबै निं ताह मारने गल्ल आथी ई!”
पर दाबेदै बोलअ, “जोनातान, हुंह खाआ बिधाते सोह, असली दी आसा इहअ ई! हुंह आसा मरनै का सिधअ हाथै-बैथै दूर! तेरै बाबा का आसा थोघ कि तूह झ़ूरा मुल्है खास्सअ। तैही निं सह ताखा खोज़ी ताह दुखी करनअ च़ाहंदअ।”
जोनातानै बोलअ दाबेदा लै, “ज़िहअ तूह बोले, ऐबै करूं हुंह तिहअ ई।”
दाबेदै खोज़अ जोनाताना का, “काल्ला आसा भाल़ पुनूंईओ थैर, हुंह बेशा ऐहा धैल़ी राज़ै संघै बैल़ी खांदअ ज़रूर, पर काल्ला रहणअ मुंह पर्शी उडै तैणीं किधी दूर खेचै लुक्की। ज़ै तेरअ बाब पुछ़े कि दाबेद किल्है निं आअ? तै खोज़ै तूह इहअ, ‘तेऊ मांगी ज़ीबाण करी मुखा छ़ुटी कि तेऊ शाचअ बेतलेम नगरी आपणैं घअरा लै डेऊणअ, तिन्नें खिंबे लोग करा हर साल हूम बल़ीदान।’ ज़ै सह इहअ बोले, ‘ठीक आ बै,’ तै समझ़ै तूह इहअ कि हुंह बच़अ, पर ज़ै सह रोश्श काढे, तै जाणअ तूह समझ़ी कि तेऊ आसा आपणैं दिलै मुंह मारने डाही दी। ज़ीबाण हेरे एऊ कामां करना लै निं तूह मेरअ भरोस्सअ चोल़ी, किल्हैकि तंऐं आसा बिधाते नाओंए सोह खाई करार किई दी कि ताह निं मुंह संघै कधि साथ चोल़णी। ज़ै ताह मुंह दी किज़ै खोट ज़ाण्हिंए, तै मारै मुंह तूह आपणैं हाथै! तेता लै निं लागदअ हुंह ताह आपणैं बाबा सेटा पजैल़णअ।”
जोनातानै बोलअ दाबेदा लै, “आरा एही गल्ल निं तूह सोठी बी आथी कि हुंह ताह संघै धोखअ करे! ज़ै मुखा पाक्कअ थोघ हंदअ कि मेरै बाबै आसा आपणैं दिलै अज़ी बी ताह मारने डाही दी, तै कै मुंह ताखा खोज़णअ निं आथी त?”
दाबेदै पुछ़अ जोनाताना का, “मुखा किहअ करै च़ाल्लअ थोघ लागी कि तेरै बाबा रोश्शै आई ती कि नांईं?”
जोनातानै बोलअ दाबेदा लै, “च़ाल्ल हाम्हां डेऊणअ दूर किधी खेचै।” तेखअ डेऊऐ तिंयां दुहै, जोनातानै बोलअ दाबेदा लै, “इज़राईलो परमेशर बिधाता आसा ऐहा गल्लो शाजत अर मेरी रही ताल्है ज़बान कि ऐहा ई बेला काल्ला कि पर्शी लणअ मुंह थोघ लाई कि मेरै बाबे दिलै किज़ै आसा। ज़ै मुखा ज़ाण्हिंए कि सह फिरअ ताल्है भलअ, तै दैंऊं ताल्है हुंह नढैऊऐ समाद। ज़ै मुखा ज़ाण्हिंए कि तेऊ आसा दिलै ताह मारने डाही दी, तै रही मेरी ताल्है ज़बान कि हुंह खोज़ूं ताखा आप्पै संघा काढूं ताह हुंह राज्ज़ी-राम्बल़अ बच़ाऊई। हुंह करा बिधाता सेटा एही अरज़ कि सह ताह संघै तिहअ ई रहे ज़िहअ मेरै बाबा संघै रहअ। ताल्है बी बोला हुंह ज़ीबाण करी कि ज़ेभै तैणीं आजू हुंह ज़िऊंदअ रहूं, तूह बी करै मुल्है आपणीं ज़बान पूरी अर तूह बी लोल़ी मुल्है तिहअ ई शुचअ-पाक्कअ रहअ। पर ज़ै हुंह मरी जाए, तिहअ ई मानदार रहै पिछ़ू मेरै टबरा लै बी। आजू ज़ेभै बिधाता तेरै सोभी दुशमणा खतम करे, तेभै बी लोल़ी तेरी-मेरी अह करार पाक्की रही। पर ज़ै तूह एता का हुधिए, तै लोल़ी बिधाता एते सज़ा आजू तेरी पोस्ती तैणीं दैनी।”
इहअ करै किई जोनातानै दाबेदा संघै भिई एकी-दुजै सोह खाई करै आपणीं साथ पाक्की। जोनातान झ़ूरा त दाबेदा लै खास्सअ ज़िहअ सह आप्पू लै झ़ूरा त। तेखअ बोलअ जोनातानै दाबेदा लै, “काल्ला पोर्ही हणअ पुनूंईओ थैर अर तिधी हेरनअ तेरै बारै पुछ़ी। किल्हैकि बैल़ी खाणें बगती हणअ तेरअ आसन रित्तअ किल्हैकि तूह ता एछणअ निं। पर्शी पल़णीं तेरी पुछ़ होर बी खास्सी। तूह डेओऐ तैहा ज़ैगा लै ज़िधी तूह एकी बारी पैहलै बी थिअ लुक्की रहअ द। तिधी रहै तूह एजेल नाओंए टोल्हा पिछ़ू लुक्की। तेता नेल़ एछी छ़ाडणअ मुंह एही एकी नशाणैं बाखा कतीर। मुंह बोल़णअ आपणैं दासा लै कि तेऊ कतीरा आण लोल़ी। तूह शूणैं ज़ै हुंह आपणैं तेऊ दासा लै इहअ बोले, ‘भाल़णीं दै कतीर आसा ताह पोर्ही बाखा पल़अ द तेऊ आण ओर्ही,’ तै समझ़ै तूह इहअ कि ताल्है निं किछ़ै खातरअ आथी अर तूह लागै मौज़ी ओर्ही एछदअ। हुंह काढा बिधाते सोह कि ताल्है निं किछ़ै बूरअ हणअ। पर ज़ै हुंह तेऊ दासा लै इहअ बोलूं, ‘पोर भाल़, पोर्ही डेऊ, कतीर आसा ताह आजू,’ तै समझ़ै तूह इहअ कि बिधाता च़ाहा ताल्है कि तूह डेओऐ तिधा का दूर अर तूह लागै तेखअ तिधा का हांढदअ। ज़ुंण ज़बान हाम्हां दूई मांझ़ै हुई, ऐहा गल्लो शाजत लोल़ी बिधाता सदा रहअ कि हाम्हैं एता पूरी करे।”
दाबेद रहअ दूर किधी खेचै लुक्की, पुनूंई धैल़ै आअ राज़अ शाऊल बैल़ी खांदअ, राज़अ शाऊल बेठअ भित्ती नेल़ आपणैं आसना दी ज़िधी सह बेशा त। तेऊ बाद बेठअ एकी बाखा अबनेर अर जोनातान बेठअ खाणें पलगा दी राज़ै सम्हनै दुजी बाखा। पर दाबेदे गाद्दी ती रित्ती। शाऊलै निं तैहा बैल़ी इहअ सोठी किछ़ै बोलअ, “किज़ू नां किज़ू करै हुअ होए दाबेद छ़ोतलअ, तैही निं सह आअ हणअ, ज़रूर हुअ हणअ किज़ै इहअ ई।” पुनूंईए दुजी धैल़ी बी रहअ दाबेदो आसन भिई रित्तअ, तेखअ लअ शाऊलै आपणैं शोहरू जोनाताना का पुछ़ी ई, “ईशैईओ शोहरू दाबेद नां थैरे भोज़ा करदअ हिझ़ थिअ नां आझ़ आथी! सह किल्है निं आअ होए?”
जोनातानै दैनअ शाऊला लै ज़बाब, “दाबेदै मांगी मुखा बेतलेम नगरी आपणैं घअरा डेऊंणा लै छ़ुटी। सह रहअ भिई-भिई बोल्दअ लागी, ‘ज़ीबाण, मुंह दै डेऊणैं, म्हारै खिंबे लोग करा हर साल हूम बल़ीदान। मेरै भाई आसा हुंह तेता लै ज़रूर शादअ द, ज़ीबाण, तूह दै मुंह घअरै आपणैं टबरा सेटा डेऊई एछणैं।’ तैही निं सह राज़े पलगा दी भोज़ करदअ एछी सकअ।”
शाऊल हुअ जोनाताना लै रोश्शै लाल-पिंऊंल़अ! तेऊ बोलअ इहअ, “तूह शोहरू हुअ द्रोही! तूह कै ज़ाणा मुखा थोघ निं आथी कि तूह च़ाहा ईशैईए शोहरू आपणीं ज़ैगा राज़अ बणाणअं, ताह शरम निं आथी! तेरी ईजे बी आसा बेइज़ती कि ताह ज़ेही लुआद किई पैईदा! ताखा इहअ बी निं ज़ाण्हदअ कि ईशैईए शोहरू दाबेदे ज़िऊंदी ज़िता निं तूह एऊ देशो राज़अ बणी सकदअ? ऐबै डेऊ, संघा आण तेऊ इधा लै, सह निं ज़िऊंदअ छ़ाडणअ आथी!”
जोनातानै दैनअ आपणैं बाब राज़ै शाऊला लै ज़बाब, “तूह आस्सा किज़ू तेऊ मारदअ लागअ द? तेऊ किज़ै बूरअ किअ?”
शाऊलै शोटअ रोश्शै आपणअ बर्छ़अ जोनाताना बाखा कि तेऊ लै बाहे। इहअ करै हेरअ जोनातानै ज़ाणीं कि मेरै बाबै आसा आपणैं दिलै पाक्की डाही दी कि दाबेद पाणअ तेऊ मारी ई। जोनातान उझ़ुअ खाणें पलगा का रोश्शा संघी खल़अ अर तेऊ निं तैहा पुनूंई दुजी धैल़ी रोटी खाई। दाबेदे बारै सोठी त सह खास्सअ दुखी किल्हैकि शाऊलो बभार त दाबेदा लै बेघै बूरअ। दुजै धैल़ै दोत्ती डेऊअ जोनातान दूर खेचै दाबेदा सेटा मिलदअ ज़िधी तिन्नैं पैहलै ई त बोली डाहअ द। आप्पू संघै निंयं तेऊ एक दास बी। तेऊ बोलअ आपणैं दासा लै, “तूह ठुर्ह, ज़ुंण मुंह कतीर बाहणअ तेऊ आणै तूह लोल़ी।” सह शोहरू ठुर्हअ अर जोनातानै छ़ाडअ कबाणा का तेऊ का खास्सअ आजू एक कतीर। ज़ांऊं सह शोहरू तैहा ज़ैगा पुजअ ज़िधी कतीर पल़अ थिअ, जोनातानै लाई तेऊ लै हाक्का, “पोर भाल़, कतीर आसा ताह आजू! इधी निं खल़्हुई रहै, पोर्ही डेऊ, छ़ेक्कअ कर!” तेऊ दासै आणअ सह कतीर च़ुंघी संघा आअ जोनाताना सेटा फिरी। तेऊ शोहरू का निं थोघ आथी त कि किज़ै हुअ। एता ज़ाणा तै सिधै जोनातान अर दाबेद। आपणैं अस्त्र-शस्त्र तेऊ दासा का दैई बोलअ जोनातानै कि इना पजैल़ नगरी दी बापस।
ज़ांऊं सह शोहरू तिधा का डेऊअ, दाबेद निखल़अ दखण दिशा बाखा तैहा टोल्हा पिछ़ू का ओर्ही संघा बेठअ ज़ान्हूंए सारै धरनीं, तेऊ टेक्कअ चिई बारी धरनीं माथअ। तेखअ लागै जोनातान अर दाबेद दुहै ज़ण्हैं लेरा लांदै अर एकी-दुजै लै मल़्हैची दैंदै, दाबेद लागअ जोनाताना का बी खास्सअ हिक्की-सल़िक्की लेरा लांदअ। तेखअ बोलअ जोनातानै दाबेदा लै इहअ, “राज्ज़ी-खुशी संघै डेऊ, बिधाता लोल़ी हाम्हां संघै सदा रहअ कि हुंह अर तूह, तेरी लुआद अर मेरी लुआद हाम्हां दूई मांझ़ै बिधाता शाजत मनी आपणीं ज़बान पूरी करे।” तेखअ लागअ दाबेद तिधा का हांढदअ अर जोनातान डेऊअ नगरी लै बापस फिरी।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.