Kulvi Outer Seraji Bible
1 शमूएल 17
पलिश्ती जोधअ गोलियाथ
तिन्नां धैल़ै झाल़ी पलिश्ती आपणीं सैना संघा हुऐ इज़राईली संघै जुधा लै यहूदा मुल्खे सोको नगरी संघा पाऐ तिन्नैं अपेस-दमीम नाओंए ज़ैगा डेरै ज़ुंण सोको अर अज़ेका नगरी मांझ़ै आसा। शाऊलै अर इज़राईली सैना बी पाऐ एलाह नाओंए खागै आपणैं डेरै संघा हुऐ पलिश्ती सैना संघै जुधा लै तैर। इहअ करै एकी बाखा धारा तै पलिश्ती अर दुजी बाखा धारा तै इज़राईली अर दुही मांझ़ै त गाडा सरली ज़ैगा।
पलिश्ती दला दी त गात नगरी का गोलियाथ नाओं दैंत्तर मर्ध खास्सअ शूरबीर कोई नौ फुट लाम्मअ। तेऊ दैनी इज़राईली लै मकाबलै करने धमकी। तेऊ हआ त मुंडै कांस्सैओ टोप, हिक्का हआ त कांस्सैओ हीकबंद बान्हअ द, सह हआ त कोई पौणै चअन मण पाक्कअ गर्कअ। ज़ांघा बी हआ तै तेऊ कांस्से ज़ांघबंद बान्हैं दै अर कान्हा हआ त तेऊ कांस्सैओ बर्छ़अ डाहअ द। तेऊए बर्छ़े डैंढी ती राछ़े लाठै ज़ेही मोट्टी अर आजू का बर्छ़ेओ लोहअ त कोई सात किलू गर्कअ। एक सपाही हआ त तेऊ आजू-आजू एक बडी ढाल़ा च़की हांढदअ लागअ द। गोलियाथ हुअ धारा आपणीं सैना आजू खल़अ संघा पाई इज़राईली सैना लै हाक्का, “तम्हैं किज़ू आसा पार जुधा लै कठा हुऐ दै? हुंह आसा भाल़ पलिश्ती मर्ध, तम्हैं आसा राज़ै शाऊले गलाम! आप्पू मांझ़ै छ़ांटा एक सोभी का खास्सअ ज़ोरा आल़अ मर्ध ज़ुंण मुंह संघै जुध करी सके। ज़ै सह मुंह मारी करै ज़िते, तै हणैं म्हारै सोभ लोग थारै गलाम, पर ज़ै हुंह तेऊ मारी पाऊं, तै लागणीं तम्हां म्हारै गलाम हई म्हारी च़ाकरी करनीं। आझ़ बोला हुंह तम्हां सोभी इज़राईली लै, ज़ै तम्हां हिम्मत आसा, तै बोला हुंह एक मर्ध छ़ाडा ज़ुंण मेरअ मकाबलअ करी सके!” ज़ांऊं शाऊल अर इज़राईली तेऊ पलिश्ती जोधे ईंयां गल्ला शूणीं, तिन्नैं चोल़अ आपणअ हैअ ई अर तिन्नां पल़ी भितरी खास्सी डअर।
दाबेद डेऊअ शाऊले डेरै जैंदरी
दाबेद त एप्राती टोली का ईशैई नाओंए मणछो शोहरू। सह रहा त यहूदा मुल्खै बेतलेम नगरी। ईशैई थिऐ आठ शोहरू, अर सह गअ त खास्सअ प्रोढअ हई ज़धू शाऊल राज़अ त। ईशैई चअन ज़ेठै शोहरू तै शाऊले सैना दी जुधा लै डेऊई गऐ दै। सोभी का ज़ेठै नाअं त एलीआब, तेऊ कान्हैं नाअं त अबीनादाब अर चिऊथै नाअं त शमाह। दाबेद थिअ सोभी का कान्हअ शोहरू, ज़ेठै चअन शोहरू तै शाऊला संघै डेऊई गऐ दै, तैही लागा त दाबेदा मांझ़ै-मांझ़ै बेतलेम नगरी आपणैं बाबे भेडा-बाकरीए हेल़्ही हेरा-सभाल़ा डेऊई करनअ संघा लागा त शाऊले डेरै लै फिरी एछणअ।
सह पलिश्ती गोलियाथ करा त धैल़ दोत्ती अर उडै इज़राईली लै हाक्का पाई, “ज़ै हिम्मत आसा, तै करा मेरअ मकाबलअ।” इहअ ई करै हुऐ कोई च़ाल़्ही धैल़ै।
एकी धैल़ै बोलअ ईशैई आपणैं कान्हैं शोहरू दाबेदा लै, “तूह निंऊं मण पाक्कअ भुज़अ द नाज़ अर इना दस रोटी आपणैं भाई लै तिन्नें खिम्भे दला दी एभी ठुर्हदा। पनीरे ईंयां दस टिक्की बी निंऊं, इना दै तिन्नें दले दलपति लै। संघा एछै आपणैं भाई भाल़ी कि तिंयां किहै आसा, फिरदा आणै ऐहा गल्ले नशाणी बी ज़ेता करै हुंह इहअ ज़ाणूं कि तिंयां आसा राज्ज़ी-राम्बल़ै। तिंयां तेरै भाई, राज़अ शाऊल अर सारी इज़राईली सैना आसा एला खागै पलिश्ती संघै जुधा लै डेरै पाऐ दै।”
दाबेद उझ़ुअ दुजै धैल़ै दोत्थी, आपणीं भेडा-बाकरीए हेल़्ही डाही तेऊ कहा होरी का सभाल़ी, आप्पू लागअ ज़िहअ ईशैई बोलअ थिअ, तिन्नां खाणैं-पिणें च़िज़ा च़की हांढदअ संघा पुजअ तैहा ज़ैगा सिऊंआं ज़िधी इज़राईली जुधा लै कठा तै हुऐ दै अर जुधे हाक्का ती लागी दी। पलिश्ती अर इज़राईली सैना ती आर पार स्मोहरी लगैग लाई खल़्हुई दी। दाबेदै दैनी तिंयां खाणें च़िज़ा तेऊ का ज़हा का सैना लै खाणैं पिणें ज़िम्मैंबारी थिई, आप्पू ठुर्हअ सह तैहा ज़ैगा सिऊंआं बाखा लै ज़िधी जुधा लै सैना ती खल़ी। तिधी पुजी पुछ़ै तेऊ आपणैं भाई राज्ज़ी-राम्बल़ै। दाबेद त आपणैं ज़ेठै भाई संघै गल्ला लागअ द, तेतरी गअ गात नगरीओ गोलियाथ पलिश्ती जोधअ पारा बाखा धारा आजू निखल़ी इज़राईली लै भिई हाक्का पाई तिहअ ई बोल्दअ लागी, दाबेदै शूणीं तेऊए गल्ला पठी कि सह किज़ै बोला। ज़ांऊं इज़राईली गोलियाथ भाल़अ, तिंयां लागै डरै तेऊ भाल़ी दूर ठुर्हदै। इज़राईली बोला तै एकी-दुजै लै इहअ, “एऊ भाल़ा! अह एछा हर धैल़ै इज़राईले बेइज़ती करदअ! राज़ै शाऊलै आसा तेऊ मणछा लै बडी नांम डाही दी ज़ुंण एऊ मारे! आपणीं शोहरीओ बैह बी करनअ राज़ै तेऊ ई संघै अर राज़ै करनअ सारी अमरा लै तेऊए टबरो कारअ माफ।”
दाबेदै पुछ़अ तिन्नां सपाही का ज़ुंण तेऊ नेल़ तै खल़्हुऐ दै, “एऊ पलिश्ती मारनै अर इज़राईला बेइज़त करनै का एऊ रोक्कणै आल़ै किज़ै भेटणअ? अह पलिश्ती ज़सरअ खतैर निं आथी हुअ द, अह आप्पू किज़ै समझ़ा? अह कुंण हआ ज़िऊंदै परमेशरे सैना लै सुहांगा करदअ!” तिन्नैं खोज़ी दाबेदा का तिंयां गल्ला कि ज़ुंण गोलियाथा मारे, तेऊ लै दैणअ राज़ै इहअ-इहअ।
दाबेद त तिन्नां संघै गल्ला करदअ लागअ द अर तेऊओ ज़ेठअ भाई एलीआब त शूणअ लागअ द। तेऊ आई दाबेदा लै रोश्शै संघा बोलअ इहअ, “तूह किज़ै करा ला इधी? थोल़ी ज़ेही भेडा-बाकरीए हेल़्ह बी तेरै भाल़्हुई निस्सी, तिंयां कहा सेटा डाही तंऐं रेगीस्तानै छ़ाडी? मुखा आसा थोघ कि तेरै दिलै केही खोट आसा! तूह च़ाहा सिधअ जुध भाल़णअ!”
दाबेदै बोलअ, “ऐबै मंऐं कै किअ? हुंह एक गल्ल बी पुछ़ी निं सकदअ?” तेखअ फिरअ दाबेद दुजै सपाही बाखा संघा पुछ़ी तेऊ का सह ई गल्ल, ज़ेतरी बारी तेऊ ज़हा का बी सह सुआल पुछ़अ, तिन्नैं दैनअ तेऊ लै सह ई एक्कै ज़बाब कि राज़ै आसा इहअ-इहअ बोलअ द।
तिन्नां मांझ़ै शूणअ कई कि दाबेद किज़ै बोला अर तिन्नैं खोज़ी तिंयां गल्ला राज़ै शाऊला का। शाऊलै शादअ दाबेद आप्पू सेटा। दाबेदै बोलअ शाऊला लै, “माहा राज़अ, तेऊ पलिश्ती मणछा पिछ़ू निं लोल़ी कोही हैअ चोल़अ! हुंह तेरअ दास डेऊं तेऊ संघै जुधा करदअ।”
शाऊलै दैनअ दाबेदा लै ज़बाब, “तूह किहअ करै सका तेऊ पलिश्ती जोधै संघै जुध करी? तूह आसा अज़ी होछ़अ अर सह आसा होछ़ी उझै शूरबीर जोधअ।”
दाबेदै बोलअ शाऊला लै, “हुंह हआ बाबै भेडा-बाकरी फुआल डाहअ द। कई बारी निंयां सिह अर भाल्लू मेरी हेल़्ही का होछ़ै चैणैं च़की, हुंह डेओआ तिन्नां पिछ़ू संघा आणा हुंह आपणैं चैणैं तिन्नें खाखा का छ़ड़ैऊई। ज़ै सिह अर भाल्लू मुंह खांदै फिरै, तै ढाका हुंह तिन्नां कुकल़ी का संघा पाआ हुंह तिन्नां मारी। हुंह आसा भाल़ तेरअ दास ज़ुंणीं कई सिह अर भाल्लू तोही मारै, सह पलिश्ती ज़सरअ खतैर निं आथी हुअ द, सह बी मारनअ मुंह इहअ ई। किल्हैकि तेऊ दैनी ज़िऊंदै परमेशरे सैना लै मकाबलै करने धमकी। ज़ै बिधाता हुंह सिह अर भाल्लू का बच़ाऊअ, तेऊ हेरनअ हुंह एऊ पलिश्ती का बी बच़ाऊई।”
शाऊलै बोलअ दाबेदा लै, “ठीक आ, तै डेऊ, बिधाता लोल़ी ताह संघै रहअ।”
शाऊलै बन्हैऊंअ दाबेदा लै आपणअ सुआब, मुंडै दैनअ कांस्सैओ टोप हीकबंद संघी राज़ैओ च़ोल़अ। तेखअ बान्हीं दाबेदै कुछी बाखा शाऊले तलबार अर तेखअ लागअ हांढी करै भाल़अ, पर तेऊए निस्सअ तेऊ सभाबा दी हांढुई ई, किल्हैकि तिहअ निं तेऊ तधू तैणीं बान्हअ ई आथी त। तेखअ बोलअ दाबेदै राज़ै शाऊला लै, “हुंह निं एऊ सभाबा बान्हीं जुध करी सकदअ, मुंह निं एतो भैस्स आथी।” तेखअ खोल्है दाबेदै तिंयां झिकल़ै पोर्ही। दाबेदै च़की आपणीं फुआला बणें शोठी संघा होथअ उंधै गाडा लै, गाडा का च़कै तेऊ पांज़ च़िफलै गोल़ पात्थर संघा डाहै काछ़ा बाखा आपणैं थैल्लू दी। दुजै हाथै च़की पात्थरै बाहणें फर्णैक्की संघा डेऊअ गाडा पार एक्कै ज़ण्हअ पलिश्ती गोलियाथा बाखा।
दाबेदै मारअ गोलियाथ
पलिश्ती जोधअ गोलियाथ बी लागअ हांढदी-हांढदी दाबेदा नेल़ एछदअ, तेऊ आजू-आजू त बडी ढाल़ च़की एक सपाही हांढदअ लागअ द। ज़ांऊं नेल़ पुजी पलिश्ती गोलियाथै दाबेद भाल़अ, दाबेद त अज़ी लान्हअ ई, सह लागअ तेऊए सुहांगा करदअ किल्हैकि दाबेद त लान्हअ ई हेरनअ बित्तअ अर अज़ी निं तेऊए थोथरा का लालगी बी डेऊई ती! पलिश्ती गोलियाथै बोलअ दाबेदा लै, “तंऐं किज़ू आसा हाथै शोठी आणी दी? तंऐं कै हुंह कुक्कर समझ़अ?” तेखअ लागअ गोलियाथ आपणैं देअआ-देबीए नाओंऐं दाबेदा लै गाल़ी दैई फिटक दैंदअ। पलिश्ती जोधै बोलअ दाबेदा लै, “एछ, एछ तूह ओर्ही! तेरी शिखा खैऊंणी मुंह सरगै डैऊंदै शकारी च़ेल्लू-पखीरू अर बणें शकारी ज़ीबा का।”
दाबेदै दैनअ पलिश्ती गोलियाथा लै ज़बाब, “तूह आसा मुंह संघै जुधा लै तलबार, बर्छ़ै अर कटार पाई आअ द, पर हुंह आअ तेऊ स्वर्गे सारी सैने मालक बिधाता नाओंऐं ज़हा का सारअ बल आसा, ज़ुंण सारी इज़राईली सैनो परमेशर आसा, तंऐं आसा तेऊ ई लै मकाबलै करने धमकी दैनी दी। आझ़ दैणीं ऐहा धैल़ी बिधाता मुल्है ताह प्रैंदै ज़ीत। तूह बदल़णअ मुंह धरनीं संघा पाणअ तेरअ कैल़अ काटी। आझ़की धैल़ी दैणीं मुंह पलिश्ती सैने ल्हासा सरगै डैऊंदै च़ेल्लू-पखीरू अर बणें ज़ीबा खाणां लै। तेखअ लागणअ सारै संसारा का थोघ कि इज़राईला दी आसा एक्कै परमेशर। इधी बी जाणअ सोभी का थोघ लागी कि जुधा ज़ितणा लै निं बिधाता तलबार बर्छ़े ज़रुरत हंदी। अह जुध आसा बिधातो अर तेऊ ई करनअ तूह मेरै बशै।”
पलिश्ती जोधअ गोलियाथ लागअ दाबेदा मारना लै आजू हांढदअ अर ओरा बाखा बाही दाबेदै तेऊ बाखा लै ठुहर। दाबेदै काढअ आपणीं काछ़ा बाखा थैल्लू का एक पात्थर संघा लाअ आजू फर्णैक्की दी। तेऊ लाअ फर्णैक्की फरेऊई करै पलिश्ती गोलियाथे माथै इहअ ज़ोरै नशाणअ कि पात्थर खुभअ माथै भितरी अर गोलियाथा बुल़्हअ फर्नैक्कअ धरनीं उटी बाखा। इहअ करै हारअ दाबेदै पलिश्ती जोधअ गोलियाथ फर्णैक्की करै एक्कै पात्थरै बाही! दाबेदा का नांईं ती तलबार आथी, दाबेद ठुर्हअ झ़ट-पटै संघा खल़्हुअ गोलियाथा प्रैंदै तेखअ घिशी तेऊए ई कुछी तलबार संघा बाही तेऊए कैल़ै अर तेऊओ मूंड काटी किअ सह मारी च़ित्त।
ज़ांऊं पलिश्ती भाल़अ कि तिन्नों जोधअ हेरअ मारी अर तिंयां ठुर्है तिधा का। इज़राईली अर यहूदी पाई ज़ोरै-ज़ोरै हाक्का-क्रुंगा संघा ठुर्है पलिश्ती मारदै पिछ़ू, तिंयां दरल़ाऊऐ गात नगरीए सिऊंआं अर अक्रोन नगरी तैणीं। शारेम पोर्ही गात अर अक्रोन तैणीं पल़ी बाता पलिश्तीए खास्सी ल्हासा। ज़ांऊं पलिश्ती पिछ़ू पल़ै दै इज़राईली बापस फिरै, तिन्नैं लुटै तिन्नें डेरै सारअ समान पठी। दाबेदै आणअ पलिश्ती जोधै गोलियाथो मूंड एरुशलेम नगरी लै, पर तेऊए अस्त्र शस्त्र डाहै तेऊ आपणैं डेरै।
दाबेद हुअ शाऊला सेटा पेश
ज़ांऊं दाबेद पलिश्ती जोधै गोलियाथा संघै जुधा लै डेऊंदअ त लागअ द, शाऊलै पुछ़अ इज़राईली सैनापति अबनेरा का, “अबनेर, अह कसरअ शोहरू आसा?”
अबनेरै बोलअ, “माहा राज़अ, तेरै सोह हुंह निं एऊ बछ़ैणदअ आथी।”
शाऊलै राज़ै बोलअ, “पुछ़णी दै अह कसरअ शोहरू आसा।”
ज़ांऊं दाबेद गोलियाथा मारी डेरै लै बापस फिरअ, सैनापति अबनेरै निंयं सह शाऊला सेटा लै। पलिश्ती गोलियाथो मूंड त दाबेदे हाथै। शाऊलै पुछ़अ दाबेद, “ज़ुआन शोहरूआ, तूह कसरअ शोहरू आसा?”
दाबेदै दैनअ ज़बाब, “हुंह आसा बेतलेम नगरी का तेरै दास ईशैईओ शोहरू।”
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.