युहन्ना

यूहन्नाले लेखेको सुसमाचार

युहन्नाये ओसोरो चाव सोर

कितापलाई सरेःने

आव साःरौ न्यामला चार गोटा कितापरंकामटा टोबो ची। जोये येसु मसिहलो उजीबनलो ओबारेलं बर्नन डोवये। नो भरिलाई स्यान्टैलाई गोस्पल हैवार्सिये। नोलो ओमाने चाव सोर टाये। आव कितापरं येसु ओनाव छिन्डे मत्ती, मर्कुस, लुका सोनो युहन्नाराई यासोरो ची। युहन्नाये ओसोरो चाव सोर, येसु ओजर्मीवकाम ठोकै ९० साल छिन्डे युहन्नाये ओसोरो ची। आव कितापटं सर्सिव माले, हैनि पनि किताप सर्ने ओतरिका युहन्नालो पैला, डोस्रा सोनो तेस्रा उचिठीसं भ्याबिछु मिलिये। कोइ डोङ्का किताप सर्ने मीराई याबिचार अनंसार युहन्ना एफिसंसला सहरलं उलिज़्याव। हैजैडे आव किताप एफिसंसलं सर्सिव टाव ढुव।

युहन्नाये चावसं बुझैडेज़ हैवार्डेले आव कितापये हैवार्ने ओपान्ज़्याव रोः आवज़, मीरंलाई ऐटाव बिस्वास डाने सायटा डोवये कि येसुज़ मसिह ची, होसोनो येसुज़ ज्युङडा परमेस्वरलो ओज़ाची। ऐटाव बिस्वास डोकं येसुलो उमिनङाम गे जीबन गेडैये। आव किताप यहुडी सोनो उरु स्यान्टै मीराई यापरिःनेलो लागिटं सर्सिव ची। युहन्नाये ओसोरो चाव सोर उरु सोम्बऱ्याङ चाव सोररंकाम जामा छुटं ले। युहन्नाये येसुये ओपाङो सात्रोटं माङ्क बुरु येसुये ओडोव अचम्बला येःनटं जोर डोवये। येसुलो बप्तिस्मा सोनो उपरिछ्या स्यानाव मुख्या येःनलो ओबारेलं पनि युहन्नालो आव चाव ओसोरटं सर्सिव माले।

आव ज्युङला बिसयेरं

१. युहन्नाये चाव सोर ओठालिव

२. होकाम येसुये ओडोव बनै भ्या अचम्बला येःनराई याबारेलं सर्डेनोयो।

३. होकाम नोये येसुलो उजीबनला स्यान्टै घटनाराई याबारेलं सर्डेनोयो। जोये येसुलो उसिने सोनो फरि ज्युङडा ओटानेलो ओबारेलं हैवार्ये।

४. युहन्नाये उकिताप सर्ने २१ अड्यालं खेमोये। नलं येसुलो सिडे ज्युङडा ओटाने बारेलं सोनो येसुये कै-कै झैडे डर्सन ओयोव आवलो उडारनलो लागिटं टोबो घटनालो ओबयान डोवये होसोनो उकितापये ओपैज़्याव रोः हैवार्ये।