Skip to content
BibleKenya

Wale Magar Kham

युहन्ना 12

बेठानियालं येसुलो पैला अभिसेक

मत्ती २६:६-१३; मर्कुस १४:३-९

निस्तार पर्बलो छ डिन ओङाःडेज़ येसु बेठानियालं ओराव। येसुये सिवलाम ज्युङडा ओझोयो लाजरस नलं लेये। नोराई येसुलो ओलागिटं रिःम्डेका ज़्याव तयार याजोयो। मार्ठाये ज़्याव ओभाज़्याव, लाजरस पनि येसु सोनो उसिसरासं बोलोङ चुङसिडे ओज़्योज़्याव। होकाम मरियमये टमानाया बनै मङगो जटामसीलो मङ-मङ बसैने ठी रैडे येसुलो ओखङटं उठिड्योव, होसोनो येसुलो ओखङ ओचेमये सिडेओयोव, होकाम ठीलो ओबासनाये ज़ीःमज़ मङ-मङ ओबासिव। येसुलाई सक्योःने येसुलो टोबो उसिस, यहुडा इस्करियोतये हैओवारो, “आव ठी सोङसय चान्डीलो ढ्याकलं येडे नो पैसा गरिबरंलाई यारंखिन माटारो?” नोये गरिबराई याख्यालं डाडे हैओवारो माङ्क, कडावार्क नो चोर लेव, होकाम पैसा नैने ठैलीलो जिम्मा नोलो उकुइटं लेव, नोये नलाम कुवये।

येसुये हैओवारो, “आवलाई कैज़ टाडाच्यो, ङा ङासिका ठिने ठी आर्कज़ ठिसङज़्याव ठिव याच्यो। कडालेकं गरिबरं के एकसप्ड्याज़ जेसंज़ लेरं, ङा के एकसप्ड्या जेसं ङाम्ले।”

लाजरसलाई सैःने योजना

यहुडीराई टोबो घ्योव यासमुहये येसु नलं लिज़्या वार्ने ठा यासोनो, होकाम येसुलो ओलागिटंया मान्त्रा माङ्क, येसुये सिवलाम ज्युङडा ओझोयो लाजरसलाई पनि रःङने वार्डे नोरं राडेयालिज़्याव। हैजैडे मुख्या सेवा डोने मीराई लाजरसलाई पनि सैःने सल्ला याडोव। कडालेकं नोलो ओकारनये भ्या यहुडीरं छुटिडे नाडे येसुलाई बिस्वास याडोव।

यरुसलेमलं येसु राजा मान्टि ओनाव

मत्ती २१:१-११; मर्कुस १1:१-११; लुका १९:२८-४०

ओपराटि पर्बला राने माहुले मीराई येसु यरुसलेमडे राज़्या वार्ने याठोयो, होकाम मीरं येसुलाई ओमान डाडे ढन्याबाड याडे खजुरलो ओखाररं रैडे किःये-किःये याराव, “होसन्ना! रेङो नो घ्योव प्रभुलो उमिनङाम राःने इस्राएलला राजा!”

होकाम टोबो बाभाका माडाहिसिव गडाहा डैडे येसु होटं उपुलुव, ऐटाव सर्सिवले,

“सियोनला सहर, टाछेङंन।

गरःङके नराजा गडाहालो ओज़ा

चेब्डे राज़्या।”

आव रोः येसुलो उसिसराई ङाःडेके माबुझिरंये। येसुलो ओमहिमा ओटाव पाना आव रोः येसुलो ओबारेलं सर्सिव ची ओलेव, होसोनो आव येःन येसुलो ओलागिटं नोराई याडोव ची वार्ने नोराई याबुझिव।

येसुये लाजरसलाई खाडरलाम खुल्डे सिवलाम ज्युङडा ओझैज़्याकं येसुसं लेव माहुले मीराई येसुये कडि-कडि येःन ओडोव हो यहुडीरंकाम उरुका मीरंलाई हैयाडोवरं। येसुये ऐटाव चिन्न डाडेनोयो वार्ने याठोयोये पनि माहुले मीराई येसुलाई डैने यानाव। होकाम फरिसीरं या-याज़ टोबोये छुटंलाई हैयाडोव, “आबो, जेलेवङाम कडिज़ टाने माले। जेरःङज़्या, प्रिठीबीला स्यान्टै मीरं नोलो उझिन्ट यानाडुरं!”

कोइ-कोइ ग्रीक मीरं येसुसं याडैसिरिव

पर्बटं परमेस्वरलो ओआराढना डाने नानेरं कोइ-कोइरं ग्रीकरं पनि लेवरं। नोरं गालीलला बेठसेडालं फिलिप लेवकं राडे ऐ वार्डे बिन्ती याडोव, “अँ प्रभु, गे येसुसं डैसिने गेवार्ज़्या।”

फिलिपये नाडे अन्ड्रियासलाई हैओडोव, होकाम अन्ड्रियास सोनो फिलिपनि नाडे येसुलाई हैनेडोव। येसुये नोनिलाई जबाफ ओयोवनि, “मानवालो ओज़ालो ओमहिमा टाने बेला केरिडेले। सत्य रोः ङा जेलाई हैङाडाच्यो, पिमालो उढुर नामलं टेःडे मासिखे भने नो टोबोज़ाज़ रहिये। नो यासिखे भने नोये भ्या ओसै झावये। उज्युलो मया डानेये उजीबन नास झोयोये, उज्युलाई आव प्रिठीबीलं मया माडानेये खर्कज़ मासिने जीबनलो लागिटं चावसं नैेनेले कोइये ङासेवा याडोव भने नो ङाछिन्ट ओराकं होसोनो ङा जोङ ङाले, ङासेवा डोने मी पनि होङंज़ लेनेले। कोइये ङासेवा याडोव भने बाबुये नोलो ओमान नैड्यानेले।”

येसुये ओल उसिने बारेलं हैओवारो

“आबो आव ङायुङ छेडे आटिज़्या, ङा कै वार्ने कै वार्ने ङाटाज़्या, ‘ए बाबु, ङालाई आव समयलाम जोगैसङ ङावार रो?’ माङ्क, आव डुखं डैने वार्डेज़ ङा आव सङसारलं राडेङाले। ए बाबु, नङ नमिनलो ओमहिमा डो।”

होकाम स्वर्गटाम ऐटाव पाङसिज़्याव गा ओठोयो, “ङा नो महिमा डाडेङानै, होकाम फरि डानेङाले।”

नला लिज़्याव मीराई आव रोः ठैडे ऐयावारो, “आव नम उगर्जिज़्याव ची!” उरुराई हैयावारो, “स्वर्गटा कटंवाल नोसं ओपाङज़्याव ची!”

येसुये नोरंलाई जबाफ ओयोवरं, “आव गा ङालागिटं ओराव माङ्क, जेलागिटं ची। आबो आव प्रिठीबीलाई निया टानेले। आव प्रिठीबीला सेःर ख्यासिनेले। जो बेलाकं ङा प्रिठीबीलाम ङाछेन्सी, ङा स्यान्टै मीरंलाई ङालेवडे सेःलनेरंङाले।” येसु खैटाव टाडे सिने, हो चिन्न यानेरं लागिटं येसुये ऐओवारो।

माहुले मीराई येसुलाई यापजोयो, “ख्रीस्टके एकसप्ड्याज़ ज्युङडा टानेले वार्ने गे न्यामटाम ठैडेगेनै। नङ कैजैडे हैनवार्डु, मानवालो ओज़ा छेन्सिवज़ परि? आव मानवालो ओज़ा काङ्का?”

येसुये नोरंलाई हैओडोवरं, “अजं जामा समं ज्योती जेसं लिज़्या। ज्योती जेसं ओलेव समं आडेहोडे बाच्यो, कडालेकं अन्ड्यारोये जेलाई टाकपच्योवकं। कोइ अन्ड्यारोलं याबा भने, नोये ङा कान्डे ङानाज़्या, वार्ने ठा मासोनो। जोका समं ज्योती जेसं ले ज्योतीलाई बिस्वास डाच्यो, होसोनो जे ज्योतीला मीरं टाच्यो।”

मीराई येसुलाई बिस्वास यामडोव

आढङ ओपाङो पान्त्रा येसु ओनाव होकाम नो मीरासं मोःसिडे ओलेव। येसुये नोराई याङाःकं बनै भ्या एटानाव अचम्बला चिन्नरं ओसोटोनो, हैओटानि पनि नोराई येसुलाई बिस्वास माडोरंये। कडालेकं यसैया अगमबक्तालो ओबचन पुरा ओटाव,

“ए घ्योव प्रभु, गे हैगेडोवरं सोरटं काङ्काये बिस्वास ओडोव ड?

होसोनो स्यान्टैराई भन्डा घ्योवलो ओपाखुराटा ओसा काङ्कालाई ओसटनो ड?”1

हैजैडे नोराई बिस्वास माडोरंये, कडालेकं यसैयाये फरि ऐवार्डे ले,

“परमेस्वरये नोराई यामिलङ मारःन्ने झैडे नैड्योवरं,

होसोनो नोराई यायुङ खाव झैडे नैड्योवरं।

हैजैडे नोराई यामिलङये टारःङरंकं,

होसोनो याडिमाकये टाबुझिरंकं,

मानि नोरं वोल्ने लेरं,

परमेस्वरये हैवार्डेले होकाम ङा नोरंलाई ससोमो ङाढु।”

यसैयाये आव रोः हैओवारो, कडालेकं नोये येसुलो ओमहिमा ओरोःङो होसोनो येसुलो ओबारेलं हैओवारो।

हैटानि पनि भ्या यहुडीराई याअगंवाराई येसुलाई बिस्वास याडोव, बुरु फरिसीराई सेवा डोने ज़ीःमलाम पुलैसिरं सै वार्ने याछ्यासैये नो काङ्कालाई पनि हैमाडोरंये। कडालेकं परमेस्वरङाम डैसिव महिमा भन्डा मीरं लेवङाम डैने महिमालाई नोराई भ्या मया डोरंये।

येसुये एकसप्ड्याज़ निया डोवये

येसुये कस्सिडे किःडे हैओडोवरं, “ङालाई बिस्वास डानेये ङालाईयाज़ माङ्क ङालाई परिःङनेलाई बिस्वास डोवये। जोये ङालाई रःङसोङो होये ङालाई परिःङनेलाई पनि रोःङोये। ङा प्रिठीबीलं ज्योती टाडे ङाराव ची, कडालेकं ङालाई बिस्वास डाने अन्ड्यारोलं टारंहिकं। जोये ङापाङ ठैडे पनि मामानिव, ङा नोलो ओनिया ङाम्डो। कडालेकं ङा प्रिठीबीलो ओनिया डाने ङाराव माङ्क, प्रिठीबीलाई जोगैने ङाराव ची। ङालाई मामानिने सोनो ङापाङ माठैनेराई यालागिटं टोबो निया डाने मी ले। ङा ङापाङो बचनयेज़ आखिरला डिनलं नोराई यानिया डानेले। कडालेकं ङा ङाज़ ङापाङज़्याव माङ्कची, ङा कैवार्ने, सोनो कडि पाङने, हो ङालाई परिःङने बाबुये ङालाई आग्या याङोये। ङा ङासंन, बाबुलो ओपाङ खर्कज़ मासिने जीबन ची। हैजैडे ङा जो ङापाङ, बाबुये ङालाई ओयाङो आग्याज़ ङापाङये।”

Source notes (1)
  1. Cross-reference यसैया ५३:१

Wale Magar Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.