Wale Magar Kham
युहन्ना 21
येसु सात जना उसिसराई याङाःकं ओसंतन्सिव
होकाम तिबेरियास समन्डरलो ओगोराटं उसिसराई याङाःकं येसु ओसंतन्सिव। येसुये ओललाई ऐजैडे टखेप फरि ओसोटोनो। सिमोन पत्रुस, डिडुमस वार्ने ठोमा, गालीलला काना नाङखारला नठानेल, जब्डियालो नेबऱ्याङ ओज़ानि होसोनो उसिसरंकाम नेबऱ्याङनि टोबोकं लेवनि। सिमोन पत्रुसये नोरंलाई हैओडोवरं, “ङा ङाः सैःने ङानाज़्या।” नोराई नोलाई हैयाडोव, “गे पनि नङसं गेरा।” नोरं नाडे डोङ्गाटं यापुलुव, नो रिलं नोराई कडिज़ माक्योरंये। उज्यालो ओटारिज़्याकं, येसु समन्डर गोराटं च्याङसिडे उलिज़्याव। येसुलो उसिसराई नो येसुज़ वार्डे मासरेरंये। येसुये नोरंलाई हैओडोवरं, “ढापा मीरं, जेसं टिगिडा ङाः लिज़्या रो?”
नोराई येसुलाई जबाफ यायोव, “माले।”
येसुये नोरंलाई हैओडोवरं, “जाल डोङ्गाकाम वोःरडे ख्याच्यो, होकाम डैने जेले।” होकाम नोराई जाल याख्याव, ङाःरं बनै भ्या यापरिवये नोराई जाल मासेल्डुरंये।
येसुये मया ओडोज़्याव उसिसये पत्रुसलाई हैओडोव, “नो के प्रभु ची ओलेव लेव।” “नो प्रभुज़ ओलेव लेव” वार्ने ठैडे सिमोन पत्रुस ओतर्टा ओक्वा ओवाङलं ओपोव, कडालेकं नोये ओक्वा पिःडे ओनैज़्याव, होकाम समन्डरलं फालओजाव। उरु उसिसरं डोङ्गाटंज़ चुङडे ङाःये ब्यालो जाल सेःल्डे यारोयो। नोरं समन्डर गोराटाम भ्या टाडाके माङ्क, ठोकै टसय मिटरया लेव। नोरं ओगोराटं याझरिवपाना नोराई मेःलो भुभुरालं ङाः हिप्सिव सोनो बरे यारोःङो। येसुये नोरंलाई हैओडोवरं, “जे बाभा जेक्योव ङाः टिगिडा गरैच्योके।”
होकाम सिमोन पत्रुस डोङ्गाटं पुलुडे टसय त्रिपन्न गोटा घ्यो-घ्योव ङाःराई ब्यालो जाल पाखाटं सेःल्डे ओरोयो, आडङ भ्या ओटानि पनि जाल माचीये। येसुये नोरंलाई हैओडोवरं, “राडे गकैच्योके।” उसिसरंकाम काङ्काये पनि “नङ काङ्का?” वार्डे पजैने आँट माडोरंये, कडावार्क नोराई नो प्रभुज़ वार्डे यासोनो। येसु राडे बरे रैडे नोरंलाई ओयोवरं, होसोनो ङाः पनि ओयोवरं।
सिवलाम ज्युङडा टाडे ओसोव छिन्डे येसु उसिसराई लेवकं ओसंतन्सिज़्याव आव तेस्रा पाला लेव।
येसु सोनो पत्रुस
नोराई ज़्याडे याखेमो पाना येसुये सिमोन पत्रुसलाई हैओडोव, “युहन्नालो ओज़ा सिमोन, कडा नङ आवराई भन्डा भ्या मया नडाङ रो?”
नोये हैओवारो, “अँ प्रभु, नङज़ नसन, ङा नङलाई मया ङाडान।”
येसुये नोलाई हैओडोव, “ङापाठारंलाई ज़्याव योरं।” येसुये फरि टखेप नोलाई हैओडोव, “युहन्नालो ओज़ा सिमोन, कडा नङ ङालाई मया नडाङ रो?”
नोये येसुलाई हैओडोव, “अँ प्रभु, नङ नसनये, ङा नङलाई मया ङाडान।”
येसुये नोलाई हैओडोव, “ङाभेडारंलाई रःङरं।” येसुये नोलाई फरि सोङ्खेपका पनि हैओडोव, “युहन्नालो ओज़ा सिमोन, कडा नङ ङालाई मया नडाङ रो?”
पत्रुस डुखि ओटाव, कडावार्क येसुये नोलाई सोङ्खेपका पनि नोलाई “कडा नङ ङालाई मया नडाङ रो?” हैओडोव। नोये येसुलाई हैओडोव, “प्रभु, नङ स्यान्टै रोःज़ नसनये। ङा नङलाई मया ङाडान वार्डे नङलाई ठाले।”
येसुये नोलाई हैओडोव, “ङाभेडारंलाई ज़्याव ओँव योरं। डस्साज़, ङा नङलाई हैङाडान, जोकं नङ ढापा नलेव नङ नङज़ नवाम्फो नपोसिये, होसोनो जोङ नमन लागि होङ ननाये। नङ बड्डा टानेनले, होकं नङ नकुइ पलाडे सहयोग निःने नले, होकाम उरुराई नवाम्फो पोड्याने लेरं, होसोनो जोङ नाने नुयुङ माले होङ लाङने लेरं।” “खैटाव किसिमये पत्रुस सिडे परमेस्वरलो ओमहिमा डानेले, नोलो लागिटं येसुये आव हैओवारो।” आडङ हैवार्डे येसुये नोलाई हैओडोव, “ङाछिन्ट राङन।”
येसु सोनो छुटं उसिस
पत्रुसये उझिन्डे वोल्डे ओरःङकं येसुये मया ओडोज़्याव येसुलो उसिस उछिन-उछिन ओराज़्याव ओरोःङो। नोयेज़ रिम्डेका काङ ज़्याने बेलाकं येसुलो ओछातीटं अडैसिडे, “प्रभु, नङलाई सक्योःने काङ्का?” वार्डे ओपजोयो। नोलाई रःङडे पत्रुसये येसुलाई हैओडोव, “प्रभु, आवलाई कैटा?”
येसुये पत्रुसलाई हैओडोव, “ङा ङामराया समं नोये ओकेनसोङोकं वार्ने ङायुङ ओलेनि पनि नङलाई कैओटाव ड? नङ ङाछिन्ट राङन।”
हैजैडे नो येसुलो उसिस मासि वार्ने रोः नोराई याभाइराई याखार्ल ओफैलिव। येसुये नो मासि वार्डे हैओवारो माङ्क, “ङा ङामराया समं ओकेनसोङोकं वार्ने ङायुङ ओलेनि पनि नङलाई कैओटाव ड?” हैओवारो।
आव नो येसुलो उसिसज़, जोये आव रोः हैवार्डे गोहाइ योज़्याव, नोये आव रोः सर्डेनोयो, होकाम गे गेसन नोलो ओगोहाइ सत्यले।
मुख्या रोःरं
येसुये उरु पनि भ्या येःन ओडोव। नो स्यान्टै येःनराई याबारेलं सर्खिनके, ङालाई ऐटाव लागिज़्या, नोलो ओबारेलं सर्सिव कितापरं प्रिठीबी भरि पनि मासुनरं हो।
Wale Magar Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.