Wale Magar Kham
युहन्ना 19
येसुलाई क्रुसटं टाङ्गिने डन्ड आग्या
मत्ती २७:१५-३१; मर्कुस १५:६-२०; लुका २३:१३-२५
होकाम पिलातसये येसुलाई लाङडे कोर्राये पोःवो उपरिःङोरं। होसोनो सिफाइँराई ज़ुलाई गुठैडे मुकुट झैडे येसुलाई ओङैःटं यासजाव, होकाम येसुलाई निलल्याव रङ्गला क्वा याक्वायो, होकाम येसुलो ओछ्योकं राडे हैयाडोव, “जडं, यहुडीराई याराजा!” होकाम नोराई येसुलाई लपंटाये झाडे यायोव।
फरि पाखाडे पुलुडे पिलातसये नोरंलाई हैओडोवरं, “रःङच्यो, ङा आवलाई पाखाकं जे लेवकंज़ ङारैज़्या, जेलाई हैङाडाच्योज़्या, ङा आवलो ओगल्ति कडिज़ ङाम्डैये।” होकाम ज़ुलो पगरि सोनो निलल्याव रङ्गला क्वा क्वाइसिव येसु पाखाडे ओराव, होकाम पिलातसये नोरंलाई हैओडोवरं, “गरःङच्योके, आव मीलाई!”
मुख्या सेवा डोने मीरं सोनो चौकिडारराई येसुलाई यारोःङो, नोराई ऐवार्डे याकिःव, “नोलाई क्रुसटं टाङ्गि, नोलाई क्रुसटं टाङ्गि!”
पिलातसये नोरंलाई हैओडोवरं, “जेज़ आवलाई लाङडे क्रुसटं टाङगिच्यो, कडालेकं ङा आवलो कडि ओगल्ति ङामडैये!”
यहुडीराई नोलाई जबाफ यायोव, “गे टोबो गेन्याम ले, हो न्यामये ओवारो मान्टि आव सिवज़ परिये, कडावार्क आवये ओललाई परमेस्वरलो ओज़ा हैवार्ज़्या।”
आव रोः ठैडे पिलातस झनज़ बनै ओछेव। नो फरि ज़ीःमलं उपसिव होकाम येसुलाई ओपजोयो, “नङ काङा?”
येसुये नोलाई कडि जबाफज़ मायोवये। हैजैडे पिलातसये येसुलाई हैओडोव, “कडा नङ ङासं नम्पाङ? नङलाई राःने अडिकार ङाकुइटंज़ ले, होसोनो नङलाई क्रुसटं टाङ्गिने पनि ङाकुइटंज़ले वार्ने नङ नमसंनये?”
येसुये जबाफ ओयोव, “नङलाई रोटाम मायासिव टावसं ङातर्ट कडि नअडिकार टाने मालेव। हैजैडे ङालाई नकुइटं सुम्पिने मीरं अजं भ्या पापलो डोसि टारंये।”
होकाम पिलातसये येसुलाई राःने बनै कोसिस ओडोव। यहुडीरं ऐवार्डे याकिव, “नङ आव मीलाई नराःखे भने नङ कैसरलो ओनै माङ्कची। ङा के राजा ची वार्नेरं स्यान्टै कैसरलो उबिरोडलं टारंये।”
पिलातसये आव रोः ठैडे येसुलाई पाखाडे ओरोयो, होकाम नो “लुङलो पल्याटा” याडोज़्याव निया डोने पोलं उचुङो, नोलाई हिब्रुङाम गब्बठा डोरंये। नो बेला निस्तार पर्बलो तयार टाने डिन लेव। लाका ठोकै बारं बजिव लेव। पिलातसये यहुडीरंलाई हैओडोवरं, “जेराजालाई गरःङच्योके!”
नोरं ऐवार्डे याकिःव, “नोलाई सैः, नोलाई सैः, नोलाई क्रुसटं टाङ्गि!”
पिलातसये नोरंलाई ओपजोयोरं, “कडा ङा जेराजालाई क्रुसटं ङाटाङ्गि?”
मुख्या सेवा डोने मीराई जबाफ यायोव, “कैसरकाम उरु गेराजा माले।”
होकाम नोये येसुलाई क्रुसटं टाङ्गिने नोराई याकुइटं सुम्पिडे ओयोवरं।
येसु क्रुसटं
मत्ती २७:३२-४४; मर्कुस १५:२१-३२; लुका २३:२६-४३
हैजैडे सिफाइँराई येसुलाई जिम्मा यारोयो।
येसुये उक्रुस ओलज़ घुर्डे खप्परे वार्ने डान्डाटं ओनाव, (जोलाई हिब्रुङाम “गलगठा” डोरंये)। नटं नोराई येसुलाई क्रुसटं याटाङ्गिव होसोनो येसुसं उरु नेबऱ्याङनिलाई पनि याटाङ्गिव, टोबोलाई टफडे सोनो टोबोलाई छुटंडे, मान्झलं येसुलाई। पिलातसये टोबो डोस पत्र पनि ओसोरो, नो क्रुसटं टाङगिडे ओयोव। नटं एटाव सर्सिव लेव, “नासरतला येसु यहुडीराई याराजा।” आबो भ्या यहुडीराई नो यापरिव, कडालेकं येसु क्रुसटं टाङगिसिव पो सहरकाम नजिकंज़ लेव। आव हिब्रुङाम, ल्याटिनङाम सोनो ग्रीक पाङङाम सर्सिव लेव। यहुडीराई मुख्या सेवा डोने मीराई पिलातसलाई हैयाडोव, “‘यहुडीराई याराजा’ वार्ने माङ्क, ‘आवये ङा यहुडीराई याराजा ओवारो’ वार्डे सर।”
पिलातसये जबाफ ओयोवरं, “ङा जो ङासर्खे, ङासर्खे।”
होकाम सिफाइँराई येसुलाई क्रुसटं याटाङगिरं, होकाम नोराई येसुलो ओक्वा रैडे स्यान्टै सिफाइँरंलाई टभाग-टभाग टाने झैडे चार भाग याजोयो। येसुलो ओतर्टा ओक्वा पनि यालाङो, नो क्वा उसिउनि मालेव रोङाम मेङा समंज़ रःसिव लेव। हैजैडे नोराई या-याज़ हैयावारो, “आव माचीने, होकाम आव काङ्कालो टाने वार्डे गोला गेझाके।” चोखो सास्त्र पुरा गटाकं वार्डेज़ आव ओटाव।
“नोराई ङाक्वा या-याज़ याभारं,
होसोनो ओतर्टा क्वाटं गोला याझाव।”
हैजैडे सिफाइँराई आव येःन याडोव।
येसुलो उक्रुसलो ओछ्योकं येसुलो वामा, सोनो वामालो ओबैनी, क्लोपासलो ओज्या मरियम सोनो मरियम मग्डलिनीरं च्याङसिडे यालिज़्याव। येसुये वामालाई सोनो ओल मया ओडोज़्याव उसिसलाई ओछ्योकं च्याङसिडे निलिज़्याव ओरोःङोनि, होकाम येसुये वामालाई हैओडोव, “आमा, गरःङके नज़ालाई!”
होकाम नो उसिसलाई पनि येसुये हैओडोव, “रःङ, नामा!” नो बेलाकामज़ येसुलो नो उसिसये होलाई उज़ीःमकं ओलाङो।
येसु उसिव
मत्ती २७:४५-५६; मर्कुस १५:३३-४१; लुका २३:४4-४९
होकाम येसुये स्यान्टै रोः याखेम वार्ने सन्डे चोखो सास्त्र पुरा ओटाकं वार्डे ऐओवारो, “ङालाई रीः याछो।”
नकं टोबो जालं स्युरो सिर्का नैसिव लेव। होकाम स्युरोलं छिमसिव रुइलो टोबो भुटुने हिसपलो ओहाङ्गाटं झाडे नोराई येसुलो ओयाःकं यालाङड्योव। येसुये स्युरो सिर्का ओओँव, होकाम येसुये हैओवारो, “आबो याखेम,”
होकाम येसुये ओङैः उझुन्डोयो होकाम ओसं ओफ्याव।
येसुलो ओकोखालं भाला रुपिडे यायोव
नो छ्याम तयार टाने डिन सुक्रबार लेव। हैजैडे यहुडीराई यानाःसिने डिन छ्याम सिव मीराई याक्याङ क्रुसटं राःने चाव माटाये वार्डे पिलातसलाई बिन्ती याडोव, होसोनो नोराई याखङ केःड्यारंडे नोराई यामोरो लाङने वार्डे यानिःव। होकाम सिफाइँरं राडे येसुसं क्रुसटं टाङ्गिसिवनि नेखङ याकेःड्योवरं, ङाःडे टोबोलो, होकाम फरि छुटंलो। नोरं येसु लेवकं राडे नोराई यारोःङो, येसुलो ओसं ङाःडेज़ फ्याडे ओलेवये येसुलो ओखङ माकेःरये। सिफाइँरंकाम टोबोये येसुलो ओकोखालं भालाये ओघोचोयो, होपानाज़ झी सोनो ज़न्ज़ारी ओराव। जेलाई बिस्वास गटाकं वार्डे आव रःङनेये घटना जोस्यानाव ओटाव हैटावज़ गोहाइ पाङडेले, होकाम नोये ओपाङो सत्यज़ ले, होकाम सत्यज़ ङापाङज़्या वार्डे नोये सोनोये। “नोलो टोबो उरुज़ क्याःने माले” वार्ने सास्त्रटा बचन पुरा गटाकं वार्डे आव ओटारिव।1 होकाम फरि छुटं टोठोकं सास्त्रये हैवार्ये, “जोलाई नोराई घोचैडे नैरं, नोराई होलाई रःङने लेरं।”2
येसुलाई यागाडिव
मत्ती २७:५७-६१; मर्कुस १५:४२-४७; लुका २३:५०-५६
होकाम अरिमाठियाला योसेफ, जो यहुडी अगंवाराई याछ्यासैये गुप्तलंया मान्त्रा येसुलो उसिस लेव, नोये पिलातसलाई येसुलो ओक्याङ लाङो ङाडैकं वार्डे बिन्ती ओडोव। पिलातसये गलाङके वार्डे हैओडोव। होकाम नोये राडे येसुलो ओक्याङ ओलाङो। ङाःडे रिलं येसुलाई डैनाने निकोडेमस पनि योसेफसं ठोकै तेत्तिस किलोया मुर्र सोनो एलवालो उसिङटाम झैसिव चाव बसैने अत्तर बराईसिव मसला डाडे नकं ओराव। ऐजैडे नोनि येसुलो ओक्याङ यहुडीराई गाडिने याचलन मान्टि मङ-मङ बसैने मसलासं सुति क्वाटं नेपोव। येसु क्रुसटं ओटाङगिसिव पोलं टोबो बाङ लेव। नो बाङलं खर्कज़ काङ्कालाईज़ मानैसिव टोबो साःरौ खाडर लेव। कडावार्क यहुडीराई तयार टाने डिन लेव, होसोनो नो खाडर पनि नजिककंज़ लेव, होकाम नोराई येसुलाई नो खाडरलंज़ यानोयो।
Source notes (2)
- Cross-reference भजनरं ३४:२०
- Cross-reference जकरिया १२:१०
Wale Magar Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.