Skip to content
BibleKenya

Wale Magar Kham

युहन्ना 2

काना नाङखारला बेह्याँ

सोङलाका गालीलला काना नाङखारलं टोबो बेह्याँ लेव। येसुलो वामा पनि नलं लेव। येसु सोनो उसिसरंलाई पनि नो बेह्याँलं खुल्डे यानैज़्यावरं। अङ्गुरलो उरीः ओखेमो पाना येसुलो वामाये येसुलाई हैओडोव, “नोरासंके अङ्गुरलो उरीः माले।”

येसुये वामालाई हैओडोव, “ए आमा1, ङा कडि डाने ङालाई हैटाडाङ। ङाबेला अजं माराटा।”

येसुलो वामाये नौकररंलाई हैओडोवरं, “जे येसुये हैओवारो स्यानाव झैच्यो।”

होकाम यहुडीराई चोखैसिने याचलनलो लागिटं रीः गप्ने लुङलो छ गोटा मान्ठरं नैसिव लेवरं नलं ठोकै बीस तीस पाठी नाये। येसुये नोरंलाई हैओडोवरं, “मान्ठरं रीःये सब्यालच्यो।” नोराई मान्ठलो ओया समंज़ रीःये यासब्यालो। येसुये नोरंलाई हैओडोवर, “टिगिडा वाप्डे आव बिह्याँ भोजला मुख्या लेवकं गलाङच्योके।” नोराई नो यालाङो। बिह्याँ भोजला मुख्याये नो रीः ओडारो, नो के आबो अङ्गुरलो उरीः टाडे उलिज़्याव। नो काङाम ओराव नोलाई ठा मालेव, बुरु रीः गप्ने नौकररंलाई याज़ ठा लेव। होकाम भोजला मुख्याये डुलाहालाई खुल्डे हैओडोव, “स्यान्टै मीराई ङाःडे चाव अङ्गुरलो उरीः योरंये होकाम मीराई बनै याओँव पाना माडारो अङ्गुरलो उरीः योरंये। नङके चाव अङ्गुरलो उरीः आर्क समंज़ जोगैडे नैडेननै।”

येसुये ओडोव येःनरं मढ्येलाम आव गालीलला काना नाङखारला येसुलो पैलाला अचम्बला चिन्न लेव। ऐजैडे येसुये ओमहिमा ओसोटोनो, होकाम येसुलो उसिसराई येसुलाई बिस्वास याडोव।

येसु प्रार्ठना डोने ज़ीःमडे ओनाव

मत्ती २१:१२-१३; मर्कुस १1:१५-१७; लुका १९:४५-४६

होकाम येसु वामा, ओभाइरं सोनो उसिसरासं कफर्नहुमलं याझरिव, होकाम जामा डिन समं नलं यालेव।

यहुडीराई निस्तार यापर्ब राने नजिकज़ लेव होकाम येसु याडे यरुसलेमडे उपुलुव। येसुये प्रार्ठना डोने ज़ीःमलं मीराई यिःङ, भेडा, परिवा यायेज़्याव सोनो यालंःङज़्याव होसोनो पैसा याटोःज़्याव ओडैरिवरं। होकाम चीःङलो टोबो कोर्रा झैडे येसुये प्रार्ठना डोने ज़ीःमलाम नो स्यान्टैरंलाई, नोराई याभेडारं सोनो याःयिःङःरंलाई समं ओरोवरं, होसोनो पैसा टोनेराई यापैसा घोप्टैड्यारंडे नोराई याटेबल पल्टैडे ओयोवरं। परिवा येनेरंलाई येसुये हैओडोवरं, “आलाम आव स्यान्टै लाङच्यो। ङा ङाबाबुलो उज़ीःमलाई बैपारलो ज़ीःम टाझैच्यो।” येसुलो उसिसराई सास्त्रटा सर्सिव आव रोः याचेटोयो, “नज़ीःमला जोसये ङालाई सचाङनेले।”2

यहुडीराई येसुलाई हैयाडोव, “नङ आव येःन कडि अडिकारये नडोज़्याव प्रमानलो लागिटं गेलाई कडि चिन्न सटन्डे नयासि?”

येसुये नोरंलाई जबाफ ओयोवरं, “आव प्रार्ठना डोने ज़ीःमलाई गटैच्योके, होकाम ङा सोङलाका तयार झैनेङाले।”

होकाम यहुडीराई हैयावारो, “आव प्रार्ठना डोने ज़ीःमलाई झैने छेयालिस बर्स ओलागिव, होकाम नङ आवलाई सोङलाका तयार नझैडु डोरो?” जो प्रार्ठना डोने ज़ीःमलो ओबारेलं येसुये ओपाङो, हो येसुलो ओक्याङ लेव। येसु सिवलाम ज्युङडा ओटाव, होकाम येसुये हैओवारो आव रोः उसिसराई याचेटोयो, होकाम नोराई सास्त्र सोनो येसुये ओपाङो बचनटं बिस्वास याडोव।

मीरं खैटाव टारंये येसुये सोनोये

होकाम निस्तार पर्बला भोजलो बेलाकं येसु यरुसलेमलंज़ लेव, होकाम येसुये ओडोज़्याव चिन्नरं रःङडे भ्या मीराई येसुलो उमिन्ट बिस्वास याडोव। कडालेकं येसुये स्यान्टै मीरं खैटाव टारंये वार्डे सोनोये हैजैडे येसु नोराई याभर मापरिये। येसुलाई मीलो ओबारेलं काङ्कायेज़ पोयो परिने मालेव, कडालेकं मीलो उयुङलं कडि टाये, नो येसुये ओल्ज़ सोनोये।

Source notes (2)
  1. Footnote मान डाडे ओपाङो आखर
  2. Cross-reference भजनरं ६९:९

Wale Magar Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.