Wale Magar Kham
युहन्ना 10
ग्वालालो ओसात्रो
सत्य रोः, ङा जेलाई हैङाडाच्यो, “जो भेडा गोठोलं झला फैडे मापसिडे बार पाडे पसिये, नो चोर सोनो डाङ्कु ची, बुरु झला येमङाम गोठोलं पसिने के भेडा ग्वालाज़। गोठो गुनेये नोलाई झला फैड्योवये, होकाम भेडाराई नोलो ओगा ठैरंये, होसोनो नोये ओभेडारंलाई यामिन पान्डे खुलोरंये, होकाम नोरंलाई पाखाडे लाङोरंये। नोये स्यान्टै भेडारंलाई पाखाडे उपुलोयोरं पाना, नो भेडाराई याङा-याङा नाये, होकाम भेडारं नोलो उछिन-उछिन नारंये, कडालेकं भेडाराई नोलो ओगा सरेःरंये। बुरु यामसःरेव मीलो उछिन्ट भेडारं मानारंये, भेडारं नोलाई रःङडे ढोङने लेरं। कडालेकं मासरेसिव मीलो ओगा भेडाराई मासरेरंये।” येसुये नोरंलाई आव सात्रो झाडेओयोवरं, हैटानि पनि येसुये नोरंलाई हैओडोवरं रोः नोराई माबुझिरंये।
येसु चाव ग्वाला
हैजैडे येसुये नोरंलाई हैओडोवरं, “सत्य रोः, ङा जेलाई हैङाडाच्यो, भेडाराई याझलायेम ङाज़। ङा भन्डा ङाडे रावरं स्यान्टै चोर सोनो डाङ्कुरं ची, भेडाराई नोराई यारोः माठैरंये। झला ङाज़ ची, कोइ मी ङालेवङाम ज़ीःमलं यापसि भने नो बान्चिनेले, होकाम गोठोलं सोनो पाखाडे राने-नाने डानेले, होसोनो ज़्याव डैनेले। चोर के कुने, सैःने सोनो नास झैने मान्त्रायाज़ राये। ङा के नोराई जीबन गडैरंकं होकाम नो बनै भ्या गडैरंकं वार्डे ङाराव।”
ङा के चाव ग्वाला ची। चाव ग्वालाये ओभेडाराई यालागिटं उज्यु पनि झावये। भाराला नैसिव मी के भेडाराई याग्वाला माटाये। नो के ब्वाङसा ओराज़्याव रःङडे भेडारंलाई राःडे नो ढोङ्ये, होकाम ब्वाङसाये भेडारंलाई क्योःडे लाङोरंये, होसोनो भेडारं चित्राङ पुत्राङ जोयोरंये। नो ढोङ्ये कडालेकं नो के भाराला मी ची, नो भेडाराई कडि यावास्टाज़ माडोव। “ङा चाव ग्वाला ची, ङा ङाभेडारंलाई ङासरेरंये, होसोनो ङाभेडाराई ङालाई सरेसङरंये। कैजैडे बाबुये ङालाई सरेसोङो, ङा पनि बाबुलाई ङासरेये, होसोनो ङा भेडाराई यालागिटं ङाज्यु पनि ङाजा।” “ङा उरु ङाभेडारं पनि लेरं, नोरं आव गोठोलारं माङ्करं ची। नोरंलाई पनि ङा रोयो परिज़्यारं, होकाम नोरं टोबो बगालज़ टाने लेरं, होसोनो टोबो गोठोलाज़ टानेरं ले।
बाबुये ङालाई आव कारनये मया डाङोये, कडावार्क ङा ङापोहोन फरि सोवोल्डे रैने झैडे ङायोज़्या। काङ्काये पनि ङा लेवङाम ङापोहोन लाङो माढुव, बुरु ङा ङाइछ्याये ङापोहोन ङायो। ङापोहोन योने अडिकार ङासंज़ ले, होसोनो फरि सवोल्डे रैने अडिकार पनि ङासंज़ ले। आव ङा ङाबाबुङाम ङाडोयो आग्या ची।”
आव बचनलो ओकारनये यहुडीरं फरि यायुसिव। नोरं भ्याबिछोये ऐयावार्ज़्याव, “आवलाईके ज़्याः ची लागिडेले, होसोनो आव माल्ङग्याडे ची ले। जे आवलो ओरोः कडाने जेठैज़्याव?”
उरुराई हैयावार्ज़्याव, “ज़्याः लागिव मीलो ओरोः ऐटाव माटाये। होकाम भुतंये अन्डलाराई यामि फैडुव डोरो?”
येसुलाई याममानिव
यरुसलेमलं मन्डिर सुम्पिने पर्ब लेव। आव युङःडा बेलाकं लेव। येसु प्रार्ठना डोने ज़ीःम ज्युङलं सोलोमन याडोज़्याव मैराटं आडेहोडे ओबाज़्याव। यहुडीरं चारकोनाङाम डुप्सिडे येसुलाई याखार्ल झाडे यापजोयो, “खर्का समं नङ गेलाई डोमनलं ननैसि? नङ ख्रीस्टज़ टावसं गेलाई प्रस्टज़ हैडासि।”
येसुये नोरंलाई जबाफ याडे हैओडोवरं, “ङा जेलाई हैडाडे ङाखेम्च्योव ची, जे बिस्वासज़ जेमडाये। ङा बाबुलो उमिन्ट जो येःन ङाडोये, नो येःनयेज़ ङागोहाइ योवये। हैनि पनि जे बिस्वास जेमडाये, कडालेकं जे ङाभेडारं माङ्करं ची।” “ङाभेडाराई ङा गा ठैरंये, हैजैडे नोरंलाई ङा ङासरेरंये, होसोनो नोरं ङाछिन्ट रारंये। नोरंलाई ङा खर्कज़ मासिने जीबन ङायोरं, होकाम नोरं खर्कज़ नास टाने मालेरं, होसोनो नोरंलाई काङ्काये पनि ङाकुइटाम नानडे लाङने मालेरं। ङाबाबुये नो ङालाई याडेनैसोङो; होके स्यान्टैराई भन्डा घ्योव ची ले। बाबुलो उकुइटाम काङ्कायेज़ नानडे लाङने मालेरं। बाबुसं गिन टोबोनि ज़।”
यहुडीराई येसुलाई फरि लुङ टिडे झोम्ने यापानो। येसुये नोरंलाई हैओडोवरं, “ङा जेलाई ङाबाबु लेवङाम बनै भ्या चाव येःन डाडे सटन्डे ङायाच्योव, होकाम काव येःन जेमन मालागिडे ङालाई लुङये झोम्ने जेपान्सङज़्याव?”
यहुडीराई येसुलाई जबाफ यायोव, “चाव येःनलो ओलागिटं गे नङलाई लुङये गेमझोमसन, बुरु परमेस्वरलो उबिरोड नडोव कारनये, कडालेकं नङ मी टाडे पनि नङलाई परमेस्वर नजैज़्या।”
येसुये नोरंलाई जबाफ ओयोवरं, “कडा जेन्यामटं सर्सिव माले, ‘ङा हैङावारो, जे के डेवतारं ची?’ जोराई लेवकं परमेस्वरलो ओबचन ओराव, नोरं डेवता याटारं भने ढर्मसास्त्र झुठा माटाये, बाबुये चोखो झैडे प्रिठीबीलं उपरिःङो मीये ‘ङा परमेस्वरलो ओज़ा ची’ ओवार्क कैजैडे परमेस्वरलो उबिरोड ओटाव? होकाम ङा ङाडोज़्याव येःन ङाबाबुलो माटाखे भने ङालाई बिस्वास टाडाङ्च्यो। होसोनो ङा ङाबाबुलो ओयेःन ङाडोये हैटानि पनि जे ङालाई बिस्वास जेमडाङखे भने आव येःनरंलाई के बिस्वास डाच्यो, होकाम जे ठा सन्नेजेले होसोनो बुझिनेजेले, बाबु ङासं उलिज़्याव, सोनो ङा बाबुसं।”
नोराई फरि येसुलाई क्योःने यापानो, होकाम येसु नोराई याकुइटाम हाइसिडे ओनाव।
होकाम येसु फरि यर्डन भै होपंटं ओनाव, नटं युहन्नाये ङाडे बप्तिस्मा ओयोज़्यावरं, होकाम येसु नङंज़ ओलेव। बनै भ्या मीरं येसु लेवकं याराज़्याव, होकाम नोराई हैयावारो, “युहन्नाये कडि चिन्नरं माडोवये, हैनि पनि युहन्नाये आवलो ओबारेलं जो-जो हैओवारो नो सत्यज़ ओलेवलेव।” होकाम नलं भ्या मीराई येसुलाई बिस्वास याडोव।
Wale Magar Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.