Wale Magar Kham
युहन्ना 14
येसु बाबु लेवडे नाने येम
“जे जियुङ हरेस टासटेच्यो। जे परमेस्वरलाई बिस्वास जेडाये, ङालाई पनि बिस्वास डाङच्यो। ङाबाबुलो उज़ीःमङ मी लेने पो बनै भ्या ले। हैटाव भ्या पो ओम्लेखिन, ङा जेलाई हैङामडाच्यो हो, ङा जेलागिटं पो तयार झैने ङानारिज़्या। होकाम नाडे ङा जेलागिटं पो तयार ङाजोयोपाना ङा फरि रानेङाले, होकाम जेलाई ङासं लाङनेङाले, होसोनो ङा जोङ ङाले, जे पनि होङ लेनेजेले। जोङ ङा ङानारिज़्या, जे होङ नाने येम जेसनये।”
ठोमाये येसुलाई हैओडोव, “ए प्रभु, नङ कान्डे ननारिज़्याव, गे गेम्सन, होकाम गे कैजैडे येम गेटंकं?”
येसुये नोलाई हैओडोव, “सत्य, येम सोनो जीबन ङाज़ ची। काङ्का पनि उरु काङाम बाबु लेवकं माराडु। जे ङालाई जेसरेसङखिन्के, ङाबाबुलाई पनि सरेने जेलेव। आबोकाम के ङाबाबुलाई पनि जेसरे, होसोनो होलाई पनि रःङडेजेनै।”
फिलिपये येसुलाई हैओडोव, “ए प्रभु, गेलाई बाबु सटन्ड्यासि। आडङ ओटाखिन्के गेलाई टा।”
येसुये नोलाई हैओडोव, “फिलिप, भ्या डिन समं ङा जेसं ङालिज़्या, होटानि पनि नङ ङालाई नमसरेसङये? जोये ङालाई रःङडेनैसोङो, होये बाबुलाई पनि रःङडे नोयो। नङ कैजैडे हैनवार्ज़्याव, ‘गेलाई बाबु सटन्ड्यासि वार्डे?’ ङा बाबुसं ङाले होसोनो बाबु ङासं ले बाबु सोनो ङा टोबोज़ वार्डे नङ कडा बिस्वास नम्डो? जो रोः ङा जेलाई हैङाडाच्यो, नो ङाअडिकारये ङापाङज़्याव माङ्क बुरु ङासं बास डोज़्याव बाबुये ओयेःन डोवये। ङा बाबुसं ङाले, होसोनो बाबु ङासं ले वार्डे ङापाङो रोःटं बिस्वास डाङच्यो। है ओमटानि पनि आव ङा ङाडोव येःनरं रःङडे बिस्वास डाच्यो।”
“डस्साज़, ङा जेलाई हैङाडाच्यो, जोये ङालाई बिस्वास डाङो, होये ङाडोव येःन पनि डानेले, होसोनो नो भन्डा घ्योव येःन पनि डानेले, कडालेकं ङा बाबु लेवडे ङानारिज़्या। जे ङामिनङाम जोज़ जिनिःनि पनि ङा ङाडोव येःनटाम बाबुलो ओमहिमा गटाकं वार्डे ङा ओज़ाये नो डानेङाले। जे ङामिनङाम जो बस्त जिनिःनि पनि ङा नो डाड्यानेङाले।”
चोखो आत्मालो कबंल
जे ङालाई मया जेडाङखे भने ङाआग्यारं मानिनेजेले। होकाम ङा बाबुसं बिन्ती डानेङाले, होकाम बाबुये जेलाई गैने टोबो छुटंलाई परिःङनेले, होसोनो नो जेसं एकसप्ड्याज़ लेने ले। आव सत्यला आत्मा ची, जोलाई प्रिठीबीये ग्रहन माडोडुव, कडालेकं प्रिठीबीये नोलाई न रोःङो न सरेवये। जे नोलाई जेसरेये, कडालेकं नो जेसं बास डोवये, होसोनो नो जियुङलं बास डानेले।
“ङा जेलाई टुहुरा राःने ङाम्ले। ङा जे लेवकं रानेङाले। आबो जामाका प्रिठीबीये ङालाई रःङने माले, हैटानि पनि जे ङालाई रःङनेजेले। ङा ज्युङडा ङालेवये, जे पनि ज्युङडा लेनेजेले। नो छ्याम जे सन्नेजेले, ङा ङाबाबुसं, जे ङासं, होसोनो ङा जेसं ङालिज़्या गे टोबोरंज़।
ङालाई मया डाने नोज़ जोसं ङाआग्या लिज़्या होकाम नोये नो मानिवये। होसोनो ङालाई मया डानेलाई ङाबाबुये मया डोवये। ङा नोलाई मया डानेङाले, होसोनो ङा ङालाईज़ नो लेवकं सतन्नेङाले।”
यहुडा इस्करियोत के माङ्क छुटं यहुडाये येसुलाई हैओडोव, “प्रभु, नङ कैनवार्ज़्याव, नङ नङलाईज़ गेलेवटं नसंटन, होसोनो प्रिठीबीलाई के माङ्क?”
येसुये नोलाई जबाफ याडे हैओडोव, “जोये ङालाई मया डाङो, नोये ङाबचन पनि मानिनेले, होसोनो ङाबाबुये नोलाई मया डानेले, होकाम गे नो लेवकं राने गेले, होसोनो नोसं बासिनेगेले। ङालाई मया माडानेये ङाबचन पनि मामानिवये। जो बचन जे जेठैज़्या, नो ङाबचन माङ्क, नो ङालाई परिःङने ङाबाबुलो ची।”
“आव रोः ङा जेसं ङालिज़्याकंज़ ङा जेलाई हैङाडाच्यो। गैने चोखो आत्मा, जोलाई बाबुये ङामिनङाम परिःङनेले, नोये जेलाई स्यान्टै रोः पैनेले, होसोनो ङा जेलाई हैङाडाच्योव स्यान्टै रोः जेलाई सम्झैनेले।
सान्ति ङा जेसं ङाख्यानै। ङा ङासान्ति जेलाई ङायाच्यो। प्रिठीबीये ओयाच्योव स्याव ङा जेलाई ङामयाच्योव। जियुङ डुखि टाटाकं होसोनो टाछेच्यो।” “ङा आलाम ‘ङानारिज़्या, होकाम फरि जेलेवकं वोल्डे जेलेवकं रानेङाले’ वार्डे हैङावारो रोः के जे ठैडेज़ जेनै। जे ङालाई मया जेडाङो टावसं ङाबाबु लेवकं ङानारिज़्या ङावार्ज़्याव ठैडे जे जेरेङखे हो, कडालेकं बाबु ङा भन्डा घ्योव ले। आबो आव टाने भन्डा ङाडेज़ ङा जेलाई हैडाडे ङानैच्योव, जोकं आव टा जे बिस्वास डाच्यो। आबो ङा जेसं भ्या पाङने ङाम्ले, कडालेकं आव प्रिठीबीला सासंक रारिज़्या। ङालाई नोलो ओसक्तिये कैज़ माजैसङढुव। हैटानि पनि ङा बाबुलाई मया ङाडोये, बाबुये ङालाई जोस्याव अरैडे नैसोङो होस्याव ङाडो वार्डे प्रिठीबीये ओसोनोकं।
गच्याङसिच्योके गे आलाम गेनाके।”
Wale Magar Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.