शधाणूं

शधाणूं

पबित्र आत्मां पजैल़अ शधाणूं करै संसारै खुशीओ समाद

भेत

लिखणैं आल़अ: लूका

पहल़णैं आल़ै: होरी ज़ाती का आऐ दै विश्वासी

सन: 61

शधाणूंए काम कताबा दी आसा लूका लिखै दै खुशीए समादा का आजू हुई दी गल्‍ला खोज़ी दी। एतो खास मकसद आसा इहअ खोज़णअ कि ईशूए शुरूआती विश्वास करनै आल़ै च़ेल्‍लै पबित्र आत्में साबै हांढदी ईशूए बारै खुशीओ समाद “एरुशलेम, सारै यहूदा, सामरी अर पृथूई दी कई ज़ैगा तैणीं” 1:8 किहअ करै पजैल़अ। ईंयां आसा मसीही विश्वासे सारै दी पुजणें पूरी गल्‍ला ज़ेते शुरूआत पैहलै यहूदी मणछा मांझ़ै हुई अर बढदी-बढदी बणअ पूरै संसारे कई लोगो विश्वास। लिखणैं आल़अ डाहा ऐहा गल्‍लो बी धैन कि ऐहा कताबा पहल़णैं आल़ै इहअ बी निहंचअ होए कि मसीही विश्वास करनै आल़ै लोग नांईं तै रोमी राज़ा दी राज़े खलाफ द्रोही हणैं आल़ै लोग आथी अर मसीही विश्वास त यहूदी धर्मां पूरै करनै आल़अ।

शधाणूंए काम कताबा सका चिई बाखा बांडी, ज़ुंण मसीही विश्वासा हर बगत बझ़दै रहैऊआ ज़ेथ ईशू मसीहे खुशीए समादो प्रच़ार हुअ अर टोली बस्सी

1. ईशूए स्वर्गै डेऊणैं का बाद एरुशलेम नगरी मसीही समाज़े शुरूआत।

2. पलिश्ती देशे होरी मुल्खै खुशीए समादो पुजणअ।

3. पृथूईए बीच़ समुंदरे देशै एतो पुजणअ।

शधाणूंए कामें एक खास ज़रूरी गल्‍ल आसा अह कि पबित्र आत्मां किहै-किहै काम किऐ। सह होथा पिन्तेकुस्त धैल़ी एरुशलेम नगरी कठा हुऐ दै विश्वासी प्रैंदै बडी शगती संघै, अर ऐहा कताबा दी हुई-बिति दी गल्‍ले बारै लिखदी बारी खोज़ी विश्वासीए टोली अर सैणैं का खोज़ी शगती दैई तिन्‍नां का आजू डेऊणे बात। शधाणूंए कामां दी दैनी दै कई शिक्षा दी आसा शुरूआती मसीही समादो सार खोज़अ द अर एथ दी खोज़ी दी गल्‍ला करा विश्वासीए ज़िन्दगी दी अर टोलीए काम-काज़ा दी एऊ खुशीए समादे शगती प्रगट।

शधाणूं मांझ़ै ज़ुंण ईशू मसीहे बारै खुशीए समादा खोज़दअ सारै दी पुजअ, सह थिअ पल़सी। अह कताब खोज़ा ज़ादातर तेऊए बारै कि तेऊ किहअ पजैल़अ खुशीओ समाद, यहूदी छ़ाडी संसारे होरी ज़ाती सेटा। खिरी पजैल़अ तेऊ अह समाद रोम ज़ुंण तेऊ ज़मानै संसारे सोभी का मशूर अर खास नगरी थिई, लूका च़ाहा त ऐहा कताबा लिखणैं करै इहअ खोज़णअ कि मसीहे बारै खुशीए समादा सारै संसारै पुजणैं का निं एता कोह रोक्‍की सकदअ:

“तेखअ रहअ पल़सी पूरी दूई साला तैणीं आपणैं कराऊऐ दैई एकी घअरा दी। ज़ुंण तेऊ सेटा एछा तै, सह रहअ तिन्‍नां संघै मिलदअ लागी अर नधड़क परमेशरे राज़ो प्रच़ार करदअ लागी अर मसीहा ईशू प्रभूए गल्‍ला सखाऊंदअ लागी, तेऊ निं तेता लै कोहै रोक्‍कदअ आथी त।”

(28:30,31)

कताबे बांड

शाजत दैणा लै तैरी 1:1-26

(1) ईशूए खिरी दैनअ द हुकम अर करार 1:1-14

(2) यहूदो ज़ैगा दुजअ च़ेल्‍लअ 1:15-26

एरुशलेम नगरी शाजत 2:1—8:3

यहूदा अर सामरी दी शाजत 8:4—12:25

पल़सीए च़ाकरी 13:1—28:3

(1) पैहली प्रच़ार-हांढ 13:1—14:28

(2) एरुशलेम नगरी कठा हणअ 15:1-35

(3) दुजी प्रच़ार-हांढ 15:36—18:22

(4) चिऊथी प्रच़ार-हांढ 18:23—21:16

(5) एरुशलेम, कैसरिया अर रोम कैद खानै पल़सी 21:17—28:31